Romanos 16 - Biblia

Pablo wɨraaka saludo reta

¹ Aipota amɨmbeu kawi pewe yanderindɨ mii Febe jee wae rewa. Jae jekuaeño omborɨ kawi Cristo re wɨrowia wae reta tëta wasu Cencrea pewa. Jare añawe jae uipota oo opou pepɨ.

² Jáeramo jae oo uwäe yawe, pembɨasa kawi mii kuri yandeYa jee re. Echa’ä ikawi ko jukuärái yayapo waerä yandeyupe, yande Tumpa ñaneñono tee jae imaerä wae reta. Jare pemborɨ mii wi Febe aramoi mbae uata chupe yawe, echa’ä jae omborɨ ma jeta wae reta jare che chemborɨ wi.

³ Pembɨsaluda mii chewe Priscila jare ime Aquila. Jae reta ko jae cheparawɨkɨ ïru, echa’ä ore päwe rewe nduyeyokui Jesucristo pe.

⁴ Jae reta uñemee umano waerä tëi cherepɨ waerä. Jáeramo jekuaeño ayapo yasurupái chupe reta. Jare cheño’ä ko ayapo yasurupái. Jae nunga opaete judío mbae Cristo re wɨrowia wae ikotɨ̈atɨ̈a uyembatɨ wae reta wi umee yasurupái chupe reta cherepɨ wae re.

⁵ Pembɨsaluda mii chewe wi opaete hermano reta Priscila jare Aquila jëta pe uyembatɨñoi wae reta. Jae nunga wi pembɨsaluda mii chewe cheïru au wae Epeneto. Jae ko tenondete wɨrowia Cristo re wae ɨwɨ Asia pe.

⁶ Jae nunga wi pembɨsaluda mii chewe María. Jae uparawɨkɨ ma täta pepɨte rupi Cristo pewarä.

⁷ Jare pembɨsaluda mii chewe cherëtáɨwa reta Andrónico jare Junias. Che aiko yawe peresorɨru pe, jae reta yureko wi che ndiwe joko pe. Jae reta wɨrowia Cristo re ndei che arowia jese mbowe, jare Jesús omondo wae reta uyemɨngeta kawi jese reta.

⁸ Jae nunga wi pembɨsaluda mii chewe Amplias. Jae ko yandeYa re wɨrowia wae wi, jare che jae au wi.

⁹ Jare pembɨsaluda mii chewe Urbano. Jae ko ore ndiwe uyeyokui Jesucristo pe wae. Jare pembɨsaluda mii chewe cheïru au wae Estaquis.

¹⁰ Jae ramiño wi pembɨsaluda mii chewe Apeles. Jae jeta uiporara ma Cristo re wɨrowia jeko pewa, erëi opia’ä Tumpa jape wi. Jukuärái jae uechaka ma kërái wɨrowia Cristo re añetete rewe. Jare pembɨsaluda mii chewe Aristóbulo jëta pewa reta.

¹¹ Jae nunga wi pembɨsaluda mii chewe cherëtáɨwa Herodión jare opaete Narciso jëta pewa Cristo re wɨrowia wae reta wi.

¹² Jae ramiño wi pembɨsaluda mii chewe yanderindɨ mii reta Trifena jare Trifosa jare Pérsida wi. Jae reta täta uparawɨkɨ ñonoï yandeYa pe.

¹³ Jare pembɨsaluda mii chewe Rufo jare ichɨ wi. Rufo wɨrowia kawi yandeYa re, jare jae ichɨ jekuaeño uyandareko kawi cheré chesɨ rami.

¹⁴ Jae ramiño wi pembɨsaluda mii chewe Asíncrito, Flegonte, Hermas, Patrobas, Hermes, jare opaete hermano reta wi uyembatɨñoi jae reta ndiwe wae.

¹⁵ Jae nunga wi pembɨsaluda mii chewe Filólogo, Julia, Nereo, Nereo jindɨ, Olimpas, jare opaete hermano reta wi uyembatɨñoi jae reta ndiwe wae.

¹⁶ Jare pe reta piyembɨsaluda yawe, jekuaeño piyembɨsaluda piyerau rewe. Opaete Cristo re wɨrowia wae reta kerupi rupi uyembatɨ wae reta omondo wi pewe saludo.

Pablo umbɨarakuaa reta oporomboe kachi wae reta re

¹⁷ Añawe hermano mii reta, che pumɨñera piyandareko kawi waerä piyé, awɨye waerä kía jeko pewa piyembɨyao tee tee peyuwi. Echa’ä ime amokue wae reta mbaetɨ ikawi oporomboe. Jokua jae reta oporomboe wae ambɨe ye pe reta piyemboe wae wi, jare jae reta jeko pewa jeta wae reta opia ma Tumpa jape wi. Jáeramo awɨye piñemɨïru jae reta ndiwe.

¹⁸ Jokua nunga oporomboe wae reta mbaetɨ uyeyokui ñonoï yandeYa Jesucristo pe. Jaeño ko uparawɨkɨ ñonoï jae reta jei wae rupiño. Jae reta iñee kawi rupi umbɨtawɨ onoi ikoi mii wae reta.

¹⁹ Erëi pe reta pereräkua kawi ma opaete kerupi rupi, echa’ä jekuaeño piyapo kawi peï kërái piyemboe wae rupi. Jokua chembɨyerowiaete oï. Erëi jaeño aipota pearakuaa katu waerä mbaembae ikawi wae pewaräño, jare awɨye pearakuaa katu waerä mbaembae kachi wae pewarä.

²⁰ Tumpa ko jae jekuaeño yanembɨpɨakatu wae. Jare jae ɨmambaeño peñonota pemɨamɨri waerä Satanás kërái mbae re pepɨ̈ro wae rami. YandeYa Jesucristo jekuaeño tipɨakawi pewe.

²¹ Kua pe oï che ndiwe cheparawɨkɨ ïru Timoteo jare ïru cherëtáɨwa reta Lucio, Jasón, jare Sosípater jee wae reta. Jae reta wi omondo oï pewe saludo.

²² Jare Tercio wi omondo oï pewe saludo yandeYa jee re. Jae ko umbaekuatía oï chewe wae.

²³ Jare Gayo uipota pembɨsaluda wi. Jae jëta pe ko che ake aï añawe, jare opaete Cristo re wɨrowia wae reta kua tëta wasu pe ñonoï wae reta uyembatɨñoi wi kua jae jëta pe. Erasto wi pembɨsaluda. Jae ko tëta wasu ikorepoti iyandarekoa. Jare hermano Cuarto omondo pewe wi saludo.

²⁴ YandeYa Jesucristo tumee opaete pewe ipɨakawi. Jukuärái tuiko.

Tumpa jee tuyembutuichaka

²⁵ Jare añawe yambutuicha Tumpa jee. Jae ko ipuere pemɨmɨräta Tumpa re kua ñee ikawi wae Jesucristo rewa amɨmbeu pewe wae rupi. Ɨma rupi kua ñee kiawe uikuaa’ä iko.

²⁶ Erëi añetete Tumpa iñee arakae umɨmbeu wae reta uikuatiaño mái yepe kua ñee. Jare añawe Tumpa ikoño mái wae jei ma kua uyekuaa kawi waerä, jare jukuärái opaete ɨwɨ pewa reta ipuere waerä wɨrowia jese jare jukuärái uyapo reta waerä jae jei wae.

²⁷ Tumpaño ko jae iyarakuaa katuete ye wae. Jae jeeño tuyembutuichaka jaeño mái pewa Jesucristo uyapo wae re. Jukuärái tuiko.