Tito 2 - Biblia

Pablo umbɨarakuaa Tito kërái omboe waerä kuimbae ukuakuaa wae reta

¹ Erëi nde, Tito, awɨye iko jokua nunga reta echa. Nde jekuaeño eporomboe yemboe añetete wae rupi.

² Jukuärái emboe kuimbae ukuakuaa wae reta uechaka waerä teko kawi, jare uyandareko kawi reta waerä iyé mbaembae kachi wae wi ïru wae reta uipɨu chuwi waerä. Emborɨ jae reta wɨrowia kawi waerä Tumpa re jare upuruau kawi waerä ipɨawasu rewe.

Pablo umbɨarakuaa Tito kërái omboe waerä kuña ukuakuaa wae reta

³ Jae ramiño wi emboe kuña ukuakuaa wae reta uechaka waerä teko kawi ipuere umbɨyerowia waerä Tumpa. Emboe reta wi awɨye waerä indayepota jare awɨye tikause reta wi. Jare emɨkɨrëɨ reta omboe waerä ikawi wae re kuña taurusu wae reta.

⁴ Tomboe reta kërái uau kawi waerä ime jare imembɨ reta.

⁵ Tomboe reta wi kërái uechaka waerä teko kawi, jare awɨye waerä uyapo reta mbaembae kachi wae, jare kërái uyandareko kawi reta waerä jëta re, jare kërái iko reta waerä ipɨakawi rewe jare ime jei wae rupi. Echa’ä jukuärái yureko reta yawe, ïru wae reta ipuereta’ä ma uyemɨngeta kachi yande yaporomboe Tumpa rewa wae re.

Pablo umbɨarakuaa Tito kërái omboe waerä kuimbae taurusu wae reta

⁶ Jae ramiño wi emboe kuimbae taurusu wae reta awɨye tumaeño jete uipota uyapo wae rupi.

^7-8 Jare nde, Tito, echaka ndereko kawi taurusu wae reta pe jae reta omomoe waerä ndereko. Jare jekuaeño eporomboe añetete wae jare jupi wae ndipɨu rewe Tumpa wi awɨye waerä kía ipuere nembɨjeko mbae re. Echa’ä jukuärái ndiyapo yawe, oyowaicho nde ndiwe wae reta kïiño upɨtata reta, echa’ä mbaetɨta chupe reta mbae re iñera waerä yandekotɨ.

Pablo umbɨarakuaa Tito kërái omboe kawi waerä uyeyokui wae reta

⁹ Emboe uyeyokui wae reta jekuaeño tuyapo uipɨu rewe ipatrón jei wae, jare tumbɨyerowia reta ipatrón opaete mbaembae uyapo wae rupi. Awɨye tiyeakapota reta.

¹⁰ Awɨye timonda reta. Tuyekuaaka reta ipatrón pe jae ipuere waerä wɨrowia katu jese reta. Echa’ä jukuärái uyapo reta yawe, ïru wae reta uikuaata kërái ikawiete ye ko yemboe Tumpa wi ou wae jare kërái Tumpa ko jae yandeRepɨ wae.

Pablo umbɨarakuaa Tito kërái oporomboe kawi waerä Tumpa ipɨakawi re

¹¹ Jayawe emboe opaete wae reta kuärái: Tumpa ipɨakawiete ko, echa’ä jae umee tëi ma opaete ɨwɨ pewa reta pe kërái ipuere waerä onoi tekowe opa mbae wae jae ndiwe.

¹² Jare Tumpa ipɨakawiete yandewe wae yanemboe yaeya waerä yandereko kachi wae jare mbae kachi yanderete uipota uyapo wae. Jare yanemboe wi kërái yepe tëi kua ɨwɨ tɨnee oï mbae kachi wae pɨpe, jesewe yaiko kawita ko jupi rupi jare Tumpa yambɨyerowia waerä.

¹³ Jukuärái ko yaikota añawe rupi, yande ñaäro ñaï rambuewe yayerowia rewe yandeYa Jesucristo ou ye rewa. Jokua ara jae uyekuaata oï imbaepuere jembipete rewe. Echa’ä jae ko yandeTumpa jare yandeRepɨ wae, jare jae imbaepuere tuichaete.

¹⁴ Opaete yande jeta ma yayawɨ Tumpa kotɨ. Erëi Jesucristo uñemee umano waerä yanderé yanderepɨ waerä jokua teko ñanoi wae wi, jare oyoe waerä yandepɨa opaete ikawi mbae wae wi. Jukuärái jae ñaneñono tee ma jae imaerä, yande ñanekɨrëɨ yayapo waerä mbaembae ikawi waeño.

¹⁵ Jokua ñee re ko ndeporomboeta. Emɨkɨrëɨ reta uyapo waerä opaete kua mbaembae che jae ma ndewe wae. Erëi uyapo’ä reta yawe, embɨeta chupe reta. Echa’ä Tumpa umee ma ndewe mbaepuere jukuärái ndiyapo waerä. Jayawe awɨye kiawe tanerɨ̈ro.