Romanos 14 - Biblia

Mbaembae Tumpa iñeerɨru pe uyekuaa’ä oï wae rewa

¹ Añawe aipota pumbɨarakuaa ye ambɨe re. Ime yawe kía pepɨte rupi ndeiño ipɨräta Tumpa kotɨ wae, piñemɨïru kawi jae ndiwe. Jare awɨye piyeaka jae ndiwe ipotawe mbaembae Tumpa iñeerɨru pe mbaetɨ oï wae re.

² Yambɨjaanga. Pe pikuaa kawi peï amokue wae reta wɨrowia ipuere jou ipotawe tembiu ipɨawiwe rewe Tumpa jowai. Erëi ïru wae reta ndarau jou mbaemɨmba soo, echa’ä ndeiño ipɨräta ñonoï Tumpa kotɨ. Ndeiño uikuaa kawi reta Tumpa yanembɨjeko’ä mbaembae yau wae re.

³ Jayawe jokua ipotawe mbae jou wae, awɨye turɨ̈ro jokua soo jou mbae wae. Jare jokua soo jou mbae wae, awɨye tiñera jokua ipotawe mbaembae jou wae re. Echa’ä jae wi ko Tumpa pewarä jare Tumpa pe uyeyokui oï wi.

⁴ Jare ¿kía pa ko yande ñaniñera waerä ïru wae pe uyeyokui wae re? Jaeño uyeyokui wae iya ipuere jei chupe ikawi’ä uyapo oï wae. Jare añetete Tumpa omborɨta oï opaete chupe uyeyokui wae reta uyapo waerä jupi wae jae jowai.

⁵ Ïru yembɨjaanga. Amokue wae Cristo re wɨrowia wae reta oñono tee iyupe pëti ara ikawiete ye ïru ara reta wi Tumpa pewarä. Jare ïru wae reta jei opaetei ara reta oyowakeño ko Tumpa pewarä. Erëi pëti pëti wae tuikuaa kawi iyupe maera ra jukuärái wɨrowia ñonoï.

⁶ Jokua oñono tee ñonoï ara reta wae, uyapo ko ñonoï umbutuicha waerä yandeYa jee jokua ara etei. Jae ramiño wi jokua uikuaa soo jou wae reta, jae reta wi ko wɨrowia uyapo ñonoï yandeYa umbɨyerowia waerä jare umeeñoi yasurupái Tumpa pe jembiu re. Jukuärái wi jokua soo jou mbae wae reta, jae nunga wi wɨrowia ko uyapo ñonoï yandeYa umbɨyerowia waerä jare umee wi yasurupái Tumpa pe jembiu re. Mokui rewe uyapo ñonoï ikawi wae Tumpa jowai.

⁷ Ikawi yaikuaa kawi waerä kua: Pëti awe yande reta yaiko’ä ko yandeyupe waeräño. Jare ndarau etei yandepuere ñamano yandeYa jei’ä yawe.

⁸ Yande ñaï yanderekowe pe rambuewe, imeta ko yaiko yambɨyerowia waerä yandeYa. Jae nunga wi ñamano yawe, ñamanota yandeYa jei ramo. Jáeramo yanderekowe pe ñaï yawe jare ñamano yawe, oyowakeño ko ñaï yandeYa pewarä.

⁹ Jokuaerä ko Cristo umano yanderé jare ikowe ye ou umanokue wae reta ipɨte wi. Jare añawe jae ko opaete tekowe onoi wae reta iYa, jare jae nunga wi jae ko opaete umanokue wae reta iYa wi.

¹⁰ Jáeramo, ¿kía pa ko yande ñaniñera waerä ïru hermano re mbae uyapo wae re? Jare ¿kía pa ko yande ñarɨ̈ro waerä ïru hermano mbae uyapo’ä wae re? Echa’ä pëti ara yande pëti pëti wae yayemboɨta ñaï Tumpa jowai jae jei waerä yandereko re.

¹¹ Jukuärái jei yandewe Tumpa iñeerɨru pe, echa’ä joko pe uyekuatía oï kuärái: “YandeYa jei: ‘Che ko jae Tumpa aikoño mái wae. Jare che etei tae, pëti ara opaete wae ñonoïta ko itawa re uipɨu rewe cherowai, jare jeita reta chewe: ‘Nde yepe jae Tumpa añetete wae,’ jeita reta.’ Jukuärái jei Tumpa.”

¹² Jayawe pëti pëti wae yayemboɨta ñaï Tumpa jowai yamɨmbeu waerä mbaembae yayapo wae re.

¹³ Jáeramo awɨye ma ñaniñera yandiyé. Erëi ikawiete ko yayandareko kawi mii waerä yandiyé awɨye waerä ïru hermano opia Tumpa jape wi yandereko pewa.

¹⁴ Che pëtiño aï yandeYa Jesucristo re ramo, aikuaa kawi aï mbaetɨ ko pëti awe mbae yau wae ipuere yandapo ikɨa Tumpa kotɨ. Erëi kía wɨrowia yawe ime amokue tembiu yandapo ikɨa Tumpa kotɨ wae, jayawe jae awɨye tou.

¹⁵ Jare yande reta, awɨyeta ko yau jokua nunga tembiu jae jowake. Echa’ä yepe tëi chupe waerä uyawɨ oï Tumpa kotɨ jae jou yawe jokua nunga tembiu, erëi aramoi jae uipotata jou wi yanderecha yau ñaï yawe. Jare jae jou yawe jokua tembiu, ipɨatɨtɨta oï kuri jokua re Tumpa jowai. Jáeramo jukuärái yayapo yawe, yaiparareko’ä ko ñaï yandehermano. Jese ko Cristo umano. Jáeramo awɨye mbaembae yau wae rupi ñarükumewa yandehermano Tumpa kotɨ.

¹⁶ Yanemaerä aramoi ime amokue mbaembae yandepuere yayapo yandepɨawiwe rewe Tumpa jowai. Erëi ime yawe kía kachi uyemɨngeta jokua mbaembae re wae, jayawe awɨye yayapo.

¹⁷ Echa’ä ñanoi Tumpa yanemburuwicha wasurä yawe, jayawe mbae’ä ko mbaembae yau wae. Erëi ikawi ko yaiko waerä jupi rupi yandepɨakatu rewe jare yerowia rewe ïru wae reta ndiwe. Jare Espíritu Santo imbaepuere rupi yandepuere yaiko jukuärái.

¹⁸ Jare jukuärái yayeyokui ñaï Cristo pe yawe, jayawe yambɨyerowiata ko ñaï Tumpa, jare ïru wae reta umae kawita yanderé.

¹⁹ Jáeramo yayapo kawi mii ñañemɨmɨräta päwe waerä Tumpa re jare yaiko kawi waerä yandepɨakatu rewe.

²⁰ Awɨye ñarükumewa Tumpa iparawɨkɨ yandepɨte rupi oï wae mbae yau wae rupi. Añetete ko, Tumpa jowai yandepuere yau opaete mbaembae. Erëi ïru wae aramoi jou yawe mbae yandereko pewa jae wɨrowia ikawi’ä ko jou waerä wae, jokua re ko ipuere jae opia Tumpa jape wi. Jáeramo jokua jeko pewa ikawi’ä ko yau waerä jokua nunga tembiu jae jowake.

²¹ Jae ipuere opia Tumpa jape wi yawe soo yau jeko pewa ani aramoi vino yau jeko pewa, jayawe ikawi’ä ko yau waerä soo jare vino. Jae ramiño wi awɨyeta ko yayapo ipotawe mbae jae jowake chupe waerä kachi wae ko, awɨye waerä jae opia Tumpa jape wi.

²² Yepe tëi aramoi yarowia yandepuere yayapo jokua mbaembae Tumpa jowai yandereko mbae rewe, erëi awɨyeta ko yayapo. Jayawe Tumpaño tuikuaa jokua yarowia wae rewa. Awɨye awe yayemɨngeta ambɨe ndiwe jokua rewa. Yayerowiaño jayawe jokua mbaembae re yandepuere yayapo Tumpa jowai yandepɨawiwe rewe wae.

²³ Erëi ime yawe kía jou jokua tembiu jae wɨrowia awɨyeta tëi ko jou wae, jaei uyembɨjekota oï jokua re, echa’ä mbaetɨ uyapo oï jae wɨrowia wae rupi. Jare ime yawe mbae yandepuere’ä yayapo Tumpa jowai yarowia kawi rewe wae, erëi yayapo yawe, yayawɨ ma ko Tumpa kotɨ.