Santiago 2 - Biblia

Ñamae kawi yandiyé yayeparawo mbae rewe

¹ Hermano mii reta, yandeYa Jesucristo jupiete ye wae ko. Jare pe reta perowia ma jese ramo, awɨye etei piyeparawo pemae kawi waerä piyé.

² Aramoi amo pe uiketa kuimbae ikokatu wae piyembatɨ wae pe. Kua kuimbae onoi ipoäkarewa oro pewa jare jemimonde ipöraete wae. Jare aramoi uiketa wi piyembatɨ wae pe kuimbae iparawete wae jemimonde ipächa wae.

³ Aramoi pe reta pemae kawita jokua kuimbae uyemonde kawi wae re jare aramoi pereta chupe, “Ewapɨ mii kua tenda ikawiete wae re.” Jare aramoi iparawete wae pe pereta, “Nde iyemboɨ eï,” ani, “Ewapɨ jokua ɨwɨ pe.”

⁴ Erëi jukuärái piyapo yawe, mbaetɨ ko ikawi piyapo peï. Echa’ä pe reta mbaetɨ ko oyowake pemae peï perapicha re. Añetete ko pemae peï perapicha re pepɨa ikawi mbae rewe.

⁵ Mase, hermano puau mii reta, ¿kía ra ko jae wɨrowia kawi Tumpa re wae reta? Jae ko iparawete wae reta. Jáeramo Tumpa uiparawo ma jae reta ikokatu waerä Tumpa kotɨ. Añetete jae reta uyekouta ñonoï Tumpa imbaepuere mburuwicha wasu pewa re jaeño mái pewa. Echa’ä jae reta uau Tumpa jare Tumpa jei ma kuärái: “Opaete cherau wae reta, che aïta chupe reta imburuwicha wasurä,” jei.

⁶ Erëi pe reta pemɨmichika peï iparawete wae reta. Mase. ¿Ikokatu wae reta jae’ä yerá uyuwanga katu peré wae jare pereraa mburuwicha reta jowai wae?

⁷ Pe reta ko jae yandeYa pewa. Erëi jeta ikokatu wae reta uyemɨngeta kachi yandeYa kotɨ. Jayawe, ¿maera pa pembutuicha peï ikokatu wae reta?

⁸ Tumpa iñeerɨru pe uyekuatía oï kuärái: “Peau perapicha kërái pe reta etei piyerau wae rami,” jei. Tumpa – jae ko yaneMburuwicha wasu etei – jei ma yandewe jukuärái yayapo waerä. Jayawe pe reta peau yawe perapicha añetete rewe, jupi wae ko piyapo peï.

⁹ Erëi piyeparawo yawe pemae kawi waerä piyé, jayawe piyawɨ ko peï Tumpa kotɨ. Tumpa jei wae rupi teko pe ma ko pepɨta.

¹⁰ Añetete ko, ime yawe kía uyapo kawi opaete mbaembae Tumpa jei yandewe wae rupi, erëi pëti miño uyawɨ yawe, jae ma teko pe oï Tumpa jowai. Tumpa pewarä, opaete mbaembae jei yandewe wae opa ma uyeyawɨ rami ko.

¹¹ Kua re ikawi yayemɨngeta waerä yandepɨa pe. Tumpa jei yandewe: “Awɨye iyapo awasa.” Jare jei wi yandewe: “Awɨye epuruyuka,” jei. Aramoi nde ndiyapo’ä etei awasa. Erëi ndepuruyuka ma yawe, ndiyawɨ ma ko Tumpa jei wae jare teko pe ma ko neï, yepe tëi ndiyapo’ä awasa.

¹² Tumpa uikuaaka ma yandewe kërái yaiko waerä, jare jokua yandeyora wae echa rami ko. Jáeramo piko kawi jae jei wae rupi opaete mbae piyapo wae rupi jare pere wae rupi wi. Echa’ä pëti ara yande yayemboɨta ñaï Tumpa jowai, jare uyekuaata oï yayapo ra yapuruau rewe jae jei wae rupi.

¹³ Jare ime yawe kía uiparareko’ä japicha wae, Tumpa umbɨjekota onoi kuri uiparareko mbae rewe. Erëi kía japicha uiparareko wae uyerowiata oï kuri jokua ara.

Yarowia Tumpa re wae uyekuaata mbaembae yayapo wae rupi

¹⁴ Hermano mii reta, ipuere ko kía jei: “Che arowia Cristo re.” Erëi jokua nunga uyapo’ä yawe mbaembae ikawi wae, jokua jae jei wae ikawi’ä maeräwe jare ndarau ipuere uepɨ.

¹⁵ ¿Këraita ra ko ime yawe pëti hermano mbaetɨ onoi jembiurä wae jare uata oï chupe yawe jemimonderä,

¹⁶ jare pe reta mbaetɨ pemborɨ peï – jaeño pere chupe, “Tumpa tumae kawi nderé. Iyandareko kawi ndiyé kuri,” pere chupe yawe? Jokua mbae’ä etei ko chupe waerä.

¹⁷ Imeta ko yaechaka yarowia ko Tumpa re mbae ikawi wae yayapo wae rupi. Erëi jukuärai’ä yayapo yawe, yarowia Tumpa re wae ko jae pëti teöwe rami, echa’ä ikawi’ä maeräwe.

¹⁸ Erëi aramoi kía jeita chewe: “Mbaetɨ yambɨyerowia Tumpa oyowake rupi. Amokue wae reta jaeño wɨrowia Tumpa re, jare ïru wae reta jae nunga wi uyapo mbaembae ikawi wae. Erëi mokui rewe umbɨyerowia ñonoï Tumpa.” Jukuärái ipuere kía jei tëi chewe aramoi. Erëi che tae jukuärái uyemɨngeta wae pe kuärái: Yaecha echaka chewe nderowia Tumpa re wae mbaembae ikawi wae ndiyapo mbae rewe. Ndarau etei ndepuere. Erëi chemaerä, che aechakata ndewe arowia Tumpa re wae mbaembae ikawi wae ayapo wae rupi. Jukuärái che jae.

¹⁹ Erëi aramoi jeita wi chewe kuärái: “Che arowia ime pëtiño Tumpa,” jeita chewe. Jokua jaekawi tëi. Erëi uepitɨ'ä, echa’ä aña reta wi ko wɨrowia jukuärái. Jare jae reta urɨrɨ ñonoï Tumpa wi ukɨye ramo.

²⁰ Kua nunga pe che jae iyarakuaa mbae echa. Yarowia Tumpa re wae yaechaka’ä yawe mbaembae ikawi wae yayapo wae rupi, jae ko teöwe rami. Echa’ä ikawi’ä maeräwe.

²¹ Ikawi ko yanemandúa waerä yanderamɨkue Abraham re. Jae mbae uyapo wae rupi uyekuaa kërái añetete yepe jae jupi wae ko. Echa’ä jae ma iko tëi uyuka waerä taɨ Isaac mbaerenda iáramo kërái Tumpa jei wae rupi.

²² Jukuärái Abraham mbae uyapo wae rupi uechaka jae wɨrowia ko Tumpa re añetete rewe. Jare jukuärái uyeyapo Tumpa ipɨayemɨngeta Abraham pewarä. Echa’ä Abraham wɨrowia ramo wiwe, Tumpa uipota iko Abraham mbae uyapo wae rupi uechaka waerä wɨrowia ko jese wae.

²³ Jare jokua Abraham uyapo wae rupi yaikuaa wi kërái añetete yepe Tumpa iñeerɨru pe uyekuatía oï wae. Echa’ä joko pe jei kuärái: “Abraham wɨrowia Tumpa jei wae re; jáeramo Tumpa umae jese jeko mbae wae rami.” Jukuärái jei. Jare jokua jeko pewa wi Tumpa jei chupe: “Cheïru.”

²⁴ Jayawe, ¿mbae pa yaecha ñaï kua pe? Yandepuere yarowia Tumpa re, erëi Tumpa re yarowia wae rupiño’ä ko ïru wae reta umaeta yanderé jupi wae. Imeta ko uyekuaa etei mbaembae ikawi wae yayapo wae rupi. Jukuärái ko umaeta reta yanderé jupi wae.

²⁵ Jae ramiño wi ikawi ko yanemandúa waerä jokua kuña jete re umɨnganase wae Rahab jee wae re. Jokua kuña mbae ikawi wae uyapo wae jeko pewa ko ïru wae reta umae jese jupi. Echa’ä jae umbɨasa kawi jëta pe jokua upurupiäro wae reta Josué omondo wae. Jare joko wi Rahab omborɨ oyepe reta waerä jowaicho reta wi, omondo reta ye yawe ambɨe tape rupi. Jukuärái Rahab mbaembae uyapo wae rupi uechaka añetete ko wɨrowia Tumpa re.

²⁶ Erëi yarowia Tumpa re wae yaechaka’ä yawe mbaembae ikawi wae yayapo wae rupi, jayawe yarowia wae ikawi’ä maeräwe. Jae ko yanderete mbaetɨ tekowe onoi wae rami.