1 Tesalonikö‑dunyʋä 1 - GOD - u2

Bhäälɩ

¹ Anyɩ Tesaloniköduu' 'cɔcɩnyʋa, anyɩmɔɔ‑ ‑kʋ lä ‑a 'Bä Laagɔ ‑yä Kwlienyɔ Zozi Klisö wlɩɩ' nä, ‑amʋ Pɔlʋ, n ‑yä Slivɛɛn ‑yä Timotee, ‑anyɩ‑ jɩjlä'anyɩ lä 'bɔɔgʋnʋ. 'Nyupälɩ ŋënö'anyɩ 'kʋ ‑yä a 'ni 'sɩɩ 'kʋ wɔtɔlɩ!

Pɔlʋ bhää Laagɔ Tesaloniköduu' 'cɔcɩnyʋaa' ‑za
( Fili 1.3‑6 ; Kolɔ 1.3‑8 )

² ‑Anyɩa bhibhie 'mnö nä, kä ‑a bhään 'kɔɔkɔ Laagɔ anyɩ 'fɩɩn ‑za. ‑A gä bhibhiedä ‑kʋ nä, ‑a luë 'kɔɔkɔ anyɩa dä 'kʋ.

³ ‑Ɛɛɛ, anyɩa' pɔlötɛtɛɛ' sɛ ‑kä lä 'tɛtɩ nä, 'nɩ anyɩa' ‑wawʋʋ' lebhee ʋ ‑nʋ lä nä, ɩyä sa a ‑kään lä kpänyɩ ‑anyɩa Kwlienyɔɔ Zozi Klisö plɛkʋ nä, ɩ gbä 'nɩ ‑a luë 'kɔɔkɔ anyɩa' dä.

⁴ Bhelie ‑yä bhɛŋwnɩänyɩ‑, ‑a ‑yi 'sɔɔ nynä ‑mä kä Laagɔ ‑wamänö'anyɩ. Ɩmɩɩ‑ ‑kä lä 'ŋnö 'nɩ ʋ ‑sa'anyɩ lä ‑yä a 'kä ʋʋ lʋä 'plö.

⁵ ‑Mä a ni 'yi naa, Kwlienyɔɔ' 'Nägädöö ‑a ‑sänö'anyɩ lä nä, ‑a 'nɩɩ ‑wʋ ‑sää nynä 'flɛɛ nüdö ‑mä, kɩ ‑yä 'päwä 'sɔ nää‑. Kplɔɔkplɔɔ‑wugɔɔ ‑gbä 'nɩ ‑a ‑känɩ plɛkʋ 'nɩ ‑a ‑sänö'anyɩmɩ lä. ‑A ‑kʋ'anyɩ bhlä nëëdë nä, ɩɩ' sä ‑a klä bhlä ‑a yëku anyɩa' ‑za nä, a ‑yi sɔɔ.

⁶ 'Nɩ ‑anyɩa nʋnʋsaa, a ‑yi 'nɩ a 'bhlüü‑ sɔɔ 'sëploo 'kʋ. 'Nɩ a 'bhlüü‑ 'sɩɩ Kwlienyɔɔ 'sëploo' 'kʋ. A ‑kʋ bhɛ 'flɛ nyäkälɩɩ' oo, ‑maa, Kplɔɔkplɔɔ‑wugɔɔ ‑gbä 'nɩ Kwlienyɔɔ' 'Nägädöö a 'bhlünɩ‑ ‑pʋpɛɛ' 'kʋ.

⁷ Ɩ ‑gbä yɩ 'nɩ Masedʋanö‑bhlɩɛ, ɩyä Akayii‑bhlɩɛ 'mnöö' 'cɔcɩnyʋa, wa 'bhlünö'anyɩ yɩ 'sɩɩ 'sëploo' 'kʋ.

⁸ A ni 'yi naa, Kwlienyɔɔ' 'Nägädöö anyɩ 'kʋ ɩ ‑ghlää lä 'fɩa, 'nɩ ɩ yi lä Masedʋanöbhlɩ 'kʋ ‑yä Akayiibhlɩ 'kʋ ŋëë. 'Nɩ dää 'fɩɩn, nyɩkpa yä sɔɔ yibhë nynä anyɩ Tesaloniköduu' 'cɔcɩnyʋa nä, ka ‑kä Laagɔɔ' pɔlötɛtɛ. Nä, ‑aa yɩɔ ‑kä 'nɩ ‑a 'gä ‑lɔɔ' 'klüü bɩɩ' bhlü.

⁹ Sä a ‑klanyɩ lä, 'nɩ a ‑yi lä 'sɩɩ 'nɩ a ‑tlaa lä Laagɔ wlɩ nä, ɩɩ' ‑lɔɔ' 'döö, nyɩkpa sänɩ. Wlä suyu‑laagwɩɩ, a yɩ gwë ‑sä. 'Nɩ Laagɔɔ, ‑ʋ plöö‑ lä ‑Yäyä ‑Laagɔɔ, 'nɩ ‑ʋ plöö‑ lä Laagɔɔ 'titi nä, a yʋ 'klʋ tlaa.

¹⁰ 'Nɩ a ‑yi 'sɩɩ 'nɩ a ‑bɛɛ yɩ Laagɔ ‑Yowlii' kwli‑tänyɩɛ. Laagɔ ‑Yowlio nä, ɔmɔɔ‑ plöö‑ lä Zozii. Ɔmɔ Laagɔ ‑gälɩä lä 'küëë! Zoziinɔ, Laagɔɔ' gbʋgblɛɛ' ylʋʋ ‑ʋ yi lä 'nɩ ‑ʋ yä lä 'mɛmɛ nä, ɔmɔɔ‑ yi‑anyɩmʋ lä nëë' ‑sä.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan