Romanos 1 - Biblia

Pablo umbɨpɨ uikuatía tupapire

¹ Che ko jae Pablo, Jesucristo pe ayeyokui wae. Tumpa chereni chemondo waerä opaete kerupi jae jee re amɨmbeu waerä ñee ikawi wae. Jokuaerä etei ko jae cheñono tee. Kua ñee ikawi wae Tumpa wi etei ko ou.

² Jare jae ko ñee Tumpa jei arakae rupi uikuaakata iko yandewe wae. Echa’ä jukuärái uikuatía Tumpa iñee arakae umɨmbeu wae reta Tumpa iñeerɨru jupi wae rupi.

³ Jare kua ñee ikawi wae uikuaaka yandewe Tumpa Taɨ rewa. Jae ou kua ɨwɨ pe uyeyapo pëti kuimbaerä, jare jae ko arakae mburuwicha wasu David jee wae iñemoñaa rupi outa iko wae.

⁴ Jare Tumpa uikuaaka yandewe kua uyeyapo kuimbaerä wae, jae ko Taɨ wae. Echa’ä Espíritu Santo rupi Tumpa umbɨjekowe ye ueru umanokue wae reta ipɨte wi imbaepuere tuichaete wae rupi. Kua Tumpa Taɨ, jae ko yandeYa Jesucristo etei.

⁵ Kua Jesucristo uyekuaaka chewe ipɨakawi rupi. Jare jukuärái Tumpa chemondo opaete ɨwɨ rupi amɨmbeu waerä opaete judío mbae wae reta pe, jae reta wi wɨrowia waerä yandeYa Jesucristo re jare jukuärái uyapo reta waerä Jesús jei wae. Jare kua mbarawɨkɨ ayapo aï Jesucristo jee uyembutuichaka waerä.

⁶ Jare amokue pe judío mbae piko wae reta wi Tumpa pereni ma piko waerä Jesucristo imaerä.

⁷ Aikuatía aï pewe kua tupapire mii opaete tëta wasu Roma pe piko wae pe, Cristo re perowia wae reta pe. Tumpa perau jare pereni piko tee waerä jae imaerä. YandeRu Tumpa jare yandeYa Jesucristo jekuaeño tipɨakawi pewe jare tuyapo pewe piko waerä pepɨakatu rewe.

Pablo uipota tëi oo opou Roma pewa reta pe

⁸ Ambɨpɨ waerä kua tupapire, aipota amee yasurupái Tumpa pe Jesucristo mbaembae uyapo yandewe wae re. Jae nunga wi amee aï yasurupái chupe peré, echa’ä jeräkua oï opaete ɨwɨ rupi perowia peï Cristo re wae.

⁹ Jare aipota pikuaa waerä wi che jekuaeño ayerure aï peré. Kua che jae aï Tumpa jowake, echa’ä chupe ko ayeyokui aï chekɨrëɨ rewe amɨmbeu aï rambuewe ñee ikawi wae Tumpa Taɨ rewa.

¹⁰ Che ayerure aï wi Tumpa pe, jae uipota yawe, uipea waerä chewe tape chepuere waerä a apou pepɨ.

¹¹ Aipota apou pepɨ, echa’ä aikuaa Espíritu Santo uipota uyapo ikawi wae pewe che rupi pepɨräta waerä Tumpa kotɨ.

¹² Jare kuaño’ä ko. Jae nunga wi aipota pe reta wi chemɨkɨrëɨ waerä. Echa’ä che wi chekɨrëɨta aecha yawe kërái pe reta perowia Cristo re. Jare jukuärái yandepuereta ñañemɨkɨrëɨ waerä päwe rewe kuri.

¹³ Erëi, hermano mii reta, aipota pikuaa kawi waerä kua: Jeta wese ma aipota tëi a apou pepɨ, erëi jekuaeño mbae chembɨawái añawe ara rewa. Aipota pomborɨ pekuakuaa kawi waerä Tumpa kotɨ kërái ïru judío mbae wae reta amborɨ rami.

¹⁴ Tumpa umee chewe mbarawɨkɨ amɨmbeu waerä iñee opaete wae pe – jae ko uyemboe wae reta jare uyemboe mbae wae reta, ñana rupi yureko wae reta jare tëta rupi yureko wae reta wi. Imeta ko amɨmbeu opaete wae pe.

¹⁵ Jáeramo aipotaete apou pepɨ tëta wasu Roma pe piko wae reta pe, chepuere waerä amɨmbeu pewe wi ñee ikawi wae.

Tumpa yanderepɨ ñee ikawi wae Cristo rewa yarowia ramo

¹⁶ Mbaetɨ etei chemara amɨmbeu waerä ñee ikawi wae Cristo rewa. Echa’ä opaete jokua ñee re wɨrowia wae reta, Tumpa uepɨta oï reta imbaepuere rupi mbaembae uyawɨ reta ikotɨ wae wi. Jare jukuärái ndarau omombo reta Tatawasurenda pe. Tenonde kua ñee ikawi wae ou judío reta pe rani, erëi añawe ou ma wi judío mbae wae reta pewarä.

¹⁷ Kua ñee ikawi ko, echa’ä uikuaaka yandewe kërái rupi Tumpa umae yanderé yandereko mbae wae rami – jae ko Cristo re yarowia wae rupi. Jare jukuäraiño mái iyɨpɨ wiwe jare jukuäraita oo oï ara taɨkuewa rewa – jaeño Cristo re yarowia wae rupi. Jukuärái yaikuaa, echa’ä Tumpa iñeerɨru pe uyekuatía oï kuärái: “Ipotawe kía wɨrowia Tumpa re wae, Tumpa umae jese jeko mbae wae rami, jare jae uyekouta oï tekowe ipɨau wae re.” Jukuärái uyekuatía oï.

Tumpa iarasɨ ɨwɨ pewa reta kotɨ

¹⁸ Erëi Tumpa ara wi uikuaaka oï kërái jae pochɨete oï wɨrowia mbae jese wae reta kotɨ jare mbae ikawi mbae wae uyapo wae reta kotɨ. Jare jupi ko jae kërái uiporaraka chupe reta waerä. Echa’ä yepe tëi jae reta uikuaa añetete wae Tumpa rewa, erëi jae reta jeko kachi rupi oyopia ñonoï jokua arakuaa.

¹⁹ Jae reta uikuaa tëi Tumpa rewa, echa’ä Tumpa etei uyekuaaka chupe reta kërái ko jae wae.

²⁰ Añetete ko, mbaetɨ kiawe ipuere uecha Tumpa. Erëi opaete mbaembae yaecha wae Tumpa ko uyapo. Jayawe ɨwɨ uyembɨpɨ wiwe, ɨwɨ pewa reta uikuaa Tumpa rewa kërái jae mbaembae uyapo wae rupi. Yandepuere yaikuaa kërái ko imbaepuere opa mbae wae jare jaeño ko Tumpa wae. Jáeramo kiawe ipuere’ä jei: “Che aikuaa’ä aiko Tumpa rewa,” jei waerä.

²¹ Jayawe yepe tëi uikuaa reta Tumpa rewa jae mbaembae uyapo wae rupi, erëi jesewe umbutuicha’ä reta jae jee. Umee’äwe reta wi yasurupái chupe opaete jae mbaembae uyapo wae re. Jaeño opa uyembojopa reta ipɨayemɨngeta rupi Tumpa wi. Jare jae reta ipɨayemɨngeta opa uñemɨpɨ̈tumimbi ramo, ipuere’ä etei uikuaa kawi reta mbae ikawi wae rewa.

²² Jae reta iyarakuaa katu wae echa umae tëi iyé. Erëi jae retái uyeyapo iyarakuaa mbae echa.

²³ Jáeramo jae reta umbutuicha’ä Tumpa ikoño mái wae jee. Jaeño umbɨadora reta kuimbaeraanga re jare kuñaraanga re, yepe tëi kuimbae jare kuña Tumpa rami’ä ko jare umanota ko. Jae nunga wi umbɨadora reta wɨraraanga reta re, jare mbaemɨmbaraanga reta re, jare ɨwɨ rupi uyewichɨ waeraanga reta re wi.

²⁴ Jáeramo Tumpa ipɨatɨtɨ rewe opa ueya reta uyapo reta waerä mbaembae kachi wae ipɨayemɨngeta jei wae rupi. Jae reta uyapo awasa opa kërái rái rupi, jare jukuärái uyapo reta iyupe mbaembae kachiete wae jete pe.

²⁵ Jae reta uikuaa tëi iko Tumpa rewa añetete wae, erëi uipota wɨrowia reta apu re. Echa’ä jokua mbaembae Tumpa etei uyapo wae, jae reta umbɨadora jese reta jare uyeyokui wi chupe reta. Yepe tëi Tumpa jee uyembutuichakata oï jaeño mái pewa, erëi jae reta mbaetɨ umbutuicha Tumpa jee.

²⁶ Jáeramo, jokua jeko pewa Tumpa ipɨatɨtɨ rewe opa ueya reta uyapo reta waerä mbaembae kachiete wae. Imeta tëi ko jae reta imara uyapo waerä jokua mbaembae. Echa’ä jeta kuña retawe umbɨpɨ uyepota jae yepái umae iyé jare uyerereko reta. Erëi Tumpa uyapo’ä kuña reta jukuärái yureko waerä tëi.

²⁷ Jae ramiño wi jeta kuimbae reta uipota’ä ma oroke jembireko. Jare umbɨpɨ uyepota reta kuimbae yepái umae iyé jare uyerereko reta wi. Yepe tëi Tumpa uyapo’ä kuimbae reta jukuärái yureko waerä, erëi uyapoñoi reta. Ñanemara rape tëi ko, erëi jae reta mbaetɨ etei imara. Jáeramo jokua jeko pewa jae reta uiporara ma ñonoï jete pe. Jare jupi ko Tumpa uiporaraka waerä chupe reta jukuärái, echa’ä jae reta uyembɨsɨrɨ mbɨrɨete ye Tumpa wi.

²⁸ Jayawe opaete wae uikuaa tëi yureko Tumpa rewa, erëi jesewe opaete seri opa umbɨsɨrɨ iyuwi jokua arakuaa. Jáeramo Tumpa ipɨatɨtɨ rewe opa ueya reta uyemɨngeta reta waerä ipɨa pe opaete mbaembae ikawi mbae wae re. Jare jokua jeko pewa jae reta añawe rewa jekuaeño uyapo opaete mbaembae ikawi mbae wae Tumpa jowai.

²⁹ Jae reta jekuaeño uyapo mbae jupi mbae wae, jare iawasapota reta. Jekuaeño uipotaete reta korepoti jae reta imaeräño. Jare uyapoñoi reta mbae ikawi mbae wae. Iñemɨrose reta. Upuruyuka reta. Iyeakase reta. Upurumbɨtawɨ reta. Jeko kachi reta. Jare indayepota reta.

³⁰ Jae nunga wi jae reta kachi uyemɨngeta japicha kotɨ. Uñamɨtäa reta Tumpa. Jeko pochɨ reta. Uyembɨkate reta. Uyemɨngeta reta uyembutuicha rewe. Ipɨa pe uyemɨngeta reta mbaembae kachi wae uyapo waerä. Uyapo’ä reta tu jare ichɨ jei wae rupi.

³¹ Iyarakuaa mbae echa reta ko. Uyapo’ä reta jae reta jei wae. Upuruau’ä etei reta. Uiparareko’ä etei japicha reta. Jukuärái ko jae reta.

³² Jare jokuaño’ä ko, echa’ä jae reta uikuaa kawi tëi ko kërái Tumpa jei: “Opaete kua mbaembae uyapo wae reta tumano.” Erëi yepe tëi uikuaa reta, jesewe mbae’ä chupe reta. Jekuaeño uyapo reta jokua mbaembae ikawi mbae wae. Jare ïru reta wi uyapo yawe mbae ikawi mbae wae, chupe reta ikawi ko. Jukuärái ko opaete wɨrɨ̈ro Tumpa wae reta.