Santiago 3 - Biblia

Yayandareko kawita ko kërái yayemɨngeta waerä

¹ Hermano mii reta, awɨye tuyeyapo jeta Tumpa iñee re oporomboe wae reta pepɨte pe. Echa’ä pikuaa kërái ore ndoporomboe wae reta, Tumpa umae ngatuete oreré ïru wae reta wi.

² Jare opaete yande reta yayawɨñoi ko jeta kërái rái rupi. Erëi ime yawe kía mbaetɨ uyawɨ iñee rupi wae, jae ko jeko jupi wae. Jare jae ipuere uyandareko kawi wi opaete jete re awɨye waerä uyawɨ Tumpa kotɨ.

³ Kua re yandepuere yambɨjaanga kuärái: Pëti kawayu, yepe tëi tuicha oï, erëi ñañono yawe iyuru pewa iyuru pe, yandepuere yarowa yande yaipota yaraa wae kotɨ.

⁴ Jukuärái wi amo pe yepe tëi chalana wasu tuichaete jare amo pe ɨwɨtu täta uipeyu, erëitu iya reta ipuere orowa ketɨ uipota wɨraa wae kotɨ itimón michiete wae pɨpe.

⁵ Jae ramiño wi yande reta, yepe tëi yandeyuru michiete ko, erëi jokua pɨpe yandepuere yayembutuichaete. Mase. Yande yaikuaa kawi ñaï pëti tata, yepe tëi michi raɨ jendɨ, erëi ipuere uñemɨái tuicha rupi opa uapɨ ɨwɨra reta.

⁶ Jare jukuärái wi ñaniñee kachi wae reta jare ndaye reta tata rami ko, jare jokua jeko pewa jeta mbae ikawi mbae wae uyeyapo. Añetete opaete yanderete pe oï wae ipɨte wi, mbaetɨ ye ïru mbae ñanererükumewa wae yandeyuru rami. Jare yande yandesɨ wi yaa wiwe yanderekowe opa rewa, ñaniñee pëti tata rami ko. Echa’ä jokua yande yae wae jeko pewa ipuere jeta uyeyapo mbae ikawi mbae wae. Jare ¿kiawi ra ou jokua ñee kachi wae? Añawasu wi etei ko ou.

⁷ Yande reta yandepuere ñamɨmaso jeta mbaemɨmba ambɨe ye ye wae reta, jare wɨra reta, jare ɨwɨ rupi uyewichɨ wae reta, jare mbaemɨmba ɨ rupiwa reta wi. Jare jukuärái yayapo.

⁸ Erëitu yandeyuru yandepuere’ä etei ñamɨmaso. Jae ko pëti mbaemɨmba pochɨ wae yandepuere’ä etei ñamɨamɨri wae rami. Pɨpe ko ñamoë ñee reta mbayachi yapuruyuka pɨpe wae rami.

⁹ Yandeyuru pe yambutuicha yandeRu Tumpa jee. Pɨpe wi ko yayepɨpeyu yanderapicha re, yepe tëi Tumpa uyapo jae echa rami.

¹⁰ Jayawe yandeyuru wi oë ñee yembɨadora pewa jare yandeyuru wi oë wi ñee yepɨpeyu pewa. Erëi kua mbaetɨ etei ikawi jukuärái, hermano mii reta.

¹¹ ¿Ipuereta ra pëti ɨkua wiño oë ɨ ikawi wae jare ɨ iro wae?

¹² ¿Ipuereta ra pëti ɨwa wi ía saini reta? ¿Ipuereta ra uva wi ía ɨwa reta? Ndarau ipuere. Jae ramiño wi ipuereta’ä oë pëti ɨkua wiño ɨ ikawi wae jare ɨ jembochɨ wae. Jayawe hermano reta, imeta ko yayemɨngeta mbae ikawi waeño.

Kërái ko arakuaa Tumpa wi ou wae

¹³ Ime yawe kía pepɨte pe umae iyé iyarakuaa katu wae, jayawe tuechaka teko kawi ïru wae reta pe uñemɨmichi rewe. Jukuärái ko yaechaka arakuaa añetete wae.

¹⁴ Erëi piñemɨro yawe perapicha pe pembasɨ rewe, jare jaeño pipota piyembutuicha yawe, awɨye pere peyupe, “Chearakuaa katu ko.” Echa’ä jukuärái pere yawe, papu ko peï jare pepuereta’ä pikuaku jokua re.

¹⁵ Jokua arakuaa pere tëi ime penoi wae ou’ä ko Tumpa wi jare mbaetɨ etei ko Espíritu Santo pewa. Jokua nunga arakuaa ko jae kua ɨwɨ pewaño jare Añawasu wi ko ou.

¹⁶ Jukuärái yaikuaa, echa’ä ñañemɨro jare yayembutuicha yawe, joko pe ime oï ñeräro, jare yeaka, jare opaño kërái rái mbae kachi wae.

¹⁷ Erëi arakuaa Tumpa wi ou wae jupi ko. Jare jokua arakuaa ñanoi yawe, yaikota yandepɨakatu rewe jare yandepɨawasu rewe. Ndarau yayembutuicha. Yaipararekota yanderapicha. Yandepɨakawita, jare yayapota mbae ikawi wae. Jare ñamaeta oyowake rupi opaete wae re, jare ndarau mokui towa yaiko.

¹⁸ Ime yawe kía yeaka uyapɨkatu wae, jae ko kía temitɨ oñotɨ wae rami. Echa’ä kërái jokua temitɨ jeñɨta jare ukuakuaata oo oï jare iata, jukuärái wi yande yayapo yawe yandepuere wae rupi pëti ramiño yaiko waerä yandepɨakatu rewe, yandereko jekuaeño oya katuta oo oï jupi wae re.