Romanos 4 - Biblia

Tumpa umae Abraham re jeko mbae wae rami

¹ Yaikuaa kawi waerä kua rewa, ñamae kërái ra uasa Abraham pe. Ore judiorä nduiko wae reta nduikuaa kawi Abraham rewa, echa’ä jae ko jae oreɨpɨ. ¿Mbae jeko pewa ra Tumpa umae Abraham re jeko mbae wae rami?

^2-3 ¿Abraham uyapo ra mbae ikawi waeño aramoi? Mbaetɨ. Echa’ä Tumpa iñeerɨru pe jei yandewe kuärái: “Abraham wɨrowia Tumpa jei wae re; jáeramo Tumpa umae jese jeko mbae wae rami.” Jukuärái uyekuatía oï. Jayawe kua pe yaikuaa ko Tumpa umae Abraham re jeko mbae wae rami Abraham wɨrowia Tumpa jei wae re ramo, jare mbaetɨ ko Abraham mbae ikawi wae uyapo wae rupi. Jáeramo Abraham ipuere’ä uyembutuicha jae mbae uyapo wae re Tumpa jowai.

⁴ Yaikuaa ñaï yaparawɨkɨ yawe yamɨngana waerä, jokua yamɨnganakue wae mbaetɨ ko uñemeeño oï yandewe wae – jae ko jokua mbarawɨkɨ iya imeta ko umbɨepɨ yandewe wae.

⁵ Erëi jukuärai’ä ko Tumpa ndiwe. Echa’ä Tumpa umae jupi mbae wae reta re jeko mbae wae rami jae reta jese wɨrowia ramo – mbaetɨ ko mbaembae ikawi wae jae reta uyapo wae rupi.

⁶ Jukuärái wi mburuwicha wasu David arakae uikuaaka yandewe. Echa’ä jokua jae uikuatía wae rupi yaikuaa mbaetɨ ko mbaembae ikawi wae yayapo wae rupi Tumpa umae yanderé yandereko mbae wae rami. Jare kía kía Tumpa umae jese jeko mbae wae rami wae, jae reta uyekouete ñonoï.

⁷ David uikuatía arakae kuärái: “Ime yawe kía uyawɨ ma Tumpa kotɨ wae, erëi Tumpa jokua umbái ma chuwi yawe jare imandua’ä ma chupe jokua re yawe, jae uyekouete oï.

⁸ Uyekouete oï wi kía Tumpa ndarau ye ma umbɨjeko wae.” Jukuärái uikuatía David.

Judío mbae wae reta wi ipuere oï jeko mbae wae rami Tumpa jowai

⁹ Erëi aramoi ¿uyembɨcircuncidaka wae retaño ra ipuere uyekou kua mbae ikawi wae re? ¿Aramoi chuwi retaño ra Tumpa umbái mbaembae kachi uyapo reta wae? ¡Mbaetɨ! Echa’ä jae nunga wi uyembɨcircuncidaka mbae wae reta wi ipuere uyekou jokua re. Yaikuaa waerä añetete jokua rewa, yaecha ñamae ye mbae ra uyeyapo Abraham pe wae. Añawe yaikuaa Tumpa umae Abraham re jeko mbae wae rami Abraham wɨrowia Tumpa iñee re ramo.

¹⁰ Erëi ¿kërái yawe ra umae jese jeko mbae wae rami? ¿Abraham uyembɨcircuncidaka ma yawe ra, ani ndei uyembɨcircuncidaka mbowe ra? Uyembɨcircuncidaka ma yawe’ä ko. Echa’ä Tumpa umae jese jeko mbae wae rami ndei uyembɨcircuncidaka mbowe.

¹¹ Jare jaɨkue rupi ramo ko Tumpa jei Abraham pe uyembɨcircuncida waerä. Erëi ¿maera ra Tumpa jei Abraham pe uyapo waerä jokua? Jokua circuncisión ko jae pëti yembɨjaangaño, jare uikuaaka ïru wae reta pe kërái Tumpa umae ma iko Abraham re jeko mbae wae rami Abraham wɨrowia iñee re ramo. Jare kua uyeyapo ndei Abraham uyembɨcircuncidaka mbowe. Jáeramo opaete kía kía Tumpa jei wae re wɨrowia wae reta, yepe tëi ko aramoi jae reta uyembɨcircuncidaka mbae wae reta, erëi Abraham ko jae reta tuukue rami. Echa’ä Tumpa umae jese reta wi jeko mbae wae rami jae reta wɨrowia iñee re ramo.

¹² Jae nunga wi Abraham ko jae orerukue, opaete ore nduyembɨcircuncidaka wae reta. Erëi jaeño orepuere ndoe jukuärái, nomomoe yawe jae jeko. Kua uipota jei jaeño ndorowia yawe Tumpa re kërái Abraham wɨrowia jese rami ndei jae uyembɨcircuncidaka mbowe.

¹³ Yaikuaa kawi ñaï Tumpa jei Abraham pe wae: “Nde jare niñemoñaa reta yurekota kua ɨwɨ iyarä,” jei chupe. Erëi ¿marái ramo ra Tumpa jei chupe jukuärái? ¿Jae ra ko Abraham uyapo jupi rupi kawi Moisés uikuatía wae re ramo? Mbaetɨ. Echa’ä jokua ara reta rupi Moisés ndeiño iko. Abraham jaeño wɨrowia Tumpa jei wae re, jare jukuärái Tumpa umae jese jeko mbae wae rami.

¹⁴ Jokua mbaembae Tumpa jei uyapota oï Abraham iñemoñaa reta pewarä wae ikawi ko. Erëi jaeño Tumpa iñee jupi rupi kawi uyapo wae reta ipuere uyekou jese yawe, jayawe Tumpa uyemɨngetaiño iko jare yarowia Cristo re wae usiriwe’ä etei ko maeräwe.

¹⁵ Echa’ä opaete yayawɨ ma ko Tumpa jei wae, jare jokua jaeño ko ueru yandewe Tumpa iarasɨ. Tumpa uikuaaka’ä ma yandewe jae jei wae yawe, jayawe yandepuereta tëi yaiko yandepɨawiwe rewe. Echa’ä ndarau tëi yayawɨ Tumpa jei wae. Erëi Tumpa uikuaaka ma ko yandewe jae jei wae Moisés uikuatía wae rupi. Jáeramo teko pe ñaï jokua yayawɨ ramo. Jáeramo Moisés uikuatía wae rupi ndarau kiawe ipuere uyekou mbaembae ikawi wae re Tumpa jei uyapota oï Abraham iñemoñaa reta pewarä wae.

¹⁶ Erëi Tumpa ipɨakawiete ye jeko pewa, jae uipota opaete wae yayekou waerä – jae ko judiorä yaiko wae reta jare judío mbae yaiko wae reta wi. Jáeramo jae jei yandewe jaeño yarowia waerä jese kërái Abraham wɨrowia jese rami. Jare jukuärái yayapo yawe, Abraham ko jae yanderukue rami Tumpa jowai.

¹⁷ Jukuärái ko jei Tumpa iñeerɨru pe. Echa’ä uyekuatía oï joko pe kua mbae Tumpa jei Abraham pe wae: “Che nduyapota aï jeta ambɨe ɨwɨ pewa reta tamɨrä.” Jukuärái Tumpa jei chupe jare jukuärái ma uyapo chupe, echa’ä opaete yande Cristo re yarowia wae reta ko jae Abraham iñemoñaa añetete wae Tumpa jowai. Jare jukuärái yandepuereta yayekou Abraham ndiwe jokua mbaembae Tumpa umeeta oï chupe wae re. Tumpa uyapo kua mbae ikawi wae Abraham pewarä, echa’ä Abraham wɨrowia iñee re ramo. Abraham uikuaa Tumpa imbaepuere tuichaete ko, jare Tumpa uipota yawe, jae nunga wi ipuere umbɨjekowe ye umanokue wae reta. Jáeramo Abraham uikuaa yawai’ä ko Tumpa pewarä umee chupe uñemoña waerä.

Abraham ko jae jeta wae reta tuukue rami

¹⁸ Yanemandúa kawi ñaï, yepe tëi Abraham jare jembireko indechiete ma, erëitu Abraham uäro wɨrowia katu rewe jokua mbae ñaäro rape mbae wae. Jare jae jekuaeño wɨrowiaete Tumpa uyapota iko jeta ambɨe ye ye ñee pe uyemɨngeta wae reta tamɨrä. Echa’ä Tumpa jei ma chupe kuärái: “Mbaetɨta kía ipuere uipapa niñemoñaa reta, echa’ä jetaete ye ikota ramo.”

¹⁹ Jukuärái Tumpa jei Abraham pe pëti chiëto año seri ma wɨreko yawe. Abraham uikuaa jete indechiete ma iko jare añapea ma iko. Uñemoña rape’ä ma iko iyupe. Jare uikuaa wi jembireko Sara ko jae ipuere mbaei imembɨ wae. Erëi Abraham yepe tëi kua mbaembae uikuaa, erëitu ikueri’ä etei.

²⁰ Jae jekuaeño wɨrowiaete Tumpa uyapo ñotái jae jei chupe wae. Jare jokua re Abraham uñemɨmɨräta wɨrowia kawi waerä Tumpa re jare umbutuicha Tumpa jee.

²¹ Abraham wɨrowiaete Tumpa imbaepuerete ko uyapo waerä opaete mbaembae jae jei uyapota iko wae.

²² Jare Abraham wɨrowia kawi Tumpa jei wae re ramo, Tumpa umae jese jeko mbae wae rami.

²³ Jare kua ñee reta, “Tumpa umae jese jeko mbae wae rami,” jei wae, mbaetɨ uyekuatía oï Abraham reño.

²⁴ Uyekuatía ko oï yanderé wi. Echa’ä Tumpa umae wi yanderé yandereko mbae wae rami yarowia jese yawe – jae ko umbɨjekowe ye ueru yandeYa Jesús umanokue wae reta ipɨte wi.

²⁵ YandeRu Tumpa etei umee Taɨ umano waerä teko yareko ikotɨ wae re. Erëi jokuaño’ä uyapo. Jae nunga wi umbɨjekowe ye Taɨ ueru umanokue wae reta ipɨte wi. Jare jukuärái uechaka yandewe añawe mbaetɨ ye ma ko mbae uata yandewe Tumpa umae waerä yanderé yandereko mbae wae rami.