Romanos 11 - Biblia

Tumpa mbaetɨ wɨrɨ̈ro opaete Israel iñemoñaa reta

¹ Jayawe, ¿mbae pa uipota jei yandewe kua? Israel iñemoñaa reta ko jae Tumpa uiparawo wae reta. Erëi ¿Tumpa opa ra wɨrɨ̈ro reta añawe? ¡Mbaetɨ etei! Echa’ä che ko jae wi Israel pewa jare Benjamín iñemoñaa pewa. Abraham ko jae cheyɨpɨ wi. Jare Tumpa mbaetɨ chererɨ̈ro che.

² Jáeramo Tumpa mbaetɨ orererɨ̈ro opaete ore judiorä nduiko wae reta. Amokue ore reta, iyɨpɨ wiwe Tumpa orekuaaño mái jare oreparawo ore nduiko waerä jae imaerä. Yanemandúa kawi ñaï wi Elías rewa. Tumpa iñeerɨru pe uikuaaka yandewe kërái arakaete Elías iyengeta jëtáɨwa Israel iñemoñaa reta kotɨ Tumpa jowai kuärái:

³ “CheYa, uyuka reta ma niñee umɨmbeu wae reta, jare opa ma urukachi reta kiape kiape nderee uyembutuichakase wae jenda reta. Añawe cheño pe etei ma aï arowia nderé wae, jare añawe che awe ma uipota cheyuka ñonoï reta,” jei Elías Tumpa pe.

⁴ Erëi ¿mbae ra Tumpa jei chupe? Jei chupe: “Mbaetɨ neño pe etei neï nderowia cheré wae. Echa’ä imeño ïru 7.000 kuimbae reta uñeñono’ä ñonoï itawa re tumparaanga Baal jee wae jowai umbɨadora reta waerä jese. Jae reta wi ko añono tee ma chemaerä.” Jukuärái Tumpa arakae jei Elías pe.

⁵ Jare jukuärái wi añawe rupi ime amokue ore judío reta nduiko wae ndorowia kawi noï Tumpa re. Jare Tumpa oreparawo ma ipɨakawi rupi.

⁶ Mbaetɨ ko oreparawo mbae ikawi wae nduyapo wae rupi. Echa’ä jae oreparawo yawe mbae nduyapo wae rupi, jayawe mbaetɨta tëi ko uyekuaa ipɨakawi oreparawo wae rupi.

Tumpa umbɨpɨatäta Judío Cristo re wɨrowia mbae wae reta

⁷ Jayawe ¿mbae pa yaecha ñaï kua pe? Yepe tëi opaete seri judío reta uipota Tumpa umae waerä jese reta jeko mbae wae rami, erëi jukuärai’ä uyeyapo chupe reta. Amokueño uwäe chupe jokua mbae ikawi wae – jae ko ore iyɨpɨ wiwe Tumpa oreparawo wae reta. Erëi jokua ïru judío reta, opa Tumpa umbɨpɨatäta reta.

⁸ Uyekuatía oï Tumpa iñeerɨru pe jese reta kuärái: “Tumpa uyapo chupe reta awɨye waerä iyarakuaa reta. Jae uyapo reta jesa mbae wae rami jare iyapɨsa mbae wae rami, awɨye waerä jae reta uikuaa kawi Tumpa rewa. Jare jekuaeño añawe rupi jukuärái jae reta ñonoï.”

⁹ Jae ramiño wi mburuwicha wasu David arakae uikuatía kuärái jae reta rewa: “Jokua mbaembae jae reta uyerowia jese wae, tuyeyapo chupe reta yembɨawái. Tuiporara reta mbaembae kachi uyapo reta wae re.

¹⁰ Tuiko jae reta jesa mbae wae rami, awɨye waerä iyarakuaa reta. Tupɨta pione retarä jaeño mái pewa.” Jukuärái David uikuatía judío reta re wɨrowia mbae Cristo re wae.

Judío reta uñatima yeta ñonoï yandeYa kotɨ

¹¹ Jayawe judío reta opaete seri ma opia Tumpa wi, echa’ä jae reta wɨrɨ̈ro Jesús ramo. Jukuärái jae reta tuicha teko onoi Tumpa kotɨ. Erëi ¿kua uipota ra jei jae reta upɨtata jukuäraiño jaeño mái pewa? ¡Mbaetɨ etei! Erëi añawe rupi judío reta wɨrɨ̈ro Jesucristo ramo, Tumpa umee oï judío mbae wae reta pe ipuere waerä jae reta onoi tekowe opa mbae wae. Jare jukuärái Tumpa uyapo judío reta uñemɨro waerä.

¹² Añawe judío reta opia ma Tumpa wi, erëitu pëti ara jae reta uyerowa yeta ñonoï Tumpa kotɨ. Jare jokua ara ikawieteta oï opaete pewarä. Añawe judío mbae wae reta uyekou ñonoï judío reta opia Tumpa wi ramo. Erëi ¿mbowɨ ye ye ra ko jae reta uyekouta ñonoï kuri judío reta uyerowa ye yawe Tumpa kotɨ?

¹³ Erëi añawe aipota ayemɨngeta pewe pe judío mbae piko wae reta pe. Tumpa chokui amɨmbeu waerä pewe ñee ikawi wae Cristo rewa, jare jokua re cheratangätu aï.

¹⁴ Echa’ä judío reta uecha yawe kërái pe reta piñemɨïru peï Tumpa ndiwe wae, aramoi amokue jae reta ikɨrëɨta wi uyerowa Jesucristo kotɨ jae uepɨ reta waerä.

¹⁵ Jukuärái aipota, echa’ä aikuaa aï jokua ara judío reta wɨrowia yawe Jesucristo re, ikawiete yeta ko yandewe. Añawe rupi judío reta wɨrɨ̈ro ma Jesús ramo, jeta pe judío mbae piko wae reta piyeapɨkatu ma Tumpa ndiwe. Erëi ¿mbowɨ ye ye ra ko piyerowiata peï kuri judío reta uñatima ye yawe Tumpa kotɨ? Añawe judío reta umano oï wae echa rami ko. Erëi jokua ara jae reta wɨrowia yawe, yurekota umanokue wae reta ikowe ye wae rami.

¹⁶ Yambɨjaanga yaikuaa waerä këraita ra ko oï judío reta wae. Amo wese pe ore judío nduiko wae reta mbɨyape nduyapo yawe, nduraa numee Tumpa pewarä jokua masa wi peraso mii. Jare jukuärái nduyapo yawe, Tumpa umae kawi jokua masa numee chupe wae re jare jae nunga wi jokua masa jembɨre wae re. Jukuärái wi ko judío reta, echa’ä judío tamɨkue reta Tumpa oñono tee jae imaerä. Jáeramo iñemoñaa reta yurekota wi jae imaerä. Jukuärái wi pëti temitɨ japo reta ikawi oï yawe, jäka reta ikawi oï wi.

Judío mbae wae reta awɨyeta ko uyembutuicha judío reta kotɨ

¹⁷ Erëi añawe pe judío mbae piko wae reta, piyekou peï Tumpa ipɨakawi re, echa’ä Tumpa peñono jeta judío reta jendakue pe. Kua yandepuere yambɨjaanga pëti temitɨ ikawi wae olivo jee wae re. Pe reta pikuaa yandepuere yayasɨa amokue temitɨ jäka reta, jare jokua jendakue pe yandepuere yamboya ye amokue olivo ñana rupiwa jäka reta. Joko wiwe jokua temitɨ ikawi wae iyaɨsɨ umbɨpɨ uasa ye jokua ɨwɨra jäka uyemboya wae reta rupi jare umee ye chupe reta tekowe. Jukuärái wi pe judío mbae piko wae reta jokua ɨwɨra jäka ambɨe wae reta rami ko. Echa’ä pe reta Abraham iñemoñaa pewa’ä ko. Jare jokua jeko pewa piyekou’äse mbaembae ikawi wae Tumpa uyapo judío reta pewarä wae re. Erëitu añawe opaete seri judío reta wɨrowia’ä Jesucristo re ramo, pe reta piyekou peï jokua mbaembae re jae reta ipepɨka pe.

¹⁸ Erëi awɨye piyembutuicha judío reta wi. Pemandúa kawi peï temitɨ jäka reta yureko japo re. Jare jukuärái wi añawe pe reta piyekou peï judío reta rupi. Ore judío nduiko wae reta mbaetɨ nduyekou noï pe judío mbae piko wae reta rupi.

¹⁹ Erëi aramoi amokue pepɨte pe ñonoï wae reta jeita kuärái: “Erëi Tumpa omombo jeta judío reta temitɨ jäka yayasɨa yamombo wae rami, yande judío mbae yaiko wae reta ñaneñono waerä jae reta jendakue pe.” Jukuärái aramoi jeita reta.

²⁰ Añetete tëi ko jokua. Erëi Tumpa wɨrɨ̈ro jokua judío reta jae reta wɨrowia’ä Jesucristo re ramo. Jare jae peñono ma ko jae reta jendakue pe perowia ma jese ramo. Erëi piyandareko kawi mii piyé pipɨu rewe. Awɨye piyembutuicha chuwi reta.

²¹ Echa’ä yepe tëi jae reta ko jae jokua temitɨ jäka rami etei, erëi Tumpa wɨrɨ̈ro ma jae reta. Jae ramiño wi pe judío mbae piko wae reta, Tumpa ipuere pererɨ̈ro wi perowia’ä jese yawe.

²² Añawe aipota pe reta pepɨa pe piyemɨngeta waerä mokui mbae re. Pëti ko jae Tumpa uiporaraka jokua judío reta pe jae reta wɨrɨ̈ro Jesucristo ramo. Erëi ïru wae ko jae kua: Jae uechaka oï ipɨakawi pe judío mbae piko wae reta pe. Erëitu pe reta mbaetɨ yawe jekuaeño piyeko jae ipɨakawi re, pikota ɨwɨra jäka kía uyasɨa omombo wae rami.

²³ Jare judío reta wɨrowia Jesucristo re yawe, Tumpa oñono yeta oï reta jenda jenda pei tenonde wɨreko wae rami, kía ɨwɨra jäka uyeyasɨa wae jendakue pei oñono ye wae rami. Tumpa uyapo yeta oï reta yureko waerä jae imaerä. Jare Tumpa ipuerete uyapo jukuärái.

²⁴ Echa’ä pe reta yepe tëi ko peï pëti ɨwɨra ñana rupiwa jäka reta rami, erëi Tumpa pewarä yawai’ä etei ko peñono waerä judío reta jendakue pe. Erëi judío reta ko jae pëti temitɨ ikawi wae jäka rami etei. Jáeramo yawai’ä etei ko Tumpa pe oñono reta ye waerä jae reta jendakue pei, jae reta uyerowa ye yawe Cristo kotɨ.

Taɨkuete rupi Tumpa uepɨta oï opaete Israel iñemoñaa reta

²⁵ Jáeramo hermano mii reta, ime mbae ndei etei uyekuaa oï wae aipota pe judío mbae piko wae reta pikuaa kawi waerä. Jare kua che aipota pikuaa waerä awɨye waerä piyembɨkate. Yepe tëi añawe jeta judío reta ipɨatäta ñonoï Jesucristo kotɨ, erëi ndarau jukuäraiño upɨta reta. Tumpa uikuaa opaete judío mbae wae wɨrowiata oï jese wae reta, jare opa ma jae uipapa reta. Jare opaete jae reta wɨrowia ma yawe,

²⁶ jayawe ramo opaete Israel pewa reta wi wɨrowiata, jare Tumpa uepɨta onoi reta. Jukuärái wi uikuaaka yandewe Tumpa iñeerɨru pe, echa’ä joko pe uyekuatía oï kuärái: “Upuruepɨ wae outa oï Sion wi. Jare jae umbɨyerowa yeta Israel iñemoñaa reta mbae kachi uyapo reta wae wi.

²⁷ Tumpa jei: ‘Kua ko jae yemɨngeta ayapota aï jae reta ndiwe wae: che opata ambái aï chuwi reta mbaembae uyawɨ reta chekotɨ wae,’ jei Tumpa.” Jukuärái uyekuatía oï.

²⁸ Añetete, añawe judío reta opaete seri Tumpa jowaicho reta ko, echa’ä wɨrowia’ä reta ñee ikawi wae re. Jare jokua jaekawi oï pe judío mbae piko wae reta pewarä. Erëi jesewe Tumpa uauñoi judío reta, echa’ä imandúa kërái uiparawo arakae judío iyɨpɨ reta jae imaerä jare jei chupe reta uyapota iko mbaembae ikawi wae iñemoñaa reta pe.

²⁹ Jare Tumpa uiparawo yawe kía jae imaerä, jaeño mái ikota jae imaerä. Jare Tumpa umee yawe mbae ikawi wae kía reta pe, ndarau etei upɨ̈ro ye chuwi.

³⁰ Pe judío mbae piko wae reta tenonde yawe piyapo’äse Tumpa jei wae jare pikuaa’äse Tumpa ipɨakawi. Erëitu añawe judío reta opaete seri wɨrowia’ä Jesucristo re ramo, Tumpa uechaka ma pewe ipɨakawi.

³¹ Jukuärái wi ko judío reta. Yepe tëi añawe jae reta opaete seri uyapo’ä Tumpa jei wae, erëi Tumpa uechaka yeta chupe reta ipɨakawi jae uechaka pewe wae rami.

³² Jukuärái ko opaete yande judío jare judío mbae yaiko wae reta yayapo’ä Tumpa jei wae. Erëi Tumpa umaeño yanderé, jukuärái ipuere waerä uechaka ipɨakawi tuichaete wae opaete wae pe.

¡Tuyembutuichaka Tumpa jee mbaembae uyapo wae re!

³³ ¡Tuichaete ye ko Tumpa iyarakuaa! ¡Mbaetɨ mbae awe jae uikuaa mbae wae! ¿Kía ra ipuere uikuaa Tumpa ipɨayemɨngeta jare maera uyapo jokua uyapo wae?

³⁴ Kërái Tumpa iñeerɨru pe jei oï wae rami: “¿Ime ra kía uikuaa yandeYa ipɨayemɨngeta wae? ¿Ime ra kía ipuere umbɨarakuaa yandeYa wae?”

³⁵ “¿Ime ra kía tenonde umee yandeYa pe wae jare yandeYa imeta ko umɨñatima ye chupe wae? ¡Mbaetɨ etei kiawe!”

³⁶ Echa’ä yandeYa ko jae opaete mbaembae iYa. Jae ipo wiño ko ou opaete mbaembae, jare jae rupi opaete mbaembae ñonoï. Jare opaete mbaembae ime oï wae reta jae uyapo jae imaerä. ¡Tuyembutuichaka yandeYa jee jaeño mái pewa! Jukuärái tuiko.