Bìoball air-loidhne

1 Kolɛtɩ‑dunyʋä 8 - GOD - u2

‑Zlüü‑bʋbɔ mnaa' yëkuu' wälɩ

¹ ‑Ɔ plöö‑ ylä ‑zlüü‑bʋbɔlɩɩ' 'cibhisä‑mnaa' wälɩɩ nä, ‑anyɩ 'fɩɩn ‑a ‑yii. ‑Mä sɔɔ wälɩɩ yibhëlɩɩ kɩ gbä 'nɩ nyɩkpɔ nämnö täkpɔlɩɩ'. ‑Wawʋ 'mʋʋ‑ glää lä nyɩkpa.

² Nä nyɩkpɔ kä ‑lɔɔ ‑kʋ 'nɩ ɔ kä bhobho nynä ‑mä ɔ yi wälɩɩ' ‑nɩnɩ nä, ‑lɔɔ' nyɩkpɔɔ yibhë sɔɔ nynä ‑mä 'klüü ɔ 'kä bhlä yibhë nä, ɔ 'nɩɩ ‑läte ‑yibhë.

³ ‑Mä nyɩkpɔɔ' lɔɔ ‑waa lä Laagɔ nä, kä Laagɔ ‑yio.

⁴ Naa, ‑ɔ plöö‑ lä mna wa bhlü lä 'kʋ 'nɩ wa bʋbɔ lä ‑zlüü nä, ‑a yia bhä lü ‑a? ‑A ‑yi sɔɔ wɩa nynä ‑mä ‑zlüü‑laagɔɔ' ‑wʋ 'ylʋnʋ ‑zɔɔ ‑kʋ. Laagɔ ‑bhlü ‑bhlo.

⁵ ‑Ɛɛɛ, wa ci 'zaazɩ nynä ‑laagwɩ ‑kʋ ŋɔkʋ, 'nɩ ‑nɩnɩ ‑kʋ ‑mää ‑dʋdʋkʋ. Kwa ci lä nynä ‑laagwɩ ‑zu, 'nɩ kwlienyʋa ‑zu.

⁶ ‑Mä ‑anyɩa' ‑za nä, Laagɔ ‑bhlü ‑bhlo. Ʋmʋʋ‑ plöö‑ lä ‑A 'Bä. Ɔmɔɔ‑ wlʋa lä zëkpëkʋʋ' ‑lɩɩ 'fɩɩn. 'Nɩ ɔɔ' ‑zä ‑a ‑kʋ lä zëkpë 'kʋ. Bʋkʋ nä, Kwlienyɔɔ ‑bhlü ‑bhlo. Ɔmɔɔ‑ plöö‑ lä Zozi Klisö. 'Nɩ Zozi Klisö nä, ɔmɔɔ‑ ‑gbä 'nɩ ‑lɩɩ' ‑lefɩɩn ‑kʋ lä. 'Nɩ ɔmɔɔ‑ ‑gbä 'nɩ ‑a ‑kʋ lä.

⁷ ‑Mä ‑nʋawlɛnɛ, ‑bhutukpä 'nɩɛ ‑wʋ ‑yi. Nyɩkpaa' ‑nänʋä ‑kʋ ‑lɔɔ 'nɩ, sä wa cɩä‑ lä ‑zlüü ‑zɔɔ' mʋlɩɩ nä, ‑zlüü' bʋbɔ‑mnaa wa lüa ‑lätee. 'Nɩ ɩ ‑kʋ yɩ nynä ‑mä zlüü 'mɩ wa nyɛ lɔɔ' mnaa. Ɩ gbä 'nɩ waa' bhobhosaa' yɩɔ 'tɛtɩ ‑kä 'nɩ, ɩ ŋʋwa yɩ ‑gesi yëku.

⁸ Lülülʋʋ nä, ʋmʋʋ‑ gbä ‑wʋ 'nɩ nyɩkpɔ 'kä Laagɔ yëku 'mɛ. Nä, ‑a 'nö ‑lɔɔ' lülülʋʋ lü nä, ʋʋ' ‑sanyɩ ‑wʋ lʋʋ 'kʋ Laagɔ dëlü. 'Nɩ kä ‑a gʋ 'sɩɩ lü nä, ʋ 'nö‑anyɩ lä dä fä.

⁹ Maa, a lüë ‑kä! Nyɩkpɔ nyɩkpɔɔ' sä ɔ nää lä nä, ɩ ‑ŋwa 'kʋ nynä ‑mä ɔ fä sɔɔ plɛkʋ ‑yä nyɩkpaa' ‑nänʋä ‑wanö pɔlotɛtɛ ‑läte lä ‑mɔɔ ‑see nä waa' kä ‑kä nyenyii' bhlüü.

¹⁰ ‑Ɔnöza bhää? ‑Mɔɔ mɔɔ‑ plöö‑ lä nyɩkpɔɔ' ‑lɔɔ ‑yi lä ‑lɔɔ' wälɩɩ 'fɩɩn nä, ‑n gä yɩ ‑mɔɔ ‑zlüü' bʋbɔdaa sä ‑kʋ, 'nɩ ‑n gä lü nä, 'nɩ nyɩkpɔɔ' ‑lɔmɔ ‑ɔnö pɔlötɛtɛɛ ‑lätee lä ‑mɔɔ ‑see nä, ɔ kä‑ä 'yi nii‑ nä, ɩ 'nöɔ ‑lä bhä 'tɛtɩ 'nyɛ 'nɩ ɔ 'kä ‑zlüü‑bʋbɔdaa' mna lü ‑a?

¹¹ Nä, bhelio ‑yä bhɛŋnɔɔ ‑ɔnö 'wlu Klisö kuu‑ lä nä, 'nɩ ‑ɔnö pɔlötɛtɛɛ‑ ‑lätee lä ‑mɔɔ ‑see nä, ‑naa ‑nʋawlɛɛ' yibhëlɩɩ 'mnö, ‑mɔɔ ɔ ghlä ‑kɛ 'nɩ ɔ too yɩ ‑a?

¹² A kä lä sɔɔ bhelia ‑yä bhɛŋwnɩa nyenyii nʋ 'nɩ a kä lä sɔɔ waa' 'wugɔɔ ‑jälö 'pä nä, Klisö 'mɔ a nʋ lä ‑lɔɔ' nyenyii.

¹³ ‑Nɩnɩɩ' ‑zä lülülʋʋ kä ‑lɔɔ ‑kʋ 'nɩ ʋ kä ‑kʋ nynä ‑mä ʋ yi bheli ‑yä bhɛŋnɔ 'sɔ nyenyi 'yi fään nä, ‑lɔɔ' lülülʋʋ nä, ‑a ‑kä 'nɩ ‑a 'nʋ ‑läyɩɔ lä lü. ‑Lɔɔ' 'cibhisä‑mnɛɛ kä n 'nɩɛ ‑läyɩɔ lä lü. Nn' kwa kä nyenyii' pään.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan