1 Tesalonikö‑dunyʋä 2 - GOD - u2

Pɔlʋ ‑nʋ Tesaloniköduu' ‑Laagɔ‑lebhe
( Nʋnʋ 20.18‑21 , 31‑35 ; 2 Kolɛ 6.3‑10 ; 12.12‑15 )

¹ Bhelie ‑yä bhɛŋwnɩänyɩ‑, anyɩ 'titi a ‑yi sɔɔ nynä ‑mä ‑a nö'anyɩ ‑wʋ 'flɛ sää yëku ‑yi.

² A ‑yi 'sɩɩ sɔɔ nynä ‑mä, 'kwlɩ ‑bhɩänö‑anyɩ 'fɩa Filipʋduu. Wa 'bhɩsɩ‑anyɩ 'nɩ wa ŋʋ‑anyɩ nyäkälɩɩ'. Mä ɩ ‑kʋ sɔɔ 'nɩ Laagɔ nyɩ‑anyɩ 'tɛtɩ 'nɩ ‑a yi'anyɩ lä ʋʋ' 'Nägädöö ‑lä.

³ Nä 'dönö ‑a ‑sänö'anyɩ lä nä, ɩɩ' ‑wʋ 'foclo 'mnö ‑kʋ. Ɩɩ' ‑wʋ gbenyenyi 'kʋ gëë‑. 'Nɩ ɩɩ' ‑wʋ 'sɩɩ ‑kpläkplä 'mnö 'kʋ.

⁴ Sä Laagɔ ‑waa bhlä nynä ‑a cii nä, sɔɔ ‑a cii‑ lä. Kä Laagɔ 'tɛnö‑anyɩ dë, ɩɩ' ‑zä ʋʋ' 'Nägädönö' bielɩɩ' tëbhuu ʋ nyɩ‑anyɩmʋ lä. Nä, ‑a gä cɩadä ‑kʋ nä, ‑aa tään ‑wʋ nynä ‑mä nyɩkpa 'ka‑anyɩ wamä, ‑mä Laagɔ, ʋmʋ mʋʋ‑ ni lä ‑anyɩa pleyii 'yi nä, ʋ 'ka‑anyɩ ‑kpacɛ klä nä, ɩmɩ ‑a tään.

⁵ A ‑yi sɔɔ nynä ‑mä ‑a ‑yä nügämɛtʋ 'sɔ ‑wʋ ‑yi ‑yä ‑a 'gä nyɩkpa 'nyigë, ‑yä ‑a 'gä monii tään. Laagɔ 'titi ‑yi sɔɔ.

⁶ ‑Aa tään ‑wʋ nynä ‑mä nyɩkpa kla‑anyɩ ‑kpacɛ. Anyɩ ‑o, 'yigäda‑nyɩkpa ‑o, ‑aa tään ‑wʋ nynä nyɩkpɔ kla‑anyɩ ‑kpacɛ.

⁷ ‑A yi bhä mii 'nɩ sä ‑a plöö‑ lä Klisöö' lobho lobhonyʋä nä, ‑a yi'anyɩ bhä kutu kutu klä, ‑mä ‑aa ‑wʋ sɔɔ ‑nʋ. Kä ‑a bhlüü‑ plɛkʋmɛnɔ 'kʋ. Sä 'yuë, wa ‑nɔɔ loluwa lä nä,

⁸ sɔɔ ‑säkä ‑säkä ‑a ‑kla'anyɩ lä. Sä ‑a ‑waa'anyɩ lä kpänyɩ nä, ‑a ‑ghlɩlɩ a 'kɔɔkɔ, 'nɩ ‑a ‑sä bhä ‑a yëku sää 'titi ‑anyɩa' ‑za nynä a 'kä Laagɔɔ' 'Nägädöö 'nu. A känö‑anyɩ bhä kpänyɩ gbʋ.

⁹ Bhelie ‑yä bhɛŋwnɩänyɩ‑, 'kwlɩkabhɩa' ‑laa ‑a nii‑ lä nä, n ‑yi sɔɔ nynä ‑mä a luë aa' dä. ‑A ‑nʋ lebhe ‑gägä‑zëlü ‑yä 'sabo ‑yä ‑aa kä ‑kä nyɩkpɔ lʋʋ 'ylää, 'nɩ ‑a yi'anyɩ lä Laagɔɔ' 'Nägädöö ‑sää.

¹⁰ A plöö‑ ‑nɩnɩ 'fɩɩn ‑dläfʋɛ‑lünyʋä. 'Nɩ Laagɔ 'titi yi 'sɩɩ ‑lɔɔ' ‑dläfʋɛɛ lü nynä ‑mä sä ‑a nää‑ lä 'cɔcɩnyʋa nëëdë nä, kä sɔɔ ‑kplɔɔ wɩa. Kä sɔɔ gëë‑ 'yii wɩa nä, nyɩkpɔ 'nö‑anyɩ ‑lä wälɩklë yëku fä.

¹¹ A ‑yi 'sɩɩ sɔɔ nynä ‑mä, sä 'bä klä lä ɔɔ' 'yuë nä, sɔɔ ‑a ‑kla'anyɩ lä.

¹² ‑A ŋʋʋ'anyɩ 'tɛtɩɩ 'nɩ ‑a ‑bhluë'anyɩ plɛɛ', 'nɩ ‑a ‑jlü'anyɩ 'nyukwli nynä sä Laagɔ ylä lä nä a nää sɔɔ. Laagɔ‑ laa'anyɩ lä ʋʋ' 'Leyiduu 'mnö ‑yä a 'kʋʋ 'klʋagba 'mnö kʋmʋ.

Tesaloniköduu' 'cɔcɩnyʋa 'kwlɩ ‑bhɩänʋwa Laagɔwälɩɩ' ‑za

¹³ ‑Nɩnɩ 'fɩɩn ‑kä 'ŋnö 'nɩ 'tänyɩɩ 'fɩɩn 'mnö, ‑a fään Laagɔ 'ŋnu. 'Tänyɩɩ' ‑a ‑sänö'anyɩ lä Laagɔɔ' 'Nägädöö nä, a 'nɩɩ ‑wʋ ‑klä nynä nyɩkpɔɔ' nëë' ‑bhawälɩ ‑mä, sɩ ‑kʋ lä 'zaazɩ nä sɔɔ a ‑klɩɩ. A ‑klɩɩ lä nynä Laagɔwälɩ nä, ɩmɩɩ‑ nʋ'anyɩ lä 'yɛkɛɛ lebhe.

¹⁴ ‑Ɛɛɛ, bhelie ‑yä bhɛŋwnɩänyɩ‑, 'klüü‑ ‑ŋëë lä Zudee' 'cɔcɩnyʋa nä, ɩɩ' ‑säkä ‑säkä ‑ŋënö'anyɩ lä. Sä 'kwlɩ ‑bhɩänʋwa lä 'Zufʋnyʋa 'wlɩɩ nä, sɔɔ ‑säkä ‑säkä 'kwlɩ ya'anyɩ lä kpänyɩ abhunyʋä 'wlɩɩ bhɩä.

¹⁵ 'Zufʋnyʋa nä, wa bhlää‑ Kwlienyɔ Zozii, 'nɩ wa bhlää‑ 'sɩɩ 'plɔfɛtɩnyʋa, 'nɩ ‑anyɩ ‑mä 'sɩɩ wa ŋʋʋ‑anyɩ nyäkälɩ 'kädɩɩ' nä, Laagɔɔ' ‑wʋ waa' wälɩ ‑waa. 'Nɩ wa plöö‑ 'sɩɩ nyɩkpaa 'fɩɩn ‑zɔbhlɛgbänyʋä.

¹⁶ Waa' 'ylää ‑wʋ nynä ‑mä, ‑a ‑sää 'yigädabhlɩ 'kʋʋ nyɩkpa Laagɔɔ' 'Nägädöö ‑yä ɩ 'kwa ‑lɔɔ nëë' ‑sä. Wa nʋ lä sɔɔ 'kɔɔkɔ nä, wa yëkuu' nyenyi‑ wa zumë lä. ‑Mä bhɩäda 'mää‑ plöö‑ ylä nynä ‑mä Laagɔɔ' gbʋgblɛɛ yʋwa 'kʋ ŋëë.

Pɔlʋ tää nynä ɔ 'kä Tesaloniköduu' 'cɔcɩnyʋa 'yi 'ni kää mʋ

¹⁷ Bhelie ‑yä bhɛŋwnɩänyɩ‑, ‑a ‑yanyɩ 'sɔ ‑bha ‑bha 'flɛ yëkuu' ‑mä, ‑ɛɛ ‑wʋ 'kɔɔkɔɔ' ‑za. Anyɩa' 'tʋ bhlä‑anyɩ lä kpänyɩ nä, ɩ ‑kä 'ŋnö 'nɩ ‑a tään sää 'titi nynä ‑mä ‑a 'ganyɩ 'yi 'ni kää yi.

¹⁸ Kä ‑a ‑tään lä nynä ‑a 'ganyɩ 'yi 'ni kää yi. 'Nɩ ‑amʋ Pɔlʋ 'titi, n ylaa‑ 'sɩɩ 'ci bhutukpä, ‑mä 'Dëvloo' ‑wʋ ŋoo‑.

¹⁹ ‑Anyɩa Kwlienyɔɔ' yiylʋʋ 'kʋ nä, lʋʋ ‑sä ‑a yi bhä dë 'tɛɛ? Lʋʋ ‑sä yi bhä ‑anyɩa ‑jäkä nʋʋ? Lʋʋ ‑sa yi bhä ‑anyɩa 'kʋzilɩɩ' ‑ajɛɛkpä 'plöö? Anyɩ 'cɔcɩnyʋa lä.

²⁰ ‑Ɛɛɛ! Anyɩ‑ ‑a 'gä lä mʋ täkpɔɔ. 'Nɩ anyɩ‑ 'plö lä 'sɩɩ ‑anyɩa ‑jäkä.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan