Bìoball air-loidhne

1 Kolɛtɩ‑dunyʋä 13 - GOD - u2

‑Wawʋʋ 'mʋʋ‑ zi lä ‑lɩɩ 'fɩɩn
( Matie 22.36‑40 ; Wlɔmʋ 13.8‑10 ; Zään 3.16‑19 ; 1 Zään 4.7‑21 )

¹ N kä mii 'nɩ n kä 'ylʋzɔkʋnyʋää' nuwälɩ ci nä, 'nɩ n kä 'sɩɩ ‑Laagɔzizii' nuwälɩ ci nä, 'nɩ n 'nö ‑a ‑liee' ‑wawʋ ‑kä nä, kä n ‑kä lä kplü nynä lätö‑sonugbä, 'nɩ n ‑kä lä kplü nynä kɔlʋkwää' ‑lɛɛ ‑kɔfʋ.

² N yi mii 'nɩ n yi Laagɔɔ' nüdö ‑sää, 'nɩ sa 'fɩɩn Laagɔ ylä lä nä, n yi sɔɔ yibhë, 'nɩ 'klüü' 'fɩɩn‑ ‑zizio lä 'kʋ nä n yii 'mʋ 'nu. N yi 'sɩɩ mii 'nɩ n yi pɔlötɛtɛɛ' ‑lɛ 'kädɛ kään 'nɩ ɛ yi 'kükü bhlëë' 'kʋ sä. ‑Mä, n käyɩ ‑nɩnɩ 'fɩɩn nʋ 'nɩ n 'nö ‑a liee' ‑wawʋ ‑kä nä, nn' ‑wʋ lʋʋ plöö‑.

³ N kä mii‑ 'nɩ ŋäzönyʋa ‑gbugbee bhlä lä nä, n kwa 'naa kääkäälɩɩ 'fɩɩn ‑dëë, 'nɩ n kä 'sɩɩ 'naa 'yɛkɛɛ ‑sä nynä ɛ si nä, 'nɩ n 'nö ‑a ‑liee' ‑wawʋ ‑kä nä, ‑lɩɩ 'fɩɩn n ‑nʋ lä nä, ɩ nö'ö ‑lä ‑bʋzʋɛ ‑lää.

⁴ ‑Wawʋ nä, kʋ ‑yi ‑bɛɛsä. Ʋ ‑yi nyɩkpaa' kläsä. Ʋʋ' ‑wʋ sɩɩ luëzü ‑kä. Ʋʋ' 'pä ‑wʋ 'sɩɩ ‑bli 'nɩ ʋʋ' täkpɔ ‑wʋ.

⁵ ‑Wawʋ nä, ʋʋ' bhla ‑wʋ zoo'. Ʋʋ' tään ‑wʋ 'sɩɩ ʋ yëku ‑bhloo' ‑bʋzʋɛ. Ʋʋ' ‑wʋ gbʋgblɛ ‑kä, 'nɩ ʋʋ' klää ‑wʋ wälɩ mnö 'nää.

⁶ ‑Wawʋ nä, saa ‑wʋ lä 'yi gëë‑ nä, ʋʋ' jäka ‑wʋ sɔɔ ‑mä ‑nʋawlɛ ʋ jäka.

⁷ ‑Wawʋ kʋ cie wälɩɩ 'fɩɩn. 'Nɩ sa 'fɩɩn ʋ ‑bɛɛ lä nä, ʋ kään sɔɔ plɛkʋ, 'nɩ sä wälɩ yi kʋmɔ ‑kʋmɔɔ ‑kaa nä, ʋ ‑yi 'mnö 'kuu sä.

⁸ 'Nɩ wawʋ nä, ʋʋ' ‑lä 'kɔɔn kʋ bhɩä. Laagɔɔ' nüdöö ʋ ghlää lä nyɩkpa 'kʋ 'nɩ wa sää lä nä, 'tänyɩ yi ŋëë 'nɩ ɩ yi bhloo. 'Nɩ Lowu‑wälɩɩ Kplɔɔkplɔɔ‑wugɔɔ ŋʋ lä nyɩkpa nëë 'nɩ wa ci lä nä, 'tänyɩ yi ŋëë 'nɩ ɩ yi 'sɩɩ bhloo. 'Nɩ wälɩ‑yibhëlɩɩ Laagɔ nyɛ lä nä, ɩ yi 'sɩɩ ‑bhlo.

⁹ ‑Ɔnöza bhää? Nyɩkpɔɔ' wälɩ‑yibhëlɩ ‑kä bhloodä. 'Nɩ wälɩɩ' ‑lɩɩ Laagɔ pä lä nyɩkpɔ nëë' 'nɩ ɔ ci lä nä, ɩ ‑kä 'sɩɩ bhloodä.

¹⁰ 'Tänyɩɛ 'mnö nʋnʋgbɩɩ 'fɩɩn 'kä lä nëë slää nä, ‑lɩɩ 'fɩɩn‑ ‑wʋ lä nëë' ‑slää nä, ɩ yi 'kʋ bhɩä.

¹¹ A ni 'tänyɩɩ n plöö‑ bhlä 'yu nä, 'yu 'bhisäkʋ n sää bhä 'mʋ. 'Nɩ n bhobho bhä 'sɩɩ 'yu 'bhisäkʋ. N kä bhä ci nä, 'yu 'bhisäkʋ n ci bhä. ‑Mä dä n plöö‑ ylä ‑lää nyɩkpabhë nä, nʋnʋgbɩɩ 'fɩɩn ‑ɩ plöö‑ lä 'yugbɩɩ nä, ɩ yä bhloo.

¹² 'Nɩ 'tänyɩnɛ 'mnö ‑a ‑kʋ lä nä, ‑lɩɩ 'fɩɩn ‑a wloo lä nä, ‑aa 'nii ‑wʋ 'nägäsä 'yi. Kɩ ‑kʋ lä nynä lɩɩ ‑a wloo kawloo'. ‑Mä ‑zee nä, ‑a yii 'yi 'ni, 'klʋ ‑yä 'klʋ. 'Tänyɩnɛ 'mnö, nn' ‑wʋ wälɩ ‑bhutukpä ‑yi, ‑mä zee nä, sä Laagɔ ‑yi'i lä nä, n yiu sɔɔ yibhë.

¹³ ‑Pɛpɛɛ nä, ‑lɛɛ ‑cikpɔ taa‑ ‑kʋ lä. Pɔlötɛtɛ ‑kʋ, dë 'tɛɛlɩ ‑kʋ, 'nɩ ‑wawʋ ‑kʋ. ‑Mä ‑ʋ kään lä ɩmɩ taa nëëdëë ‑ʋ 'ghlü lä nä, ʋmʋ plöö‑ lä ‑wawʋ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan