Salmo 139 - Biblia

Pëti himno David uikuatía jare umee upurumɨkätaka wae pe

¹ CheTumpa, nde nemae kawi chepɨa re jare chekuaaete.

² Nde ndikuaa opaete mbaembae ayapo wae. Yepe tëi chemaerä mbɨrɨ echa aï ndewi, jesewe ndikuaa opaete chepɨayemɨngeta reta.

³ Jare nde ndecha neï opaete mbaembae ayapo wae. Opaete chereko nde ndikuaa kawi.

⁴ CheTumpa, nde ndikuaa che jaeta wae ndei mbae jae mbowe.

⁵ Cheraɨkue rupi jare cherenonde rupi nde cheñowa neï. Nembaepuere rupi cherepɨ.

⁶ Chembɨpɨakañɨ ndearakuaa katuete ye ramo. Chepuere’ä etei aikuaa ndearakuaa, echa’ä tuichaete ye ramo.

⁷ ¿Ketɨ ra ata ndeEspíritu wi? ¿Ketɨ pa asita nderowai wi? Mbaetɨ etei ketɨ awe.

⁸ Chepuere ayupi yawe ɨwatete ara re, joko pe neï nde. Chepuere aweyɨ yawe kɨpete ɨwɨwɨ pe umanokue wae reta ñonoï wae pe, joko pe neï wi.

⁹ Chepuere awewe mbɨrɨete warasɨ oë wae kotɨ yawe, ani a aï waerä mbɨrɨete warasɨ uike wae kotɨ yawe,

¹⁰ jokoropi awe chereruwatata jare cheyokota nembaepuere rupi.

¹¹ Che chepuere jae tëi: “¡Tañemi ndewi pɨ̈tumimbi pe! Jayawe tembipe tuyeyapo pɨ̈tumimbirä añemi waerä.”

¹² Erëi pɨ̈tumimbi cheñomi’ä etei nderesa wi. Echa’ä pɨ̈tu jembipe oï wae rami ko ndewe.

¹³ Nde ko jae chapoa, jare chembɨyekuaa chesɨ jɨe pe.

¹⁴ Amee ndewe yasurupái, echa’ä nde chapo ikawiete ramo. Opaete chepɨa rewe aikuaa aï nderembiapo ko ikawiete ye wae.

¹⁵ Chereterä uyekuaa iko yawe, añemi’ä etei ndewi yepe tëi chesɨ jɨe pe aiko.

¹⁶ Nde cherecha ndei chesɨ wi a mbowe. Nde ndikuatía ma ndetupapire pe opaete ara cherekowe rewa. Nembɨjɨsɨ opaete cheara reta ndei ayembɨpɨ mbowe.

¹⁷ CheTumpa, ikawiete ye ko chewe ndepɨayemɨngeta reta, jare jetaete ye ko. Yawaiete ko aikuaa waerä ndepɨayemɨngeta rewa.

¹⁸ Chepuere’ä etei aipapa ndepɨayemɨngeta reta, echa’ä jetaete ye ɨwɨkuïti mar jembeɨ rupi oï wae rami. Asareko yawe, jekuaeño aï nde ndiwe.

¹⁹ Tumpa, ¡nde moná nembái jeko kachi wae reta! ¡Embɨsɨrɨ chewi upuruyuka wae reta!

²⁰ Echa’ä jae reta nderee ueniraangaiño uipɨu mbae rewe, jare pochɨ rewe uyemɨngeta kachi reta ndekotɨ.

²¹ CheTumpa, ¿añamɨtäa’ä yerá neamɨtäa reta wae? ¿Ambowaicho’ä yerá nembowaicho wae reta?

²² Che añamɨtäa reta opaete chepɨa rewe, echa’ä nderowaicho reta ko jare cherowaicho reta wi.

²³ CheTumpa, emae chepɨa re ndikuaa kawi waerä chepɨayemɨngeta reta re.

²⁴ Emae ime ra aramoi ikawi mbae wae chepɨa pe. Jare chereruwata tape tekowe opa mbae wae rupi.