Romanos 10 - Biblia

¹ Hermano mii reta, aipota tëi ko Israel iñemoñaa reta opaete onoi waerä tekowe opa mbae wae. Jáeramo jekuaeño täta rupi ayerure aï jese reta Tumpa pe.

² Chepuere chemiäri jese reta kërái jatangätuete ñonoï reta uyeyokui waerä tëi Tumpa pe. Erëi añetete jae reta uikuaa kawi’ä oï kërái uyeyokui kawi waerä chupe.

³ Echa’ä yepe tëi Tumpa uikuaaka ma yandewe kërái rupi umae yanderé yandereko mbae wae rami, erëi jae reta uikuaa’ä jokua jare uipota’äwe wi uikuaa reta. Jaeño uipota tëi uyembujupika reta Tumpa kotɨ jae reta jei wae rupiño – jae ko Moisés arakae uikuatía wae re yureko wae rupi.

⁴ Erëi Cristo opa ma jupi uyapo yandepepɨka pe opaete Moisés uikuatía wae rupi. Jare jukuärái añawe Tumpa umae opaete kía Cristo re wɨrowia wae reta re jeko mbae wae rami.

Tekowe opa mbae wae Tumpa umee wae yawái mbae ko yaikuaa waerä

⁵ Jokua uipota tëi uyembujupika Moisés uikuatía wae rupi wae reta, jokua reta rewa Moisés arakae uikuatía kuärái: “Kía uipota iko kua mbaembae reta rupi wae, jokua reño ko ikota. Jare imeta ko uyapo jupi rupi kawi uyekou waerä tekowe ipɨau wae re.” Jukuärái uikuatía Moisés arakaete.

^6-7 Erëi Cristo re wɨrowia wae reta, Tumpa umae ma jese reta jeko mbae wae rami jae reta wɨrowia jese ramo. Jare jae reta ipuere jei: “Awɨye yayemɨngeta yandepɨa pe kuärái: ‘Kiawe ipuere’ä uikuaa Tumpa uipota wae. Yaikuaa waerä mbae Tumpa uipota wae, imeta tëi ko kía oo ueka Cristo ara pe ani umanokue wae reta ñonoï wae pe. Jare uwäe ma chupe yawe, imeta ko ueru ye imiäri waerä yandewe.’ Awɨyeta ko yayemɨngeta yandepɨa pe jukuärái, echa’ä Cristo ou ma ara wi jare jae ikowe ye ma ou umanokue wae reta ipɨte wi.”

⁸ Jare Tumpa jei iñee rewa kuärái: “Chiñee mbɨrɨ'ä oï pewi. Piñee pe etei oï jare pepɨa pe oï wi.” Jukuärái jei. Kua ñee re imeta ko yarowia, jare jokua ñee etei ko numɨmbeu noï pewe.

⁹ Kua ñee uikuaaka yandewe kuärái: yande towake etei yae yawe Jesús ko jae yandeYa wae, jare yarowia yawe yandepɨa rewe Jesús umano jare Tumpa umbɨjekowe ye ueru umanokue wae reta ipɨte wi, jayawe Tumpa yanderepɨta jare umeeta yandewe tekowe opa mbae wae.

¹⁰ Echa’ä yandepɨa rewe yarowia jukuärái yawe, Tumpa umaeta yanderé yandereko mbae wae rami. Jare towake etei yae yawe Jesús ko jae yandeYa wae, jokoropi ko Tumpa yanderepɨ.

¹¹ Kua re yandepuere yaikuaa añetete ko, echa’ä uyekuatía oï Tumpa iñeerɨru pe kuärái: “Opaetei kía kía wɨrowia reta jese wae ndarau imara, echa’ä Tumpa ndarau etei uyawɨ oï chupe reta ramo,” jukuärái jei.

¹² Jare jokua wɨrowia jese wae reta, jae reta ko judío yawe ani judío mbae wae yawe, jokua mbae’ä ko Tumpa pewarä. Echa’ä yandeYa ko jae opaete wae iYa, jare jae uyapota ikawiete wae opaete chupe uyerure wae reta pe.

¹³ Jukuärái uikuaaka yandewe Tumpa iñeerɨru pe jei yawe kuärái: “Opaetei kía reta uyerure yandeYa pe uepɨ reta waerä wae, yandeYa uepɨta reta,” jei.

Israel iñemoñaa reta uyandu tëi ñee ikawi wae

¹⁴ Erëi ¿këraita ra ipuere uyerure reta yandeYa pe uepɨ reta waerä, mbaetɨ wɨrowia reta jese yawe? Jare ¿këraita ra ipuere wɨrowia reta, mbaetɨi uyandu reta jesewa yawe? Jare ¿këraita ra ipuere uyandu reta jesewa, mbaetɨ yawe kía umɨmbeu chupe reta wae?

¹⁵ Jare ¿këraita ra kía ipuere umɨmbeu chupe reta, Tumpa omondo’ä kía yawe? Kërái Tumpa iñeerɨru pe jei oï wae rami: “Ikawiete ko kía ou umɨmbeu yawe ñee ikawi wae.”

¹⁶ Erëi yepe tëi ñee ikawi wae uyemɨmbeu oï, erëi amokueño wɨrowia ma jese. Jukuärái yaikuaa, echa’ä Isaías arakae jei Tumpa pe kuärái: “CheYa, ¿ime ra kía yepe wɨrowia oriñee re wae?” Jukuärái uikuatía arakae.

¹⁷ Erëitu yaikuaa ñaï jaeño kía uyapɨsaka ñee ikawi wae re Cristo rewa wae ipuere wɨrowia jese.

¹⁸ Erëi, ¿aramoi Israel iñemoñaa reta uyandu’ä ra ñee ikawi wae? Uyandu reta tëi ko, echa’ä Tumpa iñee pe uikuaaka yandewe kuärái: “Kua ñee uyemɨmbeu ma opaetei ɨwɨ rupi. Ɨwɨ iyapɨ rewa ko yuraa uwäe reta umɨmbeu waerä.” Jukuärái uyekuatía oï.

¹⁹ Jayawe ¿marái ramo ra Israel iñemoñaa reta opaete seri wɨrowia’ä ñee ikawi wae re? ¿Aramoi uikuaa kawi’ä ra jokua ñee uyandu reta wae? Uikuaa kawi reta tëi ko. Jáeramo Moisés rani uikuatía kërái Tumpa jei chupe reta kuärái: “Che ayapota aï mbae ikawi wae judío mbae wae reta pe, pe judío reta piko wae piñemɨro waerä. Yepe tëi pe reta pere peï chupe reta iyarakuaa mbae wae ko jae reta, erëi che aechakata aï chupe reta chepɨakawi wae jare jukuärái pombopochɨkata aï.” Jukuärái Moisés uikuatía Tumpa iñee.

²⁰ Jare joko wi Isaías umɨmbeu sɨmi judío mbae wae reta rewa kuärái: “Tumpa jei: ‘Yepe tëi chereka’ä yureko reta, erëi añawe jae reta chekuaa ñonoï. Jare jokua upɨrandu’ä cheré wae reta pe, chupe reta ko ayekuaaka ma,’ jei Tumpa.” Jukuärái uikuatía Isaías.

²¹ Erëi Isaías imiäri yawe Israel iñemoñaa reta rewa, jei kuärái: “Tumpa jei ipɨatɨtɨ rewe: ‘Ɨma rupi ma aeni tëi anoi reta uñatima ye chekotɨ waerä. Erëi jae reta jekuaeño uyembowaicho ñonoï chekotɨ, jare uipota’ä etei uyapo reta che jae wae rupi,’ jei Tumpa.” Jukuärái uikuatía Isaías arakae.