Bìoball air-loidhne

1 Kolɛtɩ‑dunyʋä 1 - GOD - u2

Bhäälɩ

¹ ‑Amʋ Pɔlʋ, Laagɔ laa‑ 'nɩ ‑ɔ yä lä Zozi Klisöö' lobho lobhonyɔ 'plö nä, n ‑yä bheli Sɔsötɛnö 'sɔ,

² ‑anyɩ jɩjlä'anyɩ lä 'bɔɔgʋnʋ, anyɩ Kolɛtɩduu' 'cɔcɩnyʋa. Anyɩmɔɔ‑ ‑yä Klisöö' 'sɔ 'jɛnyɩ‑ lä kplɔɔlɩɩ 'mnö nä, ɩyä dää fɩɩn nyɩkpa ‑wa zɛɛ lä Kwlienyɔ Zozi Klisö 'ŋnö, 'nɩ ɔ plöö‑ lä waa' Kwlienyɔ 'nɩ ɔ plöö‑ lä 'sɩɩ ‑anyɩa lɔɔ nä.

³ ‑A 'Bä Laagɔ, ɔ ‑yä Kwlienyɔ Zozi Klisö 'sɔɔ 'nää ‑yä 'kʋ wɔtɔlɩɩ 'sɔ ŋënö'anyɩ 'kʋ.

'Nää nyɩkpɔ 'nii lä Klisö mnö nä

⁴ N bhään 'kɔɔkɔ Laagɔ anyɩa' ‑za. Laagɔɔ' ‑bɔɔ 'nɩ ʋ ‑ghlää lä Zozi Klisö 'kʋ 'nɩ ʋ nyɩ'anyɩ lä 'nää.

⁵ ‑Ɛɛɛ, a ‑yä Kwlienyɔɔ Zozi Klisö 'sɔɔ 'jɛnyɩlɩɩ 'mnö, ‑mɔɔ Laagɔ ‑ghlää 'nɩ ʋ yi'anyɩ lä 'nää 'fɩɩn 'kʋ kwlie. ‑Lɔɔ' 'nää bha ʋʋ' ciciwälɩɩ ‑yä ʋʋ' yibhëlɩɩ 'mnö.

⁶ ‑Anyɩ nä, Klisöö' ‑dläfʋɛɛ kä ‑a ‑lünö'anyɩmɛ lä yëku 'nɩ ɛ ‑gbä 'nɩ anyɩa' pɔlötɛtɛɛ yi lä ‑mɔɔ see.

⁷ Ɩ ‑kä yɩ 'ŋnö nä, anyɩmɔɔ‑ ‑bɛɛ lä Kwlienyɔ Zozi Klisöö' yiylʋʋ nä, 'nää 'fɩɩn Laagɔ kwlie lä nä, aa' bɔɔ ‑wʋ aa' 'mnö lʋʋ ‑bhlo 'coo.

⁸ Laagɔ yi gbä 'nɩ a yi 'tɛtɩ kään ‑aaa, 'nɩ bhɩädaa' ylʋʋ yi ŋëë. Ɩ yi sɔɔ kʋ ‑yä Kwlienyɔɔ Zozi Klisöö' yiylʋʋ 'kʋ, ɔɔ' ka'anyɩ ‑kä 'foclo yëku 'nii.

⁹ Sä Laagɔ cii‑ lä nä, kʋ nʋ sɔɔ. Ʋmʋʋ‑ laa‑anyɩ 'nɩ ‑anyɩa Kwlienyɔɔ Zozi Klisö, ‑ɔ plöö‑ lä ʋ ‑Yowli nä, ‑a ‑yɔsɔ yi lä 'jɛnyɩ.

Kolɛtɩduu' 'cɔcɩnyʋa pää' 'mʋ doolɩ ‑kʋ ‑mɔɔ

¹⁰ Bhelie ‑yä bhɛŋwnɩänyɩ‑, ‑anyɩa Kwlienyɔɔ Zozi Klisöö' 'ŋnöö 'mnö, n sonö'anyɩ nynä ‑mä anyɩ 'fɩɩn, a 'nunu 'mʋ ‑yä gbɩɩ' kʋ'anyɩ ‑lä 'pää! A 'jɛnyɩ 'wugɔɔ ‑bhlo 'mnö ‑yä a kään bhobhowlu ‑bhlo.

¹¹ ‑Ɛɛɛ, bhelie ‑yä bhɛŋwnɩänyɩ‑, Klowee' daa' ‑bhanyʋä ‑yi 'nɩ wa ‑sonö'ö nynä ‑mä aa' 'nunu ‑wʋ 'mʋ.

¹² Kä n ci lä nynä ‑mä, wlä anyɩ ‑bhlobhlo pää' nä, ‑nänʋä ci nynä ‑mä Pɔlʋ‑ wa gëë‑ 'kʋ. ‑Nänʋä ci 'sɩɩ nynä ‑mä Apolɔsʋ‑ wa gëë‑ 'kʋ. 'Nɩ ‑nänʋä ci nynä ‑mä Pɩɛlö‑ wa gëë‑ 'kʋ. 'Nɩ ‑nänʋä ci 'sɩɩ nynä ‑mä Klisö‑ wa gëë‑ 'kʋ.

¹³ Nä, kä n yla'anyɩ ylä ‑mä Klisöɔ nä, kɔ ‑dënö ‑dënöɔ bhä 'mʋ ‑a? Pɔlʋ 'mɔɔ wa ‑bhoo bhä 'kusuu 'yi anyɩa' ‑za ‑a? Pɔlʋʋ' 'ŋnöö 'mnö wa 'ŋʋnö'anyɩ bhä 'nyu 'wlu ‑a?

¹⁴ N fään Laagɔ 'ŋnu, sä ‑amʋʋ‑ nö'anyɩ ‑wʋ lä 'nyu 'wlu ŋʋʋ nä! N ‑sä ‑kä ‑mɔɔ Klipusö ‑yä Gayusö.

¹⁵ Nä, nyɩkpɔɔ' ‑lä ci nynä ‑mä 'naa 'ŋnöö 'mnö ɔ 'ŋʋʋ‑ 'nyu 'wlu.

¹⁶ ‑Ɛɛɛ! N ŋʋʋ‑ 'sɩɩ Sɩtefanasö ‑yä ɔɔ' gbünyʋä 'nyu 'wlu. N bhobho nynä nn' yɩɔ bʋkʋ nyɩkpɔ 'yigädalɔɔ 'nyu 'wlu ŋʋʋ‑.

¹⁷ Nyɩkpaa' 'nyuu 'wlu‑ŋʋlɩɩ ‑zä Klisö nö'ö ‑wʋ ‑lobho. Kɔ ‑lobho'o nynä ‑mä n ‑sää nyɩkpa Kwlienyɔɔ' 'Nägädöö. 'Nɩ ɔ nö'ö ‑wʋ 'sɩɩ ‑soo nynä ‑mä n 'bhlü nyɩkpa‑dɩgälɩ 'kʋ ‑yä n ‑sää ‑lɔɔ' 'döö. ‑Ɔnöza bhää? Klisöö' 'kusuu 'yi 'kwie kä ‑kä kʋ nynä ‑mä 'flɛ.

Laagɔɔ' 'päwaa ‑yä 'fikee 'sɔ plöö‑ lä Klisö
( 1 Kolɛ 3.18‑20 ; Matie 11.25‑27 )

¹⁸ 'Kusuu 'yii 'kwie Klisö kuu‑ lä 'nɩ, ‑ɛnö wälɩɩ ‑a ci lä nä, nyɩkpaa' ‑lʋa bhlü lä tootoo ‑blɔɔ nä, wa kɩ 'nyukwli poo nä, kwa ci nynä ‑mä pɔlö‑bhläwälɩ ‑a ci. ‑Mä, ‑anyɩmɔ Laagɔ yä lä ‑lɔɔ nëë' nä, 'kusuu 'yii 'kwie Klisö kuu‑ lä nä, ɛ plöö‑ ‑anyɩa ‑za Laagɔɔ' 'päwä.

¹⁹ Kɩ ‑jɩjlɔ Laagɔ‑bɔɔgʋʋ 'mnö nynä ‑mä, Dɩgälɩ‑yibhënyʋa' dɩgälɩɩ, N yi gbä 'nɩ ɩ yi mnɔ. 'Nɩ waa' 'fikee, n yie nuë.

²⁰ Nä, wälɩ‑yibhënyɔɔ nä, wälɩ ‑sä ‑ɔ ‑yi bhä 'nɩ ɔ 'kä bhä cii? Wälɩklë ‑sä 'bɔɔgʋ‑yibhënyɔ yi bhä? 'Nɩ ‑a sä bhä ‑mää ylʋʋnʋ ‑zɔɔ' wälɩɩ' 'kʋ bhläänyʋa? Laagɔ yä yɩ pana nynä ‑mä, ‑mää 'ylʋzɔɔ dɩgälɩɩ 'fɩɩn ‑glö ʋʋ' ‑za pɔlö‑bhlägbɩ.

²¹ ‑Ɔnöza bhää? 'Ylʋzɔkʋnyʋä ‑ghlää waa' dɩgälɩɩ 'mnö 'nɩ wa nii‑ Laagɔɔ' dɩgälɩɩ 'yi ‑mä waa' ‑wʋ Laagɔ ‑yibhë. Nä ‑anyɩa ciciwälɩnɩ dɩdɛ lä pɔlö‑bhlägbɩɩ nä, kä Laagɔ ŋʋʋ‑ lä nynä ‑mä, nyɩkpɔ yi lä ɩɩ' pɔlötɛtɛ kään nä, ʋ yio ‑lɔɔ nëë' ‑sä.

²² 'Zufʋnyʋä lä ‑daminë wa tään. 'Nɩ 'Glɛkönyʋä lä dɩgälɩ wa tään.

²³ ‑Mä ‑anyɩ nä, Klisöɔ wa ‑bho lä 'kusuu 'yi nä, ɔɔ' yëkuu' 'döö 'mɩ ‑a sää lä. Nä 'dönö 'mɩ 'Zufʋnyʋää' ŋoo ‑wʋ lä 'kʋ. 'Nɩ ‑mɔɔ 'yigädabhlɩɩ 'mnö nyɩkpaa ‑mä 'sɩɩ, wa lɩɩ 'sɩɩ pɔlö‑bhläwälɩ.

²⁴ ‑Maa, nyɩkpaa' Laagɔ yä lä laa nä, 'ŋʋʋ yɩ 'Zufʋnyʋa ‑o, ‑mɔɔ' 'yigädabhlɩɩ 'mnö nyɩkpaa ‑o, Klisöɔ nä, ɔmɔɔ‑ plöö‑ Laagɔɔ' 'päwaa ‑yä Laagɔɔ' dɩgälɩɩ.

²⁵ ‑Ɛɛɛ! ‑Mä Laagɔɔ' pɔlö‑bhlägbɩ nä, kɩ ‑zi 'ylʋzɔɔ' dɩgälɩ‑käänyʋa' dɩgälɩɩ 'kʋ. 'Nɩ Laagɔ 'nö ‑zi ‑cʋcʋ ‑kä nä, ʋ ‑kä 'kɔɔkɔ 'tɛtɩ 'nɩ ʋ ‑zi 'ylʋzɔkʋnyʋä 'tɛtɩɩ 'kʋ.

Nyɩkpaa' ‑lʋa Laagɔ laa‑ lä nä

²⁶ Bhelie ‑yä bhɛŋwnɩänyɩ‑, a wloo ‑wʋ saa, anyɩmɔ Laagɔ laa‑ lä nä. Anyɩa' nëëdëë' ‑lʋa wa wloo lä nynä dɩgälɩɩ' käänyʋä nä, wa nö'anyɩ ‑wʋ nëëdë ‑zu. 'Nɩ 'tɛtɩ‑käänyʋä nö'anyɩ ‑wʋ 'sɩɩ nëëdë ‑zu. Nyɩkpa 'kädʋä nö'anyɩ ‑wʋ 'sɩɩ nëëdë ‑zu.

²⁷ ‑Mä Laagɔ nä, ‑lɩɩ nyɩkpa ci bhlä nynä ‑mä ‑ɩɩ ‑wʋ gba ‑kä nä, ɩmɩ ʋ bhlüü‑ lä 'kʋ ‑yä, ʋ 'kä gbä ‑yä 'ylʋzɔɔ' dɩgälɩ‑yibhënyʋa zoo 'kwa 'kʋ yii. Ɩyä ‑mɔɔ' 'tɛtɩkäälɩɩ 'fɩɩn nä, ‑lʋʋ' lʋʋ‑ ‑wʋ lä ‑cʋcʋ ‑kä nä, ʋ 'kɩ sɩä.

²⁸ A ni 'yi naa, ‑mää 'ylʋzɔɔ ‑lʋʋ nyɩkpa ci lä nynä ‑mä, ‑ʋʋ ‑wʋ gba ‑kä 'nɩ waa' 'mänyɩ ‑wʋ lä nä, ʋmʋ Laagɔ bhlüü‑ lä 'kʋ ‑yä ‑mää 'ylʋzɔɔ ‑lɩɩ 'fɩɩn‑ kään lä gbʋ nä, ʋ 'kɩ sɩä.

²⁹ ‑Ɔnöza bhää? Kä Laagɔ ‑nʋ lä sɔɔ ‑yä, nyɩkpɔɔ' kä ‑kä zëkpënä ‑zɔɔ täkpɔ.

³⁰ Laagɔ yä ‑gbä 'nɩ ‑a ‑yä Zozi Klisö 'sɔ yä 'jɛnyɩ‑. ‑Anyɩ nä, Klisönɔ 'mɔɔ‑ plöö‑ lä ‑anyɩa dɩgälɩɩ ‑a yi lä nä. Nä Laagɔ dëlü ɩ bha lä. Klisönɔ 'mɔ Laagɔ ‑ghlää 'kʋ 'nɩ, ɔ ŋʋ‑anyɩ lä 'yi ‑gëë ‑blɔɔ 'kʋ. Ɔmɔɔ‑ gbä 'nɩ ‑anyɩa zëkpëa ‑kplɔɔ lä Laagɔ dëlü. Ɔmɔɔ‑ ‑sanyɩ lä nyenyii nëë'.

³¹ Ɩmɩɩ‑ ‑kä lä 'ŋnö 'nɩ Laagɔ‑bɔɔgʋʋ 'mnö, ɩ ‑jɩjlɔ lä nynä ‑mä, Nyɩkpɔ kä cii‑ nynä ‑mä ɔ yi täkpɔ nä, Ɔ täkpɔɔ Kwlienyɔ Laagɔ 'mʋ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan