1 Tesalonikö‑dunyʋä 4 - GOD - u2

Nʋnʋgbɩɩ Laagɔ ‑waa lä nä
( 1 Pɩɛ 1.14‑16 ; 4.1‑5 ; Efɛ 5.3‑8 ; 1 Kolɛ 6.13‑20 )

¹ Bhelie ‑yä bhɛŋwnɩänyɩ‑, 'klüü ‑ɩ ‑too ylä ‑mɔɔ 'nɩ ‑a 'ylänö'anyɩ ylä Kwlienyɔ Zozii' 'ŋnöö 'mnö nä, a ni ɩmɩ. Sa 'kä lä nämɔ ‑nämɔ ‑yä Laagɔ 'kä lä anyɩa' wälɩ wamä nä, ‑a cɩa'anyɩ sɔɔ. 'Nɩ a nää ylä 'zaazɩ sɔɔ nä, aa' ‑sä ‑lä ‑lɔɔ wlɩ ‑mä a 'ŋʋɩ 'tɛtɩɩ!

² 'Klüü ‑lɩɩ ‑a ‑sonö'anyɩ lä nynä ‑mä a nʋ Kwlienyɔ Zozii' 'ŋnöö 'mnö nä, a ‑yii 'zaazɩ.

³ Laagɔ ylä 'zaazɩ nynä ‑mä a kplɔɔ ‑yä a ‑taa wlu‑ylälɩɩ ‑yä ŋnʋ‑ylälɩɩ 'yi!

⁴ Ɩ ‑ŋwa 'kʋ nynä ‑mä anyɩa nëëdëë' nyɩkpɔ nyɩkpɔ yibhë ɔ yëkuu' 'yɛkɛɛ kläsä ‑yä ɔ ‑kʋ kplɔɔlɩɩ' ‑yä 'klʋkpää'.

⁵ ‑Waa ‑wʋ lä Laagɔ ‑yi nä, sä wa nämnö lä gbenyenyii 'mnö nä, sɔɔ' kla'anyɩ lä 'kʋ.

⁶ ‑A ‑sonö'anyɩ nynä ‑mä 'klünö nä, kä Laagɔ känɩ kpänyɩ 'kʋ. Anyɩa' nëëdë nyɩkpɔɔ' ghlü lä ‑yä ɔɔ' lü ‑lä 'sɩɩ ɔ ‑lie ‑amune! 'Klünö nä, ‑a ‑sonö'anyɩ nynä kä Laagɔ känɩ kpänyɩ 'kʋ nä, ‑a ‑jlü'anyɩ wɛzä 'nyukwli.

⁷ ‑Ɛɛɛ, Laagɔ nä, ʋ 'nö‑anyɩ ‑wʋ ‑sä nynä ‑a 'gä gbenyenyii' nämnö ‑mä kʋ ‑sanyɩ ‑yä ‑a 'gä kplɔɔlɩɩ 'mnö nämnö.

⁸ Nä, ‑anyɩa sä ‑a ŋʋʋ‑ lä sä nä, nyɩkpɔ kä sɔɔ 'klä paa‑ nä, 'yigäda‑nyɩkpɔɔ' ciciwälɩ ɔɔ' ‑wʋ 'klä paa ‑mä Laagɔɔ ‑ʋ nyɩ'anyɩ lä Kplɔɔkplɔɔ‑wugɔɔ nä, ʋmʋ ‑lɔɔ' nyɩkpɔɔ cɛɛ‑ lä.

⁹ A ni 'yi nä, ‑aa yɩɔ ‑kä 'nɩ ‑a 'ganyɩ bʋkʋ jɩjlä nynä 'cɔcɩɛ 'mnö bhɛŋwnɩä ‑yä bhelie wa wamä ‑wamä. Anyɩ 'titi Laagɔ ya'anyɩ wɛzä cɩa nynä a ‑kä 'nɩ a yi wamä ‑wamä.

¹⁰ 'Nɩ 'zaazɩ 'cɔcɩnyʋa 'fɩɩn‑ ‑kʋ lä Masedʋanö‑bhlɩɛ 'mnö nä, a ‑wʋa. Nä, aa' bhloo lä ‑lɔɔ.

¹¹ A tään 'kʋ wɔtɔlɩɩ' ɩyä a nʋ a yëku ‑gä. A 'bhlü anyɩa' wlɩɩ 'kʋ ‑yä a nʋnɩ lebhee'. 'Klünö 'mɩ ‑a 'ylänö'anyɩ lä.

¹² A kä sɔɔ nää nä, ‑waa ‑wʋ lä 'cɔcɩnyʋä plöö‑ nä, wa yi'anyɩ 'klʋkpää 'ŋʋ, 'nɩ ɩ yi 'sɩɩ gbä 'nɩ anyɩa' zëkpëa' ‑läyɩɔ nyɩkpɔ 'tënö.

Laagɔ yi gbä 'nɩ 'kudukuë yi 'kuëë glɔɔ

¹³ Bhelie ‑yä bhɛŋwnɩänyɩ‑, ‑aa ylä ‑wʋ nynä a kʋ plɛ ‑lëbë ‑lëbëë'. Ɩ ‑ŋwa 'kʋ nynä ‑mä 'kudukuaa' yëkuu' wälɩɩ, ‑nʋawlɛɛ‑ ‑kʋɩ lä 'mnö nä a yibhënɩɛ. Ɩyä ‑wa bhobho lä nynä ‑mä nyɩkpɔ kä kuu‑ nä, ɔ yä 'ku nä, aa' kä ‑kä wamä 'bhisäkʋ bhʋtʋ.

¹⁴ ‑A ‑känɩ plɛkʋ nynä ‑mä, Zozii kuu‑ 'nɩ ɔ ‑glɔɔ 'kuëë. ‑A ‑känɩ 'sɩɩ plɛkʋ nynä ‑mä, Zoziinɔ 'kʋ Laagɔ 'kä ghlää ‑yä 'cɔcɩnyʋa‑ yä bhlä 'ku nä, ʋ 'kwa 'kuëë ‑sä.

¹⁵ A ni wälɩklëë' laa Kwlienyɔ cii‑ lä 'nɩ ‑a yi'anyɩ lä 'sɩɩ soo nä. Kwlienyɔɔ lä ɔɔ' yiylʋʋ 'kʋ nä, ‑anyɩmɔ ɔ 'kä lä zëkpë 'kʋ ŋëë nä, 'kudukua, ‑a 'nʋwa ‑lä 'yikʋ 'tɔɔ 'nɩ ‑a ‑yɔsɔ 'kä mʋ.

¹⁶ Sɩ ‑kʋ lä naa, Kwlienyɔɔ 'titi yi ‑laagɔɔ' ‑bha 'nɩ ɔ yi kwli. ‑Mä 'fɩa ‑yä ɔ 'kä kwli nä, ‑Laagɔzuzu 'kädʋ yi wälɩ 'pä, 'nɩ Laagɔɔ' läglɛɛ yi gbä. Nä 'tänyɩ Kwlienyɔɔ bha ylä Laagɔduu' 'nɩ ɔ kwli ylä nä, ‑lɔɔ' tänyɩɛ ‑bhlobhlo 'mnö, nyɩkpaa' ‑lʋa ‑wa ŋoo‑ lä Klisö 'kʋ 'nɩ ‑wa yä bhlä 'ku nä, wa yi 'fɩa 'kuëë glɔɔ

¹⁷ 'nɩ ‑anyɩ ‑yäyänyʋa, ‑a ‑yʋwa 'sɔ yi 'jɛnyɩ 'nɩ ‑a yi ‑gblää. ‑A yi ‑mɔɔ ŋɔkʋ 'nyukpɔɔ 'mnö blüë 'nɩ ‑a yi Kwlienyɔɔ ‑blɔkʋ mʋ. 'Nɩ ‑a ‑yɔsɔ yi 'kʋ kʋʋ 'kɔɔ ‑yä 'kɔɔ ‑za.

¹⁸ Nä, a kä ‑lɔɔ ‑kʋ nä 'klünö, a 'bhlii 'kʋ ‑yä a 'ŋʋŋʋ plɛ 'mnö.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan