Bìoball air-loidhne

1 Kolɛtɩ‑dunyʋä 9 - GOD - u2

Pɔlʋ cɩalɩɩ 'mnö nä ɔɔ' tää bhɔɔ bɔɔpälɩ
( 2 Kolɛ 11.7‑12 ; 12.13‑15 )

¹ ‑Amʋ Pɔlʋ nä, n ‑kä 'nɩ sä n ‑waa lä nä, n yi sɔɔ nʋ. Laagɔ nö'ö bhä ‑lobho ‑a? Nn' bhä ‑anyɩa Kwlienyɔɔ Zozii 'yi nii‑ ‑a? 'Nɩ lebhee n nʋ lä Kwlienyɔɔ' ‑za nä, ɛɛ' 'bhüü ɛ ‑tlʋ lä nä, anyɩ‑ 'nɩɩ bhä plöö‑ ‑a?

² Nä, nyɩkpaa' ‑nänʋä kä ‑lɔɔ ‑kʋ 'nɩ n 'nö waa' ‑za Kwlienyɔɔ' lobho lobhonyɔ plöö‑ nä, anyɩ ‑bhlo 'coo ‑za nä, n plöɔ. Sä a ‑yä Kwlienyɔ 'sɔ 'jɛnyɩ‑ lä nä, sɔɔ‑ pana lä nynä ‑mä ‑amʋ, n plöö‑ Kwlienyɔɔ' lobho lobhonyɔ.

³ Nä nyɩkpaa' ‑lʋa ‑wa fä'ä lä wälɩ yëku nä, a ni sä n sonʋwa lä nä.

⁴ Kä n ylʋwa lä nynä ‑mä, lebhee ‑a nʋ lä nä, ɛɛ' ‑lä bhɛ gbä 'nɩ ‑a 'gä lümʋ 'nɩ ‑a 'gä 'mnämʋ ‑a?

⁵ ‑Aa ‑lä bhɛ mii 'nɩ ‑a ‑yä 'cɔcɩŋwnɩä 'sɔ 'kä 'kʋ kʋʋ ‑a ‑liesɩɩ 'bhisäkʋ ‑a? ‑Mɔɔ' lobho lobhonyʋa, Kwlienyɔɔ ɔ bhelia, ɩyä Pɩɛlö, wa nöö‑ 'ŋwnɩä. Yio ‑a?

⁶ ‑Aaa! nä Banabasö ‑yä ‑amʋ 'sɔ, ‑anyɩ‑ 'nö lä 'fɩa lebhe ‑nʋ 'nɩ ‑aa lü ‑wʋ lä ‑a?

⁷ ‑Mä nyɩkpɔɔ' lɔɔ‑ mʋ lä 'sʋjälɛ 'kʋ nä, ɔmɔ 'titii‑ zɔɔ ɔ yëku lɩɩ ‑gä ‑a? Naa, nyɩkpɔ ‑goo ‑kɛ divaa‑gälösu 'nɩ ɔɔ' lä bhä ʋʋ' 'yii ‑gälö lümʋ ‑a? Nyɩkpɔ kpaa bhä ‑dodobhlü 'nɩ ɔɔ' ‑lä bhä ‑bhliibhlʋ 'mnä ‑mʋ ‑a?

⁸ ‑Nɩnɩ n ci lä ‑lää nä, sɔɔ ɩ nʋɔ lä nyɩkpa nëëdë ‑mä, ɩ cio‑ 'sɩɩ Moyizöö' ‑Jlämaa 'mnö. Yio ‑a?

⁹ Kɩ ‑jɩjlɔ ‑Jlämaa 'mnö nynä ‑mä, ‑Dodobhlii' lɛɛ nyɩkpɔ ‑kä 'nɩ ‑ɛ nʋ lä ɔɔ' nyʋʋklää' lebhe nä, ɔɔ' gʋɛ ‑lä në 'klʋ nynä ‑mä ɛɛ' kä ‑kä ɔɔ' nyʋʋ lü. Laagɔ nä, ‑dodobhlüü' wälɩ känöɔ bhɛ yëkuu ‑a?

¹⁰ ‑Anyɩa ‑zä ʋʋ' ci bhä ‑lɔɔ' wälɩklëa ‑a? ‑Mä nyɩkpɔɔ' lɔɔ‑ nʋ lä lebhee' cënänä nä, ‑dʋdʋ ɔ klu ‑o, 'säkä ɔ yee 'kʋ ‑o, ɩ ‑ŋwa 'kʋ nynä ‑mä lebhee ɔ nʋ lä nä, ɔ 'tɛnɩɛ dë nynä ‑mä ɛ yio 'nyɛmʋ.

¹¹ Naa, 'Wugɔɔ 'mnö ‑lɩɩ ‑a ya'anyɩ lä nëëdë goo nä, ɩɩ' bhɛ 'kʋ ‑ŋwa nynä ‑mä a 'nyɛmʋ‑anyɩ anyɩa' ‑mää zëkpëkʋʋ' 'nää ‑a?

¹² Nyɩkpaa' ‑nänʋä ‑kʋ ‑lɔɔ 'nɩ wa lü anyɩa' wlɩɩ lɩɩ, yio ‑a? ‑Anyɩ, ‑anyɩ‑ 'gɩ bhlä lü ‑ɔ 'gwa 'kʋ zi ‑mä ‑a 'nɩɩ ‑wʋ ylää‑. ‑A mii 'nɩ ‑a 'kuu 'mnö, ‑ɔnöza bhää? Klisöö' 'Nägädöö' nä, wälɩklëë' kɩ ‑kä 'yikʋ sɩɔ ‑yä ɩ 'kä 'yikʋ mʋ.

¹³ Aa' bhä sɔɔ ‑yi nynä ‑mä nyɩkpaa' ‑lʋa nʋ lä Laagɔ‑bhutuu 'kädʋʋ 'mnö lebhe nä, Laagɔ‑bhutuu 'mʋʋ nyɩwa 'nɩ wa lü ‑a? Aa' bhä sɔɔ ‑yi nynä ‑mä Laagɔɔ' 'Cibhisänyʋa nä, 'cibhie 'mnö wa sä 'nɩ wa lü ‑a?

¹⁴ 'Nɩ Kwlienyɔɔ cii‑ 'sɩɩ nynä ‑mä Laagɔɔ' 'Nägädöö' ‑säänyʋa nä, wa ‑sä 'Nägädöö 'mnö ‑yä wa 'kä lü.

¹⁵ ‑Mä ‑amʋ nä, dää‑ plöö bhlä 'naa dä nä, nn' ‑wʋ ‑lɔɔ bʋkʋ ylää‑. 'Nɩ 'bɔɔgʋnʋ n jɩjlä lä nä, kä nn' jɩjlʋ ‑wʋ ‑yä n 'kä 'naa daa bʋkʋ 'ylä. Kɩ kä plöö‑ nynä ‑mä ‑nɩnɩ 'mnö 'kwie yi'i ‑mɔɔ fämʋ nä, kɛ lɛ fämʋ'ʋ! 'Klünö 'mɩ n ‑kä 'nɩ n täkpɔ lä 'mʋ. 'Nɩ nyɩkpɔɔ' ‑lä mii‑ 'nɩ ɔ kä'ä 'mɩɩ pleyii ‑sä.

¹⁶ 'Nägädöö' bielɩɩ nä, nn' täkpɔnɩ ‑wʋ 'mʋ ‑mä ɩ ‑glö 'naa ‑za wälɩklëë' laa ‑a ‑ŋwa lä 'kʋ nynä ‑mä a nʋɔ nä. 'Nɩ n 'nɩɩ 'sɩɩ ‑bie nä, n yä mie!

¹⁷ 'Nägädöö' bielɩɩ' lebhee nä, ‑amʋ 'titii‑ gä bhä n yëku ‑lobho nynä n 'kɛ nʋ nä, n yi bhä ci nynä ‑mä nyɩkpa plʋnö'ö. ‑Ma sä kwa nyɛɛ'ɛ lä ‑lɔɔ' lebhee nʋdä nä, n ‑kä 'nɩ n 'kɛ nʋ.

¹⁸ ‑Ɔ plöö‑ bhä 'naa plʋlɩɩ? N kä Laagɔɔ' 'Nägädöö bie 'nɩ, sää‑ yi bhlä 'naa dä 'plö nä, wa nö'ö sɔɔ 'ylɩbha nä, ɩmɩɩ‑ plöö‑ lä 'naa 'pɛɛ.

Pɔlʋ klä ɔ yëku nynä geyu Klisöö' ‑za

¹⁹ ‑Ɛɛɛ, nn' ‑wʋ nyɩkpɔɔ' geyu plöö‑ ‑mä, ɩ ‑kʋ sɔɔ 'nɩ n ‑klä n yëku nynä geyu ‑yä n 'kä gbä nyɩkpa ‑bhutukpä 'kä Kwlienyɔɔ' ‑blɔɔ 'kʋ yi.

²⁰ N ‑kʋ bhlä 'Zufʋnyʋa nëëdë nä, kä n ‑klä n yëku nynä 'Zufʋyu, ɩyä 'Zufʋnyʋa 'kä Kwlienyɔ yii. ‑Wa ŋʋ lä Moyizöö' ‑Jlämaa 'klʋkpää' nä, kä n ‑yʋwa 'sɔ 'ŋʋnöa däbhloo' 'klʋkpä. Aa' bhɔɔ 'zazɩ 'naa laa plöö‑ ‑mä, kä n ‑klaa nynä 'naa laa ‑yä, ‑wa ‑kʋa lä 'zaazɩ 'mnö nä, wa 'kä Kwlienyɔɔ yii.

²¹ Nyɩkpaa' ‑lʋa ‑wʋ lä Moyizöö' ‑Jläma ‑yi nä, n kwa nëëdë ‑kʋ nä, kä n klä n yëku nynä nyɩkpɔɔ' lɔɔ‑ ‑wʋ Moyizöö' ‑Jlämaa ‑yi nä, ‑bhlɛ sä Klisöö' ‑Jläma 'mää 'tienö'ö lä nä, kɩ plöö‑ ylä nynä ‑mä Laagɔ ‑Jlämaa 'mnö n nämnö. ‑Mä kä n klä lä n yëku nynä nyɩkpɔɔ' lɔɔ‑ ‑wʋ ‑Jlämaa ‑yi nä, ɩyä ‑waa ‑wʋ lä ‑Jlämaa ‑yi nä, wa 'kä Kwlienyɔɔ yii.

²² Nyɩkpaa' ‑waa bhɔɔ lä ‑cʋcʋ ‑kä nä, n ‑kʋwa bhlä nëëdë nä, kä ‑nʋ bhä nynä ‑mä lɔɔ‑ bhɔɔ ‑cʋcʋ ‑kä ɩyä n 'kä gbä wa 'kä Kwlienyɔɔ yii. Kä n nʋ bhlä sɔɔ ‑yä nyɩkpaa' 'sɔnalʋä 'kä ‑lɔɔ nëë' ‑bha.

²³ ‑Nɩnɩ 'fɩɩn n nʋ lä nä, Kwlienyɔɔ' 'Nägädöö' ‑zä n nʋɩ lä ‑yä n 'kä ɩɩ' 'mnö ‑bʋzʋɛ 'nimʋ.

Sämɩ‑panyʋa' ‑jläma 'mnö

²⁴ Sämɩ‑padaa' nyɩkpaa 'fɩɩn‑ paa lä ‑ajɛɛkpää' ‑za nä, aa' bhä sɔɔ ‑yi nynä ‑mä waa' ‑lefɩɩn paa 'flɛ ‑mä nyɩkpɔ ‑bhlo wa nyɩa ‑a? Nä anyɩmɔɔ‑ paa lä nä, sa yi lä paa 'nɩ a yi lä ‑ajɛɛkpa 'ni nä, a paa sɔɔ.

²⁵ A ni sämɩ‑panyʋa 'fɩɩn‑ paa lä nä, kwa yla 'fɩa 'sää 'titi wa yëku lɩɩ, 'nɩ wa mʋ lä paa ‑kää. 'Nɩ bɔɔpälɩɩ wa tään lä nä, ɩ yi 'kʋ bhɩä ‑mä ‑anyɩ, ‑anyɩa bɔɔpälɩɩ' ‑wʋ 'kʋ bhɩäsä ‑kä.

²⁶ ‑Amʋ nä, ‑lɔɔ' sämɩɩ 'mɩ n paa lä. Nn' paa ‑wʋ 'wubhë ‑wubhë ‑mä ‑gbäsɩɩ n mʋ lä nä, ‑mɔɔ 'naa 'yii ‑kʋ lä. Kä n ‑kʋ lä 'sɩɩ nynä 'gbaa yibhënyɔ. Nä, n kä vë nä, nn' 'pää ‑wʋ 'naa 'kwätlö 'wubhë ‑wubhë.

²⁷ 'Naa 'yɛkɛnɛ nä, kä n wlue 'nägäsä 'kʋ 'nɩ n klɛɛ ‑kpään ‑yä ‑amʋ mɔɔ‑ yä bhɛ lä Kwlienyɔɔ' 'Nägädöö bie nä, Laagɔɔ' kä ci nynä ‑mä n gbogo.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan