Bìoball air-loidhne

1 Kolɛtɩ‑dunyʋä 5 - GOD - u2

'Cɔcɩnyʋa nää ‑käpä ‑käpä

¹ Wa ci dää 'fɩɩn anyɩa ‑za nynä nyɩkpa ‑kʋ'anyɩ nëëdë 'nɩ wa nää ‑käpä ‑käpä. 'Nɩ nyɩkpaa' ‑lʋa 'titi ‑waa ‑wʋ lä 'cɔcɩnyʋä plöö‑ nä, 'klüü a nʋ lä nä, waa' nʋɩ ‑wʋ. N nuu‑ nynä ‑mä nyɩkpɔ ‑kʋ'anyɩ nëëdë 'nɩ ɔ ‑sä ɔ 'bä 'ŋnɔ.

² 'Sää wälɩ‑nyënyi ‑kʋ'anyɩ nëëdë 'nɩ a ‑kɩɩ 'nɩ a täkpɔnɩ 'mʋ! Kɩ 'kanyɩ bhlä yëkuu' kamä kpänyɩ ‑yä, ‑lɔɔ' nyɩkpɔɔ a 'kɔ 'cɔcɩɩ' 'tlü.

³ ‑Amʋ nä, n ‑tlʋ'anyɩ dä ‑mä 'naa plɛ ‑kʋ'anyɩ yëku. Kɩ ‑kʋ lä nynä ‑mä n ‑kʋ'anyɩ nëëdë. Naa, nyɩkpɔɔ' ‑lɔmɔ ‑ɔ ‑nʋ lä ‑lɔɔ' wälɩklëa nä, n yä wɛzä ɔɔ' wälɩɩ 'döö.

⁴ 'Tänyɩ a 'kä lä Kwlienyɔ Zozii 'ŋnöö 'mnö 'wlʋ 'wlää nä, n ‑kʋ'anyɩ yëku 'wugɔɔ mnö. 'Nɩ ɔɔ' 'päwaa 'ŋnöö 'mnö nä,

⁵ ‑lɔɔ' nyɩkpɔɔ, ɩ ‑ŋwa 'kʋ nynä ‑mä a kunöɔ 'Dëvlo ‑yä ɔɔ' 'yɛkɛɛ kä ‑nyimo ‑yä, Kwlienyɔɔ' 'Tite 'kädɛɛ pläylʋʋ 'kʋ nä, ‑lɔɔ' nyɩkpɔɔ' 'wuga 'kä ‑lɔɔ nëë' ‑bha.

⁶ Wälɩklëë' laa a 'kä lä 'mʋ täkpɔ nä, amää‑ ‑wʋ lä ‑lɔyɩ ‑kʋ. Aa' bhä sɔɔ ‑yi nynä ‑mä 'flɔɔ 'bhabha‑gwäzöpɛ gbä 'nɩ ʋʋ' tɩtɛ bha nä ‑yi ‑a?

⁷ Nä, ‑gɔgɔbhlää' 'bhabha‑gwäzöö' a ‑sɩɩ a yëku nëëdë ‑yä a kä kplɔɔ ‑yä a 'kä ‑lɛɛ ‑loluë 'plö. 'Nɩ, n ‑yi wɛzä 'sɩɩ sɔɔ nynä ‑mä Laagɔɔ' 'bhablöyuo, Klisö, ‑ɔ plöö‑ lä anyɩa Pakö‑glɩsɩɩsɩɛ nä, ɔɔ' 'cibhie ya'anyɩ kpɔlʋä.

⁸ Nä ‑glɩsɩɩsɩɛ' ‑jäkaa, a nʋa. ‑Mä ɛɛ' 'flɔɔ tɩtɛɛ 'mnö, aa' 'ŋʋ ‑lä ‑mɔɔ 'bhabha‑gwäzö. Gbenyenyii ‑yä ‑käpä ‑käpä 'sɔ 'nä kʋmʋ ‑lä ‑mɔɔ. ‑Lɔɔ' ‑glɩsɩɩsɩɛ nä, 'flɔɔ ‑ʋnö tɩtɛɛ ‑wʋ lä 'bhabha‑gwäzö ‑kʋ nä, ʋmʋ wa 'ninɩɛ lä 'mʋ. Nä, a ‑ya kʋ kplɔɔlɩ ‑yä ‑nʋawlɛ 'sɔ 'mnö.

⁹ 'Naa ‑bɔɔgʋʋ n ‑jɩjla'anyɩ lä nä, n ‑sonö'anyɩ ʋmʋ 'mnö nynä nyɩkpɔ kä ŋnʋ‑ylälɩ ‑yä wlu‑ylälɩɩ' dëbëa 'mnö ‑kʋ nä, a ‑yɔsɔɔ' nämnö ‑lä 'kʋ.

¹⁰ N cii‑ lä sɔɔ nä, ɩɩ' bhɔɔ plöö‑ nynä ‑mä 'ylʋzɔɔ' nyɩkpaa 'fɩɩn ‑wa nämnö ŋnʋ‑ylälɩɩ ‑yä wlu‑ylälɩɩ 'mnö nä, 'nɩ ‑wa ‑waa lä monii gbʋʋsä nä, ‑wa plöö‑ lä 'ghüghünyʋä nä, ɩyä ‑zlüü‑bʋbɔnyʋa nä, nn' bhɔɔ cii‑ nynä ‑mä a ‑yʋwa 'sɔɔ nämnö lä 'kwläkwlä sää 'kʋ. Sɔɔ ɩ kä bhä ‑kʋ nä, ka 'kä bhlä 'kɔɔnʋ 'mnö ‑bhaa.

¹¹ 'Bɔɔgʋʋ 'mnö nä, kä n ‑sonö'anyɩ lä nynä ‑mä, nyɩkpɔ kä cii‑ nynä ‑mä ɔ plöö‑ 'cɔcɩnyɔ, 'nɩ ɔ kä ŋnʋ‑ylälɩɩ ‑yä wlʋ‑ylalɩɩ 'sɔ 'mnö ‑kʋ nä a ‑yɔsɔɔ' nämnö ‑lä 'kʋ. N cii‑ 'sɩɩ nynä ‑mä, nyɩkpɔ kä 'cɔcɩnyɔ plöö‑ 'nɩ ɔ kä ghlü nä, a ‑yɔsɔɔ' nämnö ‑lä 'kʋ. N ‑sonö'anyɩ 'sɩɩ nynä ‑mä, nyɩkpɔ kä cii‑ nynä ‑mä 'cɔcɩnyɔ‑ ɔ plöö‑, 'nɩ ɔ kä zlüü bʋbɔɔ nä, a ‑yɔsɔɔ' nämnö ‑lä 'kʋ. Nyɩkpɔ kä 'sɩɩ 'cɔcɩnyɔ plöö‑ 'nɩ ɔ kä nyɩkpaa' kpʋkpɔlɩ ‑waa nä, a ‑yɔsɔɔ' nämnö ‑lä 'kʋ. 'Cɔcɩnyɔ kä 'sɩɩ kpänyɩ nʋ 'mnä nä, a ‑yɔsɔɔ' nämnö ‑lä 'kʋ. 'Cɔcɩnyɔ kä 'sɩɩ gbʋʋsä monii ‑waa nä, a ‑yɔsɔɔ' nämnö ‑lä 'kʋ. ‑Lɔɔ' 'cɔcɩnyɔɔ nä, a ‑yɔsɔɔ' lüü ‑lä 'sɩɩ 'kʋ.

¹² Nyɩkpaa' ‑lʋa ‑waa ‑wʋ lä Kwlienyɔɔ' 'cɔcɩɛ 'mnöö nyɩkpa plöö nä, ‑amʋʋ‑ 'gä bhɛ waa' wälɩɩ ‑döö ‑a? Yio! ‑Wanöö wälɩɩ' n yi lä ‑döölɩ mii nä, wamää‑ plöö‑ lä 'cɔcɩnyʋa.

¹³ ‑Mä ‑waa ‑wʋ lä 'cɔcɩnyʋä plöö‑ nä, Laagɔ 'titii‑, ʋmʋʋ‑ 'gwa lä 'tite 'ŋʋ. A ni, kɩ ‑jɩjlɔɔ lä nynä ‑mä, nyɩkpɔ ka'anyɩ nëëdë ‑kʋ 'nɩ ɔ kä ‑nyuu nä, a 'tlüo.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan