Bìoball air-loidhne

1 Kolɛtɩ‑dunyʋä 3 - GOD - u2

Laagɔɔ' ‑gänʋnyʋaa' ‑tëbhu
( 2 Kolɛ 6.4‑13 )

¹ Bhelie ‑yä bhɛŋwnɩänyɩ‑, 'tänyɩ n ‑yi 'nɩ n ‑sonö'anyɩ lä Laagɔwälɩɩ nä, n nö'anyɩ ‑wʋ 'kʋ bhlüü‑ nynä nyɩkpaa' lʋä ‑wa ‑kä lä Kplɔɔkplɔɔ‑wugɔɔ nä, 'ylʋzɔkʋnyʋää' 'yɛkɛ 'yɛkɛ a plöö‑ bhä. Aa' bhɔɔ Laagɔ ‑yi 'nɩ n ‑sonö'anyɩ lä. Klisöö' 'kʋgëlɩɩ 'mnö nä, ka ‑kʋ bhlä nynä 'yuë 'tɩkɩɩlɩä

² nä, bhlʋʋ n nyɩ'anyɩ lä ‑mä n nö'anyɩ ‑wʋ ‑jɛjɛsaa' ŋënü nyɛɛ‑. ‑Jɛjɛ‑ŋënü n ka'anyɩ bhä nyɛɛ‑ nä, ɩ nö'anyɩ ‑lä bhɔɔ 'mnö ŋwamä. 'Nɩ ‑zɩkä 'titi, ɩ nö'anyɩ lä 'mnö ŋwamä.

³ ‑Ɔnöza bhä? kä luëzü ‑yä cice 'sɔ ‑kʋ'anyɩ ‑lätee nëëdë nä, aa' ‑lätee 'cɩcɩ. Ka pana lä nynä ‑mää 'ylʋzɔɔ' nyɩkpa 'bhisäkʋ a ‑kʋ ‑lätee. Yio ‑a?

⁴ ‑Nɔnɔ ci lä nynä ‑mä ‑amʋ nä, Pɔlʋʋ' 'pɛlʋʋ n ‑kʋ lä! 'Nɩ ‑Nɔnɔ ci nynä ‑mä ‑amʋ nä, Apolɔsʋ 'pɛlʋʋ n ‑kʋ. A kä sɔɔ 'mʋ ‑sää nä, 'ylʋzɔkʋnyʋä 'cëa 'mä aa' bhä ‑kä ‑a?

⁵ 'Nɩ ‑ɔ plöö‑ bhä 'titi Apolɔsʋʋ? 'Nɩ ‑ɔ plöö‑ bhä Pɔlʋʋ? ‑Mä Laagɔɔ' ‑gänʋnyʋä‑ ‑a plöö‑ lä nä! ‑Anyɩ ‑gbä 'nɩ a ‑yibhë lä Laagɔ. 'Nɩ ‑anyɩa lobholɩɩ 'fɩɩn 'mnö nä, ‑tëbhuu Laagɔ nyɛɛ‑ lä nyɩkpɔ nyɩkpɔ nä, ʋmʋ ɔ ‑kä.

⁶ ‑Amʋ Pɔlʋ nä, kä n ‑goo lä, 'nɩ Apolɔsʋ ‑yi 'nɩ ɔ ŋʋʋ‑ lä ‑lɔɔ' gogolɩɩ 'nyu 'kʋ nynä ɩ 'kä 'pʋ. ‑Mä Laagɔ, ʋmʋʋ‑ ‑gbä 'nɩ ‑lɔɔ' gogolʋʋ pʋʋ‑ lä.

⁷ Nä, ‑ɔ goo lä nä, ɔɔ' ‑wʋ 'ŋnö ‑kä. 'Nɩ ‑ɔ ŋʋʋ lä 'nyu 'kʋ nä, ɔɔ' ‑wʋ 'sɩɩ 'ŋnö ‑kä. ‑Ɔ gbä lä 'nɩ ‑lɔɔ' gogolʋʋ pʋ lä nä, ɔmɔ ‑bhlo ‑kä lä 'ŋnö. Ɔmɔɔ‑ plöö‑ lä Laagɔ.

⁸ ‑Ɔ goo lä lʋʋ nä, 'nɩ ‑ɔ ŋʋ lä ‑lɔɔ' ‑lʋʋ 'nyu 'kʋ nä, wamä 'sɔ kä wa ‑bhlü. 'Nɩ nyɩkpɔ nyɩkpɔɔ' lebhee ɔ ‑nʋ lä nä, Laagɔ yio ɛɛ' ‑za plʋʋ.

⁹ ‑Anyɩ 'sɔ nä, kä ‑a ‑yä Laagɔ 'sɔ 'jɛnyɩ‑ 'nɩ a nʋ lä ʋʋ' lebhee. 'Nɩ anyɩ nä, ka ‑kʋ la nynä ‑mä Laagɔɔ' 'klä, 'nɩ a ‑kʋ lä 'sɩɩ nynä Laagɔɔ' 'slä 'slä ‑bhutu.

¹⁰ Sä Laagɔ nyɛɛ'ɛ lä nä, sɔɔ n bhlüü‑ 'kʋ 'nɩ n yi lä ʋʋ' ‑bhutuu glu pään. 'Nɩ 'yigäda‑nyɩkpɔ yiu lä 'slä kää yi. ‑Maa, nyɩkpɔ nyɩkpɔɔ' sä ɔ slä lä nä, ɔ fä sɔɔ plɛ.

¹¹ ‑Bhutuu nä, Zozi Klisö 'mnö n pänʋ‑ lä glu. Nä, 'yigäda‑nyɩkpɔɔ' yi lä 'nɩ ɔ 'kä 'yigädada ‑bhutu glu pään.

¹² Naa, ‑bhutuu ‑ʋ pänöɔ lä Klisö 'mnö glu nä, nyɩkpɔ kä ‑yi 'nɩ ɔ kä ‑lɔɔ 'slää nä, ‑sikaa' ɔ yi bhɛ ‑lɔɔ 'slää ‑o, ‑sika 'päpää' ɔ yi bhɛ ‑lɔɔ 'slää ‑o, 'ŋnumʋ‑cɛkwɩɩ' ɔ yi bhɛ ‑lɔɔ 'slää ‑o, sii' ɔ yi bhɛ ‑lɔɔ 'slää ‑o, ‑patɩɩ' ɔ yi bhɛ ‑lɔɔ 'slää ‑o, ŋazɩɩ' ɔ yi bhɛ ‑lɔɔ 'slää ‑o,

¹³ nyɩkpɔ nyɩkpɔɔ' lebhee ɔ ‑nʋ lä nä, ɛ yi 'yi nio. Laagɔɔ' 'tite 'kädɛɛ' pläylʋʋ 'kʋ nä, ɛɛ' wälɩ yi yibhënöɔ wɩa. ‑Lɔɔ' lebhee Laagɔɔ' ‑kosuu yie pana 'nɩ, nyɩkpɔ nyɩkpɔɔ' lebhee' sä ɛ ‑kʋ lä nä, sɔɔ yi 'yi nio.

¹⁴ 'Nɩ ‑ɔnö lebhee ‑lä lä si nä, Laagɔ yio bɔɔ 'pä.

¹⁵ ‑Mä ‑ɔnö lebhe‑ gä ‑kosuu 'mnö ‑sii nä, bɔɔ ɔ 'kä bhlä 'ni nä, ɔ yiu të. ‑Lɔɔ' nyɩkpɔɔ yi ‑lɔɔ nëë' ‑bha 'flɛ ‑mä, kɩ ‑kʋ lä nynä ‑mä ‑vluu 'kʋ ɔ ‑bha. Kɔ ‑kʋ lä nynä lɔɔ‑ ‑bha ‑kosu‑düdë nëë' nä.

¹⁶ Aa' bhä sɔɔ ‑yi nynä ‑mä, a ‑glö Laagɔɔ' ‑bhutu nä, anyɩ 'mnö Kplɔɔkplɔɔ‑wugɔɔ ‑kʋ ‑a?

¹⁷ Nyɩkpɔ kä ‑kä Laagɔɔ' ‑bhutuu ‑wlä nä, Laagɔ yio nuë. Laagɔɔ' ‑bhutu nä, kʋ ‑kplɔɔ. 'Nɩ anyɩ‑ plöö‑ lä Laagɔɔ' ‑bhutuu.

¹⁸ Nä, nyɩkpɔ 'nä 'nyigë ‑lä ɔ yëku. Anyɩa' nëëdë, nyɩkpɔ kä ‑mɔɔ ‑kʋ 'nɩ ɔ kä cii‑ nynä ‑mä ‑mää 'ylʋzɔɔ' dɩgälɩɩ 'mɩ ɔ ‑kä nä, ɩ ‑ŋwa 'kʋ nynä ‑mä ‑lɔɔ' nyɩkpɔɔ bämä 'fɩa ‑yä ɔ 'kä dɩgälɩɩ 'titi kään.

¹⁹ ‑Ɔnöza bhä? ‑Mää 'ylʋzɔɔ' dɩgälɩɩ nä, ɩ ‑glö dëbë Laagɔ dëlü. Ɩmɩɩ‑ ‑kä 'ŋnö 'nɩ Laagɔ‑bɔɔgʋʋ ci lä nynä ‑mä, Dɩgälɩ‑käänyʋa' ‑kpläkpla 'mnö, ‑Mɔɔ Laagɔ ghlää 'nɩ ʋ klʋwa.

²⁰ Ɩ ‑jɩjlɔ 'sɩɩ ‑mɔɔ nynä ‑mä, Dɩgälɩ‑käänyʋa' sä wa bhobho lä nä, Kä Laagɔ ‑yi sɔɔ. 'Nɩ ʋ ‑yi sɔɔ nynä ‑mä waa' dɩgälɩɩ' ‑wʋ gba ‑kä.

²¹ Naa, nyɩkpɔɔ' täkpɔɔ ‑lä nyɩkpɔɔ'. Ɩyä a yibhë 'sɩɩ sɔɔ nynä ‑mä kʋkʋlɩɩ 'fɩɩn ‑glö anyɩa' lɩɩ.

²² 'Kɔɔnʋ 'mnö ‑o, zëkpënä 'mnö ‑o, 'kwiee 'tänyɩ ‑o, ‑zee ‑o, ‑amʋ Pɔlʋ, n ‑yä Apolɔsʋ, ‑yä Pɩɛlö nä, ‑anyɩ 'fɩɩn ‑a plöö‑ anyɩa' nyɩkpa.

²³ ‑Mä anyɩ nä, a yibhë sɔɔ nynä ‑mä a ‑glö Klisöö' lʋä. 'Nɩ Klisö ‑yi 'nɩ ɔ plöö‑ lä Laagɔɔ' lɔɔ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan