Romanos 2 - Biblia

Mbae jei Pablo uyererowia katu wae reta pe

¹ Aramoi imeta kía ipuere jei yandewe jupi ko Tumpa uiporaraka waerä jokua jeko kachi wae reta pe. Erëi che tae jukuärái uyemɨngeta wae pe kuärái: Nde ndere yawe jukuärái, ndiyembɨjeko ma ko neï wi, echa’ä nde ndiyapo wi ko jokua nunga etei teko ikawi mbae wae. Jáeramo jupi ko Tumpa uiporaraka waerä ndewe wi, ipotawe wae rami ko nde wi.

² Yaikuaa ñaï Tumpa uyapo oï jupi wae rupi jae uiporaraka yawe jokua teko ikawi mbae uyapo wae reta pe.

³ Jáeramo, ¿këraita pa nde nderowia Tumpa ndarau uitɨ iarasɨ nderé? Echa’ä yepe tëi nde ndere jupi ko Tumpa uiporaraka waerä ïru wae reta pe mbae ikawi mbae wae uyapo reta wae re, erëi nde etei wi ndiyapo jokua nunga ikawi mbae wae.

⁴ Añawe Tumpa ipɨakawi oï ndewe jare ipɨawasu oï ndewe; jáeramo ndeiño uiporaraka oï ndewe. Erëi nemaerä, mbae’ä chawaa oï ndewe. Erëi aipota ndikuaa waerä kua: Tumpa ipɨakawi oï ndewe ndeya waerä ndepɨayemɨngeta jupi mbae wae Tumpa rewa.

⁵ Erëi nde ndipota’ä ndeya jare jekuaeño ndepɨatäta neï. Jare jokua jeko pewa Tumpa iarasɨ wasu jekuaeño ukuakuaa oï ndekotɨ. Jare Tumpa jokua uitɨta oï nderé uwäe yawe ara opaete ɨwɨ pewa reta uyemboɨ waerä jae jowai jae jei waerä jae reta jeko re. Jare jokua ara ramo Tumpa uiporarakata oï ndewe täta rupi.

Tumpa umɨñatimata oï yandewe kërái mbaembae yayapo wae rupi

⁶ Jokua ara Tumpa umɨñatimata oï yandewe kërái mbaembae yayapo wae rupi.

⁷ Echa’ä amokue wae reta ikɨrëɨete uyembutuichaka Tumpa pe. Jare uipota yureko reta jaeño mái pewa Tumpa ndiwe. Jáeramo jae reta uyapo ikawi wae. Jare Tumpa umeeta chupe reta tekowe opa mbae wae.

⁸ Erëi ïruwe reta jukuärai’ä ko. Jae reta jaeño uipota yureko jae reta jei wae rupiño. Jae reta wɨrowia’ä añetete wae jare uipota uyapo reta mbae jupi mbae waeño. Jáeramo Tumpa uiporarakata iarasɨ rewe chupe reta. Jukuärái uyapota oï jokua ara opaete wae uyemboɨ yawe jae jowai.

⁹ Jayawe jokua ara opaete mbae ikawi mbae wae uyapoñoi wae reta uiporarata ko ikuasɨ katu rupi – judío reta, jare judío mbae wae reta wi.

¹⁰ Erëi Tumpa umae kawita oï opaete ikawi wae uyapo wae reta re. Jae umae kawita jese reta uyerowia rewe opaete wae reta jowake, jare jae reta upɨtata ipɨawiwe rewe. Jukuäraita ko judío reta pewarä, jare jae nunga wi judío mbae wae reta pewarä.

¹¹ Tumpa pewarä mbaeta’ä kía ko jae reta wae, echa’ä Tumpa umae oyowake opaete wae re.

Judío jare judío mbae wae reta mokui rewe ko onoi teko Tumpa jowai

^12-13 Añetete judío jare judío mbae wae reta oyowakeño uyemboɨta ñonoï Tumpa jowai jae jei waerä jae reta jeko re. Jare Tumpa uiporarakata oï judío reta pe. Echa’ä Moisés arakae uikuaaka kawi jae reta tamɨkue reta pe kërái Tumpa uipota wae – jae ko mbaembae uyapota ko reta wae jare mbaembae awɨyeta ko uyapo reta wae. Erëi judío reta mbaetɨi uyapo kawi Tumpa jei wae rupi. Jare Tumpa pewarä mbae’ä ko kía uikuaaño yawe jae jei wae. Imeta ko uyapo wi Tumpa jei wae Tumpa umae waerä jese jeko mbae wae rami. Jare judío reta mbaetɨ uyapo ñonoï jokua. Jare judío mbae wae reta, yepe tëi Moisés uikuaaka’ä chupe reta Tumpa uipota wae, erëi jae reta wi Tumpa omombota iyuwi jaeño mái pewa.

¹⁴ Echa’ä jae retawe wi uikuaa tëi amokue mbaembae Tumpa jei wae mbaetɨ kía umɨmbeu chupe reta rewe. Erëi uyawɨñoi reta. ¿Kërái ra uikuaa reta Tumpa jei wae? Añetete ko jae reta uikuaa. Echa’ä amo pe jae reta uikuaa mbae rewe yurekoño Tumpa jei wae rupi.

¹⁵ Amo pe jae reta uikuaa teko onoi mbaembae kachi uyapo reta ramo, jare amo pe uyembɨpɨakatu reta mbae ikawi wae uyapo reta yawe. Jukuärái jae reta uikuaaka ñonoï ime ko oï Tumpa jei wae ipɨa pe wae. Jayawe jupi ko Tumpa uiporaraka waerä chupe reta wi, echa’ä uyawɨ reta jokua Tumpa jei wae ipɨa pe oï wae.

¹⁶ Jayawe Tumpa mbaetɨta iñakañɨ jokua mbaembae reta wi, ɨwɨ pewa reta uyemboɨ yawe jae jowai. Jokua ara ramo Tumpa oñonota Jesucristo jei waerä jae reta jeko re opaete mbaembae uyapo reta wae rupi, jare mbaembae uyapo wɨari ñonoï wae rupi wi. Jekuaeño jukuärái chemiäri, ñee ikawi wae amɨmbeu aï wae rupi.

Judío reta uikuaa tëi Tumpa jei wae, erëi uyapo’ä reta

¹⁷ Añawe che aipota jae kua mbaembae opaete ore judiorä nduiko wae reta pe. Moisés arakae uikuatía yandewe mbaembae Tumpa jei wae. Jare jeta pe reta perowia tëi Tumpa umae kawi oï peré jae jei wae pikuaa ramo. Jare pere tëi piyembutuicha rewe: “Ore ko jae judío reta. Ore nduikuaa Tumpa.

¹⁸ Jare nduikuaa Tumpa uipota wae, echa’ä nduyemboe ma jae jei wae re. Jáeramo ore nduikuaa noï ikawiete ye wae,” pere tëi chupe reta. Jukuärái pe reta piyembutuicha peï.

¹⁹ Jare pe reta pere tëi wi peyupe kuärái: “Judío mbae wae reta jesa mbae echa wae ko, jare pɨ̈tumimbi pe ñonoï reta rami uikuaa’ä reta Tumpa ramo. Erëi yande yandepuere ñamɨmae reta jare yaechaka chupe reta tembipe.

²⁰ Echa’ä yande yaikuaa Tumpa jei wae, jare jukuärái yaikuaa opaetei Tumpa rewa jare añetete wae. Jáeramo yepe tëi jae reta iyarakuaa’ä jare ñonoï reta sambiaɨ rami, erëi yande yandepuere yamboe kawi reta.” Jukuärái pere tëi peyupe.

²¹ Jaekawi. Añawe aipota apɨrandu pewe amokue mbaembae reta re. Pe reta pemboe peï ïru wae reta, erëitu pe reta, ¿maera pa piyemboe’ä? Pemboe peï ïru wae reta awɨye waerä imonda, erëi pe reta, ¿pemonda’ä ra?

²² Pe reta pemboe peï ïru wae reta awɨye waerä uyapo awasa, erëi ¿pe reta jukuärai’ä ra? Jare piñamɨtäa peï tumparaanga reta, erëi ¿piyekou’ä ra mbaembae piñomi jokua tumparaanga jëta wi wae re?

²³ Jayawe yepe tëi pe reta piyererowia katu piyé Tumpa jei wae pikuaa ramo, erëi piyapo’ä jupi rupi jae jei wae. Jare jokua jeko pewa pemɨmichika peï Tumpa jee.

²⁴ Tumpa iñeerɨru pe uyekuatía oï kuärái pe rami wae reta re: “Pereko pewa judío mbae wae reta jei ikawi mbae wae Tumpa kotɨ.” Jukuärái uyekuatía oï. Jayawe ¿mbae re ra yayemboe ñaï kua pe? Yepe tëi pe reta ko jae judío reta, erëi jupi ko Tumpa uiporaraka waerä pewe wi.

Tumpa ipɨa umbɨambɨe chuwi wae retaño ko jae imaerä etei

²⁵ Erëi aramoi pe reta piyemɨngeta tëi peï pepɨa pe: “Tumpa ndarau uiporaraka chewe, echa’ä che ko jae ayembɨcircuncidaka wae. Tumpa chapo ma jae imaerä,” pere tëi. Erëi awɨyeta ko perowia jukuärái. Echa’ä jaeño ikawita tëi pewe piyembɨcircuncidaka wae, jekuaeño piyapo yawe opaete Tumpa jei wae rupi. Erëi piyawɨ yawe Tumpa jei wae, jayawe Tumpa pewarä mbae’ä ko piyembɨcircuncidaka peï wae. Oyowakeño peï uyembɨcircuncidaka mbae wae reta rami – jae ko judío mbae wae reta rami.

²⁶ Jae ramiño wi pëti judío mbae wae, yepe tëi uyembɨcircuncidaka wae’ä ko, erëi jae uyapo yawe jupi Tumpa jei wae rupi, ¿ndarau yerá Tumpa umae kawi jese?

²⁷ Jáeramo jokua judío mbae wae jeita oï Tumpa uyapo ko jupi rupi uiporaraka waerä pewe. Jukuärái jeita, echa’ä yepe tëi opaete Tumpa jei wae uyekuatía oï pewe, jare yepe tëi piyembɨcircuncidaka peï, erëi pe reta piyawɨñoi Tumpa jei wae.

²⁸ Ipuere ko kía judío. Jare ipuere ko uyembɨcircuncidaka oï. Erëi jokua uipota’ä jei jae ko judío añetete wae Tumpa jowai. Uipota’ä jei jae ko oï Tumpa pewarä.

²⁹ Tumpa imaerä añetete wae reta ko jae kía kía ipɨa Tumpa umbɨambɨe chuwi wae reta. Jare jokua uyekuaa’ä yanderete pe – jaeño oï yandepɨa pe. Jare kua ko Tumpa uyapo Espíritu Santo rupi – mbaetɨ ko Moisés arakae uikuatía wae rupi. Jare jokua nunga retarä yaiko wae re Tumpa umae kawita, yepe tëi ïru wae reta aramoi umae kawita’ä yanderé.