Romanos 13 - Biblia

Këraita ko yaiko mburuwicha reta ndiwe

¹ Jare yanemburuwicha reta, yaikuaa kawi Tumpa ko umee chupe reta mbaepuere opaetei yureko waerä mburuwicharä. Jayawe mbaetɨ pëti awe mburuwicha Tumpa oñono mbae wae. Jáeramo imeta ko yande reta yayapo mburuwicha reta jei wae rupi.

² Erëi ime yawe kía ombowaicho mburuwicha wae, jae ko Tumpa kotɨ etei uyembowaicho oï wi. Echa’ä Tumpa etei ko oñono mburuwicharä. Jáeramo ime yawe kía ombowaicho mburuwicha wae, Tumpa umaeñota oï mburuwicha re uiporaraka chupe waerä.

³ Añetete ko, jaeño mbae ikawi mbae wae uyapo wae reta ukɨye mburuwicha reta wi. Mbae ikawi wae uyapo wae reta ndarau ukɨye chuwi reta. Jayawe piyapo mii ikawi wae. Jare jukuärái piyapo yawe, ndarau pekɨye mburuwicha reta wi, jare jae reta uyemɨngeta kawita oï peré.

⁴ Tumpa jowai, mburuwicha reta uyeyokui ñonoï chupe ikawi waerä pewe. Erëi pe reta piyapo yawe mbae ikawi mbae wae, jupi ko pekɨye waerä chuwi reta, echa’ä jae reta uiporarakata oï pewe. Jokuaerä ko Tumpa umee chupe reta mbaepuere, uiporaraka waerä mbae ikawi mbae wae uyapo wae reta pe.

⁵ Jáeramo piyapota ko mburuwicha reta jei wae rupi awɨye waerä jae reta uiporaraka pewe, jare piko waerä pepɨawiwe rewe jare pepɨa pembɨjeko mbae rewe.

⁶ Jare jokua jeko pewa wi jupi ko pembɨepɨ waerä mburuwicha reta okowara pewe wae. Echa’ä yambɨepɨ'ä yawe chupe reta, ipuereta’ä uyapo reta jokua mbarawɨkɨ Tumpa umee chupe reta wae.

⁷ Jayawe piyapo jupi wae rupi opaete mburuwicha reta pe. Pembɨepɨ jae reta okowara pewe wae, jare pipɨu chuwi reta wi.

Yayerau päwe, echa’ä koiño ma oï Cristo ou ye waerä

⁸ Pepía kía pe yawe, awɨye pemaeño ɨma tuasa pembɨepɨ ye waerä chupe. Erëi ime ñanoi pëti mbía opa mbae wae – jae ko yayerauta päwe rewe wae. Jekuaeño piyerau päwe rewe jayawe. Echa’ä kía uau japicha wae, añetete uyapo oï jupi opaete Moisés arakae uikuatía wae.

⁹ ¿Kërái ra jokua? Ime jeta mbaembae Moisés uikuatía wae. Amokue jei kuärái: “Awɨye piyapo awasa. Awɨye pepuruyuka. Awɨye pemonda. Awɨye papu pembɨjeko waerä perapicha. Awɨye pepɨa pe pipotaete rewe pemae mbaembae perapicha onoi wae re.” Jukuärái Tumpa jei Moisés pe uikuatía waerä. Jare jei chupe ïru mbaembae reta wi. Erëi opaete jokua Moisés uikuatía wae, jae ko pëti waeño. Jae ko kua: “Peau perapicha kërái pe reta etei piyerau wae rami.”

¹⁰ Jayawe yande yaau yawe yanderapicha añetete rewe, ndarau yayapo chupe mbae ikawi mbae wae. Jare jukuärái yaiko yawe, yaiko kawita Tumpa jei wae rupi.

¹¹ Pikota ko kua che pumbɨarakuaa aï wae rupi. Awɨye piko kía ike rái wae rami. Echa’ä pikuaa peï koiño ma oï ara yandewe Tumpa yanderepɨ waerä opaete mbaembae kachi wae kua ɨwɨ pewa wi. Añetete ko, yande Cristo re yarowia ramo yawe, jokua ara mbɨrɨ echa iko yandewi. Erëi añawe koiño ma oï yandewe.

¹² Köe ma yandewe rami jare ara koiño ma oï Cristo ou ye waerä. Jáeramo awɨye ma yayapo mbae ikawi mbae wae, pɨ̈tumimbi pe jeko kachi wae reta mbae uyapo wae rami. Yayapota ko ikawi waeño. Jare kërái sɨndaro reta oñono iyé jembiporu ñeräro pewa köe ma yawe, jukuärái wi yayeyapɨkatu yandepuere waerä ñamɨamɨri mbae ikawi mbae wae.

¹³ Yaiko kawita ko opaete wae jowake. Jáeramo awɨyeta ko yasawɨpo. Jare awɨyeta ko yayapo arete opa mbaembae uasata oï wae. Jare awɨyeta ko yayapo awasa. Awɨye yayeaka yande yepái. Jare awɨye wi ñañemɨro yandeyupe.

¹⁴ Yepe tëi amo pe ime ñanoi kɨrëɨ mbae kachi yayapo waerä, erëi awɨye yayemɨngeta yandepɨa pe jese kërái yayapo waerä. Pëti pëti wae yaipɨsɨ yandeyupe yandeYa Jesucristo jeko.