Santiago 5 - Biblia

Ikokatu wae reta jeko kachi wae tuikuaa iyupe

¹ Añawe che jaeta jokua ikokatu wae reta uiporaraka ñonoï pewe wae pe kuärái: Pe pikokatu piko wae reta, piyapɨsaka kua chiñee re. Ikawi ko piyao waerä peräse rewe, echa’ä outa oï ara ikawi’äete wae pemaerä.

² Jare pembaembae ikawi wae reta ndarau etei pemborɨ, echa’ä opata ikumewa oï kuri. Kupii reta opata urükumewa oï peremimonde ikawi oï wae.

³ Jare jokua oro jare korepoti penoi wae opata ikumewa, echa’ä peupi penoi pemaeräño ramo. Jáeramo peïta kuri teko pe jokua ara piyemboɨ yawe Tumpa jowai. Jare piporarata peï kuri tata perapɨ rami. Jukuärái peupi tëi ma peyupe mbaembae ikawi wae kua ara taɨkuewa rupi.

⁴ Jare jokuaño’ä ko piyapo peï. Uparawɨkɨ peko pe wae reta umbaewɨro tëi ñonoï pewe, erëi pe reta pembɨepɨ'ä etei peï chupe reta. Mase, jokua korepoti pembɨete peï chupe reta wae uñeapo oï wae echa yandeYa pe jae uiporaraka waerä pewe jokua re. Jokua umbaewɨro wae reta iyengeta ñonoï pekotɨ, jare yandeYa imbaepuerete wae uyandu oï chupe reta.

⁵ Pe pikokatu piko wae reta kua ɨwɨ pe peï rambuewe piyekou ma opaete mbaembae ikawiete wae re. Piko ma jaeño perete pembɨyerowia waeräño. Pe reta ko jae waka uyemɨngɨra ñonoï wae rami. Jae reta uikuaa’ä koiño ma oï ara wɨraa reta uyuka waerä. Jare jukuärái wi pe reta jekuaeño piyembɨikokatu peï, erëi pikuaa’ä koiño ma oï ara Tumpa uiporaraka waerä pewe.

⁶ Pe reta pembɨjeko ma jeko mbae wae reta jare piyukaka reta wi. Jare jae parawete reta ipuere’ä uyapo mbae awe uyerepɨ waerä pewi. Jukuärái che jae jokua ikokatu wae reta uiporaraka ñonoï pewe wae pe.

Ñamɨawätata ko yandepɨawasu rewe yaiporara ñaï yawe

⁷ Jayawe hermano reta, pepɨawasu mii yandeYa ou ye rewa. Mase kërái umaetɨ wae uäro mbaewɨye ikawi wae. Jae uäro ipɨawasu rewe tenondewa ama umaetɨ waerä. Jare jae uäro wi ama jekuaeño okɨ waerä opa yawɨye kawi waerä.

⁸ Jukuärái rami ko pepɨawasu rewe jare piñemɨmɨräta rewe peärota. Echa’ä uyaro ma oï yandeYa ou ye waerä.

⁹ Añetete koiño ma oï yande yayemboɨ waerä jae jowai. Jáeramo awɨye piyengeta ïru hermano reta kotɨ awɨye waerä peï teko pe jokua ara.

¹⁰ Jare hermano mii reta, jekuaeño pemandúa jokua kuimbae reta ñee Tumpa wi etei ou wae arakae umɨmbeu wae reta re. Jae reta yepe tëi uiporara, erëi umɨawäta reta ipɨawasu rewe. Jayawe pemomoeta ko jae reta jeko.

¹¹ Echa’ä yande yaikuaa uyekoueteta ko ñonoï kuri jukuärái umɨawäta wae reta. Yanemandúa kawi ñaï wi jokua kuimbae Job jee wae re. Jae uiporara tuicha rupi, erëi umɨawäta kawi opaete. Jare taɨkue rupi yandeYa uasaete ye ikawi uyapo chupe. Jukuärái yaikuaa yandeYa tuicha rupi yanembɨpɨakatu jare yanderauete ko.

¹² Jare pe reta, ikawi ko pikuaa waerä kua: Pe reta mbae pere yawe, awɨye pere Tumpa jowake ani ɨwɨ jowake ani ipotawe mbae jowake. Pe pere yawe, “Ayapota,” piyapota ko jukuärái. Jare pere yawe, “Ayapota’ä,” awɨyeta ko piyapo wi jukuärái. Jukuäraita ko piyapo awɨye waerä peï teko pe.

Yandiyerure reta ime onoi mbaepuere

¹³ Ime yawe kía pepɨte pe uiporara oï wae, tuyerure Tumpa pe jokua re. Ime yawe kía pepɨte pe uyerowia oï wae, tumbutuicha Tumpa jee ukäta wae pɨpe.

¹⁴ Jare ime yawe kía pepɨte pe imbaerasɨ oï wae, tueni Cristo re wɨrowia wae itenondewa reta uipichɨ waerä aceite pɨpe jare uyerure reta waerä Tumpa pe jese yandeYa jee re.

¹⁵ Jare jae reta uyerure yawe jese wɨrowia rewe, imbaerasɨ wae ukuerata. YandeYa etei ko umɨnguerata. Jare jae uyawɨ Tumpa kotɨ jeko pewa imbaerasɨ oï yawe, tuyemɨmbeu Tumpa pe uñemɨmichi rewe. Jare Tumpa imanduata’ä chupe uyawɨ wae re.

¹⁶ Jáeramo pe reta piyawɨ yawe Tumpa kotɨ, piyemɨmbeu peyupe piñemɨmichi rewe. Jare piyerure piyé Tumpa pe pekuera waerä. Añetete ko, pëti jupi wae ipɨa rewe uyerure yawe Tumpa pe mbae re, jokua yerure ime onoi mbaepuere.

¹⁷ Echa’ä yanemandúa ñaï Tumpa iñee arakae umɨmbeu wae Elías jee wae re. Jae iko pëti kuimbae yande rami. Erëi jae uyerure Tumpa pe ipɨa rewe awɨye waerä okɨ. Jayawe okɨ'ä etei mbapɨ año jare owa yasɨ rupi.

¹⁸ Joko wi Elías uyerure ye ipɨa rewe Tumpa pe okɨ ye waerä. Jare umbɨpɨ okɨ ye jare ime ye mbaewɨye.

¹⁹ Jayawe hermano mii reta, ime pëti mbae re ye. Ipuere ko kía pepɨte pe iko wae usɨrɨ ma añetete wae wi jare uñatima ye ma teko kachi pe. Erëi ime yawe kía omborɨ jokua nunga uyerowa ye waerä jeko kachi wi wae,

²⁰ pe reta pikuaa jae uepɨ ma ko mano wi. Jare japicha, yepe tëi jae jeta uyawɨ Tumpa kotɨ, erëi opa ma uyembái chuwi. Jaeño ma.