Bìoball air-loidhne

1 Kolɛtɩ‑dunyʋä 16 - GOD - u2

Wa pä 'kwänɩsɩ Zolizalɛmʋduu' 'cɔcɩnyʋa ‑za

¹ ‑Ɔ plöö‑ ylä Zolizalɛmʋduu' 'cɔcɩɛɛ' kwänɩsɩɛɛ' bʋʋlɩɩ' nä, sä n paa‑ lä Galatɩ‑bhlɩɛ 'mnö 'cɔcɩnyʋa nä, anyɩ ‑mä 'sɩɩ a nʋ sɔɔ.

² 'Sɔlɩcëa kä bhɔ nä, cie yɩ aa' tɛɛtɛɛylʋʋ 'kʋ ‑aaa nä, nyɩkpɔ nyɩkpɔɔ' gbëë', ɔ gboguë ɔɔ' kwänɩsɩɛ' monie. A 'nä ‑bɛɛ ‑lä 'fɩa 'naa yiylʋʋ ‑yä a 'kä kwänɩsɩ‑monii bʋʋ.

³ N kä ‑yi nä, nyɩkpaa' ‑lʋa a 'kä lä ‑sä nä, n yiwa Zolizalɛmʋduu' lobho. N yiwa 'bɔɔgʋ 'kʋ gbɛɛ 'nɩ wa yi ‑mɔɔ anyɩa' kwänɩsɩɛ fä.

⁴ Ɩ kä plöö‑ nynä ‑mä n yi ‑mɔɔ mʋ ‑amʋ 'titi nä, wa ‑yamʋ 'sɔ yi ‑mɔɔ mʋ.

Pɔlʋ lä ɔ 'kä lowudii' ‑nɩnɩ 'kʋ mʋ

⁵ N kä anyɩa' duu' yi nä, Masedʋanö‑bhlɩɛ 'mnö n 'kä lä ghlää. Ɛmɛ 'mnö n 'kä lä ghlää ‑yä n 'kä yi.

⁶ N kä ‑yi nä, n yi'anyɩ yëku kʋ ylɩɩ zioo' ‑za. N 'nö 'kʋ 'mänyɩ nä, n yi'anyɩ yëku kʋ ‑aaa 'nɩ 'nyugozo yi 'plö ɩyä a kä'ä 'kʋ yi ‑yä n 'kä 'naa ‑blɔɔ 'yi gëë.

⁷ Nä 'plöplösä nn' yi'anyɩ ‑wʋ lä yëku. Laagɔ kä ‑gbä nä, n yi'anyɩ 'pɛpɛlɩä yëku gwlɛɛ.

⁸ ‑Mä Efɛzɩduu' n 'kä lä kʋ ‑aaa ‑yä Patekɔtö‑glɩsɩɩsɩɛ 'kä ŋëë.

⁹ 'Naa lebhee' ‑za nä, Efɛzɩduu yä 'klʋ känöɔ wɩa ‑mä, 'naa ‑zɔhlɛgbänyʋaa' ‑wʋ 'sɩɩ ‑mɔɔ ‑zunɔɔ' 'bɛ.

¹⁰ Timotee ka'anyɩ yëku ‑yi nä, a gbä ‑yä ‑ŋänöö kɔ ‑kä 'bhlä ‑mä, Kwlienyɔɔ' lebhee 'mɛ ɔ nʋ lä ‑amʋ 'bhisäkʋ.

¹¹ Nä nyɩkpɔɔ' wlonöɔ ‑lä ‑dʋdʋkʋ. A 'nyɩɔ saa 'fɩɩn ‑yä ɔ kä'ä ‑mää yëku ŋëë 'kʋ wɔtɔlɩɩ 'mnö. N ‑yä ‑mää' bhelia 'sɔ ‑a ‑bɛnöɔ.

¹² ‑Ɔ plöö‑ lä bheli‑ Apolɔsʋ nä, n ‑sonöɔ nynä ɔ ‑yä bhelia 'sɔ yi'anyɩ 'yi 'ni kää, ‑mä ɔɔ' ‑lätee ‑ghlɩlɩ. ‑Ɔ kä 'casɩ nii‑ nä, ɔ yi ‑mɔɔ yi.

Bhlüüdää' wälɩklü ‑yä bhääwälɩ

¹³ Aa' ŋɔɔ lä ‑mä a gblɩmä, ɩyä anyɩa' pɔlötɛtɛɛ see 'nägäsä sä. A tɛmä 'yikʋ ‑yä a kään 'tɛtɩ.

¹⁴ Ɩyä sa 'fɩɩn a yi lä nʋ nä, a nʋʋ sɔɔ ‑wawʋʋ 'mnö.

¹⁵ Bhelie ‑yä bhɛŋwnɩänyɩ‑, a ni bʋkʋ wälɩklë ‑bhlo, amä n 'kanyɩ lä soo. A ‑yi sɔɔ nynä ‑mä, ‑mɔɔ Akayiibhlɩ 'kʋ nä, Sɩtefanasö ‑yä ɔɔ' gbünyʋa, wamää‑ ‑yi lä tɛɛ Kwlienyɔɔ' ‑blɔɔ 'kʋ, 'nɩ wa ‑klää lä 'cɔcɩnyʋa ‑aaa.

¹⁶ Nä, ‑lɔɔ' nyɩkpa‑cëa, ɩ ‑ŋwa 'kʋ nynä ‑mä wa 'ŋʋwa kpänyɩ 'klʋkpä. Ɩyä nyɩkpaa 'fɩɩn wa ‑yʋwa 'sɔ nʋʋ lä lebhe 'kʋ nä, wa kʋ 'sɩɩ 'klʋkpää.

¹⁷ Sɩtefanasö, ‑yä Fɔtunatusö, ‑yä Akayikusö, wa ‑yi'i lä ‑mää 'yi 'ni 'kää nä, ɩ nʋ'ʋ kpänyɩ ‑pʋpɛ. Wa ya'anyɩ bhlëë' 'ŋʋʋ.

¹⁸ Wa yä gbä 'naa plɛ yä bhlü, 'nɩ anyɩ ‑mä 'sɩɩ anyɩa' plɛ yä bhlü. Nä ‑lɔɔ' nyɩkpa‑cëa' 'nää wa nʋ lä nä, a yibhënöa.

¹⁹ Azii‑bhlɩɛ 'mnö 'cɔcɩnyʋa lä wa bhänö'anyɩ. Akilasö ‑yä ɔ 'ŋnɔ Plisii 'sɔ, wa ‑yä 'cɔcɩnyʋa ‑wa 'wlää lä waa' 'gbëa 'mnö 'wlu nä, wa bhänö'anyɩ kpänyɩ Kwlienyɔɔ' 'ŋnöö 'mnö.

²⁰ Bhelia ‑yä bhɛŋwnɩa 'fɩɩn, wa bhänö'anyɩ. Anyɩ ‑mä 'sɩɩ, a bhänö ‑bhänö ‑yä a gbëë ‑gbëë bheli‑wawʋʋ 'mnö.

²¹ ‑Amʋ Pɔlʋ, ‑amʋ 'titii‑ jɩjlä lä 'klünö. N bhänö'anyɩ.

²² Kä nyɩkpɔ kä ‑lɔɔ ‑kʋ 'nɩ ɔ 'nö Kwlienyɔ ‑waa nä, ‑lɔɔ' nyɩkpɔɔ ‑muzue ŋënöɔ. Malanata! (‑Anyɩa Kwlienyɔ‑, ‑n yi!)

²³ Kwlienyɔ Zozii' 'nyupälɩɩ ŋënö'anyɩ 'kʋ.

²⁴ Anyɩ 'fɩɩn, n ‑waa'anyɩ Zozi Klisöö' 'ŋnöö 'mnö.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan