1 Tesalonikö‑dunyʋä 5 - GOD - u2

Kwlienyɔɔ' yiylʋʋ nä nyɩkpɔ 'nʋʋ ‑wʋ ‑yi

¹ Bhelie ‑yä bhɛŋwnɩänyɩ‑, ‑ɔ plöö‑ lä lioo ‑yä 'tänyɩɛ 'mnö Kwlienyɔɔ 'kä lä yii nä, aa' tään ‑lä nynä ‑mä ‑a jɩjla'anyɩ ‑lɔɔ' wälɩɩ' ‑za.

² A ‑yi sɔɔ anyɩ 'titi nynä ‑mä, Kwlienyɔɔ' yiylʋʋ nä, kä ʋʋ' panalɩɩ ‑kʋ lä nynä ‑n ‑näsä 'sabo, 'ghüghünyɔɔ vu lä ‑zɔɔ 'nɩ ɔ yi lä nyɩkpɔɔ' gbëë' nä.

³ 'Tänyɩɩ' 'ylʋzɔkʋnyʋä 'kä lä ci nynä ‑mä ‑a ‑wɔtɔ yɩ ‑pɛɛ 'kʋ 'nɩ plɛɛ' belio‑anyɩ yɩɔ 'mʋ nä, ‑lɔɔ' 'tänyɩɛ ‑bhlobhlo 'mnö nyɛnɩälɩɩ 'kwa lä ‑zɔɔ 'vu ‑yä ɩ 'kä yi ‑n ‑näsä gbadöŋnɔɔ 'mnöö vuo lä ‑zɔɔ nä. 'Nɩ waa' 'kʋʋ nyɩkpɔ 'nɩɩ ‑lä nëë' ‑bha.

⁴ ‑Mä, anyɩ 'cɔcɩɛ 'mnö bhɛŋwnɩa ‑yä bhelia nä, aa' ‑wʋ lä 'cucukpää' ‑kʋ nä, Kwlienyɔɔ' yiylʋʋ nö'anyɩ ‑lä ‑zɔɔ 'vu nynä 'ghüghünyɔ.

⁵ Anyɩ 'fɩɩn ‑glö zëlüü' 'yuë. A ‑glö zëlügää' nyɩkpa. ‑Ɛɛɛ, ‑anyɩ 'cɔcɩnyʋä nä, ‑aa ‑wʋ 'cucuu' nyɩkpa plöö‑ 'nɩ ‑aa ‑wʋ 'sɩɩ 'saboo nyɩkpa plöö‑.

⁶ Naa, ‑aa ŋɔɔ ‑lä ‑mä ‑a ‑ya gblɩmä ‑yä ‑a klä ‑a yëku ‑kpään.

⁷ ‑Wa ŋɔɔ lä nä, 'sabo wa ŋɔɔ lä. 'Nɩ ‑wa mnä lä gbʋʋsä nʋʋ nä, 'sabo wa mnʋʋ lä.

⁸ ‑Maa, ‑anyɩmɔɔ‑ plöö‑ ylä zëlüü' nyɩkpaa nä, a ‑ya klä ‑a yëku ‑kpään. Pɔlötɛtɛɛ ‑yä ‑wawʋʋ 'kplänö‑anyɩ nynä tëvë‑kotu. Ɩyä ‑anyɩa Laagɔɔ' dëtɛɛlɩɩ 'gbi‑anyɩ 'wlu nynä tëvë‑wugblë.

⁹ Laagɔ 'nö‑anyɩ ‑wʋ wlʋa‑ nynä ʋ 'ka‑anyɩ gbʋgblɛ yëku 'pää. Kʋ laa‑anyɩ ‑yä ‑anyɩa Kwlienyɔɔ Zozi Klisö, ‑a 'gɔ 'kʋ ghlää ‑yä ‑a 'gä ‑lɔɔ nëë' ‑bha.

¹⁰ ‑A yi zëkpëkʋ kʋ ‑o, ‑a yi bhɛ 'ku ‑o, kä Zozii kuu‑ ‑anyɩa ‑za ‑yä ɔ kä ‑yi nä, ‑a ‑yɔsɔ 'kä 'kʋ kʋʋ.

¹¹ Nä, bhelie ‑yä bhɛŋwnɩänyɩ‑, a 'ŋʋŋʋ 'tɛtɩɩ. Sa yä lä 'kʋ cie nä, a 'ŋʋʋ sɔɔ 'yikʋ ‑yä anyɩa' pɔlötɛtɛɛ 'kä ‑mɔɔ see.

Bhlüüdä ‑yä bhää‑wälɩ

¹² Bhelie ‑yä bhɛŋwnɩänyɩ‑, wälɩklë ‑bhlo ‑a 'ylänö'anyɩ lä nä, amää‑ plöö‑ lä nynä ‑mä, nyɩkpaa' ‑lʋa ‑wa ‑kʋ'anyɩ lä nëëdë 'nɩ wa nʋ lä ‑Laagɔ‑lebhee nä, 'nɩ ‑wa 'tienö'anyɩ 'nɩ ‑wa gblɩmänö'anyɩ lä nä, a 'ŋʋwa 'klʋkpää.

¹³ Lebhee wa nʋ'anyɩ lä nëëdë nä, a 'ŋʋwa 'klʋkpää kpänyɩ ɛɛ' ‑za, ɩyä a panʋwa anyɩa' ‑wawʋʋ. Ɩyä anyɩ ‑bhlobhlo pää' 'kʋ wɔtɔlɩ kʋ 'sɩɩ ‑mɔɔ.

¹⁴ Bhelie ‑yä bhɛŋwnɩänyɩ‑, wälɩklë ‑bhlo ‑a 'ylänö'anyɩ lä bʋkʋ nä, amää‑ plöö‑ lä nynä ‑mä, ‑wa nää lä ‑käpä ‑käpä nä, a fʋwa nëkʋ. ‑Lʋa plɛ 'kpɔsɔ lä nä, a gbä ‑yä wa 'ni 'tɛtɩ. ‑Wanö pɔlötɛtɛɛ ‑wʋ lä ‑mɔɔ ‑see nä, a yibhë waa' kläsä. A yibhë 'sɩɩ kpänyɩ plɛkʋ 'tɛmä sä.

¹⁵ A luë ‑kä ‑mä, ɩɩ' ‑kä 'kʋ ‑ŋwa nynä nyɩkpɔ 'titi ‑sä ɔ yëkuu' kpä. A nʋnʋ 'nää 'kɔɔkɔ ‑yä a nʋʋ 'sɩɩ nyɩkpaa 'fɩɩn 'nägägbɩ yëku.

¹⁶ A kään ‑jäkä 'kɔɔkɔ!

¹⁷ A bhibhie 'kɔɔkɔ!

¹⁸ Sɩ yi kʋmɔ ‑kʋmɔ ‑kaaa nä, a fään Laagɔ 'ŋnu. Anyɩmɔ ‑ɔ ‑yä Zozi Klisö 'sɔ 'jɛnyɩ‑ lä nä, 'sɔɔ Laagɔ tänönö'anyɩ lä 'mʋ.

¹⁹ Aa' ŋëmüë ‑lä Kplɔɔkplɔɔ‑wugɔɔ' ‑kosuu.

²⁰ Aa' ‑sä lä 'sɩɩ ‑lɔɔ 'plɔfɛtɩnyʋa' ciciwälɩɩ!

²¹ Sä wälɩ yi kʋmɔ ‑kʋmɔ ‑kaaa nä, a bɩä ‑yä sää‑ nää‑ lä nä, 'sɔɔ a la 'bhlü 'kʋ.

²² 'Klüü 'fɩɩn‑ ‑nyu lä nä, a ‑sɩɩ gwë!

²³ Laagɔɔ ‑ʋ plöö‑ lä 'kʋ wɔtɔlɩɩ' Laagɔɔ nä, ʋ yi ‑yä ʋmʋ 'titi kpɔlʋa'anyɩ wɩa. Ʋ gbä ‑yä Kwlienyɔ Zozi Klisö kä ‑yi nä, anyɩa' 'wugöö ‑yä anyɩa' kätö‑zizii ‑yä anyɩa' 'yɛkɛɛ, ɔɔ' kɩ ‑kä 'foclo 'mnö 'nii.

²⁴ ‑Lɔmɔ ‑ɔ laa'anyɩ lä nä, sä ɔ cii‑ lä kɔ nʋ sɔɔ nä, ɔmɔ 'titi yi gbä 'nɩ ‑nɩnɩ 'fɩɩn yi glää.

²⁵ Bhelie ‑yä bhɛŋwnɩänyɩ‑, a bhibhie 'sɩɩ ‑anyɩa ‑za.

²⁶ A bhään 'cɔcɩɩ' bhelia ‑yä bhɛŋwnɩa 'fɩɩn, ɩyä a gbënʋwa bheli ‑wawʋʋ 'mnö.

²⁷ N sla'anyɩ 'wlu Kwlienyɔɔ' 'ŋnöö 'mnö, bheeje, 'bɔɔgʋnʋ a zɛnönʋ 'cɔcɩnyʋa 'fɩɩn 'klʋ.

²⁸ ‑Anyɩa Kwlienyɔɔ Zozi Klisö, ɔɔ' 'nyupälɩɩ ŋënö'anyɩ 'kʋ anyɩ 'fɩɩn!

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan