Tito 3 - Biblia

Kërái Cristo re wɨrowia wae reta yureko waerä japicha reta ndiwe

¹ Jekuaeño emɨmandúa Cristo re wɨrowia wae reta kua re: Jae reta tuipɨu imburuwicha reta wi jare tuyapoñoi jae reta jei wae rupi. Toï reta uyapo waerä ipotawe mbae ikawi wae.

² Jare awɨye tuyemɨngeta kachi reta japicha kotɨ. Awɨye tuyeaka reta. Tipɨawasu chupe reta jare tuñemɨmichi reta.

³ Emɨmandúa reta yande ndei Cristo re yarowia mbowe, yandereko ikawi’äse. Yande yaikose yandearakuaa mbae echa. Yaikose yaipota wae reño yayembɨyerowia waerä. Jare yayembɨtawɨse. Mbaembae kachi yanderete re yareko wae jekuaeño ime wɨreko mbaepuere yanderé. Yayapoñoise mbaembae kachi wae, jare ñañemɨrose yanderapicha reta pe. Ñañeamɨtäase yanderapicha reta ndiwe. Jukuärái yande yaikose tenonde yawe.

Kërái Tumpa yandeparareko

⁴ Erëi Tumpa ko jae yandeRepɨ wae. Jae uikuaaka yandewe kërái jae ipɨakawiete yandekotɨ wae jare kërái yanderauete oï.

⁵ Echa’ä jae opa umbái yandewi mbaembae yayawɨ ikotɨ wae, jare jukuärái yanderepɨ teko ime yareko ikotɨ wae wi. Jukuärái jae uyapo yandeparareko ramo – mbaetɨ ko mbae jupi yayapo wae rupi. Añetete Espíritu Santo rupi Tumpa yandepɨayoe, jare jukuärái umee yandewe tekowe ipɨau wae. Jare yandereko umbɨpɨau wi.

⁶ Tumpa umee ma yandewe Espíritu Santo umbɨete mbae rewe Jesucristo re yarowia ramo. Jae ko yandeRepɨ wae.

⁷ Jare ipɨakawiete ramo, Tumpa umae yanderé yandereko mbae wae rami. Jukuärái Tumpa uyapo yandewe yandepuere yaiko waerä taɨ jare tayɨ retarä. Jáeramo ñaäro ñaï yayerowia rewe yaiko waerä jae ndiwe jaeño mái pewa.

⁸ Jokua ñee añetete ko. Jáeramo awɨye ndekueri ndeporomboe waerä jese. Echa’ä jukuärái opaete Tumpa re wɨrowia wae reta uñemɨatangätuta jekuaeño uyapo reta waerä mbaembae ikawi waeño.

Pablo jekuaeño umbɨarakuaa Tito

⁹ Iyandareko kawi ndiyé, echa’ä jeta wae reta uyeakañoi tamɨkue reta re, jare judío reta jeko re, jare ipotawe mbae re. Awɨye iyemɨinge jokua mbaembae reta ipɨte pe. Echa’ä jokua ikawi’ä oï yandewe jare ndarau omborɨ kiawe uyapo waerä Tumpa jei wae rupi.

¹⁰ Ime yawe kía oporomboe kachi wae jare jukuärái umbɨyao tee oï Cristo re wɨrowia wae reta, jayawe embɨeta chupe. Jare jae uyapɨsaka’ä nderé yawe, embɨeta ye chupe. Erëi uyapɨsaka’ä ñeño yawe, nde jare ïru hermano reta pesɨrɨ chuwi.

¹¹ Echa’ä jokua nunga reta uyawɨ ma oï Tumpa kotɨ jare uyerowa ma añetete wae wi. Jae jeko pewái ma ko uyembɨjekoka oï.

Pablo jei Tito pe mbaembae uyapo waerä

¹² Che aipota amondo aï ndepɨ cheïru Artemas ani Tíquico. Jare jae oo ma uwäe yawe ndepɨ, jupiwoiño eyu chepɨ tëta wasu Nicópolis pe. Echa’ä che chekɨrëɨ apɨta aï joko pe roɨ uasa rewa.

¹³ Emborɨ kawi mii opaete ndepuere wae rupi abogado Zenas jee wae jare Apolos wi yuraa kawi reta waerä, jare awɨye waerä mbae uata chupe reta.

¹⁴ Opaete Cristo re wɨrowia wae reta tuyemboe jekuaeño uyapo reta waerä mbaembae ikawi wae omborɨ waerä mbae uata oï chupe wae reta pe. Jare jukuärái uyapo reta yawe, ndarau yureko iyakɨ wae reta rami.

Pablo wɨraaka saludo

¹⁵ Opaete che ndiwe ñonoï wae reta wɨraaka oï ndewe saludo. Embɨsaluda mii chewe opaete cheïru reta Cristo re wɨrowia wae joko pe ñonoï wae reta. YandeYa Jesucristo jekuaeño tipɨakawi pewe. Jukuärái tuiko.