Romanos 15 - Biblia

Yaikota ko ñamɨkɨrëɨ waerä ïru hermano reta

¹ Jayawe yande ñanepɨräta ñaï Tumpa kotɨ wae reta, yandepɨawasuta ko ndeiño ipɨräta Tumpa kotɨ wae reta pe. Awɨyeta ko yaiko yandeiño yayembɨyerowia waerä.

² Erëi yande pëti pëti wae imeta ko yaiko yambɨyerowia waerä ïru hermano Cristo re wɨrowia wae reta mbaembae ikawita chupe wae rupi. Echa’ä jukuärái yayapo yawe, ñamɨmɨrätata ñanoi reta Tumpa kotɨ.

³ Ñamae mii yandeYa Cristo re. Echa’ä yepe tëi jae ko opaete wae iYa, erëi jae awe uyapo’ä mbae uyembɨyerowia waerä. Jae uyapo yandeRu Tumpa jei wae, yepe tëi täta uiporara jokua jeko pewa. Jukuärái uikuaaka yandewe Tumpa iñeerɨru pe. Echa’ä joko pe yaikuaa Cristo jei Tu pe kuärái: “Jokua ñee ikawi mbae oï ndekotɨ wae, jae nunga wi oa oï cheré.” Jukuärái uyekuatía oï.

⁴ Kua jare opaete ïru tenonde Tumpa iñeerɨru pe uyekuatía oï wae uyekuatía ko yanemboe kawi waerä. Tumpa iñee ñanemɨkɨrëɨ yandepuere waerä ñaäro yandepɨawasu rewe Tumpa jei yandewe wae.

⁵ Tumpa ko jae yanembɨpɨakatu wae, jare jae ko yanemborɨ oï ñamɨawäta waerä yembɨawái reta. Jayawe jae tuparawɨkɨ pepɨa pe piko kawi waerä pëti ramiño, kërái Jesucristo jeko uechaka yandewe rami.

⁶ Jukuärái ko pepuere pëti ñee waeño pembutuicha waerä yandeRu Tumpa jee – jae ko yandeYa Jesucristo Tu.

Judío jare judío mbae wae reta mokui rewe umbutuichata Tumpa jee

⁷ Jayawe piñemɨïru kawi päwe rewe kërái Cristo uñemɨïru kawi pe reta ndiwe wae rami, jukuärái Tumpa jee uyembutuichaka waerä pepɨte rupi.

⁸ Pemandúa kawi peï kërái etei Cristo uñemɨïru kawi oï yande reta ndiwe. Ore judiorä nduiko wae reta, tenonde Cristo ou oremborɨ waerä jare uikuaaka waerä orewe Tumpa jupi ko uyapo waerä jae jei wae. Echa’ä arakae rupi Tumpa jei oreramɨkue reta pe ombouta iko Upuruepɨ wae.

⁹ Jare pe judío mbae piko wae reta, jae nunga wi Cristo ou, pe reta wi pembutuicha waerä Tumpa jee jae peparareko ramo. Jukuärái yaikuaa, echa’ä uyekuatía oï Tumpa iñeerɨru pe kuärái: “Tambutuicha nderee judío mbae wae reta ipɨte rupi. Tambutuicha nderee himno reta akäta wae rupi.”

¹⁰ Jare uyekuatía oï wi kuärái: “Judío mbae wae reta tuyerowia wi judío reta ndiwe.”

¹¹ Jare uyekuatía oï wi kuärái: “Opaete judío mbae wae reta tumbutuicha yandeYa jee. Tumbutuicha jae jee opaete ɨwɨ pewa reta.”

¹² Jare uyekuatía oï wi kërái Isaías arakaete jei kuärái: “Outa oï pëti wae Isaí iñemoñaa pewa. Jae ikota judío mbae wae reta imburuwicha wasurä. Jare jese ko judío mbae wae reta wɨrowia katuta ñonoï.” Jukuärái uyekuatía oï.

¹³ Tumpa ko jae umee yandewe yerowia wae, echa’ä yaikuaa kawiete jae uyapota opaetei mbaembae jae jei uyapota oï yandewe wae. Jayawe jekuaeño jae tumee pewe yerowia jare tuyapo pepɨakatu waerä perowia jese wae rupi. Jukuärái yawe, jekuaeño peärota perowia katu rewe Espíritu Santo imbaepuere rupi.

Tumpa omondo Pablo umɨmbeu waerä judío mbae wae reta pe

¹⁴ Jayawe hermano mii reta, aikuaa aï pe pepɨakawiete ko jare pikuaa kawi peï jeta kua mbaembae rewa. Jare aikuaa aï wi pe reta pepuere piyembɨarakuaa kawi.

¹⁵ Erëitu aipota pumɨmandúa mii kua mbaembae re, jare añomi’ä aï pewi mbae awe aikuatía wae rupi. Echa’ä kua ko jae mbarawɨkɨ Tumpa umee chewe wae. Jae ipɨakawi rupi

¹⁶ chembou amɨmbeu waerä judío mbae wae reta pe ñee ikawi wae Jesucristo rewa. Kua ñee Tumpa wi etei ko ou. Jare jokua ñee re wɨrowia wae reta, jae reta ko pëti mbae ikawi wae che amee aï Tumpa pe wae rami – pëti mbae Espíritu Santo oñono tee Tumpa pewarä wae, jare Tumpa umae kawi oï jese.

¹⁷ Jáeramo che ayerowia aï kua mbarawɨkɨ ayapo aï Tumpa pewarä wae re jare mbaembae Jesucristo uyapo oï che rupi wae re.

¹⁸ Erëi che amɨmbeuta’ä aï pewe cheiño mbae ayapo wae re – jaeño ko Cristo uyapo mbaembae che rupi wae re. Che amɨmbeu wae rupi jare mbaembae ayapo wae rupi Cristo uparawɨkɨ ma jeta judío mbae wae reta ipɨa pe jae reta yureko waerä Tumpa jei wae rupi.

¹⁹ Jare jokuaerä wi ko Espíritu Santo umee chewe mbaepuere ayapo waerä mbaembae kiawe ipuere’ä uyapo wae. Jayawe jukuärái opa ma amɨmbeu araa araa chupe reta ñee ikawi wae Cristo rewa opaete kerupi Jerusalén wiwe ɨwɨ Ilírico pe rewa.

²⁰ Jare jukuärái ayapo ma jokua chekɨrëɨño mái ayapo aiko wae – kua ko jae amɨmbeu ñee ikawi wae kerupi mbaetɨ etei uikuaa reta Cristo rewa wae rupi. Echa’ä aipota’ä aparawɨkɨ kiape ïru wae uyapo ma mbarawɨkɨ Tumpa pewarä wae pe.

²¹ Erëi chekɨrëɨ ayapo Tumpa iñeerɨru pe jei wae rupi, echa’ä uyekuatía oï kuärái: “Jokua ndeiño uikuaa Cristo rewa wae reta uikuaata ko. Jokua ndeiño uyandu wae reta uyanduta jare uikuaa kawita ko.” Jukuärái uyekuatía iko arakae wiwe.

Pablo ikɨrëɨ oo tëta wasu Roma pe

²² Jáeramo kua cheparawɨkɨ jeko pewa chepuere’ä ma a apou waerä pepɨ.

²³ Añetete jeta año ma chekɨrëɨete tëi a apou waerä pepɨ, erëi chepuere’ä a. Erëi añawe kua rupi mbaetɨ ma kiape awe uyandu mbae reta Cristo rewa wae.

²⁴ Jáeramo añawe chepɨayemɨngeta ko a waerä ɨwɨ España kotɨ, joko pe amɨmbeu waerä chupe reta wi Cristo rewa. Jare jokotɨ asa aï rambuewe, aipota apɨta pepɨ Roma pe mbowɨ semana pewa pe reta ndiwe. Jare mbowɨ semana ma aï pe reta ndiwe yawe, aramoi pe reta pepuereta chemborɨ asa a waerä ɨwɨ España kotɨ.

²⁵ Erëi ndei a apou pepɨ mbowe, ata aï Jerusalén pe rani amborɨ waerä joko pewa judío Cristo re wɨrowia wae reta.

²⁶ Echa’ä jeta jae reta ikuasɨ ñonoï. Jare hermano ɨwɨ Macedonia pewa reta jare Acaya pewa reta, yepe tëi judío mbae wae reta ko, erëi uipota omborɨ reta. Jáeramo jae reta umbatɨ ma korepoti jare chokui reta araa waerä chupe reta Jerusalén pe.

²⁷ Jae reta uecha kua ikawi uyapo reta waerä. Jare añetete ikawi ko jukuärái uyapo reta waerä, echa’ä jae reta ipía wae reta rami ko judío reta pe. Echa’ä judío reta rupi ko ou ma judío mbae wae reta pe mbaembae ikawiete wae Tumpa pewa. Jáeramo ikawi ko jae reta umɨñatima waerä judío reta pe yemborɨ kua ɨwɨ pewa pɨpe.

²⁸ Jayawe araata rani Jerusalén pe kua yemborɨ mii. Jare joko wi ramo ata apou aï pepɨ kuri España kotɨ a aï rambuewe.

²⁹ Jare aikuaa che a pepɨ yawe, yayekou päweta mbaembae ikawi wae Cristo uyapo yandewe wae re.

³⁰ Hermano mii reta, yande pëti ramiño ñaï yandeYa Jesucristo re ramo, jare Espíritu Santo rupi yayerau päwe rewe ramo, che pumɨñera piyerure waerä cheré täta rupi Tumpa pe che ndiwe.

³¹ Ɨwɨ Judea pe ma aï rambuewe, peka mii Tumpa pe cheré jae cherepɨ waerä Cristo re wɨrowia mbae wae reta wi. Piyerure mii wi hermano reta Jerusalén pewa re, jae reta umbɨresiwe kawi waerä kua yemborɨ mii araa aï chupe reta wae.

³² Jukuärái yawe, ata pepɨ kuri ayerowia rewe Tumpa jei ikawi yawe, jare aputuu kawita aï pepɨ kuri.

³³ Jayawe Tumpa yanembɨpɨakatu wae toï opaete pe reta ndiwe. Jukuärái tuiko.