1 Tesalonikö‑dunyʋä 3 - GOD - u2

Wa ‑lobho Timotee Tesaloniköduu'

¹ Nä, ‑aa ‑lä bhɛ lä ‑bɛɛlɩ mii nä, n ‑yä Slivɛɛn 'sɔ, kä ‑a ŋʋʋ‑ yɩ nynä ‑mä ‑a yi Atɛnöduu' too

² 'nɩ ‑a yi ‑a bheli Timotee anyɩ yëku lobho. Timotee nä, kɔ ‑yä Laagɔ 'sɔ 'jɛnyɩ lä ‑yä ɔ 'kä Klisöö' 'Nägädöö bie. Nä, ka ‑a ‑lobhuo lä ‑yä ɔ 'kä gbä anyɩa' pɔlötɛtɛɛ 'kä ‑mɔɔ see ‑yä ɛ 'kä 'tɛtɩ kään

³ ɩyä nyäkälɩɩ ‑a ni lä nä, ɩɩ' ka'anyɩ ‑kä plɛ 'kpɔsʋä. Anyɩ 'titi ‑a ‑yi sɔɔ nynä ‑mä ‑nɩnɩ 'fɩɩn nä, sä Laagɔ ‑waa lä nynä ‑mä ɩ 'plö 'kʋ ‑anyɩa' ‑za nä, sɔɔ ɩ plö lä 'kʋ.

⁴ 'Nɩ 'tänyɩɩ ‑a ‑kʋ'anyɩ bhlä ‑lätee yëku nä, ‑a gblɩmänö'anyɩ. ‑A ‑sonö'anyɩ bhä nynä ‑mä 'kwlɩ yi‑anyɩ bhä kpänyɩ bhɩä. 'Nɩ sä ‑a cii‑ bhlä nä, a ‑yi sɔɔ nynä ‑mä sɔɔ ɩ plö lä 'kʋ.

⁵ Ɩ ‑kä yɩ 'ŋnö nä, sä nn' ‑lä bhɛlä ‑bɛɛlɩ mii nä, kä n ‑lobho Timotee nynä ɔ yi'anyɩ 'yi 'ni kää ‑yä, n 'kä anyɩa' pɔlötɛtɛɛ' yëkuu' 'dö 'numʋ. Wälɩklë ‑bhlo n ‑guu bhlä 'kʋ nä, amää‑ plöö‑ nynä ‑mä, 'Dëvloo' ka'anyɩ ‑kä ‑zɔɔpälɩ 'nyɛ ‑yä, lebhe 'fɩɩn ‑a ‑nʋ lä nä, ɛɛ' kä ‑kä 'nyuu bhlüü.

Timotee ‑sää Tesaloniköduu' 'cɔcɩnyʋaa' 'nägädö

⁶ Timotee ‑bha'anyɩ lä yëku 'nɩ ɔ ‑ŋënö‑anyɩ ylä ‑mää nä, ɔ ‑sänö‑anyɩ anyɩa' yëkuu' 'nägädö. Anyɩa' ‑wawʋʋ ‑yä anyɩa' pɔlɔtɛtɛ, ɔ ‑sänö‑anyɩ ɩ yëkuu' 'dö. Ɔ ‑sonö‑anyɩ nynä ‑mä, a luë 'kɔɔkɔ ‑anyɩa dä 'kʋ. Sä ‑a tään lä nynä ‑mä ‑a 'ganyɩ 'yi 'ni 'kää yi nä, sɔɔ anyɩ ‑mä 'sɩɩ a tään lä nynä a 'ka‑anyɩ 'yi 'ni.

⁷ Nä bhelie ‑yä bhɛŋwnɩänyɩ‑, ‑a ‑kʋ 'flɛ plɛɛ' beliolɩɩ' ‑yä 'kwlɩkabhɩa 'mnö, ‑mä a ‑kä lä pɔlötɛtɛ nä, ‑anyɩ, kɩ ŋʋ‑anyɩ 'tɛtɩɩ.

⁸ ‑Pɛpɛɛ nä, sä a ‑yä Kwlienyɔ 'sɔ 'jɛnyɩ‑ lä anyɩa' pɔlötɛtɛɛ 'mnö nä, sɔ gbä yɩ 'nɩ ‑a ‑kʋmʋ yɩ bʋkʋ.

⁹ ‑Lɔɔ' ‑jäkaa 'fɩɩn a ŋʋ‑anyɩ lä pleyii nä, ‑aa 'ni ‑wʋ sä ‑a yi lä Laagɔ bhään aa' ‑za nä.

¹⁰ ‑Gägäzëlü ‑yä 'sabo, sɔɔ ‑a bhibhie lä 'kɔɔkɔ Kwlienyɔ nynä ɔ 'nyɩ‑anyɩ 'casɩ ‑yä ‑a 'ganyɩ bʋkʋ 'yi 'ni 'kää yi, ‑yä sä anyɩa' pɔlötɛtɛɛ ‑ŋwa lä 'kʋ 'nɩ ɛɛ' ‑lätee lä nii‑ nä, ɛ 'kä sɔɔ 'ni.

¹¹ Laagɔ 'titi ‑ʋ plöö‑ lä ‑a 'Bä nä, ʋ ‑yä Zozi Klisö ‑anyɩa Kwlienyɔɔ, wa känö‑anyɩ ‑blɔ 'klʋ ‑yä ‑a 'ganyɩ 'yi 'ni kää yi.

¹² ‑Wawʋʋ' a ‑kä lä anyɩ ‑bhlobhlo pää', 'nɩ a ‑kä lä 'sɩɩ nyɩkpa 'fɩɩn ‑za nä, Kwlienyɔ Zozii gbä ‑yä ʋ zumë. Ʋ zumë nynä ‑wawʋʋ' ‑a ‑kä lä anyɩa' ‑za nä.

¹³ Ɔ gbä ‑yä kplɔɔlɩɩ 'mnö, anyɩa' pɔlöö see sä 'nägäsä. Ɩyä 'tänyɩɩ ɔ ‑yä ɔɔ' kplɔɔkplɔɔnyʋa 'fɩɩn 'kä lä yi nä, wälɩklëë' kä‑anyɩ ‑kä gbʋ klaa ‑a 'Bä Laagɔ dëlüü. [Ɩ kʋ sɔɔ.]

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan