Bìoball air-loidhne

1 Kolɛtɩ‑dunyʋä 2 - GOD - u2

Klisöɔ wa ‑bhoo lä 'kusuu 'yi nä ɔɔ' yëkuu' 'dö ‑a sää lä

¹ ‑Amʋ 'titi nä, bhelie ‑yä bhɛŋwnɩänyɩ‑, 'tänyɩ n ‑yi'anyɩ lä nëëdë 'nɩ n lü bhlä Laagɔɔ' ‑dläfʋɛɛ nä, nn' ‑wʋ wälɩ‑yibhëlɩ 'mnö ‑ghlää. Nn' ‑wʋ 'sɩɩ 'fikee 'cënänä 'mnö ‑ghlää.

² N ‑kʋ'anyɩ bhlä nëëdë nä, Zozi Klisö ‑bhlo 'coo n tään bhä nynä n 'kä bhä yibhë. Zozi Klisö‑ wa ‑bhoo lä 'kusuu 'yii nä, ɔmɔ ‑bhlo 'coo, n ‑tään nynä ‑mä n 'kä yibhë.

³ Ɩmɩɩ‑ ‑kä 'ŋnö 'nɩ n ‑kʋ'anyɩ bhlä nëdë 'nɩ nn' bhɔɔ lä ‑cʋcʋ ‑kä. 'Nɩ ‑ŋänö ‑kʋ'ʋ bhä 'sɩɩ pleyii nä, kä 'naa 'yɛkɛɛ tɩtɛnö'ö bhä yëku.

⁴ 'Naa ciciwälɩɩ ‑yä 'naa cɩalɩɩ 'mnö nä, nn' ci bhɔɔ nynä ‑mä n 'kä wälɩ‑yibhëlɩɩ' ghlää ‑yä n 'kä nyɩkpa‑dɩgälɩɩ 'gë 'ŋʋʋ ‑yä nyɩkpa kä'ä ŋomä. ‑Mä kä Kplɔɔkplɔɔ‑wugɔɔ 'titi pana‑ ʋʋ' 'päwaa 'naa ciciwälɩɩ mnö

⁵ ‑yä anyɩa' pɔlötɛtɛɛ 'kä Laagɔɔ' 'päwaa 'mnö sä see ‑yä ɛɛ' kä ‑kä ‑mää 'ylʋzɔɔ' nyɩkpa‑dɩgälɩɩ 'tënö.

Dɩgälɩnɩ bha Laagɔ yëku

⁶ ‑Mä ɩ ‑kʋ 'sɩɩ sɔɔ 'nɩ, 'cɔcɩnyʋa‑ yä lä pɔlötɛtɛɛ 'mnö glɛɛ nä, dɩgälɩ‑cëa ‑bhlo ‑a cɩwa‑. ‑Mä dɩgälɩnɩɩ' ‑wʋ ‑mää 'ylʋzɔɔ' dɩgälɩ plöö‑. 'Nɩ ɩɩ' ‑wʋ 'sɩɩ 'kɔɔnʋ 'mnö 'tɛtɩkä ‑zizinyeyii' dɩgälɩ plöö‑.

⁷ ‑Anyɩ nä, Laagɔɔ' dɩgälɩɩ nyɩkpaa' 'nu ‑wʋ lä 'mʋ nä, 'nɩ ‑ɩ ‑ziozio lä 'kʋ nä, ɩmɩ ‑a cɩa lä. 'Kɔɔnʋʋ' ‑lätee wlʋʋ‑ 'nɩ Laagɔ wlʋa‑ lä ‑lɔɔ' dɩgälɩɩ ‑yä ɩ 'kä ‑anyɩa 'klʋagba nʋ.

⁸ 'Nɩ ‑mää 'ylʋzɔɔ' 'päwö‑känyʋaa' 'kʋʋ nyɩkpɔ ‑bhlo 'coo ‑wʋ ‑lɔɔ' dɩgälɩɩ ‑kä. Wa kä bhä dɩgälɩnɩ ‑yibhë nä, Kwlienyɔɔ ‑kä lä 'klʋagbaa nä, wa 'nöɔ ‑lä bhɔɔ 'kusuu 'yi bhoo.

⁹ Ɩ ‑jɩjlɔ Laagɔ‑bɔɔgʋʋ 'mnö nynä ‑mä, Wälɩɩ' ‑nɩnɩ ‑kʋ ‑lɔɔ 'nɩ 'Yi 'nɩ ‑läzä 'yi 'ni 'nɩ 'Nyukwli 'nɩ ‑läzä 'nu. 'Nɩ nyɩkpɔ 'nɩ ‑läzä bhobho. ‑Mä kɩ ŋʋɔ‑ lä nynä ‑mä Nyɩkpaa‑ ‑waa Laagɔ nä Wamä ‑bhlo 'coo‑, Wamää‑ ‑lä yibhënɩ.

¹⁰ ‑Lää' wälɩnɩ 'fɩɩn nä, ‑anyɩ‑ Laagɔ 'Wugɔɔ panɩ‑ lä. Wälɩ 'fɩɩn ‑kʋ lä 'nɩ ‑ɩ ‑zizio lä 'kʋ nä, kä Laagɔɔ' Kplɔɔkplɔɔ‑wugɔɔ ‑yii.

¹¹ ‑Mää 'ylʋzɔɔ nä, nyɩkpɔ ‑sä ‑yi bhä ɔ ‑liee' pleyii wälɩɩ? Nyɩkpɔɔ' 'wugɔ 'mʋʋ‑ ‑yi lä ɔɔ' pleyii wälɩ. Sɔɔ ‑säkä wälɩɩ 'fɩɩn‑ plöö‑ lä Laagɔɔ' lɩɩ nä, nyɩkpɔ 'nɩ ‑wʋ ‑yi 'nɩ ‑ɔnö Laagɔɔ' 'Wugɔɔ ‑bhlo.

¹² ‑Anyɩ nä, ‑mää 'ylʋzɔɔ' 'wugɔɔ 'mʋ ‑aa ‑wʋ ‑kä. 'Wugɔɔ ‑ʋ bha lä Laagɔ yëku nä, ʋmʋ ‑a ‑kä lä, nä sä Laagɔ nyɩ‑anyɩ lä nä, ‑a ‑yi sɔɔ.

¹³ ‑A gä ci nä, nyɩkpa‑dɩgälɩɩ 'mɩɩ‑ cɩa‑anyɩ ‑wʋ ‑mä Laagɔɔ' 'Wugɔɔ 'mʋʋ‑ cɩa‑anyɩ. Nä ‑a gä Laagɔ yëkuu' wälɩklë ‑zɔɔ ‑sä nä, 'Wugɔnʋ 'mʋʋ‑ paa‑anyɩmɩ wälɩ nëë' 'nɩ ‑a sɩɩ lä ‑zɔɔ.

¹⁴ Nyɩkpɔɔ' lɔɔ‑ ‑ɔ bhobho lä nyɩkpasä ‑bhlo 'coo nä, 'klüü‑ bha lä Laagɔɔ' 'Wugɔɔ' nëë' nä, ‑lɔɔ' nyɩkpɔɔ' ŋoonɩ ‑wʋ 'kʋ. Ɔmɔɔ' ‑za nä, ɩ ‑glö pɔlö‑bhlägbɩ nä, ‑lɔɔ' wälɩɩ ɔɔ' 'nui ‑wʋ 'mʋ. ‑Ɔnöza bhä? 'Wugɔɔ 'mnö, ‑mɔɔ ‑tɛɛ nyɩkpɔ yi lä ghlää 'nɩ ɔ yi lä ‑lɔɔ' wälɩɩ 'mʋ 'nu.

¹⁵ ‑Mä nyɩkpɔ kä Laagɔɔ' 'Wugɔɔ ‑kä nä, wälɩɩ 'fɩɩn plö lä 'kʋ nä, kɔ nui 'mʋ. Ɔ ‑yi sɔɔ nynä ‑mä, 'klünö nää, 'nɩ 'klünö ‑nyu. 'Nɩ nyɩkpɔ 'nöɔ ‑lä 'kɔɔn gbʋ klaa.

¹⁶ Kɩ ‑jɩjlɔ Laagɔ‑bɔɔgʋʋ 'mnö nynä ‑mä, Sä Kwlienyɔ Laagɔ bhobho lä nä, Nyɩkpɔ ‑sä yi bhä sɔɔ? Nyɩkpɔ yi bhä Kwlienyɔ dɩgälɩ pana ‑a? Yio! ‑Maa, Zozi Klisöö' sä ɔ bhobho lä nä, ‑anyɩ ‑mä 'sɩɩ sɔɔ ‑a bhobho lä.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan