Bìoball air-loidhne

1 Kolɛtɩ‑dunyʋä 11 - GOD - u2

¹ Naa, sä n dɩdɛ lä Klisö 'nɩ n nää lä ɔmɔ 'bhisäkʋ nä, anyɩ ‑mä 'sɩɩ a dɩdɛnö'ö.

'Cɔcɩgbëë sä ŋwadi ‑yä 'ŋnɔ yi lä 'mʋ plä nä
( Efɛ 5.22‑24 ; 1 Timo 2.8‑14 )

² Sa a luë lä 'tänyɩɩ 'fɩɩn 'mnö 'naa dä 'kʋ nä, 'nɩ sä n ‑sonö'anyɩ lä nä, a nää lä sɔɔ nä, n kla'anyɩ ‑kpacɛ.

³ ‑Mä n ‑waa bhä nynä wälɩklënä a yibhënöa. A yibhë sɔɔ nynä ‑mä, sä 'fɩɩn ŋwadi yi lä kʋmɔ ‑kʋmɔ nä, Klisö‑ plöö‑ ɔɔ' 'cifi. 'Nɩ ŋwadi ‑yi 'nɩ ɔ plöö‑ lä 'ŋnɔɔ 'cifi. 'Nɩ Klisöö' 'cifi plöö‑ lä Laagɔ.

⁴ Nä, ŋwadi kä bhibhiedä ‑kʋ 'nɩ ɔ kä 'wlu ‑gʋä nä, 'nɩ kɔ kä 'sɩɩ Laagɔɔ' nüdö ‑säädä ‑kʋ 'nɩ ɔ kä 'wlu ‑gʋä nä, ɔɔ' 'cifioo‑ plöö‑ lä Klisö nä, ɔmɔ ɔ sʋkpa lä.

⁵ ‑Mä 'ŋnɔ kä bhibhiedä ‑kʋ 'nɩ ɔ 'nö 'wlu ‑gʋä nä, 'nɩ kɔ kä 'sɩɩ Laagɔɔ' nüdö ‑säädä ‑kʋ 'nɩ ɔ 'nö 'wlu ‑gʋä nä, ɔɔ' 'cifioo‑ plöö‑ lä ɔ ‑nyoto nä, ɔmɔ ɔ sʋkpa lä. Kɔ ‑kʋ lä nynä ŋnɔɔ' lɔɔ‑ ‑kpään 'wlu lioko lioko nä.

⁶ Nä 'ŋnɔ kä cii‑ nynä ‑mä ɔɔ' ‑lä 'wlu gʋä nä, kɔ lɔ kpänö yɩ 'gää ‑nä! ‑A ‑yi sɔɔ nynä ‑mä 'ŋnɔ kä 'wlu ‑kpään nä, kɔ ‑kä zoo 'kʋ. Nä, ɩ ‑ŋwa 'kʋ nynä ‑mä ɔ gʋä 'wlu.

⁷ ‑Mä ŋwadi, ɩɩ' ‑wʋ 'kʋ ‑ŋwa nynä ‑mä ɔ gʋä 'wlu. ‑Ɔnöza bhää? Ŋwadi nä, kä Laagɔ ‑nʋɔ ʋ yëku 'kʋ nä, ɔ ‑glö Laagɔɔ' 'klʋagba. 'Nɩ 'ŋnɔ plöö‑ lä ŋwadii' 'klʋagba.

⁸ 'Ŋnɔɔ 'mnöö waa' ‑wʋ ‑sä 'nɩ wa 'kä ŋwadi ‑nʋ. Ŋwadi 'mnöö wa ‑sä 'nɩ wa ‑nʋ lä 'ŋnɔ.

⁹ Ŋwadi nä, Laagɔ 'nöɔ ‑wʋ 'ŋnɔɔ ‑za ‑nʋ. ‑Mä 'ŋnɔ, kä Laagɔ ‑nʋɔ ŋwadii' ‑za.

¹⁰ ‑Nɩnɩ ‑kä ylä 'ŋnö nä, ‑Laagɔzizii' ‑za, kä 'ŋnɔ ‑kä 'nɩ ɔ yi 'wlu gʋä ‑yä ɔ 'kä pana nynä ɔ ‑kä 'kämänyɔ.

¹¹ Nä Kwlienyɔɔ dëlü na, 'ŋnɔ ‑yä ŋwadi 'sɔ nä, kwa 'jɛnyɩ‑ yɩ nä wa 'nʋwa ‑läyɩɔ ‑säsä.

¹² ‑Ɔnöza bhää? 'Zaazɩ 'ŋnɔ nä, ŋwadi 'mnö Laagɔ ‑sä 'nɩ ʋ ‑nʋɔ yɩ 'flɛ, ‑mä 'ŋnɔ ɔmɔɔ‑ gään lä ŋwadi. ‑Nɩnɩ 'fɩɩn nä, Laagɔ‑ ‑nʋɩ lä.

¹³ ‑Maa, anyɩ 'titi a wloo yɩ ‑nä, ɩ ‑ŋwa bhä 'kʋ nynä ‑mä 'ŋnɔ kä bhibhiedä ‑kʋ nä ɔɔ' gʋä ‑lä 'wlu ‑a?

¹⁴ 'Nɩ zëkpëa 'titi nä, a panö'anyɩ nynä ‑mä ŋwadi kä nyɩ kwlie nä, ɩɩ' ‑wʋ 'klʋkpä ‑kʋ

¹⁵ ‑mä 'ŋnɔ kä nyɩɩ kwlie nä, kɩ ŋʋɔ 'klʋkpä kpänyɩ. Yio ‑a? Kä Laagɔ nyɛɛ‑ 'ŋnɔ nyɩɩwlu nynä ɔɔ' 'wluu gʋä ‑lapolu.

¹⁶ ‑Nɩnɩ n ci lä ‑lää nä, kä nyɩkpɔ kä ‑lɔɔ ‑kʋ 'nɩ ɔ kɩ 'kʋ bhläälɩɩ' fään nä, ɔ yibhë sɔɔ nynä ‑mä ‑anyɩ, ‑aa ‑wʋ 'kʋ bhläälɩɩ ‑waa. 'Nɩ Laagɔɔ' 'cɔcɩgbüü 'mnö 'kʋ bhläälɩɩ' ‑wʋ 'sɩɩ ‑mɔɔ ‑kʋ.

Kwlienyɔɔ' lülülɩɩ
( Matie 26.26‑28 ; Makö 14.22‑25 ; Lukö 22.15‑20 ; 1 Kolɛ 11.17‑34 )

¹⁷ Wälɩnɩ n 'kä ylä ci nä, ɩmɩ 'mnö, nn' ‑wʋ ‑kä 'nɩ n 'kanyɩ yɩ ‑kpacɛ klä. A kä 'wlu 'wlää nä, aa' 'plöö ‑wʋ 'kʋ ‑mä ka nyumä 'nɩ a mʋmʋ klä.

¹⁸ Wa yä'ä soo nynä ‑mä, anyɩa' 'wlu 'wläälɩɩ kɩ gbä 'nɩ a doo 'mʋ. 'Nɩ n lɩɩ 'pɛpɛlɩä nyaasäsä.

¹⁹ Ɩ ‑ŋwa 'zaazɩ 'kʋ nynä ‑mä 'mʋ‑doolɩ kʋ'anyɩ pää ‑yä anyɩa' nëëdëë' ‑lʋa ‑wa ‑kä lä dë 'tɛɛ sä nä, wa 'kä yibhënöɔ.

²⁰ A kä 'wlu 'wlää nä, Kwlienyɔɔ' kplɔɔkplɔɔ‑ŋënüü 'mɩ aa' lü ‑wʋ.

²¹ A kä 'wlu 'wlää‑ nä, nyɩkpɔ nyɩkpɔɔ' ŋënüü ɔ ‑pi lä nä, kɔ 'tɩtɔ ɩɩ' ‑za, 'nɩ ɔ bhlii 'kʋ 'nɩ ɔ lii. Ɩ ‑kä 'ŋnö 'nɩ ‑nɔnɔ ‑kʋ ‑lɔɔ 'nɩ ‑gbugbe bhlɔɔ yɩ, 'nɩ ‑nɔnɔ ‑kʋ ‑lɔɔ 'nɩ ɔ ‑loo, 'nɩ nʋ bhlɔɔ yɩ.

²² Aa' ‑wʋ 'gbü ‑kä nä, aa' kʋ ‑wʋ ‑mɔɔ 'nɩ a 'kä lü 'nɩ a kä 'mnä ‑a? ‑Mä Laagɔɔ' 'cɔcɩɛ 'mɛ aa' 'mänyɩ ‑wʋ lä ‑a? ‑Mä ‑wa ‑kʋɛ lä 'mnö 'nɩ ‑waa ‑wʋ lä lʋʋ ‑kä nä, wamä a tään bhä nynä a 'kä zoo' bhla ‑a? Sä n 'kanyɩ bhɛ soo? N 'kanyɩ 'ŋnu fään nynä ‑mä ka nʋ 'nää ‑a? Yio! 'Klünö 'kʋ nä, n nö'anyɩ ‑lä ‑kpacɛ klä.

( Matie 26.26‑28 ; Makö 14.22‑24 ; Lukö 22.19‑20 )

²³ Amʋ nä, a ni sä n 'cɩä‑ lä Kwlienyɔɔ dëlü nä. Kwlienyɔ Zozii nä, 'fɩa ‑yä wa 'kɔ pëë nä, ɩɩ' 'sabo, ɔ bhlüü‑ 'flɔɔbhë 'kʋ,

²⁴ 'nɩ ɔ ‑bhään 'fɩa Laagɔ 'nɩ ɔ yia 'mʋ ‑döödö. 'Nɩ ɔ yi ci, ɔ lä ‑nänä, amää‑ plöö‑ lä 'naa 'yɛkɛɛ n nyɛɛ‑ lä anyɩa' ‑za nä! A nʋ sɔɔ 'futu ‑yä a 'kä 'naa dä 'kʋ luë!

²⁵ Wa ‑bhɩä lä lülɩ 'nɩ ɔ yi 'sɩɩ divaa' pliie 'kʋ 'bhlü. Ɔ ‑bhään 'fɩa Laagɔ 'nɩ ɔ yi ci, ɔ lä divaa pliinɛ, ɛmɛɛ‑ plöö‑ lä Laagɔɔ' mɛnʋ ‑loluu 'naa doluu wlʋa‑ lä nä. Nä 'tänyɩɩ 'fɩɩn 'mnö a yi lä divaanä 'mnä nä, a luë 'naa dä 'kʋ.

²⁶ 'Tänyɩ 'fɩɩn 'mnö a yi lä 'flɔɔbhëa lü nä, 'nɩ a yi lä divaa 'mnä nä, Kwlienyɔɔ' 'kwiee wälɩ a ci lä. 'Nɩ ɩ yi sɔɔ kʋ ‑aaa 'nɩ ɔ yi yi.

²⁷ Ɩ ‑kä 'ŋnö 'nɩ nyɩkpɔɔ' ‑lɔmɔ ‑ɔ lü lä 'flɔɔbhëa 'nɩ ‑ɔ mnä lä divaa, 'nɩ ‑ɔɔ 'ŋʋɩ ‑wʋ lä 'klʋkpää nä, kɔ 'mänyɩ ‑wʋ lä Kwlienyɔɔ' 'yɛkɛɛ ‑yä ɔɔ' doluu.

²⁸ ‑Nɩnɩ ‑kä ylä 'ŋnö nä, nyɩkpɔ nyɩkpɔɔ' sä ɔ nää lä ‑mää zëkpëa 'kʋ nä, ɔ fään sɔɔ plɛ yëku 'fɩa ‑yä ɔ 'kä yi ‑yä ɔ 'kä 'flɔɔbhëa lü ‑yä ɔ 'kä divaa 'mnä.

²⁹ ‑Ɔnöza bhää? Nyɩkpɔɔ' lɔɔ ‑ɔ gä ‑lɔɔ lülülɩɩ lü 'nɩ ‑ɔ gä 'sɩɩ mnä 'nɩ ‑ɔ 'nɩɩ plɛ yëku fään nynä ‑mä Kwlienyɔɔ' 'yɛkɛɛ lä nä, ‑lɔɔ' nyɩkpɔɔ, Laagɔɔ' gbʋgblɛɛ 'mɛ jlüü lä ɔ yëku 'kʋ.

³⁰ ‑Nɩnɩ 'mɩɩ‑ ‑kä lä 'ŋnö 'nɩ anyɩa' nëëdëë' nyɩkpa ‑bhutukpää' ‑wʋ lä ‑yä. 'Nɩ ‑nänʋä 'bhlʋlɛ ‑slʋwa ylä, 'nɩ bhutukpä yä ylä 'ku.

³¹ ‑A gä ‑a yëkuu' nʋnʋgbɩɩ bɩä 'nägäsä nä, Kwlienyɔ 'nö‑anyɩ ‑lä ɔɔ' tlobina 'kʋ laamʋ.

³² ‑Mä Kwlienyɔɔ nä, kɔ bhu‑anyɩ lä ‑kɔkwɩ 'nɩ ɔ sä‑anyɩ gbäylɩ ‑yä Laagɔɔ' 'tite 'kädɛɛ ylʋʋ 'kʋ nä, ʋʋ' kä‑anyɩ ‑kä 'ylʋnʋzɔɔ' nyɩkpa 'mʋ 'cäkä.

³³ Nä, bhɛŋwnɩä ‑yä bhelienyɩ‑, a kä 'wlu 'wlää nynä a 'kä Kwlienyɔɔ' kplɔkplɔɔ‑ŋënü lü nä, a ‑bɛɛ ‑bɛɛ.

³⁴ Lɔɔ' ‑gbugbe kä 'bhlä nä ɔ lüü gbëë' ‑mä ɩɩ' ‑wʋ 'kʋ ‑ŋwa nynä ‑mä a 'wlää 'wlu ‑yä a 'kä Laagɔɔ' gbʋgblɛɛ a yëku 'kʋ jlüü. Bhelie ‑yä bhɛŋwnɩänyɩ‑, 'klüü‑ ‑too ylä ‑mɔɔ nä, n kä ‑kɛ ‑yi 'nɩ n 'kɩ ci.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan