Romanos 5 - Biblia

Mbaembae ikawi wae Tumpa uyapo yandewe wae

¹ Añawe yaikuaa ñaï Tumpa umae ma yanderé yandereko mbae wae rami yandeYa Jesucristo re yarowia wae rupi. Jáeramo yayeapɨkatu ma Tumpa ndiwe, Cristo uyapo yandewe wae rupi.

² Jare añawe yarowia ma Cristo re ramo, Cristo uyapo ma yayekou waerä Tumpa ipɨakawi re. Jare yayerowia ñaï, echa’ä yaikuaa ko pëti ara yayekouta ñaï kuri Tumpa imbaepuere jupiete ye wae re.

³ Jare kuaño’ä ko. Jae nunga wi yandepuere yayerowia yaiporara ñaï wae rupi. Echa’ä yaikuaa yaiporara ñaï yawe, jokoropi ko yayemboe ñamɨawäta waerä.

⁴ Jare ñamɨawäta ma yawe, jokua re ko Tumpa umae kawita oï. Jare yaikuaa Tumpa umae kawi oï yanderé yawe, yaikuaa kawieteta Tumpa uyapota oï mbae ikawi wae yandewe kuri.

⁵ Jokua ko añawe ñaäro ñaï yayerowia rewe. Jare jokua re ndarau ñanemara yapɨta, echa’ä Tumpa yanderauete ko. Jare Espíritu Santo Tumpa umee yandewe wae jekuaeño uikuaaka yandewe Tumpa yanderau ko.

¿Kërái ra ko Tumpa yanderau?

⁶ Jare ¿kërái ra ko Tumpa yanderau? Yaikuaa Tumpa yanderauete ko, echa’ä Cristo umano yanderé, yande jupi mbae yaiko wae reta re. Yande parawete reta teko pe yaiko Tumpa jowai yayawɨ jae jei wae ramo. Jare yandepuere’ä etei yayerepɨ chuwi yandeiño. Erëi ou ma uwäe yawe ara Tumpa uiparawo wae, Cristo umano yanderé.

⁷ Kua re ikawi yayemɨngeta waerä yandepɨa pe. Jeta’ä uipota umee jekowe pëti jupi wae re. Erëi aramoi imeta kía ipɨakawiete wae re umee jekowe wae.

⁸ Erëi Tumpa uechaka ma yandewe yanderauete ko. Echa’ä yepe tëi yande yayapoñoi mbaembae kachi wae Tumpa jowai, erëi jesewe jae etei ombou Cristo umano waerä yanderé.

⁹ Jayawe jukuärái ko Tumpa yanderauete ye. Erëi ime ye mbae ikawi wae yaikuaa waerä. Yaikuaa ñaï yandeYa Jesús upɨyere juwɨ jare umano yanderé Tumpa ipuere waerä umae yanderé yandereko mbae wae rami. Jare jukuärái yawe, ¿këraita pa Tumpa iarasɨ oata oï yanderé kuri ara taɨkuewa pe? Ndarau etei ma.

¹⁰ Echa’ä yepe tëi tenonde yawe yaikose Tumpa jowaichorä, erëi añawe yayeapɨkatu ma ko Tumpa ndiwe Taɨ imano rupi. Jare jukuärái yawe, ¿këraita pa Tumpa uitɨ oï iarasɨ yanderé kuri ara taɨkuewa pe? Ndarau uyapo, echa’ä Jesús jekuaeño oï yanderepɨ waerä.

¹¹ Jare jokuaño’ä ko. Añetete tuicha yerowia ñanoi, echa’ä Tumpa iarasɨ wasu ndarau ma oa oï yanderé. Erëi ime ñanoi yerowia tuichaete ye wae, echa’ä yandeYa Jesucristo uyapo yandewe wae rupi yayeapɨkatu ye ma Tumpa ndiwe.

Adán uyapo wae uyemboyowake’ä etei Cristo uyapo wae ndiwe

¹² Jayawe ¿mbae pa yaikuaa kua pe? Yande yaikuaa tenondete kuimbae iko wae jae ko tenondete uyawɨ Tumpa kotɨ wae. Jare jae uyawɨ Tumpa kotɨ jeko pewa mano uike kua ɨwɨ pe. Jáeramo opaete ñamanota ñaï, echa’ä opaete wae yayawɨ Tumpa kotɨ ramo.

^13-14 Añetete ko, ndei Moisés uikuaaka chupe reta Tumpa jei wae mbowe, imeño mái yepe teko kachi kua ɨwɨ pe. Erëi Tumpa umbɨjeko’ä ɨwɨ pewa reta jokua re, echa’ä jae reta ndeiño uikuaa Tumpa jei wae ramo jare uyawɨ'ä reta Tumpa jei wae Adán uyapo rami. Erëitu jesewe Adán wiwe Moisés rewa jae nunga wi mano opa uyembɨiya jese reta Adán jeko pewa. Jayawe yandepuere yae Adán ko jae Cristo rami, echa’ä jae mbae uyapo wae oa jeta wae reta re.

¹⁵ Erëi Tumpa jepɨ mbae awe umee yandewe Jesucristo rupi wae, oyowake’ä etei ko uasa yandewe Adán rupi wae. Echa’ä jokua pëti kuimbae uyawɨ Tumpa jei wae jeko pewa, jeta wae reta umano. Erëi Jesucristo uyapo wae rupi jeta yande reta yayekou ma ñaï Tumpa ipɨakawi re, jare Tumpa umae ma yanderé yandereko mbae wae rami.

¹⁶ Che tae ye pewe, Tumpa jepɨ mbae awe umee yandewe wae, oyowake’ä etei ko uasa yandewe Adán rupi wae. Adán jaeramo etei uyawɨ Tumpa jei wae yawe, Tumpa umbɨpɨ umbɨjeko ɨwɨ pewa reta. Erëi Tumpa umee yandewe wae jeko pewa, yande ñaï ma yandereko mbae wae rami Tumpa jowai, yepe tëi jeta ye ye yayawɨ ikotɨ.

¹⁷ Añetete, jokua pëti kuimbae Adán uyawɨ Tumpa jei wae jeko pewa mano uyembɨiya opaete wae re. Erëi yaipɨsɨ Tumpa ipɨakawi yawe, jare jae umae yanderé yandereko mbae wae rami yawe, tuichaete ye uyembɨiyata oï yanderé tekowe opa mbae wae jokua pëti kuimbae Jesucristo uyapo yandewe wae rupi.

¹⁸ Jayawe jukuärái ko pëti kuimbae uyawɨ Tumpa jei wae jeko pewa, opaete yande reta ñanoi teko Tumpa jowai. Erëi Jesucristo jupi wae uyapo wae rupi, añawe opaete kía wɨrowia reta jese wae ime onoi tekowe opa mbae wae, jare Tumpa umae ma jese reta jeko mbae wae rami.

¹⁹ Jae ramiño wi Adán mbaetɨ Tumpa jei chupe wae uyapo jeko pewa opaete wae uyawɨ wi Tumpa kotɨ. Erëi Jesucristo Tumpa jei chupe wae uyapo ramo, Tumpa umaeta jeta wae reta re jeko mbae wae rami.

Tumpa jei wae uikuaaka yandewe yandereko tuicha ko

²⁰ Arakae Tumpa uikuaaka Israel iñemoñaa reta pe kërái yureko reta waerä – jae ko mbaembae uyapota ko reta wae jare mbaembae awɨyeta ko uyapo reta wae. Jare jukuärái Tumpa uyapo opaete yande yaikuaa kawi waerä yandereko tuicha wae ko jae jei wae yayawɨ ramo. Erëi yepe tëi yande jeta yayawɨ Tumpa jei wae jare yandereko jekuaeño ukuakuaa oo iko, erëi jesewe Tumpa tuichaete ye ipɨakawi yandewe.

²¹ Jáeramo kërái yaikose teko yareko wae ipo pe jare jokua yanembɨsɨrɨ iko Tumpa wi, jukuärái wi añawe Tumpa ipɨakawi wae ipo pe ko ñaï jare ime ma ñanoi tekowe opa mbae wae. Echa’ä ime yawe kía wɨrowia yandeYa Jesucristo re wae, Tumpa umae jese jeko mbae wae rami.