Bìoball air-loidhne

1 Kolɛtɩ‑dunyʋä 12 - GOD - u2

Kplɔɔkplɔɔ‑wugɔɔ' sʋ nʋ lä 'cɔcɩɛ 'mnö nä
( Wlɔmʋ 12.3‑8 ; Efɛ 4.4‑16 )

¹ ‑Ɔ plöö‑ ylä Kplɔɔkplɔɔ‑wugɔɔ' sä ʋ nyɛ lä 'cɔcɩnyʋa nä, bhelie ‑yä bhɛŋwnɩänyɩ‑, ɩ ‑ŋwa 'kʋ nynä a yibhë ‑lɔɔ' ‑nʋawlɛɛ.

² A ‑yi sɔɔ nynä ‑mä 'tänyɩɩ aa' ‑lä bhlä tee Laagɔ ‑yibhë nä, suyua‑ ‑sää ‑wʋ lä 'mʋ nä, wamä a mʋʋ bhä.

³ Ɩmɩɩ‑ ‑kä 'ŋnö 'nɩ n sonö'anyɩ lä nynä ‑mä, nyɩkpɔɔ' lɔɔ Laagɔɔ' 'Wugɔɔ 'tie lä nä, ɔɔ' ‑lä 'kɔɔkɔ në ‑sä 'nɩ ɔ 'kä Zozii gbütë. 'Nɩ nyɩkpɔɔ' ‑lä ci nynä ‑mä Zozii 'mɔɔ‑ plöö‑ Kwlienyɔ 'nɩ Kplɔɔkplɔɔ‑wugɔɔ 'mʋʋ 'nöɔnyɩ nëë' paa‑.

⁴ Kplɔɔkplɔɔ‑wugɔɔ ‑bhlü ‑bhlo, ‑mä kʋ 'nyɛɛ 'cɔcɩnyʋä 'ci ‑bhutukpä 'kʋ.

⁵ Kwlienyɔɔ ‑bhlü 'sɩɩ ‑bhlo, ‑mä ɔ nyɛ 'cɔcɩnyʋa ‑tëbhii' nü nü nü.

⁶ 'Nɩ Laagɔ ‑bhlü ‑bhlo ‑mä ʋ gbä 'nɩ 'cɔcɩnyʋa mii 'nɩ wa nʋ lëbhüü' nü nü nü.

⁷ Nyɩkpɔ nyɩkpɔ nä, kä Kplɔɔkplɔɔ‑wugɔɔ nyɩɔ 'tɛtɩɩ' ‑lɩɩ ʋ ‑waa lä nä, 'nɩ ɔ bhlü ‑lɔɔ' 'tɛtɩɩ 'kʋ 'nɩ ɔ nʋʋ 'cɔcɩnyʋa 'fɩɩn 'nägägbɩ yëku.

⁸ ‑Nɔnɔ ‑kʋ ‑lɔɔ 'nɩ Kplɔɔkplɔɔ‑wugɔɔ nyɩɔ dɩgälɩ 'nɩ ɔ plɩɩ. ‑Nɔnɔ ‑kʋ ‑lɔɔ 'nɩ Kplɔɔkplɔɔ‑wugɔɔ nyɩɔ wälɩ‑yibhëlɩ 'nɩ ɔ paanɩ. 'Wugɔɔ ‑bhlobhlo nʋ lä sɔɔ.

⁹ ‑Nɔnɔ ‑kʋ ‑lɔɔ 'nɩ 'Wugɔɔ' ‑säkä ‑säkä nyɩɔ pɔlötɛtɛ 'kädɛ. ‑Nɔnɔ ‑kʋ ‑lɔɔ 'nɩ 'Wugɔnʋ ‑bhlobhlo nyɩɔ 'päwä 'nɩ ɔ yamä gupanyʋä.

¹⁰ ‑Nɔnɔ ‑kʋ ‑lɔɔ 'nɩ 'Wugɔɔ gbä 'nɩ ɔ nʋ 'yiziziogbɩ. ‑Nɔnɔ ‑kʋ ‑lɔɔ 'nɩ 'Wugɔɔ gbä 'nɩ ʋ sää 'cɔcɩnyʋa Laagɔɔ' nüdö. ‑Nɔnɔ ‑kʋ ‑lɔɔ 'nɩ 'Wugɔɔ gbä 'nɩ ɔ ‑yi Laagɔɔ' 'Wugɔɔ 'nɩ ɔ ‑yi 'wugɔ ‑nyonyu. Kplɔɔkplɔɔ‑wugɔɔ gbä 'sɩɩ 'nɩ ‑nɔnɔ ‑kʋ ‑lɔɔ 'nɩ ɔ ci lowu‑wälɩ. 'Nɩ ʋ gbä 'sɩɩ 'nɩ ‑nɔnɔ sä ‑lɔɔ' lowu‑wälɩɩ ‑zɔɔ.

¹¹ ‑Nɩnɩ 'fɩɩn nä, 'Wugɔɔ ‑bhlo 'coo‑ nyɩɩ lä 'cɔcɩnyʋa. Ʋmʋʋ‑ nyɛ lä nyɩkpɔ nyɩkpɔ 'päwä sʋ ‑waa lä nä.

Nëmüü ‑zu ‑mä 'yɛkɛ ‑bhlo ɩ jɛnyɩ‑ lä

¹² A ni 'yi naa, nyɩkpɔɔ' 'yɛkɛ ɛ ‑kä nëmü ‑bhutukpä. 'Nɩ nëmünö ‑zu 'flɛ ‑mä, ɩmɩɩ‑ nʋ lä nyɩkpɔɔ' 'yɛkɛ. 'Nɩ 'yɛkɛɛ ‑bhlü lä ‑bhlo. Sɔɔ ‑säkä ‑säkä Klisöö' wälɩɩ ‑kʋ lä.

¹³ 'Wugɔɔ ‑bhlo, Laagɔ klwienö‑anyɩ lä 'kʋ nä, ʋ ‑gbä 'nɩ ‑a plöö‑ yɩ 'yɛkɛɛ ‑bhlo. ‑N plöö‑ 'Zufʋyu ‑o, ‑n plöö‑ 'Glɛköyu ‑o, ‑n plöö‑ geyu ‑o, ‑nn ‑wʋ geyu plöö‑ ‑o, 'Wugɔɔ ‑bhlo Laagɔ nyɩ‑anyɩ lä.

¹⁴ ‑Ɛɛɛ, nyɩkpɔɔ' 'yɛkɛɛ' ‑wʋ nɛmɛ ‑bhlo plöö‑. Kɛ ‑zu nëmü 'kʋ.

¹⁵ A ni 'yi ‑a, nyɩkpɔɔ' bho kä bhä ci nynä ‑mä, sä nn' ‑wʋ lä ‑klɔgbä plöö‑ nä, nn' ‑wʋ 'yɛkɛɛ nɛmɛ plöö‑ nä, sä bhoo cii‑ ylä sɔɔ nä, 'ɩɩ ‑zä ʋʋ' yɩɔ 'zaazɩ 'yɛkɛɛ nɛmɛ plö ‑a?

¹⁶ 'Nyuklu kä cii‑ nynä ‑mä, sä nn' ‑wʋ lä 'yi plöö‑ nä, nn' ‑wʋ 'yɛkɛɛ nɛmɛ plöö‑ nä, sä 'nyuklu cii‑ yɩ sɔɔ nä ɩɩ' ‑zä ʋʋ' bhä 'zaazɩ 'yɛkɛɛ nɛmɛ plöö‑ ‑a?

¹⁷ Naa, 'nɩ 'yɛkɛɛ ‑lefɩɩn kä bhɛ 'yi plöö‑ nä, dä ‑sä 'nyuklu 'kä bhɛ kʋʋ? 'Nɩ 'yɛkɛɛ ‑lefɩɩn kä bhɛ 'nyuklu plöö‑ nä, dä ‑sä 'mnëa 'kä bhɛ kʋʋ?

¹⁸ Sä Laagɔ ‑waa lä nä, sɔɔ ʋ ŋʋʋ‑ lä nyɩkpɔɔ' 'yɛkɛɛ nëmüü.

¹⁹ Nëmüü 'fɩɩn kä bhä nɛmɛ ‑bhlo plöö‑ nä, dä ‑sä nyɩkpɔɔ' 'yäkö‑bhëa 'kä bhɛ kʋʋ?

²⁰ Kä nëmüü ‑zu 'flɛ ‑mä 'yɛkɛɛ ‑bhlü ‑bhlo.

²¹ 'Yii ‑lä mii 'nɩ ɛ 'kä ‑klɔgbä soo nynä ‑mä, ‑mɔɔ ‑klɔgbä nä, nn' tään ‑wʋ ‑naa 'kʋ nʋʋlɩ. 'Nɩ nyɩkpɔɔ' 'wluu ‑lä 'sɩɩ ɔɔ' ‑kokokpü soo nynä ‑mä, anyɩ ‑kokokpü nä, nn' tään ‑wʋ ‑naa 'kʋ nʋʋlɩ.

²² 'Yɛkɛɛ 'mnö nëmüü 'fɩɩn‑ ‑ɩɩ ‑wʋ lä 'sää 'titi ‑cʋcʋ ‑kä nä, ɩ ‑kään kpänyɩ 'yɛkɛɛ gbʋ.

²³ 'Nɩ 'yɛkɛɛ' nëmüü‑ ‑aa 'ŋʋ ‑wʋ lä 'klʋkpää nä, kä ‑a wlui 'kʋ 'nägäsä. 'Nɩ ɛɛ' nëmüü‑ ‑kä lä zoo 'kʋ nä, ‑a ‑klänɩ wlɩɩ' 'nägäsä.

²⁴ 'Nɩ ‑anyɩa 'yɛkɛɛ nëmüü ‑ɩ ‑kä lä wloosä nä, ‑aa 'mänyɩnɩ ‑wʋ kpänyɩ. Sɔɔ Laagɔ ‑nʋ lä 'yɛkɛɛ. Ɛɛ' dää ‑wʋ lä kpänyɩ wloosä ‑kä nä, ‑lɔɔ wa ŋʋ lä kpänyɩ 'klʋkpää.

²⁵ Nä 'yɛkɛɛ nëmüü' bhlää ‑wʋ 'kʋ ‑mä kɩ klää klää.

²⁶ 'Yɛkɛɛ nɛmɛ kä nyäkälɩɩ' ‑kʋ nä, kä ‑mɔɔ' nëmüü ‑yɛsɔ känö ‑lɔɔ' nyäkälɩɩ däbhloo'. Nɛmɛ kä ‑jäkä ‑kʋ nä, kä ‑mɔɔ' nëmüü ‑yɛsɔ nʋ ‑lɔɔ' ‑jäka.

²⁷ Nä, anyɩ‑ plöö‑ lä Klisöö' 'yɛkɛɛ. 'Nɩ nyɩkpɔ nyɩkpɔ ‑yi 'nɩ ɔ plöö‑ ylä Klisöö' 'yɛkɛɛ nɛmɛ.

²⁸ Kwlienyɔɔ' 'cɔcɩɛ 'mnö nä, kä Laagɔ ŋʋʋ‑ lä ‑mɔɔ' nyɩkpaa' ‑zajɛ ‑zajɛ. Tɛɛtɛɛ ‑zajɛɛ 'mɛɛ‑ plöö‑ lä lobho lobhonyʋa. 'Sɔna ‑zajɛɛ 'mɛɛ‑ plöö‑ lä nyɩkpaa' ‑lʋa Laagɔ cii lä nëë' nä. Taana ‑zajɛɛ 'mɛɛ‑ plöö‑ lä cɩanyʋa. 'Nɩ ‑zajɛɛ‑ nʋ lä 'yiziziogbɩɩ nä ɛ ‑kʋ lä ‑lɔɔ. 'Nɩ gupanyʋaa' yamä ‑zajɛɛ yi lä. 'Nɩ ‑zajɛɛ‑ ‑yi lä nyɩkpaa' klääsä nä, 'nɩ ɛ yi lä. 'Nɩ ‑wa ‑yi lä nyɩkpaa' 'tiesä nä wa yi lä. 'Nɩ ‑zajɛɛ' ‑nɛnɛ ‑kʋ lä ‑lɔɔ 'nɩ Kplɔɔkplɔɔ‑wugɔɔ ŋʋwa lä lowu‑wälɩ nëë' 'nɩ wa cii lä.

²⁹ 'Cɔcɩnyʋa 'fɩɩn‑ plöö‑ bhä Kwlienyɔɔ' lobho lobhonyʋä ‑a? Waa' ‑lefɩɩn Laagɔ cii bhä nëë' ‑a? Waa' ‑lefɩɩn‑ cɩa bhä ‑a? Waa' ‑lefɩɩn‑ nʋ bhä 'yiziziogbɩɩ ‑a?

³⁰ Waa' lefɩɩn‑ ‑kä bhä gupanyʋaa' yamälɩɩ' ‑tëbhu ‑a? Waa' ‑lefɩɩn 'Wugɔɔ gbä 'nɩ ‑wa ci bhä lowu‑wälɩɩ ‑a? Waa' ‑lefɩɩn‑ ‑yi bhä ‑lɔɔ' wälɩɩ ‑zɔɔ ‑säsä ‑a?

³¹ Nä saa 'fɩɩn nää‑ lä kpänyɩ 'nɩ 'Wugɔɔ nyɛ lä nyɩkpɔ nä, a tään sɔɔ. 'Nɩ ‑pɛpɛɛ nä, ‑blɔɔ' lʋʋ ‑ʋ zi lä ‑bɔlɩɩ 'fɩɩn nä, n 'kanyɩ mʋ yɩ pana.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan