Bìoball air-loidhne

1 Kolɛtɩ‑dunyʋä 7 - GOD - u2

Wlunöölɩɩ ‑yä ŋnʋnölɩɩ' yëkuu wälɩ

¹ ‑Pɛpɛɛ nä, 'klüü a ylää‑ lä anyɩa 'bɔɔgʋ 'mnö nä, ɩmɩ ‑a 'gä ylä 'bɩɩ bhlü ‑a 'gä ci. A ni 'yi nä, ɩ nää‑ nynä ‑mä nyɩkpɔ 'nä nöö ‑lä 'ŋnɔ.

² ‑Mä sä ŋnʋylälɩ ‑yä wluylälɩ yä lä baa nä, ɩ ‑ŋwa 'kʋ nynä nyɩkpɔ nyɩkpɔ nä, ɔ kään ɔɔ' 'ŋnɔ. Ɩyä 'ŋnɔ 'ŋnɔ nä, ɔ kään ɔɔ' 'wli.

³ Ɩyä sä ŋwadi yi lä ɔ 'ŋnɔ ‑za nʋ nä, ɔ nʋ sɔɔ. 'Nɩ sä 'ŋnɔ yi lä 'sɩɩ ɔ ‑nyotoo' za nʋ nä, ɔ nʋ sɔɔ.

⁴ 'Ŋnɔ nä, ɔ yibhë yɩ sɔɔ nynä ‑mä sɔ ‑waa lä nä, sɔɔ ɔɔ' ‑läyɩɔ ɔ 'yɛkɛɛ klä. Ɔmɔ 'titi‑ 'nɩɛ yɩɔ ‑kä ‑mä ɔ ‑nyoto ‑kɛɛ yɩ. Ɩyä ŋwadi ‑mä 'sɩɩ ɔ yibhë sɔɔ nynä ‑mä ɔɔ' 'yɛkɛɛ nä, sä ɔ ‑waa lä nä sɔɔ ɔ 'nɩɛ ‑läyɩɔ klä. Ɔmɔ 'titi‑ 'nɩɛ yɩɔ ‑kä ‑mä, ɔ 'ŋnɔɔ‑ ‑kɛɛ yɩ.

⁵ Nä nyɩkpɔ nyɩkpɔ 'nä zloo lä ɔ lie. 'Ɩzä ka kä 'kʋ 'ŋʋʋ 'nɩ a kä gwë ‑säsä 'tänyɩ ‑zio ‑za nynä ‑mä a 'kä bhibhie nä, ɩɩ' ‑wʋ ‑nyu. ‑Lɔɔ' 'tanyɩɛ kä yɩ plöö‑ nä, a yiyii bʋkʋ yëku ‑mä a 'nö ‑bɛɛsä ‑yi nä, 'Dëvlo yi'anyɩ ‑kä ‑zɔɔpälɩ 'nyɛ.

⁶ 'Klünö nä, n nö'anyɩ ‑wʋ soo nynä ‑mä 'sëëti ɩmɩ a laa nʋ. ‑Mä ɩ ‑glö 'klüü lɩɩ a ‑kä 'nɩ a yi lä 'mnö nämnö nä.

⁷ ‑Amʋ 'naa ‑za nä, n ‑waa bhä nynä nyɩkpa 'fɩɩn kʋ ‑amʋ 'bhisäkʋ. Ŋwadii' nöö ‑läyɩ 'ŋnɔ ɩyä 'ŋnɔɔ' nöö ‑läyɩ 'wlie. ‑Mä nyɩkpɔ nyɩkpɔ ‑kä sä Laagɔ nyɩɔ‑ lä nä.

⁸ Nä 'ŋwnɩa ‑wʋ lä 'wlie nöö‑ nä, ɩyä ŋwadia ‑waa ‑wʋ lä 'ŋwnɩä nöö nä, ɩyä 'kuzëlü‑ŋwnɩa ‑yä 'kuzëlü‑ŋwadia, 'klüü n ‑kä lä ‑yä n 'kwa soo nä, ɩmɩɩ‑ plöö‑ lä nynä ‑mä, ‑ɩ ‑ŋwa 'kʋ nynä wa kʋ ‑amʋ 'bhisäkʋ.

⁹ ‑Mä kä 'yɛkɛɛ 'nö ŋoo nä, a nöö wlie ‑yä a nöö 'ŋwnɩä ‑mä aa' si ‑lä.

¹⁰ Anyɩmɔɔ‑ yä lä wlie nöö 'nɩ ‑ɔ yä lä 'ŋwnɩä nöö nä, 'klünö, ‑amʋʋ‑ 'nɩɩ ‑wʋ cii‑ ‑mä Kwlienyɔɔ 'mɔɔ‑ cii‑, ɔ laa, 'ŋnɔɔ' ‑bha lä ɔ ‑nyoto yëku.

¹¹ Kɔ kä ɔ ‑nyoto yëku ‑bha nä, ɔɔ' nöö ‑läyɩ 'wlie. Kɔ kä ‑waa nä, ɔ ‑yä ɔ ‑nyoto 'sɔ 'nunu bʋkʋ ‑yä wa 'kä glää. Ŋwadi nä, ɔɔ' 'tlü ‑lä 'ŋnɔ.

¹² 'Klü ‑ɩ ‑kʋ ylä bʋkʋ ‑lɔɔ nä, Kwlienyɔɔ 'mɔɔ‑ 'nɩɩ ‑wʋ cii‑ ‑mä, ‑amʋʋ cii lä. 'Ŋnɔɔ lɔɔ‑ ‑wʋ lä 'cɔcɩŋnɔ plöö‑ nä, ɔmɔ 'cɔcɩ‑bheli kä nöö‑ 'nɩ ɔ kä ‑waa nynä ‑mä ɔ ‑yɔsɔ yi sä kʋ nä, ɔ 'nä 'tlüo ‑lä.

¹³ 'Nɩ 'cɔcɩ‑bhɛŋnɔ ‑mä 'sɩɩ, nyɩkpɔɔ' lɔɔ‑ ‑wʋ lä 'cɔcɩnyɔ plöö‑ nä, ɔmɔ ɔ kä nöö‑ 'nɩ ɔ kä ‑waa nynä ‑mä ɔ ‑yɔsɔ yi sä kʋ nä, ɔ 'nä ‑bhɔɔ lä yëku.

¹⁴ ‑Ɔnöza bhä? 'Wlii lɔɔ ‑wʋ lä 'cɔcɩnyɔ plöö‑ nä, kä 'cɔcɩ‑ŋnɔɔ' zëkpëa kpɔlʋä ‑lɔɔ' 'wlioo zëkpëa. 'Nɩ 'ŋnɔɔ' lɔɔ ‑wʋ lä 'cɔcɩŋnɔ plöö‑ nä, 'cɔcɩ‑bhelioo' zëkpëa kpɔlʋä ‑lɔɔ' 'ŋnɔɔ' zëkpëa. Ɩ 'nö bhɛ sɔɔ ‑kʋ nä, anyɩa 'yuaa' ‑lä bhɛ Laagɔ dëlü kplɔɔ. ‑Mä kwa ‑kplɔɔ ylä.

¹⁵ 'Nɩ kɩ kä ‑kʋ nynä ‑mä nyɩkpɔɔ' ‑lɔɔ ‑wʋ lä 'cɔcɩnyɔ plöö‑ nä, kɔ cɛɛ‑ 'cɔcɩŋnɔ nä, ɔ cɛnöɔ. ‑Lää' 'pɛlʋnʋ 'mnö nä, 'cɔcɩ‑bheli ‑o, 'cɔcɩ‑bhɛŋnɔ ‑o, ɔɔ' wälɩɩ' ‑wʋ gbʋ 'kʋ ‑kʋ. Kä Laagɔ laa‑anyɩ ‑a 'gä 'kʋ wɔtɔ.

¹⁶ Bhɛŋnɔ‑, sä ‑n yi bhä sɔɔ yibhë nynä ‑mä ‑n ‑nyoto ‑mɔɔ 'gɔ ‑lɔɔ nëë' sää? 'Nɩ ‑mɔɔ, bheli‑, sä ‑n yi bhä sɔɔ yibhë nynä ‑mä ‑mɔɔ 'gä ‑lɔɔ ‑n 'ŋnɔ nëë' sää?

Pɔlʋ lä 'cɔcɩnyʋa kʋ sä Laagɔ ‑waa lä nä

¹⁷ Ɩ ‑kʋ yɩ sɔɔ ‑mä, nyɩkpɔ nyɩkpɔ Laagɔ lɔɔ‑ lä nä, ɩɩ' sä ɔ ‑kä lä nä, 'nɩ sä Laagɔ nyɩɔ‑ lä 'sɩɩ nä, sɔɔ ‑tɛɛ ɔ yi lä 'kɔɔkɔ kään. 'Cɔcɩgbüü 'fɩɩn 'mnö n plö lä nä, ‑jlämänä 'mä n ŋʋ lä sä.

¹⁸ Laagɔ kä nyɩkpɔ laa‑ nä, 'nɩ ‑lɔɔ' nyɩkpɔɔ kɔ kä bhä 'kʋ döö‑ nä, ɔ kʋ sɔɔ. Kɔ 'nö bhä 'kʋ döö‑ nä, ɔ kʋ 'sɩɩ sɔɔ.

¹⁹ Nyɩkpɔ döö‑ 'kʋ ‑o, ɔɔ' ‑wʋ 'kʋ döö‑ ‑o, ɩɩ' ‑wʋ gba ‑kä. Sä Laagɔ ylä lä nä, nyɩkpɔ kä sɔɔ nää nä, ɩmɩɩ‑ ‑kä lä gba.

²⁰ Nä, sä nyɩkpɔ ‑kʋ 'nɩ Laagɔ lɔɔ‑ lä nä, ɔ kʋ sɔɔ.

²¹ Geyu ‑n plöö‑ bhä 'nɩ Laagɔ lä‑ä bhɛ ‑a? Ɩ 'nä kamänö‑ö lä yëkuu'. 'Tanyɩɛ lä ŋëë ‑yä ‑n 'gä geylüü' ‑bha nä, ‑lɔɔ' 'klüü 'mɩ ‑n ‑nä ‑n kpelio yɩ 'kʋ.

²² ‑Ɔnöza bhää? Geyuu' ‑lɔɔ Kwlienyɔ yä ylä laa nä, ɔ yä 'mʋ kplɩɔ. Ɔ ‑glö yɩ Kwlienyɔɔ' lɔɔ. 'Nɩ nyɩkpɔɔ' lɔɔ ‑ɔɔ bhɔɔ lä geyu plöö‑ 'nɩ Kwlienyɔ laa‑ lä nä, ɔ ‑glö yɩ Klisöö' geyu.

²³ Kä Laagɔ ‑plʋʋ anyɩa' 'wlu dlu 'kädʋ 'nɩ a yi lä 'mʋ kplɩɔ. Nä, ɩɩ' yɩɔ 'kʋ ‑ŋwa nynä ‑mä a 'plö yɩ nyɩkpaa' geyuë.

²⁴ Bhelie ‑yä bhɛŋwnɩänyɩ‑, nyɩkpɔ nyɩkpɔ nä, sɔ ‑kʋ 'nɩ Laagɔ lɔɔ‑ lä nä, ɔ kʋ sɔɔ.

Ŋnʋ‑nöölɩ ‑yä wlunöölɩ ɩyä 'kuzëlü‑ŋwnɩa yëkuu' wälɩ

²⁵ ‑Ɔ plöö‑ lä nyɩkpaa' ‑lʋa ‑waa ‑lätee lä wlunö‑wälɩɩ ‑yä ŋnʋnö‑wälɩɩ' ‑plä nä, nn' 'ŋʋ ‑wʋ ‑jlämä sä, ‑mä n ‑kä wälɩklë ‑yä n 'kwa soo. Kwlienyɔɔ 'mɔɔ‑ 'nöa ‑wʋ cii ‑mä ‑amʋ 'titii‑ cia lä. 'Nɩ Kwlienyɔɔ' plɛkʋmɛnɔɔ ‑kä 'ŋnö nä, n ‑kä dë 'tɛɛ sä.

²⁶ 'Tänyɩnɛɛ' 'kwlɩkabhɩa' ‑za nä, ɩ ‑ŋwa 'kʋ nynä ‑mä nyɩkpɔ nyɩkpɔɔ' sä ɔ ‑kʋ lä nä, ɔ kʋ 'gää sɔɔ.

²⁷ ‑N ‑kä bhä 'ŋnɔ ‑a? ‑N gɔ ‑kä nä, ‑naa cɛnöɔ ‑läyɩ! ‑Nn bhä 'ŋnɔ ‑kä ‑a? ‑N 'nöɔ ‑kä nä, ‑naa tään ‑läyɩ 'ŋnɔ!

²⁸ Kä ‑n gä mii‑ 'nɩ ‑n gä 'ŋnɔ nöö‑ nä, ‑nn ‑wʋ nyenyi ‑nʋ. 'Nɩ ŋnʋgbɛnyɔ kä mii‑ 'nɩ ɔ kä 'sɩɩ 'wlie nöö‑ nä, ɔɔ' ‑wʋ nyenyi ‑nʋ. ‑Mä a yibhë sɔɔ nynä ‑mä ŋnʋnölɩ ‑yä wlunöölɩ nä, kä nyäkälɩ ‑kʋɩ 'mnö ylɩɩ 'fɩɩn 'kʋ. 'Nɩ ‑amʋ nä, ‑lɔɔ' nyäkälɩɩ, n ylä bhä nynä ‑mä ɩɩ' ŋënö'anyɩ ‑lä.

²⁹ Bhelie ‑yä bhɛŋwnɩänyɩ‑, n sonö'anyɩ yɩ nynä 'tänyɩɛɛ yɩɔ 'mʋ ‑tlʋ. ‑Pɛpɛɛ nä, nyɩkpɔɔ' lɔɔ ‑ɔ gä bhɛ 'ŋnɔ ‑kä nä, ɔ kʋ yɩ nynä lɔɔ ‑ɔɔ ‑wʋ 'ŋnɔ ‑kä.

³⁰ Nyɩkpɔɔ' lɔɔ‑ gä bhɛ 'tu nä, ɔ klä yɩ ɔ yëku nynä lɔɔ wälɩɩ' yɩɔ yëkuu' kään. Nyɩkpɔɔ' lɔɔ gä bhɛ nyɩä nä, ɔ klä yɩ ɔ yëku nynä lɔɔ ‑jäkää' ‑wʋ pleyii ‑kʋ. Nyɩkpɔɔ' lɔɔ ‑ɔ gä bhɛ lʋʋ zɔɔ‑ nä, ɔ kʋ nynä ‑ma ‑lʋʋ ɔ zɔɔ‑ lä nä, ɔmɔɔ‑ 'nʋʋ ‑wʋ ‑kä.

³¹ Nyɩkpaa ‑lʋa ‑wa ‑kä lä 'nää ‑mää 'ylʋzɔɔ nä, wa kʋ yɩ nynä ‑mä lʋa‑ 'ni ‑wʋ ‑lɔɔ' 'nää 'mnö ‑bʋzʋɛ. ‑Ɔnöza bhää? Zëkpënä ‑a ‑kʋ lä 'mnö nä, aa bhɩä‑tänyɩɩ' yɩɔ dä ‑tlʋ.

³² Nä n ylä nynä wälɩklëë' kamä ‑läyɩɔ nyɩkpɔ yëkuu. A ni nyɩkpɔ 'nö 'ŋnɔ ‑kä nä, ‑lɔɔ ɔ 'mänyɩ lä kpänyɩ Kwlienyɔɔ' lebhee, 'nɩ ɔ tään lä sɩɩ nynä ‑mä Kwlienyɔ 'kɔ wamä.

³³ Nyɩkpɔɔ' lɔɔ‑ ‑kä lä 'ŋnɔ nä, ‑mää 'ylʋzɔɔ' zëkpëa, aa' wälɩ ɔ 'manyɩ kpänyɩ. 'Nɩ ɔ tään 'sɩɩ nynä ‑mä ɔ 'ŋnɔ 'kɔ wamä.

³⁴ ‑Lɔɔ' nyɩkpɔɔ nä, kɔ ‑dënöɔ lä 'mʋ 'ci 'sɔɔ 'kʋ. 'Ŋnɔɔ' lɔɔ ‑wʋ lä 'wli ‑kä nä, ɔ yä ŋnʋgbɛnyɔ, sɔɔ ɩ ‑kʋ lä 'sɩɩ waa' ‑za. Wa 'nö 'wlie ‑kä nä, ‑lɔɔ wa 'mänyɩ lä Kwlienyɔɔ' lebhee. Waa nʋnʋgbɩɩ 'fɩɩn 'mnö wa tään kplɔɔlɩ nynä wa 'kä Kwlienyɔɔ' lʋä 'plö 'bhë 'kʋ. ‑Mä 'ŋnɔɔ‑ ‑kä lä 'wli nä, 'kɔɔnʋ 'mnöö zëkpëa 'mä ɔ 'mänyɩ kpänyɩ. 'Nɩ ɔ tään 'sɩɩ nynä ‑mä ɔ ‑nyoto 'kɔ wamä.

³⁵ 'Klünö 'fɩɩn n ci lä nä, anyɩa' 'nää ‑zä n cii lä ‑mä ‑gbosu‑ nn' tlaa'anyɩ ‑wʋ. Nä, sää‑ yi lä anyɩa' 'nää 'plö nä, a nʋ sɔɔ. Anyɩa' pɔlöö 'nä dënö ‑dënö ‑lä 'mʋ ‑mä a ‑yä Kwlienyɔɔ 'sɔ 'jɛnyɩ sää 'titi.

³⁶ Nyɩkpɔ kä ‑lɔɔ ‑kʋ 'nɩ ɔ kä bhobho nynä ‑mä ɔ 'nö ɔ ‑yɔŋnɔ 'wlie nyɛɛ‑ nä, ɩɩ' ‑wʋ 'klʋkpä ‑kʋ nä, ɔ 'nyɩɔ 'wlie. ‑Lɔɔ' nyɩkpɔɔ' ‑wʋ nyenyi ‑nʋ.

³⁷ 'Ɩzä kä nyɩkpɔ kä ‑lɔɔ ‑kʋ 'nɩ ɔ kä ‑bhobho, 'nɩ ɔ kä 'sänyɩ‑ ‑mɔɔ ɔɔ' pleyii nynä ‑mä, ɔɔ' ‑lä ɔ ‑yɔŋnɔ 'wlie 'nyɛ nä, ‑lɔɔ' nyɩkpɔɔ ‑nʋ 'sɩɩ 'nää.

³⁸ Nä nyɩkpɔɔ' lɔɔ‑ gä ɔ ‑yɔŋnɔ 'wli nyɛɛ‑ nä, ɔ ‑nʋ 'nää. 'Nɩ ‑ɔnö 'sɩɩ ɔ ‑yɔŋnɔ 'wli nyɛɛ‑ nä, ɔ ‑nʋ kpänyɩ 'nää.

³⁹ A ni 'ŋnɔ nä, kɔ ‑yä ɔ ‑nyoto 'sɔ 'jɛnyɩ‑ lä 'kɔɔkɔ ‑aaa, 'nɩ 'kwie ‑tɛɛ sänʋwa lä. Kä ɔ ‑nyoto kä kuu‑ nä, ‑lɔɔ ‑tɛɛ ɔ yi lä mii‑ 'nɩ ɔ yi lä bʋkʋ 'wlie nöö. ‑Mä ‑lɔɔ 'wlio nä, ɔ 'ninöɔ Kwlienyɔɔ' 'cɔcɩɛ 'mnö.

⁴⁰ 'Nɩ n bhobho 'sɩɩ nynä ‑mä, kä ‑lɔɔ' 'ŋnɔ 'nöyɩ bʋkʋ 'wli nöö‑ nä, ɩ yi kpänyɩ ɔɔ 'nää nʋ. ‑Ɛɛɛ! Sɔɔ n bhobho lä, 'nɩ n ‑yi sɔɔ nynä ‑mä n ‑kämʋ 'sɩɩ Laagɔɔ' 'Wugɔɔ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan