Romanos 8 - Biblia

Ndarau ma ñanoi teko Tumpa jowai

¹ Jayawe ¿mbae ra añawe yandepuere yaikuaa opaete kua mbaembae reta rupi? ¿Kërái ra ko ñaï añawe yande reta Cristo re pëti ramiño yaiko wae? Añawe yaikuaa ñaï Tumpa ndarau ma yanembɨjeko.

² Echa’ä yepe tëi yayawɨ Tumpa kotɨ, jare jokua jeko pewa imeta tëi ko ya Tatawasurenda pe, erëi añawe Tumpa yanderepɨ ma chuwi Jesucristo rupi. Echa’ä pëti ramiño ñaï Jesucristo re, jare jukuärái Tumpa umee yandewe Espíritu Santo. Jare jokua Espíritu Santo rupi ime ma ñanoi tekowe ipɨau wae. Jáeramo ndarau ma Tumpa yanembɨsɨrɨ iyuwi.

³ Opaete Tumpa jei Moisés pe uikuatía waerä wae ipuere’ä yanderepɨ Tumpa iarasɨ wi, echa’ä ñanepɨräta’ä ñaï yaiko waerä jupi opaete Tumpa jei wae rupi. Jáeramo Tumpa uyapo mbae ikawi wae yanderepɨ waerä. Jae ombou Taɨ kua ɨwɨ pe umano waerä mbaembae yayawɨ Tumpa kotɨ wae re. Taɨ uyeyapo kuimbaerä jare uyekuaa yandewe ipotawe kuimbae uyawɨ Tumpa kotɨ wae rami, erëi jae uyawɨ'ä etei Tumpa kotɨ. Erëitu Tumpa uiporaraka chupe jete pe yande mbaembae yayawɨ wae re, jare jukuärái ndarau ma ñanoi teko Tumpa jowai.

⁴ Jukuärái Tumpa uyapo yandepuere waerä yaiko jae arakae jei wae rupi añetete pewa. Erëi kua jaeño uyeyapota yande yaiko yawe Espíritu Santo jei wae rupi – mbaetɨ yande yae wae rupiño.

Añawe yandepuere yaiko jupi Tumpa jowai Espíritu Santo rupi

^5-6 Espíritu Santo jei wae re yureko wae reta ipɨayemɨngeta oï Espíritu Santo uipota wae re. Jae reta onoita tekowe opa mbae wae jare ipɨakatuta reta wi. Erëi jokua jae jei wae rupiño yureko wae reta jaeño uikuaata mano jare Tatawasurenda, echa’ä ipɨayemɨngeta oï mbaembae jete uipota wae reño.

⁷ Kua nunga reta Tumpa jowaicho ko, echa’ä uipota’ä uyapo reta Tumpa jei wae rupi jare ipuere’äwe uyapo reta wi.

⁸ Jáeramo jae jei wae rupiño yureko wae reta ipuereta’ä etei umbɨyerowia reta Tumpa.

⁹ Erëi añawe pe reta mbaetɨ ma piko jae reta rami. Mbaetɨ ma piko pe reta pere wae rupiño. Añawe Espíritu Santo uyembɨiya ma peré, echa’ä Tumpa iEspíritu oï pepɨa pe ramo. Jare ikawi ko yaikuaa waerä wi kua: mbaetɨ onoi Cristo iEspíritu wae Cristo pewa’ä ko.

¹⁰ Erëi pe reta jukuärai’ä ko, echa’ä Cristo oï pepɨa pe ramo. Jayawe, yepe tëi perete umanota oï piyawɨ Tumpa kotɨ jeko pewa, erëi pe reta penoi ma ko tekowe ipɨau wae, echa’ä añawe Tumpa umae ma peré pereko mbae wae rami.

¹¹ Jare Tumpa iEspíritu oï pepɨa pe ramo, jokua Espíritu rupi etei ko Tumpa umbɨjekowe yeta oï perete umanota oï wae. Jukuärái ko jokua Espíritu rupi etei wi Tumpa umbɨjekowe ye Jesucristo ueru umanokue wae reta ipɨte wi. Jare jukuärái wi ko uyeyapota oï pewe.

¹² Jáeramo hermano mii reta, yande reta ime ñanoi tekowe ipɨau wae ramo, añawe ime oï kërái yaiko waerä. Erëi mbaetɨ ma ko yaiko waerä yande yae wae rupiño.

¹³ Echa’ä jokua nunga reta Tumpa umbɨsɨrɨta oï iyuwi jaeño mái pewa Tatawasurenda pe. ¿Jayawe maera ra yande jekuaeño yaipota yaiko jukuärái? Erëi Espíritu Santo yanemborɨ wae rupi yaya yawe yandereko kachi wae, jayawe yayekoueteta ñaï tekowe ipɨau wae re.

¹⁴ Añetete ko, Tumpa taɨ añetete wae reta jae ko kía kía Espíritu Santo uparawɨkɨ oï jese wae.

Añawe yande ko jae Tumpa taɨ reta

¹⁵ Jayawe mbaetɨ ko ikawi yakɨye waerä Tumpa wi kërái pione reta ukɨye ipatrón wi rami. Echa’ä Espíritu Santo Tumpa umee yandewe wae yandapo’ä oï yakɨye chuwi waerä. Echa’ä Espíritu Santo yandapo ko Tumpa taɨrä yaiko waerä. Jáeramo añawe yandepuere yae Tumpa pe: “CheRu.”

¹⁶ Jare Espíritu Santo etei jekuaeño uikuaaka oï yandewe yandepɨa pe yande ko jae Tumpa taɨ wae.

¹⁷ Jare yande ko jae Tumpa taɨ reta ramo, yandepuere yaikuaa kawi Tumpa upi oï yanemaerä mbaembae ikawiete ye wae umee waerä yandewe kuri. Jokua ko jae mbaembae añawe Cristo uyekou oï jese wae, jare yande reta wi yayekouta ñaï kuri jokua mbaembae re Cristo ndiwe etei. Kua ikawi yaikuaa kawi waerä. Echa’ä añawe rupi yaiporara ñaï Cristo re yarowia ramo. Erëi Cristo jae nunga wi uiporara kua ɨwɨ pe iko rambuewe. Jare yande yaiporara yawe kërái Cristo uiporara wae rami, jukuärái wi yayekouta ñaï jae ndiwe jae oï ma yawe opaete wae imburuwicha wasurä jaeño mái pewa.

Tumpa jembiapo reta opaetei uyekouta ñonoï

¹⁸ Jáeramo che ayemɨngeta yawe chepɨa pe kua mbaembae ikawiete ye wae rewa, mbae’ä ko chewe añawe yaiporara ñaï wae. Echa’ä yaikuaa ko uasaete ye yayekouta ñaï kuri Tumpa imbaepuere jupiete ye wae re.

¹⁹ Jare opaete mbaembae Tumpa uyapo wae uäro ñonoï wi ikɨrëɨete rewe jokua ara. Echa’ä jokua ara Tumpa yandekuaakata oï opaete wae pe yande ko jae Tumpa taɨ reta wae.

²⁰ Añawe rupi Tumpa jembiapo reta uiporara ñonoï, echa’ä opaete ikumewa oo oï ramo jare mano uyembɨiya ma jese ramo. Erëi jukuärai’ä iko iyɨpɨ pe, echa’ä Tumpa jaeramo uyapo yawe mbaembae, ikawiete uyapo tëi. Erëi Adán uyawɨ Tumpa jei wae ramo, Tumpa umaeño mano uyemɨmbaepuere waerä opaete jae jembiapo reta re. Erëi jae jembiapo reta ndarau jukuäraiño upɨta oï.

²¹ Echa’ä yepe tëi añawe opaete Tumpa jembiapo reta ikumewa oo oï, erëi pëti ara Tumpa uepɨta oï kuri reta. Jukuärái uyapota oï jokua ara jae opa umbɨyapɨ yawe mano yandewe, yande jae taɨrä yaiko wae reta pe. Joko wi ramo Tumpa jembiapo reta yande ndiwe uyekouta ñonoï reta Tumpa imbaepuere jupiete ye wae re. Jukuärái ko Tumpa ipɨayemɨngeta.

²² Erëi añawe rupi Tumpa jembiapo reta uäro ñonoï ikɨrëɨ rewe pëti kuña imembɨrasɨ oï wae rami. Yaikuaa ñaï pëti kuña umbɨpɨ imembɨrasɨ yawe, jae ipüe jasɨ chupe ramo, jare uipota ɨmambae mii uasa chuwi waerä jokua jasɨ oï chupe wae. Erëi ikotɨ̈a rupi jae uyerowia oï wi, echa’ä jae uikuaa ɨmambae miño imembɨ oata oï. Jukuärái ko Tumpa jembiapo reta ñonoï añawe rupi. Echa’ä yepe tëi uyembɨpɨ wiwe añawe rewa jeta uiporara ñonoï, erëi uikuaa reta koiño ma oï Tumpa uepɨ reta waerä.

²³ Jukuärái wi yande reta yaiporara ñaï yandepɨa pe jokua kuña imembɨrasɨ oï wae rami. Echa’ä yepe tëi Tumpa umbɨtenonde ma yandewe Espíritu Santo, erëi imeño ñaäro ñaï yayekou waerä ïru mbaembae reta re – jae ko jokua mbaembae Tumpa umeeta oï yandewe jae taɨrä ma yaiko wae reta pe. Jare jokua ko uyeyapota oï yandewe kuri, jokua ara Tumpa umbɨpɨau yawe yanderete.

²⁴ Jokua ko jae yande reta ñaäro ñaï wae yarowia katu rewe jokua ara Tumpa yanderepɨ wiwe. Añetete, Tumpa umee ma yandewe yawe yanderete ipɨau wae, jayawe ndarau ma jekuaeño ñaäro tëi ñaï. Echa’ä, ¿kía ra uäro mbae ime ma onoi wae?

²⁵ Erëi yande ñaäro ñaï mbaembae ndeiño ñanoi wae, jare jukuärái ñaäro ñaï yandekueri mbae rewe jare yarowia katu rewe.

²⁶ Jae ramiño wi Espíritu Santo yanemborɨ oï. Echa’ä añawe rupi imeño yaiporara ñaï jare ñanepɨräta’ä ñaï parawete. Yaikuaa’ä kërái etei yayerure kawi waerä Tumpa pe mbae re. Amo pe uata yandewe ñaniñeerä yaeka waerä Tumpa pe. Erëitu Espíritu Santo etei uyerure oï yanderé jupi rupi kawi Tumpa pe. Kua ikawi yaikuaa kawi waerä. Espíritu Santo uyerure oï yanderé iañeki rewe mbaetɨ yande reta ñawäe ñee wae rupi.

²⁷ Jare Tumpa uikuaa kawi Espíritu Santo opaete mbae re uyerure oï wae. Echa’ä kërái Tumpa uikuaa yandepɨa pe yayemɨngeta wae, jukuärái wi jae uikuaa Espíritu Santo uyerure wae. Jare jae nunga wi Espíritu Santo jekuaeño uyerure oï Tumpa pe yanderé Tumpa uipota wae rupi.

²⁸ Jare yande Tumpa yaau wae reta yaikuaa ko Tumpa uparawɨkɨ oï opaete mbaembae uyeyapo oï yandewe wae rupi ikawi waerä yandewe. Jukuärái Tumpa uyapo oï, echa’ä jukuärái rupi uyeyapota oï ipɨayemɨngeta yanemaerä wae. Jokuaerä ko jae ñanereni.

²⁹ Jare ¿kërái ra ko Tumpa ipɨayemɨngeta yanemaerä? Iyɨpɨ wiwe jae yandekuaaño mái, yande jae imaerä yaiko wae reta. Jáeramo iyɨpɨ wiwe jae ipɨayemɨngeta iko ñaneñono tee waerä yande reta yaiko waerä Taɨ Jesucristo echa rami. Echa’ä Tumpa uipota onoi jeta taɨ reta, jare jae nunga wi jae uipota taɨ Jesucristo oï waerä ñanerëtara tenondewarä. Jukuärái ko Tumpa ipɨayemɨngeta ikawi wae yanemaerä.

³⁰ Jare jokuaño’ä ko Tumpa ipɨayemɨngeta yanemaerä. Tumpa ñaneñono tee jae imaerä ramo, jae nunga wi ñanereni. Jare jae ñanereni ramo, jae nunga wi jae umae yanderé yandereko mbae wae rami. Jare jokuaño’ä ko uyapo. Jae uyapo ma wi yandewe ñanoi waerä jae ndiwe imbaepuere jembipete ye wae jaeño mái pewa.

Tumpa jekuaeño yanderauta Cristo rupi

³¹ Jayawe opaete kua mbaembae rupi yaikuaa ko Tumpa oï yandepepɨka pe yanemborɨ waerä. ¿Kía ra ipuereta ñanemɨamɨri jayawe? ¡Ndarau ipuere kiawe!

³² Echa’ä Tumpa umbɨete’ä Taɨ umee waerä yandewe jare umano waerä yanderé. Jare jukuärái yawe, ¿këraita pa Tumpa umbɨete mbaembae yandewe jae ndiwe ñaï kawi waerä?

³³ Jayawe ¿kía ra ipuereta mbae re yanembɨjeko Tumpa jowai? Ndarau ipuere kiawe, echa’ä yande ko jae Tumpa etei yandeparawo wae reta, jare Tumpa etei umae ma yanderé yandereko mbae wae rami.

³⁴ Jayawe ¿imeta ra kía ye ipuere omboya teko yanderé Tumpa jowai? Ndarau ipuere kiawe, echa’ä Jesucristo etei ko umano jokua teko yareko wae re opa umbái waerä yandewi. Jare kuaño’ä ko, echa’ä jae ikowe ye ou wi umanokue wae reta ipɨte wi. Jare añawe jae ime oï yandeRu Tumpa ndiwe iyɨke pe iyakata kotɨ. Jare jae etei ko uyerure oï yandeRu Tumpa pe yanderé.

³⁵ Cristo yanderauete, jare ndarau kiawe ipuere yanembɨsɨrɨ chuwi jae yanderau wae wi. Aramoi yaiporarata, jare aramoi yawaita ko yandewe yaiko waerä. Aramoi ïru wae reta uyapota yandewe mbae ikawi mbae wae. Aramoi karuái outa yandewe. Aramoi ndarau ñanoi korepoti yanderemimonderä. Aramoi ïru wae reta uipotata ñanenupa, jare aramoi yandeyukata reta. Erëi jokua mbaesusere reta uyeyapo yandewe yawe, jokua uipota’ä jei Cristo yanderau’ä ma oï wae.

³⁶ Jare yaikuaa opaete jokua mbaesusere reta ipuereta uyeyapo yandewe. Echa’ä jukuärái uyekuatía oï Tumpa iñeerɨru pe. Joko pe jei kuärái: “Nderé ndorowia ramo, opa ara rupi oremumburu oreyuka reta waerä. Ore ko jae owecha reta kía wɨraata uyuka onoi wae rami.” Jukuärái uyekuatía oï.

³⁷ Aramoi yandewe wi uyeyapota opaete jokua nunga mbaembae reta, erëi jesewe Cristo jekuaeño yanderauete oï, jare jae imbaepuere rupi yande reta jekuaeño opata ñamɨamɨri jokua mbaembae reta.

³⁸ Jare che aikuaa kawi aï Tumpa yanderauete ko jare ndarau mbae awe ipuere yanembɨsɨrɨ chuwi jae yanderau wae wi. Aramoi ñamanota, jare aramoi jekuaeño yaikota. Erëi jesewe Tumpa jekuaeño yanderauta oï. Araɨwa reta, jare aña reta, jare ipotawe ïru mbaepuere onoi wae reta ndarau etei ipuere yanembɨsɨrɨ Tumpa yanderau wae wi. Opaete añawe uyeyapo oï yandewe wae jare opaete uyeyapota oï yandewe wae jae nunga wi ndarau etei ipuere yanembɨsɨrɨ Tumpa yanderau wae wi.

³⁹ Ipotawe mbaembae ɨwate oï wae reta, jare ipotawe mbaembae ɨwɨwɨ rupi oï wae reta, jare ipotawe ïru mbaembae Tumpa uyapo wae awe ndarau etei ipuere yanembɨsɨrɨ Tumpa yanderau wae wi. Jare Tumpa uechaka ma yandewe yanderauete wae ko yandeYa Jesucristo rupi.