Bìoball air-loidhne

1 Kolɛtɩ‑dunyʋä 10 - GOD - u2

'Yizlɛnyʋaa' ‑gɔgö‑popiee' nämʋʋ plöö‑ panalɩ
( Eblëë 3.7‑19 )

¹ Bhelie ‑yä bhɛŋwnɩänyɩ‑, 'klüü lɩɩ‑ ‑ŋëë lä ‑a tɩtɩä nä, n 'kanyɩmɩ ‑sää. Wa bha bhlä Ejipiti 'nɩ wa yi bhlä nä, 'nyukpɔ, ʋmʋʋ‑ 'tienʋwa‑ 'nɩ wa yi lä jizlɛɛ 'tɔɔ.

² Wa ‑yä Moyizö 'sɔɔ jɛnyɩ‑ bhɛ lä nä, 'nyukpɔnʋ ‑yä jizlɛɛ 'mnö ‑mɔɔ waa' ‑lefɩɩn 'ŋʋʋ‑ lä 'nyu 'wluu.

³ 'Wugɔɔ 'mnö ŋënü‑cëa ‑bhlo wa ‑lü.

⁴ 'Wugɔɔ 'mnö 'nyu‑cëa ‑bhlo wa mnää‑. Cɛkʋʋ fänʋwa bhlä ‑blɔkʋ nä, ʋʋ' 'mnö 'nyuu 'mʋ wa mnää‑. 'Nɩ Klisö 'mɔɔ‑ plöö bhlä lɔɔ' cɛkʋʋ.

⁵ ‑Mä ɩ ‑kʋ sɔɔ 'nɩ waa' pää ‑bhutukpä waa' nää bhɔɔ sä Laagɔ 'ylä bhlä nä. Ɩ ‑kä 'ŋnö 'nɩ wa 'kuu‑ ‑mɔɔ ‑gɔgö ‑popie 'mnö.

⁶ ‑Lää' 'klünö nä, kɩ ‑ŋëë lä ‑a tɩtɩä ‑yä ɩ 'kä ‑anyɩa panalɩ 'plö ‑yä ‑aa kä ‑kä gbenyenyi pleyi känö wamä 'bhisakʋ.

⁷ A 'nä bʋbɔɔ ‑lä ‑zlüü waa' nëëdëë' nyɩkpaa' ‑nänʋä 'bhisäkʋ. ‑Lɔɔ' 'klüü ‑jɩjlɔ Laagɔ‑bɔɔgʋʋ 'mnö nynä ‑mä, Wa ‑kʋ sä 'nɩ wa ‑lü, 'nɩ wa mnää‑. 'Nɩ wa ‑bha 'kʋ 'nɩ wa bluu‑ ‑zaylɛklu.

⁸ Nä ‑käpä ‑käpää' kʋ‑anyɩ lä nëëdë nynä waa' nëëdëë' 'sɔnalʋä. Kä wa ‑nʋ lä sɔɔ nä, waa' nëëdëë' nyɩkpaa' bhɛgöö' glʋ 'nɩ taa (23.000) kuu‑ ylʋʋ ‑bhlo 'kʋ.

⁹ ‑A gä ‑lɔɔ ‑kʋ nä, ‑a 'nä ‑sä ‑lä 'sɩɩ Kwlienyɔɔ ‑zɔɔ. Waa' nëëdëë' nyɩkpaa' ‑nänʋä ‑nʋ sɔɔ. Ɩ ‑kä 'ŋnö nä, Laagɔ ‑lä ‑leebeli 'nɩ ɩ ‑mnuwa 'nɩ wa kuu‑.

¹⁰ A kä 'sɩɩ ‑lɔɔ ‑kʋ nä, a 'na 'ŋʋŋuë ‑lä 'mnö. Waa' nëëdë ‑nänʋä ‑nʋ sɔɔ 'nɩ 'kwiee ‑zuzuu ‑yi 'nɩ ʋ yiwa bhɩa.

¹¹ Wälɩnɩ 'fɩɩn‑ ‑ɩ ‑ŋënʋwa lä nä, kɩ ‑nʋɔ lä ‑yä ɩ 'kä nyɩkpaa' panalɩ 'plö. Kɩ ‑jɩjlɔ lä 'sɩɩ Laagɔ‑bɔɔgʋʋ ‑yä, ‑anyɩmɔɔ‑ ‑kʋ ylä zëkpëa' bhɩä ‑gbäsɩɩ nä, ɩ 'kä anyɩa cɩalɩ 'plö.

¹² Naa, nyɩkpɔɔ' lɔɔ‑ gä bhɛ bhobho nynä ‑mä kɔ 'nynigo 'kʋ nä, ɔ luë ‑yä ɔɔ' kä ‑kä ‑zɔɔ bhlü.

¹³ ‑Zɔɔpälɩɩ 'fɩɩn a nii‑ lä nä, sɔɔ ‑zɔɔpälɩ ŋëë lä nyɩkpa. Laagɔɔ' sʋ cii‑ lä nä, kʋ nʋ sɔɔ. Ɩ ‑kä 'ŋnö nä, ʋʋ' ‑lä ‑lɔɔ kʋ 'nɩ ‑zɔɔpälɩɩ' lɩɩ ‑ɩnö 'tɛtɩ ‑zinö'anyɩ lä 'wlu nä, ɩ 'kanyɩ ŋëë. ‑Zɔɔpälɩ ka'anyɩ ŋëë nä, Laagɔ yi'anyɩ 'tɛtɩ 'nyɛ 'nɩ a yii nëë' bhɩä.

Pɔlʋ lä Kolɛtɩduu' 'cɔcɩnyʋaa' 'plö lä ‑zlüü' bʋbɔdä

¹⁴ ‑Nɩnɩ ‑kä yɩ 'ŋnö nä, 'naa ‑wawanyʋänyɩ‑, aa' 'plö ‑läyɩɔ ‑zlüü' bʋbɔɔdä!

¹⁵ N ‑yi sɔɔ nynä ‑mä a ‑glö nyɩkpaa' lʋa‑ 'fika lä nä, 'nɩ n sonö'anyɩ lä wälɩnɩ. Nä 'klüü ‑lɩɩ n sonö'anyɩ lä nä, a bɩɩ ‑yä a 'kɩ nyaasäsä 'ni.

¹⁶ ‑A gä Kwlienyɔɔ' kplɔɔkplɔɔ‑ŋenüü lüdä ‑kʋ nä, divaa ‑a gä Laagɔ ‑bhään 'nɩ ‑a mnä lä nä, a gbä 'nɩ ‑a ‑yä Klisö 'sɔ 'jɛnyɩ‑ ɔɔ' doluu 'mnö. 'Flɔɔbhëa ‑a dëë 'nɩ ‑a lü lä nä, a gbä 'nɩ ‑a ‑yä Klisö 'sɔ 'jɛnyɩ ɔɔ' 'yɛkɛɛ 'mnö.

¹⁷ Sä 'flɔɔbhëa ‑bhlü lä ‑bhlo 'nɩ ‑a dënöa lä nä, ‑anyɩ ‑mä 'sɩɩ, ‑a ‑zu yɩ 'flɛ ‑mä ‑a ‑glö yɩ 'yɛkɛɛ ‑bhlo.

¹⁸ A ni 'Yizlɛnyʋa 'yi ‑a? ‑Wa lü lä 'cibhiee' mnaa nä, 'cibhisälɩɩ 'mnö wa ghlää 'nɩ wa ‑yä Laagɔ 'sɔ 'jɛnyɩ lä.

¹⁹ 'Klü ‑sä n ylä bhä nynä n 'kanyɩ soo 'naa ‑a? N nö'anyɩ ‑wʋ ‑soo nynä ‑mä mnɛɛ' ‑lɛɛ wa bʋbɔ lä zlëë' nä, kɛ ‑kä gbaa' 'cënänä. 'Nɩ kä nn' ci ‑wʋ 'sɩɩ nynä ‑mä ‑zlëë ‑kä gba.

²⁰ ‑Ɛɛɛ ‑wʋ sɔɔ! Kä n ci lä nynä ‑mä, ‑zlüü' bʋbɔnyʋaa' 'cibhie nä, ‑zizinyenyi‑ wa sänɩɛ lä dëlü ‑mä ‑ɛɛ ‑wʋ Laagɔ. Ɩ ‑kä 'ŋnö 'nɩ wa ‑yä ‑lɔɔ' ‑zizinyenyii 'sɔ yä 'jɛnyɩ‑. Nä ‑amʋ, nn' ‑wʋ ‑waa nynä ‑mä a ‑yä ‑zizinyenyi 'sɔ 'jɛnyɩ.

²¹ Aa' ‑lä Kwlienyɔɔ' pliie 'mnö 'mnää 'nɩ a 'kä 'ylɩbhɔ 'nɩ a 'kä ‑zizinyenyii' pliie 'mnö 'mnää. Aa' ‑lä Kwlienyɔɔ' lülülɩɩ lü, 'nɩ a 'kä 'sɩɩ ‑zizinyenyii' lülülɩɩ lü.

²² Naa, Kwlienyɔɔ 'mɔ ‑a fʋfʋä bhä ‑a? Ka ‑a ‑kä 'tɛtɩ 'nɩ ‑a zio bhä ‑a?

A nʋ sa 'fɩɩn Laagɔɔ' 'klʋagbaa' ‑za

²³ ‑Ɛɛɛ, nʋnʋgbɩɩ 'fɩɩn ɩ ‑kʋ lä zëkpënä ‑zɔɔ nä, ‑a yi mii 'nɩ ‑a yii nʋ ‑mä ɩɩ' ‑lefɩɩn ‑wʋ sɔɔ nʋdä nää. ‑A yi mii 'nɩ ‑a yii nʋ ‑ma ɩɩ' ‑lefɩɩn‑ 'nyɛ ‑wʋ nyɩkpɔ 'tɛtɩ.

²⁴ Nä aa' tään ‑lä a yëkuu' 'nää ‑mä, a tään a ‑liesɩɩ' 'nää.

²⁵ Lʋʋ a yi lä ‑adäbhlää' zɔɔ nä a luu ‑yä plɛɛ' belio'anyɩ ‑lä 'mʋ!

²⁶ ‑Ɔnöza bhää? ‑Dʋdʋnʋ ‑yä ‑lɩɩ 'fɩɩn‑ ‑kʋʋ lä 'mnö nä, ‑ɩ ‑glö Kwlienyɔɔ' lɩɩ.

²⁷ Nä nyɩkpɔɔ' lɔɔ ‑wʋ lä Kwlienyɔ ‑yi nä, ɔ kä‑ä ɔɔ' ‑gbäsɩɩ laa‑ nynä a 'kä lü 'nɩ ‑n gä ‑mɔɔ ‑mʋ nä, ‑lɩɩ 'fɩɩn ɔ kä‑ä lä 'nyɛ nä, ‑n lii ‑mä ‑naa 'ylä ‑lä ‑n yëku.

²⁸ ‑Mä nyɩkpɔ ka'anyɩ ‑soo nynä ‑mä, mnɛɛnɛ ‑zlëë' bʋbɔlɛɛ lä nä, aa' lie ‑lä. ‑Ɔnöza bhää? Nyɩkpɔmɔɔ‑ ‑luënö'anyɩ lä nä, ɔɔ' ‑za. Ɔɔ' kɩ ‑kä 'yigädasä bhobho.

²⁹ Sä a bhobhui lä nä, sɔɔ n sä ‑wʋ. Sä ɔmɔ ɔ yii lä bhobho nä, sɔɔ n sä lä. N ci lä sää nä, nyɩkpɔ yi mii 'nɩ ɔ yi ɔ yëku 'ylä nynä ‑mä, 'aa! nä 'naa sä n ‑waa lä nä, sɩ ‑kʋ bhä 'nɩ nn' ‑lä bhä sɔɔ ‑a ‑liee' ‑za nʋʋ?

³⁰ N 'kä lä lü nä, n ‑bhään 'fɩa Laagɔ 'nɩ n lü nä, sɩ ‑kʋ bhä 'nɩ nyɩkpɔ yi'i bhä bʋkʋ nëkʋ fä ‑lɔɔ' lülülɩɩ' ‑zaa?

³¹ Nä ka yi bhä lü ‑o, ka yi bhä 'mnä ‑o, sa 'fɩɩn a yi lä nʋ nä, a fään Laagɔ 'ŋnu.

³² 'Zufʋnyʋä ‑o, 'Glɛkönyʋä ‑o, 'cɔcɩnyʋa ‑o, 'klüü' lɩɩ‑ yiwa lä plɛ 'kpɔsʋä nä, aa' nʋɩ ‑lä.

³³ ‑Amʋ 'titi, sɔɔ n bhlää lä 'kʋ 'nɩ n nʋ lä 'sɩɩ ‑yä sa 'fɩɩn n yi lä nʋ nä nyɩkpa 'fɩɩn 'kä sɔɔ wamä. N yëkuu' 'nää nn' tään ‑wʋ ‑mä, nyɩkpa ‑bhutukpää' 'nää n tään lä ‑yä wa 'kä ‑lɔɔ nëë' ‑bha.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan