Bìoball air-loidhne

1 Pɩɛlö 3 - GOD - u2

Ŋwadi ‑yä 'ŋnɔ sɔɔ 'kʋ kʋʋlɩ
( 1 Timo 2.9‑15 ; Efɛ 5.22‑33 )

¹ 'Nɩ, anyɩ 'ŋwnɩa ‑mä 'sɩɩ, a 'ŋʋ kpänyɩ a ‑nyëtie 'klʋkpää. Ŋwadii' ‑nɔnɔ ‑kʋ ‑lɔɔ 'nɩ ɔɔ' ‑wʋ Laagɔwälɩɩ' pɔlötɛtɛ ‑kä. ‑Mä, 'ŋnɔɔ kä 'nägägbɩ nʋ 'nɩ ɔ ‑nyoto kä ɔɔ' nʋnʋgbɩɩ 'yi 'ni nä, ‑lɔɔ nyɩkpɔɔ nä, ɔ 'ŋnɔɔ 'pänöɔ yɩɔ 'tɔgɩsɩ 'nɩ ɔmɔ 'titi yi Laagɔɔ' ‑blɔɔ 'kʋ.

² Nä, anyɩa' nää nääsaa' kplɔɔlɩɩ ɩyä anyɩa' 'klʋkpaa, wa yi sa ‑kplɔɔ lä nä 'yi 'ni.

³ Aa' tään lä nynä ‑mä a 'kä anyɩa' 'yɛkɛɛ nanɔɔ pana ‑yä a 'kä gbʋnɔɔ' nyɩɩwli bhlä ‑yä a 'kä ‑sika ylo, ‑yä a 'kä 'mʋ plä ‑cʋ ‑yä nyɩkpa 'kanyɩ 'yikʋ 'ŋʋʋ.

⁴ Anyɩa' pleyii, ‑mɔɔ anyɩa' nanɔ lä kʋ. A namä plɛkʋ ‑yä a kään pɔlöwätɛ. Nänɔ‑cënä, amää‑ kʋ lä 'kɔɔkɔ. Ʋmʋʋ‑ ‑kä lä kpänyɩ gbaa Laagɔ dëlü.

⁵ ‑Mɔɔ ‑gɔgɔbhlää' 'ŋwnɩa ‑wa ‑kä bhlä pɔlötɛtɛɛ 'nɩ ‑wa 'tɛɛ‑ bhlä Laagɔ dë nä, ‑lɔɔ' nanɔɔ 'mʋ wa nää‑ bhlä. Kä wa ŋʋ bhä kpänyɩ wa ‑nyetie 'klʋkpää'.

⁶ Ablaamʋ 'ŋnɔ Salaa' nʋnʋgbɩɩ a 'bhlünɩ 'sëploo' 'kʋ. Salaa nä, ɔ ‑nyoto Ablaamʋ 'mɔ ɔ laa bhä ɔɔ' käänyɔ! ‑Pɛpɛɛ nä, wälɩklë ‑bhlo 'coo ‑ŋänö nö'anyɩ 'bhlä 'nɩ a kä 'zaazɩ 'nägägbɩ nʋ nä, a ‑glö yɩ ɔɔ' 'yuŋnʋgbɛnyʋä.

⁷ Anyɩ ŋwadië ‑mä 'sɩɩ, anyɩmɔɔ‑ nöö‑ lä 'ŋwnɩä nä, a wloo a 'ŋwnɩä 'kʋ 'nägäsä. A yibhë sɔɔ nynä ‑mä 'ŋnɔ nä, kä Laagɔ ‑nʋɔ lä ɔɔ' sä nä, ɔɔ' ‑wʋ 'tɛtɩ ‑kä ŋwadi 'bhisäkʋ. A 'ŋʋwa 'klʋkpää' ‑mä 'pʋpʋɛ ‑lɛɛ Laagɔ 'kä lä ŋwadi 'nyɛ nä, ɛɛ' ‑säkä ‑säkä ʋ 'kä lä 'sɩɩ 'ŋnɔ 'nyɛ. A kä sɔɔ nʋ nä, anyɩa' bhibhie lʋʋ' 'nɩɛ ‑lä ‑blɔkʋ sɩɔ.

A nʋ 'nägägbɩ
( Wlɔmʋ 12.14‑21 ; Matie 10.24‑31 )

⁸ ‑Nɩnɩ 'fɩɩn ɩɩ' bhlüüda 'mää‑ plöö‑ lä nynä ‑mä, a kään bhobhowluu ‑bhlo ‑yä a kään ŋäzöplɛ ‑yä a wamä ‑wamä bhelie ‑yä bhɛŋwnɩä 'bhisäkʋ. A namää plɛkʋ ‑yä a 'nä täkpɔ ‑lä.

⁹ Nyɩkpɔ ka'anyɩ nyenyi ‑nʋ nä, aa' ‑sä ‑lä anyɩa' kpä. Nyɩkpɔ ka'anyɩ 'bhɩsɛ‑ nä, aa' 'bhɩsɩɔ ‑lä ‑mä, a pɔɔ 'nyu. 'Klünö 'mɩ Laagɔ lanö'anyɩ 'kʋ ‑yä ʋ 'kanyɩ 'nyu 'pä.

¹⁰ Kɩ ‑jɩjlɔ lä ‑mɔɔ Laagɔ‑bɔɔgʋʋ 'mnö nynä ‑mä, Nyɩkpɔɔ' ‑lɔmɔ ‑ɔ ci lä nynä ‑mä kɔ ‑waa zëkpë ‑yä, Ɔ 'kä 'nää kʋ ‑mää 'ylʋzɔɔ, nä, ‑Lɔɔ' nyɩkpɔɔ ɩ ‑ŋwa 'kʋ nynä ‑mä, Ɔ ‑sää ‑läyɩɔ nyenyisä 'mʋ, Ɩyä ɔɔ' gë ‑lä yio.

¹¹ Ɔ ‑sä gbenyenyi gwë ‑yä, ɔ nʋ yɩ 'nää. Ɔ tään 'kɔɔkɔ nynä 'kʋ wɔtɔlɩ yi.

¹² ‑Ɔnöza bhää? Kwlienyɔ Laagɔ nä, nyɩkpaa' ‑lʋa ‑wa gëë‑ lä 'yi nä, Wamä ɔɔ' 'yii ‑kʋ lä 'kʋ. Wa kä bhibhie nä, Laagɔ ‑ghlɩlɩ 'kɔɔkɔ ʋ 'kwa 'nyukwli poo. ‑Mä ‑wa ‑kʋ lä gbenyenyii 'mnö nä, Kwlienyɔɔ' puwa ‑wʋ 'nyukwli.

¹³ A kä 'nää nʋlɩɩ ‑za ‑ghlɩlɩ 'kɔɔkɔ nä, nyɩkpɔ‑ ‑sä yi'anyɩ bhä nyenyisä klää?

¹⁴ 'Nɩ kɩ kä 'sɩɩ plöö‑ nynä ‑mä nyäkälɩ yi'anyɩ ŋëë anyɩa' 'nägägbɩɩ' ‑za nä, ‑mä a yä 'pʋ nä! Aa' ‑guu lä nyɩkpɔ! Ɩyä ‑ŋänöö' bhla'anyɩ ‑lä!

¹⁵ Ɩyä ‑mɔɔ anyɩa' pɔlöö 'yi ɩ kʋ 'kɔɔkɔ ‑mɔɔ nynä ‑mä, Klisö ‑bhlo 'coo, ɔmɔɔ‑ plöö‑ lä anyɩa Kwlienyɔ. Nyɩkpɔ ka'anyɩ anyɩa' pɔlötɛtɛɛ' ‑za wälɩklë 'kʋ 'ylä nä, a ‑ghlɩlɩ 'kɔɔkɔ ‑yä a 'kɔ soo ‑yä a 'kä anyɩa' pɔlötɛtɛɛ 'kʋ bhlää.

¹⁶ ‑Mä a 'bhlü pɔlöwätɛ 'kʋ, ɩyä 'klʋkpää, ‑yä bhobhowlu 'nänʋ 'kʋ ‑yä 'klëa 'titi wa kpʋkpɔnö'anyɩ bhlä 'kʋ nä, a 'kä waa' zoo nʋ.

¹⁷ ‑Ɛɛɛ, Laagɔ 'mʋʋ‑ gä ŋoo nynä ‑mä 'kwlɩ bhɩänö'anyɩ nä, ɩ ‑ŋwa 'kʋ nynä ‑mä a kʋ 'nää nʋdä ‑yä ‑lɔɔ' 'kwlɩɩ bhɩänö'anyɩ. ‑Mä ɩɩ' 'plö ‑lä nynä ‑mä gbenyenyi a ‑nʋ nä, ɩɩ' 'kwlɩkabhɩä a ‑kʋ 'mnö.

Klisö yä 'kʋ zi

¹⁸ A ni 'yi naa, Klisö 'kuu‑ 'ci ‑bhlo nyɩkpaa 'fɩɩn nyenyii' ‑za. Ɔmɔ mɔ ‑ɔɔ bhɔɔ lä nyenyi ‑kä nä, ɔ kuu‑ nyenyinyʋaa' 'wlu ‑yä ɔɔ' 'kwiee 'kä gbä wa 'kä Laagɔɔ' ‑blɔɔ 'kʋ yi. Klisö nä, wa bhlää‑ ɔɔ' 'yɛkɛɛ ‑mä, kä Kplɔɔkplɔɔ‑wugɔɔ ‑yi 'nɩ a nyɩɔ‑ zëkpë.

¹⁹ Nä, ‑mɔɔ 'kudukʋʋ' 'kudukua ‑wa ‑kʋ bhlä 'kwiee ‑jɩɛ 'mnö nä, kä Klisö ‑mʋwa Laagɔduu' 'Nägädöö ‑sää ‑kää.

²⁰ 'Kudukuënä, ‑gɔgɔbhlää' nyɩkpaa‑ 'ŋʋ bhɔɔ lä Laagɔ 'klʋkpää nä, wamä lä. Kä Laagɔ ‑bɛɛ bhlä. ‑Lɔɔ' 'tänyɩɛ 'mnö Nowee slää‑ lä 'gokpëa. 'Nɩ nyɩkpaa‑ ‑plä 'gokpëa nä, waa' bhɔɔ ‑zu. Wa ‑bhlü bhä nyɩkpa ‑ngbaatä 'cɩɩn, wamää‑ ‑bha lä 'nyie nëë'.

²¹ Kwlienyɔ 'mnö 'nyuu 'wlu ‑ŋʋlɩɩ ‑ɩ sa'anyɩ lä ‑zɩkä ‑lɔɔ nëë nä, ɩmɩɩ‑ plöö‑ lä Nowee' 'tänyɩɛ 'nyuu panalɩɩ. 'Nyuu 'wlu‑ŋʋlɩɩ' ‑wʋ 'yɛkɛɛ büdalɩ plöö‑. Kɩ plöö‑ lä nynä ‑mä a ŋoo Laagɔ 'kʋ ‑yä ʋ gbä ‑yä ‑anyɩa 'wugɔɔ 'mnö kplɔɔ wɩa. Klisöö 'kuëë glɔɔlɩɩ 'mnö a ‑bha lä ‑lɔɔ nëë'.

²² Klisö gblää‑ lä Laagɔduu' nä, kɔ ‑kʋ yɩ Laagɔɔ' lüüklä 'kʋ sä. ‑Mɔɔ ɔ ‑kʋ 'nɩ ɔ 'kämä ylä ‑Laagɔzizii ɩyä 'päwö‑käälɩɩ ‑yä 'tɛtɩ‑käälɩɩ 'fɩɩn.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan