Romanos 7 - Biblia

Ndarau yayeyokui Tumpa pe Moisés arakae uikuatía wae rupi

¹ Jayawe hermano mii reta, pe reta pikuaa kawi kërái ko yaiko waerä ïru wae imbaepuere pe. Imeta ko yaiko jae jei wae rupi. Erëi jokua jae jei yandewe wae jaeño ime mbaepuere onoi yanderé imeño tekowe ñanoi rambuewe.

² Kua yandepuere yambɨjaanga menda re. Yandereko pe jei kuña umenda wae pëti ramiño ko oï ime ndiwe, ime imeño tekowe pe oï rambuewe. Mbaetɨ ikawi umenda waerä ambɨe ndiwe. Erëi ime umano ma chuwi yawe, jayawe ramo kuña mbaetɨ ma oï jokua teko menda rewa imbaepuere pe, jare ipuere umenda ye ipɨawiwe rewe.

³ Jáeramo kuña ueya yawe ime jare umenda ye yawe ïru kuimbae ndiwe, kuña uyapo ko oï awasa. Erëi ime umano chuwi yawe, kuña mbaetɨ ma oï jokua teko menda rewa imbaepuere pe. Jare umenda ye yawe ïru kuimbae ndiwe, mbaetɨ ko uyapo oï awasa.

⁴ Jukuäraiete wi, hermano mii reta, jokua Moisés arakae uikuatía wae mbaetɨ ma onoi mbaepuere yanderé. Jukuärái ko, echa’ä ñamano rami ma ko chuwi. ¿Kërái ra jokua? Yayemboe ma kërái ñamano rami ko Cristo ndiwe jae umano yawe. Jare jokua jeko pewa Moisés arakae uikuatía wae ndarau ye ma onoi mbaepuere yanderé. Añawe Tumpa yandapo ma Cristo pewarä – jae ko jokua ikowe ye ou umanokue wae reta ipɨte wi wae. Jukuärái Tumpa yandapo yandepuere waerä yayeyokui kawi chupe.

⁵ Tenonde yawe, ndei yarowia Cristo re mbowe, yandepuere’äse yayeyokui kawi Tumpa pe. Echa’ä yaikose yande yae wae rupiño. Jare yepe tëi Moisés arakae uikuatía wae yanembɨarakuaa kawi Tumpa jei wae rewa, erëi jokua jae uikuatía wae etei yepe uparawɨkɨ iko yanderé jeiete uipotaka waerä yandewe mbae kachi yayapo waerä yanderete pɨpe. Jare jokua yandereraa tëi iko mano kotɨ jare Tatawasurenda kotɨ.

⁶ Añetete ko Moisés arakae uikuatía wae ñaneapɨ̈ti iko rami awɨye waerä yandepuere yayeyokui Tumpa pe. Erëi añawe Tumpa yandeyora ma chuwi, echa’ä Cristo ndiwe ñamano ma ko chuwi rami. Jáeramo ndarau ma yayeyokui Tumpa pe Moisés arakae uikuatía wae rupi tenonde yayapose wae rami. Ime añawe kërái rupi yayeyokui waerä Tumpa pe mbae ipɨau wae rupi – jae ko tekowe Espíritu Santo umee yandewe wae rupi etei.

Tumpa jei wae uikuaaka yandewe yayawɨ ma ko Tumpa kotɨ wae

⁷ ¿Këraita pa jayawe? ¿Moisés arakae uikuatía wae ikawi’ä ra aramoi? ¡Mbaetɨ! Echa’ä Moisés uikuatía wae rupi Tumpa uikuaaka yandewe mbae ra ko jae mbae kachi wae jae jowai. Yambɨjaanga. Moisés uikuatía Tumpa jei chupe wae kuärái: “Awɨye pepɨa pe pipotaete rewe pemae mbaembae perapicha onoi wae re,” jei. Erëi Tumpa jei’ä yawe jukuärái, ndarau tëi aikuaa aiko mbae kachi wae ko Tumpa jowai cherapicha imbaembae aipota yawe.

⁸ Erëi Tumpa jei wae aikuaa wae, chemborɨ'ä oï ayapo waerä jae jei wae. Echa’ä Tumpa jei wae aikuaa ma yawe, jokua kɨrëɨ mbae kachi ayapo waerä wae jeiete uyembɨiya cheré. Jáeramo jeiete aipota ïru wae reta imbaembae. Añetete, Moisés uikuatía wae mbaetɨ yawe, jayawe ndarau tëi jekuaeño ayemɨngeta chepɨa pe ïru wae reta imbaembae re. Ndarau tëi jekuaeño aipota ayawɨ Tumpa kotɨ.

⁹ Tenonde yawe, ndei aikuaa Tumpa jei wae mbowe, chepɨawɨweño aiko tëi, echa’ä aikuaa’ä aiko ayawɨ aiko Tumpa kotɨ wae. Erëi aikuaa ma yawe Tumpa jei awɨyeta tëi ayapo wae, jayawe ramo ambɨpɨ aikuaa ayawɨ ma yepe Tumpa kotɨ wae. Jare jayawe ramo aikuaa wi amano wae echa yepe aiko Tumpa wi.

^10-11 Che aikuaa ramo Tumpa jei wae yawe, che jae tëi cheyupe: “Añawe aikuaa kërái Tumpa uipota aiko waerä wae. Añawe ramo anoita tekowe opa mbae wae,” jae tëi. Erëi jukuärai’ä uasa chewe. Echa’ä Tumpa jei wae aikuaa ma yawe, jokua kɨrëɨ mbae kachi ayapo waerä wae jekuaeño uyembɨiya cheré ayawɨ waerä Tumpa jei wae, jare jukuärái chembɨsɨrɨ Tumpa wi. Añetete ayembɨtawɨka aiko parawete.

¹² Jayawe opaete mbaembae Tumpa jei Moisés rupi wae ikawi wae ko tëi jare jupi ko.

¹³ Erëi aramoi imeta kía jei tëi: “Tumpa jei wae ikawi oï yawe, ¿maera pa chembɨsɨrɨ Tumpa wi?” jeita tëi. Erëi mbaetɨ ko Tumpa jei wae yanembɨsɨrɨ Tumpa wi. Ime yandepɨa pe kɨrëɨ mbae kachi yayapo waerä wae. Jare yande yayandu yawe Tumpa iñee ikawi wae, jokua kɨrëɨ jeiete ñanemɨata wae echa yayawɨ waerä Tumpa jei wae, jare jukuärái yandereraa mbɨrɨ Tumpa wi mano kotɨ. Jukuärái yaikuaa jokua kɨrëɨ mbae kachi yayapo waerä wae kachiete ye ko.

Yandepɨa pe ñeräro oï wae rewa

¹⁴ Jayawe yaikuaa jokua mbaembae Tumpa uikuaaka Moisés pe uikuatía waerä wae ikawi ko, echa’ä Tumpa wi etei ko ou ramo. Erëi che ko jae kuimbaeño, jare yawái mbae ayawɨ Tumpa kotɨ. Añetete teko kachi ipionerä aiko wae rami ko che.

¹⁵ Cheropa aï parawete chereko rewa. Echa’ä jeta wese ayapo’ä mbae ikawi wae chekɨrëɨ tëi ayapo wae. Erëi mbae kachi añamɨtäa wae, jokua ayapo parawete.

¹⁶ Jare ayapo yawe mbae kachi wae aipota’ä tëi ayapo wae, chepɨa uikuaaka chewe jokua ikawi’ä ko jare che etei ayembɨjeko jese. Jare jukuärái aikuaa Tumpa jei wae ikawi wae ko.

¹⁷ Jayawe ayapo yawe mbae kachi wae aipota’ä tëi ayapo wae, jayawe mbaetɨ ko aï tekowe ipɨau wae anoi wae rupi. Erëi ime chepɨa pe jokua kɨrëɨ mbae kachi ayapo waerä wae. Jokua ko chemɨata oï wae echa ikotɨ.

^18-19 Jare che aikuaa amaeño jese yawe, jare aiko che jae wae rupiño yawe, ndarau uyekuaa ikawi wae. Echa’ä ndarau ayapo ikawi wae aipota tëi ayapo wae. Erëi jokua mbae ikawi mbae wae aipota’ä tëi ayapo wae, jekuaeño jokua ayapo parawete.

²⁰ ¿Kërái ra jekuaeño ayapo jokua aipota’ä tëi ayapo wae? Jukuärái ko ayapo mbaetɨ aiko yawe tekowe ipɨau wae anoi wae rupi. Erëi ime chepɨa pe jokua kɨrëɨ mbae kachi ayapo waerä wae. Jokua ko chemɨata oï wae echa ikotɨ.

²¹ Jayawe aikuaa kawi aï añawe mbae jekuaeño uyeyapo oï chewe wae. Jae ko kua: Mbae ikawi wae aipota tëi ayapo yawe, ime mbae kachi wae chembɨawái oï.

²² Yepe tëi chepɨa pe ayerowia aï Tumpa jei wae re,

²³ erëi aikuaa ime ambɨe mbaepuere oï cheré wae. Jare jokua mbaepuere umbɨawái oï jokua ikawi wae chepɨa pe aipota tëi ayapo wae. Jare jokua mbaepuere chemɨamɨri oï che ayawɨ waerä Tumpa kotɨ cherete pɨpe, jare chepuere’ä ayapo mbae awe cheiño ayerepɨ waerä chuwi.

²⁴ ¡Aikuasɨ katu aï parawete! Echa’ä mbae kachi cherete uipota wae ueru oï chewe mano jare Tumpa iarasɨ. ¿Kía ra ipuere cherepɨ chuwi?

²⁵ Jaeño ko Tumpa cherepɨta chuwi yandeYa Jesucristo rupi. Jare jokua re amee yasurupái Tumpa pe. Jayawe añetete che aiko parawete kuärái: Chepɨa pe aipota tëi aiko kawi opaete Tumpa jei wae rupi. Erëi ime wi oï chepɨa pe jokua kɨrëɨ che jae wae rupiño aiko waerä. Jare jukuäraiño aiko yawe, jekuaeño ayawɨ Tumpa kotɨ.