Bìoball air-loidhne

1 Kolɛtɩ‑dunyʋä 14 - GOD - u2

Kplɔɔkplɔɔ‑wugɔɔ' 'nää ʋ kwlie lä 'cɔcɩnyʋa 'kʋ nä

¹ A kä ‑lɔɔ ‑kʋ nä, a tään nynä ‑mä a 'kä ‑a ‑liesɩɩ' ‑wawʋ kään. Ɩyä Kplɔɔkplɔɔ‑wugɔɔ' 'tɛtɩɩ ʋ nyɛ lä nä, a tänɩ 'sɩɩ. A tään 'sää 'tasɩɛ nynä Laagɔ cinö'anyɩ nëë'.

² A ni nyɩkpɔ kä Kplɔɔkplɔɔ‑wugɔɔ' nuwälɩɩ ci nä, ɔ lünyɩkpa‑ ɔɔ' soo ‑wʋ, ‑mä Laagɔ ɔ soo lä. Nyɩkpɔɔ' 'nu ‑wʋ sɔ ci lä nä ‑mä, Laagɔɔ' 'Wugɔɔ 'mʋʋ‑ kwlienöɔ lä wälɩ 'wugɔɔ 'nɩ, ɔ cii lä 'kʋ ‑zizio‑wälɩ.

³ Nyɩkpɔ kä Laagɔɔ' nüdö ‑sää nä, nyɩkpa ɔ soo lä. Ɔ ŋʋwa pɔlötɛtɛɛ' 'nɩ ɔ ŋʋwa 'tɛtɩɩ 'nɩ ɔ bhluwa plɛɛ'.

⁴ Nyɩkpɔ kä Kplɔɔkplɔɔ‑wugɔɔ' nuwälɩ ci nä, ɔ yëku 'titi ɔ ŋʋ lä 'tɛtɩɩ'. ‑Mä ɔ kä Laagɔɔ' nüdö ‑sää nä, ‑jlünyʋä ɔ soo lä ‑yä wa 'kä 'tɛtɩ 'ni.

⁵ Nä, n ylä nynä ‑mä anyɩ 'fɩɩn a ci 'Wugɔɔ' nuwälɩɩ, ‑mä n ‑waa bhä 'sɩɩ kpänyɩ nynä ‑mä, 'Wugɔɔ gbä ‑yä a ‑sää Laagɔɔ' nüdö. 'Cɔcɩnyɔ kä Laagɔɔ' nüdö ‑sää nä, kɔ 'ghlü 'nɩ ɔ ‑zi 'cɔcɩnyɔɔ' ‑lɔɔ ci lä 'Wugɔɔ' nuwälɩɩ nä. Kä nyɩkpɔ kä ‑lɔɔ kʋ 'nɩ ɔ kä 'Wugɔɔ' nuwälɩɩ' ‑zɔɔ ‑sälɩ mii nä, kɩ nää‑ lä.

⁶ Bhelie ‑yä bhɛŋwnɩänyɩ‑, a 'pä ‑wʋ saa plɛ nynä ‑mä 'tänyɩ kʋ ‑lɔɔ 'nɩ n yi'anyɩ 'yi 'ni kää, ‑mä 'tänyɩ n 'kanyɩ ylä soolɩ 'kʋ cie nä, kä n ci ylä Kplɔɔkplɔɔ‑wugɔɔ' nuwälɩɩ. ‑Mä ‑lɔɔ' nuwälɩɩ nä, aa' nui ‑wʋ lä nä, ɩ nö'anyɩ lä wälɩklë ‑bhlo 'coo soo. Ɩ nö'anyɩ ‑lä wälɩklë ‑bhlo coo pana. Ɩ nö'anyɩ ‑lä dɩgälɩ ‑bhlo 'coo 'ŋʋ, 'nɩ nö'anyɩ ‑lä 'sɩɩ Laagɔɔ' nüdö ‑sää, 'nɩ ɩ nö'anyɩ ‑lä wälɩklë ‑bhlo 'coo cɩa. N kä sɔɔ n yëku ‑klä nä, kä n ‑klänö'anyɩ bhä ‑a?

⁷ Laa‑bhlɩdää' kläklälɩɩ, a fänɩɩ ‑wʋ saa plɛkʋ yëku! ‑Blɩkɔ ‑yä ‑dʋnplʋ 'sɔ kä gbä, 'nɩ sɩ gbä lä nä, nyɩkpa 'nö sɔɔ 'mʋ yibhë ‑yibhë nä, säsä wa yi bhä ci nynä ‑mä, ‑blɩkɔ gbä lä 'sää, 'nɩ ‑dʋnplʋʋ‑ gbä lä 'sää?

⁸ 'Nɩ läglɛ kä gbä ‑yä 'sʋjä 'kä tʋ 'kʋ mʋ 'nɩ ɛ 'nö 'nää gbä nä, säsä 'sʋja yi bhä ‑ghlɩlɩ 'nɩ wa yi bhä tʋʋ 'kʋ 'mʋʋ?

⁹ Nä, anyɩ ‑mä 'sɩɩ, a kä 'Wugɔɔ' nuwälɩɩ ci 'nɩ sä nyɩkpɔɔ' 'nui ‑wʋ lä nä, wälɩɩ 'fɩɩn a ci lä nä, kɩ blu lä nynä ‑vʋvɔlʋ.

¹⁰ ‑Mää 'ylʋzɔɔ nä, nuwälɩɩ' nü nü nü ‑kʋ ‑mɔɔ. 'Nɩ ɩɩ' ‑lefɩɩn ‑kä ‑zɔɔ.

¹¹ ‑Mä wälɩklëa ‑a cio lä nä, n 'nö aa' ‑zɔɔ 'nu nä, ‑ɔ cia lä nä lowuyuu' n 'kɔ lä bhobho, 'nɩ ‑amʋ ‑mä 'sɩɩ ɔ kä'ä lä lowuyuu' bhobho.

¹² Nä sa tään lä nynä Laagɔɔ' 'Wugɔɔ nyɩ'anyɩ ʋʋ' 'tɛtɩɩ nä, a 'ni sɔɔ kpänyɩ 'cɔcɩnyʋaa' ‑za ‑yä waa' pɔlötɛtɛɛ 'kä ‑mɔɔ see.

¹³ Ɩmɩɩ‑ ‑kä lä 'ŋnö 'nɩ 'cɔcɩnyɔɔ' lɔɔ‑ ci lä 'Wugɔɔ nuwälɩɩ nä, ɩ ‑ŋwa lä 'kʋ nynä ‑mä ɔ bhibhie ‑yä ɔ 'kä 'sɩɩ ɩɩ' ‑zɔɔ ‑sälɩɩ 'päwaa 'ni.

¹⁴ ‑Ɔnöza bhää? N kä Laagɔɔ' 'Wugɔɔ' nuwälɩɩ ci nä, 'naa 'wugɔɔ 'mʋʋ‑ bhibhie lä, ‑mä 'naa bhobhowluu' bhobho ‑wʋ.

¹⁵ Ɩ kä yɩ sɔɔ ‑kʋ nä, säsä n yi bhä ‑pɛɛ nʋ 'naa? N yi 'Wugɔɔ 'mnö bhibhie 'zaazɩ, ‑mä n yi 'sɩɩ nëë' bhibhie ‑yä nyɩkpa 'kä 'nu. N yi 'Wugɔɔ' bhlɩɩ 'zaazɩ, ‑mä n yi 'sɩɩ nëë' bhlɩɩ ‑yä nyɩkpa 'kä 'nu.

¹⁶ A ni 'yi naa, ‑n gä 'Wugɔɔ ‑bhlo 'coo 'mnö bhibhie 'nɩ ‑n gä Laagɔ bhään nä, ‑jlëa 'mnö nyɩkpɔɔ' lɔɔ‑ ‑wʋ lä ‑naa bhibhie 'mnö nuu‑ nä, ɔ yi bhä ci nynä ‑mä, ɩ kʋ sɔɔ ‑a? Sä ‑n cii‑ lä ‑naa bhibhielɩɩ 'mnö nä, ɔɔ' ‑kä 'gää sɔɔ nuu‑!

¹⁷ ‑N bhibhie bhɛ 'flɛ 'nägäsä Laagɔ dëlü ‑mä sä waa' ‑wʋ lä nuu‑ nä, ɩ 'nʋwa yɩɔ ‑klää.

¹⁸ N bhään Laagɔ, ʋʋ' ‑bɔɔ 'nɩ n ci lä Kplɔɔkplɔɔ‑wugɔɔ' nuwälɩɩ. 'Nɩ n cii 'sɩɩ 'nɩ n ‑zi anyɩ 'fɩɩn.

¹⁹ ‑Mä n kä 'cɔcɩnyʋa nëëdë ‑kʋ nä, sä n 'kä bhlä 'Wugɔɔ 'mnö wälɩ ‑bhutukpä ci nä, kä n taa yɩ sɔɔ 'yi 'nɩ n cii wälɩklü ‑ngbü nëë' wɩa, 'nɩ nyɩkpa nui ‑yä ɩ 'kä ‑mɔɔ' 'cɔcɩnyʋaa' cɩalɩ 'plö.

²⁰ Nä bhelie ‑yä bhɛŋwnɩänyɩ‑, anyɩa' bhobhosaa 'mnö nä, aa' bhobho ‑läyɩɔ 'yuë 'bhisäkʋ. Gbenyenyii' 'pɛlʋʋ 'mnö nä, a kʋ yɩ nynä 'yuëlɩä, ɩyä anyɩa' bhobhosa 'mnö, a ‑glɛɛ yɩ.

²¹ A ni sä Laagɔ‑bɔɔgʋʋ ci lä nä, ʋ lä Kwlienyɔɔ lä, 'Bhlɩnɛ 'mnö nyɩkpaa N kä yɩ cii‑ nynä ‑mä n 'kwa soo nä, Lowie‑ n 'kwa ylä 'kʋ lobho Ɩyä wa 'kwa lowu‑wälɩɩ' sonö. Wa nö'ö lä 'nyukwli poo 'flɛ o, ‑Mä lowie 'kʋ n 'kä ylä ghlää Ɩyä wa 'kwa yɩ lowu‑wälɩɩ' sonö.

²² ‑A nii ylä 'yi nä, nyɩkpaa' ‑lʋa ‑wʋ lä Laagɔɔ' pɔlötɛtɛ ‑kä nä, Kplɔɔkplɔɔ‑wugɔɔ' nuwälɩɩ glö waa' ‑za panalɩ. ‑Wa ‑yi lä Laagɔ nä, ‑ɛɛ ‑wʋ waa' panalɩ. ‑Mä ‑ɔ plöö‑ lä Laagɔɔ' nüdö‑säälɩɩ nä, ‑wa ‑yi lä Laagɔ nä, waa' panalɩ lä. ‑Waa ‑wʋ lä Laagɔ ‑yi nä, ‑ɛɛ ‑wʋ waa' panalɩ.

²³ Nä, 'cɔcɩnyʋa kä 'wlu 'wlää‑ 'nɩ waa' ‑lefɩɩn kä Kplɔɔkplɔɔ‑wugɔɔ' nuwälɩɩ ci nä, 'cɔcɩɛ 'mnö nyɩkpa ‑wa plä lä ‑mɔɔ nä, ɩyä ‑waa ‑wʋ lä Laagɔ ‑yi nä, waa' ‑lä bhä bhobho nynä ‑mä pɔlö bhla'anyɩ ‑a?

²⁴ Kä 'cɔcɩnyʋa kä 'wlu 'wlää‑ 'nɩ Laagɔ kwa nëë' cii waa' lefɩɩn nä, nyɩkpɔ yi bhɛ 'cɔcɩnyɔ 'plö ‑o, ɔɔ' ‑lä bhɛ 'cɔcɩnyɔ 'plö ‑o, sä nyɩkpaa ‑bhutukpa sonö'ɔnyɩ lä nä, 'klüü ɔ 'kä lä 'nu nä, ɔ yii plɛ yëku fään.

²⁵ Wälɩɩ' lɩɩ‑ zizio bhlä ‑mɔɔ ɔɔ' pleyii nä, ɩ yi zëkpëkʋ ghlä. Ɩ yi gbä 'nɩ ɔ yi Laagɔ dëlü ‑kokoowli glu 'pä, 'nɩ ɔ yiu bʋbɔ. ‑Lɔɔ' nyɩkpɔɔ yi ci nynä ‑mä, 'zaazɩ Laagɔ ‑kʋ'anyɩ nëëdë.

'Cɔcɩnyʋa nëëdë nä ‑lɩɩ 'fɩɩn nämnö ‑dɔlʋʋ'

²⁶ Naa, bhelie ‑yä bhɛŋwnɩänyɩ‑, sä ‑a yi bhä nʋʋ? A kä ‑lɔɔ ‑kʋ nä, anyɩa lɔɔ' ‑bhlo bhlɩ. Ɩyä ‑bhlo cɩa, ɩyä ‑bhlo Laagɔ ghlänöɔ wälɩklë 'yii ‑yä ɔ ‑sänöa. ‑Bhlo kʋ 'sɩɩ ‑lɔɔ ‑yä Kplɔɔkplɔɔ‑wugɔɔ kwlienöɔ ʋʋ' nuwälɩɩ nëë' ‑yä ɔ cii. Ɩyä ‑nɔnɔ kʋ ‑lɔɔ ‑yä ɔ ‑sɩɩ ‑zɔɔ. Ɩ plö'anyɩ 'sää nëëdë 'kʋ ‑yä 'cɔcɩnyʋaa' pɔlötɛtɛɛ 'kä 'tɛtɩ kään.

²⁷ A kä 'wlu 'wlää‑ nä, nyɩkpɔ ‑bhlo ‑o, 'sɔ ‑yä taa ‑o, wamä‑ lä ci Kplɔɔkplɔɔ‑wugɔɔ' nuwälɩɩ. Anyɩa' ‑zunɔɔ' 'mɩä ‑lä ‑lɔɔ 'kʋ. A 'nä cii lä däbhloo' ‑mä nyɩkpɔ nyɩkpɔ ‑bɛɛ ‑yä ɔ ci ɔɔ' bhlëë'. Ɩyä ‑bhlo kʋ ‑lɔɔ ‑yä ɔ tʋa wälɩɩ wa cii lä 'Wugɔɔ 'mnö nä.

²⁸ Ɩɩ' tʋanyɔ 'nö 'cɔcɩɛ 'mnö ‑kʋ nä, ‑wa ‑kä lä 'Wugɔɔ' nuwälɩɩ' cilɩɩ' ‑tëbhuu nä, wa bhlü nëkʋ ‑yä, wa soo wa yëku ɩyä wa soo 'sɩɩ Laagɔ.

²⁹ ‑Ɔ plöö‑ lä Laagɔɔ' nüdöö' ‑säälɩɩ nä, 'cɔcɩnyʋa 'Wugɔɔ nyɛɛ‑ lä ‑lɔɔ' tëbhuu nä, waa' lʋä 'sɔ ‑o, taa ‑o, wa ci ‑yä säkʋnyʋä 'kä ‑lɔɔ' wälɩɩ ‑zɔɔ sä.

³⁰ ‑Bhlo kä cidä ‑kʋ 'nɩ 'Wugɔɔ kä 'yigädalɔɔ wälɩklë 'kʋ ‑ghlää nä, ‑lɔɔ ‑ɔ ci bhlä nä, ɔ ‑kʋ ‑plɩɩ.

³¹ A yi mii 'nɩ a yi bhloo bhlo Laagɔɔ' nüdöö ‑sää ‑yä 'cɔcɩnyʋa 'kä 'cɩä ‑yä wa 'kä 'tɛtɩ kään.

³² 'Cɔcɩnyʋa‑ sää lä Laagɔɔ' nüdöö nä, wamä 'titi yi 'mʋ ‑mnaalɩ mii.

³³ ‑Ɔnöza bhää? Laagɔ nä, ʋʋ' nʋnʋgbɩɩ' ‑wʋ sä ‑jɛjɛɛ. 'Nɩ ʋ ‑glö 'sɩɩ 'kʋ wɔtɔ Laagɔ. 'Nɩ sɩ nʋɔ lä 'cɔcɩgbüü 'fɩɩn 'mnö nä,

³⁴ ɩ ‑ŋwa 'kʋ nynä ‑mä 'ŋwnɩa bhlü në 'kʋ. Ɩɩ' ‑wʋ 'kʋ ‑ŋwa nynä wa ‑sää ‑mɔɔ 'cɔcɩgbëë 'mʋ. Sä Laagɔ ‑Jläma ci lä nä, wa nʋ sɔɔ. Wa ‑lä wa yëku ‑dʋdʋkʋ.

³⁵ 'Ŋnɔ kä cii‑ nynä ‑mä ɔ 'kä wälɩklëë' ‑zɔɔ yibhë nä, ɔ 'ylää ɔ ‑nyoto gbëë' ‑mä, ɩɩ' ‑wʋ 'kʋ ‑ŋwa nynä 'ŋnɔ 'bhlü ‑jlëë' nuwälɩ 'kʋ.

³⁶ Sa bhobho bhää? Ka bhobho nynä ‑mä Laagɔwälɩɩ nä, anyɩ yëku ɩ ‑ghlää ‑a? Anyɩ ‑bhlo plöö‑ nyɩkpaa' lʋä ‑wa nui‑ lä nä ‑a?

³⁷ Nyɩkpɔ kä ‑lɔɔ ‑kʋ 'nɩ ɔ kä cii‑ nynä ‑mä Laagɔ cinöɔ nëë', 'nɩ Kplɔɔkplɔɔ‑wugɔɔ nyɩɔ‑ ‑tëbhuu' 'cënänä nä, ɔ yi sɔɔ yibhë nynä ‑mä wälɩnɩ n ci lä nä, ɩ ‑glö Kwlienyɔɔ' ‑jlämä.

³⁸ Kɔ kä cii‑ nynä ‑mä 'klüü n cii‑ lä nä, ɔ 'nii ‑wʋ sɔɔ ‑yi nä, ‑lɔɔ' nyɩkpɔɔ Laagɔ 'nöɔ ‑wʋ ‑yi.

³⁹ Nä bhelie ‑yä bhɛŋwnɩänyɩ‑, a tään nynä 'Wugɔɔ gbä ‑yä a 'kä Laagɔɔ' nüdö‑sänyʋä 'plö. Ɩyä 'cɔcɩnyʋa‑ ci lä 'Wugɔɔ' nuwälɩɩ nä, aa' ci lä nynä ‑mä wa bhlü nëkʋ.

⁴⁰ ‑Mä wa ci bhloo bhlo, ɩyä waa' cicisaa plä ‑dɔlʋ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan