Bìoball air-loidhne

1 Kolɛtɩ‑dunyʋä 6 - GOD - u2

'Cɔcɩɛ 'mnö bhelia kuu kuu tʋ
( Matie 5.38‑41 )

¹ Wälɩ kä anyɩ ‑bhlobhlo pää ‑kʋ nä, sɩ ‑kʋ bhä 'nɩ aa' ‑lɩɩ bhä 'cɔcɩnyʋä ‑yä wa 'kɩ 'mʋ ‑döö 'nɩ, nyɩkpaa ‑waa ‑wʋ lä 'cɔcɩnyʋä plöö‑ nä wamä a fɩɩ bhä dëlü nynä wa ‑dɩɩ 'mʋʋ?

² Aa' bhä sɔɔ ‑yi nynä ‑mä 'cɔcɩnyʋa, wamää‑ 'gä ‑zee 'kɔɔnʋ 'mnö nyɩkpa 'tite 'ŋʋ ‑a? 'Nɩ anyɩ 'cɔcɩnyʋä, anyɩ‑ gä yɩ 'kɔɔnʋ 'mnö 'titee' ‑tëbhu ‑kä nä, sɩ ‑kʋ bhä 'nɩ aa' mii bhä anyɩa' pää' wälɩ 'tɩkɩɩlɩa 'mʋ ‑döölɩɩ?

³ ‑Anyɩ 'cɔcɩnyʋa, ‑anyɩ 'gä lä 'sɩɩ ‑Laagɔzizii 'tite 'ŋʋ nä, ‑lää' 'klünö, a 'nɩɩ bhä ‑yi ‑a? 'Nɩ sɩ ‑kʋ bhä 'nɩ 'ylʋnʋzɔɔ' wälɩ yi‑anyɩ bhä cilɩɩ' sɩää?

⁴ Anyɩ wälɩ ka'anyɩ pää' ‑kʋ nä, nyɩkpaa‑ ‑wʋ lä 'cɔcɩɛɛ' 'yikʋ gba ‑kä nä, wamä a fä ‑lɔɔ' wälɩɩ.

⁵ N ci lä nä, ɩ nʋ anyɩa' zoo. ‑Aaa nä, anyɩ nëëdë nyɩkpɔɔ' ‑wʋ ‑mɔɔ ‑kʋ ‑yä wälɩ kä bhelie 'sɔ pää' ‑bhlü nä, ɔ 'kɩ 'mʋ ‑döö ‑a?

⁶ Sɩ ‑kʋ bhä 'nɩ, wälɩ kä bhä 'cɔcɩɩ' bhelie 'sɔ pää' ‑kʋ 'nɩ, nyɩkpaa ‑waa ‑wʋ lä 'cɔcɩɛ 'mnö ‑kʋmʋ nä, wamää‑ dɩɩ bhä 'mʋʋ?

⁷ 'Nɩ anyɩ ‑bhlobhlo pää' cice kä 'sɩɩ ‑mɔɔ ‑kʋ nä, kɩ pana lä nynä ‑mä a yä wɛzä 'foclo bhlü. ‑Mänɩ sɩ ‑kʋ bhä 'nɩ nyɩkpɔ ka'anyɩ bhä wälɩklë ‑nʋ 'nɩ aa' 'tɛmä bhä plɛkʋ? Nyɩkpɔ yi 'sää 'titi anyɩa' kääkäälʋʋ ghlü nä, a 'tɛmä plɛkʋ!

⁸ A yi 'nɩ ‑mɔɔ 'cɔcɩɛ 'mnö bhelia ‑yä bhɛŋwnɩa, a nʋwa wälɩ ‑nyenyi. A yi 'nɩ a sʋwa waa' kääkäälɩɩ.

⁹ 'Nɩ a ‑yi sɔɔ nynä ‑mä, nyɩkpaa 'fɩɩn ‑wa nämnö lä gbenyenyii 'mnö nä, Laagɔɔ' 'Leyiduu 'mnö jaa, wa 'nöa ‑wʋ 'mʋ ‑kʋmʋ. Yio ‑a? A 'nä 'nyigë ‑lä 'flɛ a yëku ‑ɛɛn! ‑Wa nää lä ‑käpä ‑käpä nä, ɩyä ‑zlüü‑bʋbɔnyʋä ɩyä ŋnʋ‑ylänyʋä ‑yä wlu‑yläŋwnɩä, 'ŋʋʋ yɩ ŋwadii' lɔɔ ‑ɔ ‑yä ɔ lüŋwadi 'sɔ mʋʋ lä yëkuu' nä,

¹⁰ 'ŋʋʋ yɩ 'sɩɩ 'ghüghünyʋa, ɩyä ‑lɛɛ ‑guguënyʋa, ɩyä ‑bädaglusaa' nʋmnänyʋa, ɩyä nyɩkpa‑luglunyʋa, ɩyä 'glɩ käänyʋa 'sɔ nä, waa' ‑lä Laagɔɔ' 'Leyiduu 'mnö plä.

¹¹ 'Nɩ ‑lää' nyɩkpa‑cënä nä, anyɩa' nëëdëë' nyɩkpaa' ‑nänʋä ‑kʋmʋ bhä wamä 'bhisäkʋ. ‑Mä Kwlienyɔ Zozi Klisöö' 'ŋnöö 'mnö, Laagɔɔ' 'Wugɔɔ ya'anyɩ büda. Ʋ ya'anyɩ kpɔlʋä. Ʋ ‑gbä yɩ 'nɩ gbʋ ya'anyɩ 'wlu ‑bha.

Nyɩkpɔɔ' 'yɛkɛɛ ‑glö Kplɔɔkplɔɔ‑wugɔɔ' ‑bhutu

¹² ‑Ɛɛɛ! 'Zaazɩ, saa 'fɩɩn n ‑waa lä nä, n yi a sɔɔ nʋ ‑mä, saa 'fɩɩn‑ ‑wʋ nʋdä nää! Saa 'fɩɩn n ‑waa lä nä, n yi a sɔɔ nʋ, ‑mä nn' ‑lä mii n 'kä lʋʋ nʋ ‑yä n 'kä ʋʋ' geyu 'plö.

¹³ A ni lülülʋʋ nä, ʋ plöö‑ nyɩkpɔɔ' 'mnöö dä, 'nɩ nyɩkpɔɔ' 'mnö plöö‑ lülülʋʋ mʋdä. 'Nɩ Laagɔ yi gbä 'nɩ 'mnöö yi 'kʋ bhɩä, 'nɩ lülülʋʋ yi 'kʋ bhɩä. Nä nyɩkpɔɔ' 'yɛkɛ ɛɛ' ‑wʋ gbenyenyii' ‑za ‑lɔɔ ‑kʋ. Anyɩa 'yɛkɛɛ 'fɩɩn nä, kɛ ‑kʋ lä ‑lɔɔ Kwlienyɔɔ' ‑za. 'Nɩ Kwlienyɔɔ ‑kʋ lä 'sɩɩ ‑lɔɔ ‑anyɩa 'yɛkɛɛ' ‑za.

¹⁴ 'Nɩ Laagɔ, ‑ʋ gbä lä 'nɩ Kwlienyɔɔ ‑glɔɔ lä 'kuëë nä, ʋʋ' 'päwaa yi gbä 'nɩ ‑anyɩa 'yɛkɛɛ yi 'sɩɩ 'kuëë glɔɔ.

¹⁵ Aa' bhä sɔɔ ‑yi nynä ‑mä, anyɩa' 'yɛkɛɛ plöö‑ Kwlienyɔɔ' 'yɛkɛɛ 'pɛlʋ ‑a? Nä, 'yɛkɛnɛ ‑ɛ plöö‑ ylä Klisöö' 'yɛkɛɛ nä, sɩ ‑kʋ bhä 'nɩ n yie bhä ‑pɛɛ wlu‑yläŋnɔɔ' 'yɛkɛɛ' plüë? 'Nn ‑lä mii!

¹⁶ Aa' bhä sɔɔ ‑yi nynä ‑mä, nyɩkpɔ ‑yä wluyläŋnɔ 'sɔ kä yëkuu' mʋʋ nä, kɔ 'yɛkɛɛ ‑yä ‑lɔɔ' 'ŋnɔɔ 'yɛkɛɛ 'sɔ 'kplää, 'nɩ 'yäkö cikpɔɔ 'sɔ plö 'cë ‑bhlo ‑a? Kɩ ‑jɩjlɔ lä nynä ‑mä wa yi 'yɛkɛɛ ‑bhlo 'plö.

¹⁷ Nä nyɩkpɔ ‑yä Kwlienyɔ 'sɔ kä yɩ 'jɛnyɩ nä, 'wugɔɔ 'mnö ɔ ‑yɔsɔ yä ‑bhlo 'plö.

¹⁸ Naa, ŋnʋ‑ylälɩɩ ‑yä wlu‑ylälɩɩ, a ‑tanɩ 'yi. Nyenyii' 'cënänä nyɩkpɔ yi lä nʋ nä, ɩ 'mɩɔ ‑wʋ 'yɛkɛɛ. ‑Mä nyɩkpɔ kä ɔɔ' 'yɛkɛɛ 'kʋ 'bhlü 'nɩ ɔ kä 'ŋwnɩä tään, 'nɩ ɔ kä 'wlie tään nä, ɔ yëkuu' 'yɛkɛ ɔ nʋ lä nyenyi.

¹⁹ Anyɩa' 'yɛkɛɛ nä, aa' bhä sɔɔ ‑yi nynä ‑mä ɛ ‑glö Kwlienyɔɔ' Kplɔɔkplɔɔ‑wugɔɔ' ‑bhutu ‑a? Kplɔɔkplɔɔ‑wugɔɔ Laagɔ nyɩ'anyɩ lä nä, anyɩa 'yɛkɛɛ 'mnö ʋ ‑kʋ lä. Nä, anyɩ 'titii‑ yɩɔ a yëku ‑kä.

²⁰ Anyɩa' ‑za Laagɔ yä dlu 'kädʋ plʋʋ, 'nɩ ʋ kplɩɩ'anyɩ lä 'mʋ ‑yä a 'kä ʋʋ' lʋä 'plö. Ɩ ‑kʋ ylä sää nä, a 'bhlü anyɩa' 'yɛkɛɛ 'kʋ ‑yä a nʋ Laagɔɔ' 'ŋnu fään gbɩ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan