Bìoball air-loidhne

1 Kolɛtɩ‑dunyʋä 15 - GOD - u2

Klisöö' 'kuëë glɔɔlɩɩ' wälɩ

¹ Bhelie ‑yä bhɛŋwnɩänyɩ‑, Kwlienyɔɔ' 'Nägädöö n ‑sänö'anyɩ lä, 'nɩ a nämnö lä 'mnö nä, ɩɩ' ‑za, kä n luënö'anyɩ lä bʋkʋ.

² Sä n ‑sonö'anyɩ lä nä, sɔɔ a kä 'zaazɩ nää nä, ɩmɩ 'mnö anyɩa' puëlɩ ‑kʋ lä. 'Nɩ ‑ɔnö yɩ sɔɔ nä, 'flɛflɛsaa' pɔlötɛtɛ a ‑kä lä.

³ 'Klüü 'fɩɩn wa cɩä'ä lä nä, ɩmɩɩ n cɩa'anyɩ lä. Kä Laagɔ‑bɔɔgʋʋ ci lä nynä ‑mä Klisö ‑anyɩa' nyenyii' ‑zä ɔ kuu lä.

⁴ ‑Mä ɔ kuu‑ 'nɩ wa ‑ziozio lä nä, tanaylʋʋ kɔ ‑glɔɔ 'kuëë.

⁵ Ɔ ‑glɔɔ lä 'kuëë nä, ɔ ‑ghlä Pɩɛlö 'yii, 'nɩ ɔ ‑ghlä ɔɔ' lobho lobhonyʋa 'kʋgbä 'sɔ 'yii.

⁶ Bʋkʋ 'nɩ ɔɔ' 'kʋgënyʋää' gwlɩ ‑ngbüü' 'ci ‑ngbü (500) 'nɩ wa pään 'kʋ, ɔ ‑ghlʋwa 'yii. Waa' bhutukpä ‑yä ‑lätee, 'nɩ bhloo bhlolʋä yä 'ku.

⁷ Kwlienyɔɔ ‑ghlä 'sɩɩ Zakö 'yii, 'nɩ ɔ ‑ghlä ɔɔ' lobho lobhonyʋa 'fɩɩn 'yii.

⁸ 'Nɩ ‑lää bhɩädänä, ‑amʋ 'titi, ‑amʋ mɔ ‑ɔɔ ‑wʋ lä 'kwläkwlä 'sää lʋʋ plöö‑ nä, ɔ ‑ghlä'ä 'sɩɩ 'yii.

⁹ Kwlienyɔɔ' lobho lobhonyʋa 'fɩɩn, ‑amʋʋ‑ plöö‑ lä waa' nëëdë ‑lɛ 'tɩkɩɩlɛɛ. 'Nɩ nn' ‑wʋ 'kʋ ‑ŋwa nynä ‑mä wa lä'ä Kwlienyɔɔ' lobho lobhonyɔ. ‑Ɔnöza bhää? Kpänyɩ n nyɛɛ‑ Laagɔɔ' 'cɔcɩɛ nyäkälɩ.

¹⁰ Laagɔɔ' ‑bɔɔ 'nɩ n ‑kʋ lä 'naa sä n ‑kʋ lä nä. 'Nɩ 'nää ‑laa Laagɔ ‑nʋʋ'ʋ lä nä, n 'nöa ‑wʋ sɩɩ 'flɛ ‑kä. Kä n ‑ghlänöa 'mnö 'nɩ n ‑nʋ lebhe. Kä n ‑nʋ lebhe 'nɩ n ‑zi Kwlienyɔɔ' lobho lobhonyʋa 'fɩɩn. 'Nɩ ‑lɔɔ' lebhee, ‑amʋ 'titii‑ 'nɩɛ ‑wʋ ‑nʋ ‑mä Laagɔɔ' plɛkʋmɛnɔɔ' ‑bɔɔ 'nɩ ɛ ‑nʋɔ lä.

¹¹ Nä, ‑amʋ ‑o, wamä ‑o, ɩmɩ nn' ci yɩɔ. ‑Mä wälɩɩ ‑a plö 'nɩ ‑a ci lä nä, ɩmɩ a ŋoo‑ lä 'kʋ 'nɩ a ŋʋʋ‑ lä 'sɩɩ anyɩa' pɔlötɛtɛɛ 'kʋ.

'Kudukuaa' 'kuëë glɔɔlɩ

¹² 'Nɩ ‑anyɩa cɩalɩɩ 'mnö nä, a ci kä nynä Klisö ‑glɔɔ 'kuëë, 'nɩ nyɩkpa ‑kʋ'anyɩ bʋkʋ nëëdë 'nɩ, wa ci nynä ‑mä 'kudukuëë' glɔɔ ‑wʋ 'kuëë. ‑Ɔnöza bhää?

¹³ 'Kudukuë 'nö 'kuëë glɔɔ nä, kɩ plöö‑ lä nynä ‑mä Klisö ‑mä 'sɩɩ ɔɔ' ‑wʋ 'kuëë ‑glɔɔ.

¹⁴ 'Nɩ Klisö 'nö yɩ 'kuëë ‑glɔɔ naa, ‑anyɩa Laagɔwälɩɩ cilɩɩ ‑glö yɩ 'flɛ. Bʋkʋ 'nɩ anyɩa' pɔlötɛtɛɛ ‑glö yɩ 'sɩɩ 'flɛ.

¹⁵ Ɩ yi 'sɩɩ 'plö nynä ‑mä ‑a gä ci nynä Laagɔ ‑gbä 'nɩ Klisö ‑glɔɔ 'kuëë nä, ‑kpläkplö ‑dläfʋɛ ‑a lü lä Laagɔ dëlü. Ɔnöza bhää? Sä 'Kudukuëë' glɔɔ ‑wʋ lä 'kuëë nä, Klisöö' ‑wʋ 'kuëë ‑glɔɔ!

¹⁶ 'Kudukuë 'nö 'kuëë glɔɔ nä, Klisö ‑mä 'sɩɩ, ɔɔ' ‑wʋ 'kuëë ‑glɔɔ.

¹⁷ 'Nɩ Klisö 'nö ylä 'kuëë ‑glɔɔ nä, anyɩa pɔlötɛtɛɛ ya'anyɩ 'nyigë nä, anyɩa' nyenyii a ‑kʋɩ lätee 'mnö.

¹⁸ 'Nɩ 'cɔcɩnyʋa 'fɩɩn ‑wa ŋoo‑ lä 'fɩa Kwlienyɔ 'kʋ 'nɩ ‑wa kuu‑ lä nä, kä wa yä ylä too.

¹⁹ Nä, ‑anyɩa pɔlötɛtɛɛ ‑a gɛ Kwlienyɔ 'kʋ ŋʋʋ‑ ‑mää zëkpëkʋ ‑bhloo' za nä, ‑a yi ŋäzö 'kʋ kamä kpänyɩ 'nɩ ‑a yi nyɩkpaa 'fɩɩn zi.

Zozi Klisö 'mɔɔ‑ ‑glɔɔ lä tɛɛ 'kuëë

²⁰ ‑Mä 'zaazɩ nä, Kwlienyɔɔ ‑glɔɔ 'kuëë. Nyɩkpaa 'fɩɩn ‑wa yä lä 'ku nä, Klisö 'mɔɔ‑ plöö‑ lä waa' tɛɛtɛɛlɔɔ‑ ‑glɔɔ lä 'kuëë nä.

²¹ 'Kwiee nä, nyɩkpɔ ‑bhlo 'kʋ ɛ ‑ghlää 'nɩ ɛ ‑yi lä 'ylʋzɔɔ. Bʋkʋ nä, nyɩkpɔ ‑bhlo 'kʋ 'kudukua' glɔɔlɩɩ 'bhää‑ 'nɩ ɩ ‑yi lä 'sɩɩ 'ylʋzɔɔ yi.

²² Sä nyɩkpa 'fɩɩn ‑yä Adää 'sɔ 'jɛnyɩ‑ lä nä ɩɩ ‑zä wa ku lä. ‑Mä Klisö 'mnö nyɩkpaa' 'fɩɩn yi 'kuëë glɔɔ.

²³ ‑Mä sɩ 'kä bhä 'kʋ 'plöö? Klisö, ‑ɔ ‑glɔɔ lä tɛɛ 'kuëë nä, ɔ kä 'ylɩbhɔ‑ 'nɩ ɔ kä ‑yi nä, nyɩkpaa 'fɩɩn‑ plöö‑ lä ɔɔ' lʋä nä, wa yi 'sɩɩ 'kuëë glɔɔ.

²⁴ ‑Nɩnɩ kä yɩ plöö‑ nä, zëkpëa' bhɩädä yä ŋëë. Kʋkʋlɩɩ 'fɩɩn ‑ɩ kʋ 'nɩ ‑ɩ 'kämä lä nä, ‑ɩ ‑kä lä 'tɛtɩ 'nɩ ‑ɩ ‑kä lä 'päwä nä, Kwlienyɔɔ yii nuë. 'Nɩ ‑lɔɔ 'päwaa, ɔ yia Laagɔ dëlü ‑lä. Laagɔ‑ plöö‑ lä ɔ 'Bä.

²⁵ Ɩ ‑ŋwa kʋ nynä ‑mä Klisö 'mɔɔ‑ lä kään 'leyi‑päwa, ‑yä tänyɩ kä ‑lɔɔ kʋ ‑yä Laagɔ 'kä ɔɔ' ‑zɔbhlɛgbänyʋa 'fɩɩn ɔɔ' 'kʋnämnö‑gwädɛ 'kʋ nʋ.

²⁶ ‑Maa, Kwlienyɔɔ' ‑zɔbhlɛgbänyʋa' gbäbhɩälɔɔ ‑ɔ 'kä lä nuë nä, ɔmɔɔ‑ plöö‑ lä 'kwie.

²⁷ ‑Ɛɛɛ, Laagɔ yä ɔɔ' ‑zɔbhlɛgbänyʋa 'kʋ nämnö ‑gwädɛ 'kʋ nʋ ‑mä, 'tänyɩ Klisö 'kä lä ci nynä ‑mä, ‑ɔmɔɔ‑ 'tie yɩ ‑lɩɩ 'fɩɩn nä, ‑a ‑yi 'sɩɩ 'sɔɔ nynä ‑mä ɔɔ' 'kämä ‑wʋ ɔ 'Bä Laagɔ.

²⁸ Klisö kä ‑lɩɩ 'fɩɩn 'kämä nä, sä ɔmɔɔ‑ plöö‑ lä Laagɔɔ' ‑Yowli nä, 'nɩ Laagɔ 'mɔɔ nyɩɔ‑ lä 'sɩɩ ‑lɩɩ 'fɩɩn 'kämädä nä, ɔɔ' ‑lä mii 'nɩ ɔ 'kä Laagɔ 'kämä. Ɩ ‑kʋ ylä 'sää nä, Laagɔ 'mɔɔ‑ 'gä ylä ‑lɩɩ 'fɩɩn 'kämä.

²⁹ Nyɩkpaa' ‑lʋa ŋʋ lä 'nyu 'wlu 'kudukuaa' ‑za nä, 'klë ‑sä wa tään bhää? 'Kudukuë 'nö 'kuëë glɔɔ nä, 'klë ‑sä ‑kä bhä 'ŋnö 'nɩ wa nʋ bhä 'sɔɔ?

³⁰ 'Nɩ ‑anyɩ 'titi, 'klë ‑sä ‑kä bhä 'ŋnö 'nɩ ‑a ‑kʋ bhä 'kɔɔkɔ ‑vluu 'kʋ?

³¹ ‑Ɛɛɛ, 'zaazɩ bhelie ‑yä bhɛŋwnɩänyɩ‑, ylɩɩ 'fɩɩn 'kʋ nä, n ‑kʋ 'kwiee numnu 'kʋ. ‑Bhlɛ sa ‑yä Zozi Klisö ‑anyɩa Kwlienyɔɔ' 'sɔ 'jɛnyɩ lä nä, ɩ ‑kʋ sɔɔ 'nɩ n täkpɔnö'anyɩ lä 'mʋ.

³² Nyɩkpɔɔ' ‑zä n kä bhä sɔɔ nʋ nä, ‑ɔ 'gä bhɛ 'ŋnö kää ‑yä n ‑yä vëvëmna 'sɔ 'kä bhɛ Efɛzɩduu' vëë? 'Kudukuë 'nö yɩ 'kuëë glɔɔ nä, a ‑ya lü ‑yä ‑a 'mnä ‑mä ‑zëkü ‑a yi 'ku.

³³ A lüë ‑kä ‑mä, nyɩkpɔɔ' 'nägälɔɔ ‑yä nyɩkpa ‑nyonyuë 'sɔ kä 'kʋ nämnö nä, kä waa' ‑nyunɔɔ 'plönöɔ ‑kä!

³⁴ Nä, a 'ylɩbhɔ ‑yä a nʋ bʋkʋ anyɩa' 'nägägbɩɩ ‑mä a ‑bha nyenyii 'mnö. ‑Ɛɛɛ, ‑nänʋä ‑kʋ'anyɩ nëëdë 'nɩ waa' ‑wʋ Laagɔ ‑yi nä, ɩmɩ 'fɩɩn 'mnö, anyɩ‑ zoo 'kä lä 'bhlä.

‑Wa 'gä lä 'kuëë ‑glɔɔ nä sä waa' 'yɛkɛɛ 'kä lä kʋ nä

³⁵ Nyɩkpaa' ‑nänʋä yi 'ylä nynä ‑mä, säsä 'kudukuë glɔɔ bhä 'kuëë? 'Nɩ wa kä yɩ 'kuëë ‑glɔɔ nä, ku sä wa 'kä bhä bhɛɛ?

³⁶ Döbänyɔ‑! ‑N gä subhë ‑goo nä, kä aa' 'ku ‑wʋ 'fɩa 'nɩ aa' 'wlʋ ‑wʋ ‑a?

³⁷ 'Nɩ lʋʋ sä ‑n goo bhää? 'Yʋyee 'mɛ ‑n goo lä. 'Yʋye ‑o, subhëë' 'cënänä ‑o, amä ‑n goo lä ‑mä suvaa‑ a 'gä lä 'wlʋ nä, amä ‑nn ‑wʋ ‑goo.

³⁸ 'Yʋyenɛ ‑n goo lä nä, ɛmɛ Laagɔ gbä 'nɩ ‑ɛ nʋ lä suu' lʋʋ ʋ ‑waa lä nä. 'Nɩ sä 'yʋye ‑kʋ lä nä, sɔɔ 'vä ɛ nʋ lä.

³⁹ Bʋkʋ nä, 'yäköö 'fɩɩn ‑wʋ ‑bhlüo. Nyɩkpɔɔ' 'yɛkɛ ‑kʋ ɛɛ' dä, 'nɩ mnɛɛ' 'yɛkɛ ‑kʋ ɛɛ' dä. Nümnëë' 'yɛkɛ ‑kʋ ɛɛ' dä 'nɩ zliiyee' 'yɛkɛ ‑kʋ ɛɛ' dä.

⁴⁰ Laagɔduu' 'yɛkɛ ‑kʋ 'sɩɩ, 'nɩ zëkpë 'kʋʋ 'yɛkɛ ‑kʋ. 'Nɩ 'yɛkɛ 'yɛkɛ nä, ɛ kä ɛɛ' nanɔ. ‑Laagɔɔ' ‑lɛɛ nää‑ ɛɛ' sä, 'nɩ zëkpë 'kʋʋ ‑lɛɛ nää‑ 'sɩɩ ɛɛ' sä.

⁴¹ 'Ylʋkwädla lie aa' sä, 'nɩ 'cʋʋ lie 'sɩɩ ʋʋ' sä. 'Nɩ ‑laagɔzälöö lie ɩɩ' sä. ‑Mä ‑laagɔzälöö ‑mä 'sɩɩ, ɩɩ' lie ‑wʋ säbhlo ‑säbhlo.

⁴² Nä, 'kudukua' 'kuëë glɔɔ‑tänyɩɩ nä, sɔɔ 'yɛkɛɛ wälɩɩ 'kä lä 'sɩɩ kʋ. 'Yɛkɛɛ nä, wa kɛ glu ŋʋʋ‑ nä, kɛ zɛ. ‑Mä ɛ kä yɩ 'kuëë ‑glɔɔ nä, ɛɛ' ‑läyɩɔ 'ku.

⁴³ 'Yɛkɛɛ' ‑lɛɛ wa ŋʋ lä glu nä, kɛ zɛ. ‑Mä ɛ kä yɩ 'kuëë ‑glɔɔ nä, kɛ bhɛɛ‑ 'klʋagba. 'Yɛkɛɛ ‑lɛɛ ‑wa ŋʋ lä glu nä, ɛɛ' ‑wʋ ‑cʋcʋ ‑kä. ‑Mä ɛ kä yɩ 'kuëë ‑glɔɔ nä, kɛ bhɛɛ‑ 'tɛtɩ 'kädɩ.

⁴⁴ Wa kä ylʋʋnʋ ‑zɔɔ' 'yɛkɛɛ glu ŋʋʋ‑ nä, ɛɛ' 'kuëë glɔɔ‑tänyɩɩ' nä kɛ 'plöö 'wugɔɔ'. Nä 'ylʋzɔɔ' 'yɛkɛ ‑kʋ 'nɩ 'wugɔɔ' lɛɛ ‑kʋ.

⁴⁵ Ɩmɩɩ‑ ‑kä 'ŋnö 'nɩ ɩ ‑jɩjlɔ lä nynä ‑mä, tɛɛtɛɛ nyɩkpɔɔ wa laa lä Adää nä, ɔ plöö‑ bhä ‑yäyänyɔ. ‑Mä bhɩädää' Adää Laagɔ ‑nʋ lä nä, ɔ ‑glö 'wugɔ. Ɔ ‑glö 'wugɔɔ' lʋʋ ‑ʋ nyɛ lä 'pʋpʋɛ nä.

⁴⁶ Nä 'ylʋzɔɔ' kuu 'mʋʋ‑ yi lä 'fɩa, 'nɩ 'wugɔɔ' kuu 'bhänɩɛ lä bɩɩ'.

⁴⁷ Tɛɛtɛɛ‑nyɩkpɔɔ Adää Laagɔ ‑nʋ lä nä, ‑dʋdʋ ʋ bhlüü‑ 'kʋ 'nɩ ʋ ‑nʋɔ. ‑Mä 'sɔna‑lɔɔ Laagɔduu' ɔ ‑bha 'nɩ ɔ ‑yi.

⁴⁸ Nä nyɩkpaa 'fɩɩn ‑wa bha lä ‑dʋdʋkʋ Adää 'mnö nä, wa ‑glö ‑dʋdʋʋ' lʋä. 'Nɩ ‑wa bha lä Laagɔduu' Adää 'mnö nä, wa ‑glö Laagɔduu' lʋä.

⁴⁹ ‑Anyɩ nä, kä ‑a ‑plä lä ‑bhlɛ ‑dʋdʋkʋʋ' nyɩkpɔɔ' kuu 'mʋ. ‑Mä ‑zee nä, ‑ɔ ‑kʋ lä Laagɔduu' nä, ‑a yi ɔɔ' kuu 'mʋ plä.

Bhɩäylʋʋ 'kʋ 'cɔcɩnyʋä yi ku 'cɩcɩ
( 1 Tesa 4.13‑18 )

⁵⁰ Bhelie ‑yä bhɛŋwnɩänyɩ‑, wälɩklëa n ci lä nä, amää‑ plöö‑ lä nynä ‑mä, ‑paplɩɩ‑yɛkɛnɛ ‑a bhɛɛ‑ lä nä, ɛ ‑yä doluu 'sɔ, ɩɩ' ‑lä Laagɔɔ' 'Leyiduu 'mnö plä. Lʋʋ 'kwie sɩä lä nä, ʋʋ' kʋ ‑wʋ 'kɔɔkɔɔ' ‑za.

⁵¹ Wälɩklë ‑bhlo ‑zizio lä nyɩkpa 'fɩɩn 'yii nä, amä n 'kanyɩ lä pana. ‑Aa ‑lä 'ku anyɩ 'fɩɩn ‑mä kä ‑anyɩa kuu 'kä jɩjlä.

⁵² 'Sää 'kpobhuu ‑bhlo 'kʋ, ‑n ‑näsä nyɩkpɔ 'këpë lä 'yikʋ nä sɔɔ 'tänyɩɩ', dä Laagɔɔ' gbä‑bhɩädaa' läglɛɛ 'kä lä gbä nä, kä ‑aa ‑lefɩɩn 'kä jɩjlä. Läglɛɛ kä yɩ ‑gbä nä, 'kudukua 'fɩɩn yi 'kuëë' glɔɔ ‑yä zëkpëa' laa‑ ‑wʋ lä bhɩäsä ‑kä nä, wa 'ka 'mnö plä. 'Nɩ ‑anyɩmɔɔ‑ ‑kʋ lä ‑lätee 'ylʋzɔɔ nä ‑anyɩa kuu yi jɩjlä.

⁵³ ‑Ɛɛɛ, ɩ ‑ŋwa 'kʋ 'zaazɩ nynä ‑mä ‑anyɩa ‑paplɩɩ‑yɛkɛnɛ nä, ɛ jɩjlää 'yɛkɛɛ lɛɛ ‑ɛɛ 'zɛ ‑wʋ lä nä 'mʋ. ‑Anyɩa 'yɛkɛnɛ 'kwiee sɩä lä nä, ɩ ‑ŋwa 'kʋ nynä ‑mä ɛ sɩä 'kwie 'kɔɔkɔɔ' ‑za.

⁵⁴ ‑Anyɩa 'yɛkɛnɛ ‑ɛ zɛ lä nä, ɛ kä yɩ 'yɛkɛɛ‑ 'zɛ ‑wʋ lä nää' kuu 'mʋ ‑plä nä, ɛmɛ 'yɛkɛnɛ 'kwie sɩä lä nä, ‑lɛɛ 'kwiee sɩä ‑wʋ lä nä, ɛ kä yɩ ɛɛ' kuu 'mʋ plä nä, 'klüü Laagɔ‑bɔɔgʋʋ cii‑ bhlä nä, ɩ yä yɩ glää. Kɩ ‑jɩjlɔɔ lä nynä ‑mä, 'Kʋzilɩɩ yä 'kwiee sɩä 'kɔɔkɔɔ' ‑za.

⁵⁵ 'Nɩ ‑mɔɔ 'kwie, ‑A sä bhä ‑naa 'kʋzilɩɩ? ‑A sä bhä ‑naa gblɔnʋʋ? ‑Naa gblɔnʋʋ ‑n ‑kä 'nɩ ‑n bhlä lä nyɩkpaa nä, ‑A sʋʋ bhä?

⁵⁶ 'Kwie nä, ɛɛ' gblɔnʋʋ plöö‑ lä nyenyii. 'Nɩ nyenyii nä, ‑jlämää‑ nyɩɩ lä 'päwä.

⁵⁷ ‑Mä a ‑ya bhään Laagɔ. Ʋʋ' ‑bɔɔ 'nɩ, ʋ ‑gbä 'nɩ a ‑zi lä 'kʋ, ‑anyɩa Kwlienyɔ Zozi Klisöö 'ŋnöö 'mnö!

⁵⁸ Naa, 'naa ‑wawa‑bhelie ‑yä bhɛŋwnɩänyɩ‑, a 'tɛmä 'mʋ. Aa' yɔmä ‑lä 'mʋ. A nʋ 'kɔɔkɔ Kwlienyɔɔ' lebhee ‑yä ɛ mʋ 'yikʋ. Ɩyä ɩ kʋ'anyɩ 'wlu nynä ‑mä lebhee 'fɩɩn a nʋ lä Kwlienyɔɔ' ‑za nä, ɛɛ' ‑lä 'flɛ 'plö.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan