Números 20 - Biblia

Moisés okua yawe itape re, uyapo’ä kërái Tumpa jei chupe wae

¹ Jokua año uyembɨpɨ iko yawe, Israel iñemoñaa reta yuraa uwäe yewɨ ɨwɨtini wasu Sin jee wae pe. Jayawe ɨwɨ Cades jee wae pe umbɨyemboɨ reta jëta wakapi pewa, jare joko pe upɨta reta ɨma rupi. Jare joko pe ñonoï rambuewe, umano María. Jayawe oñotɨ reta joko pe.

² Jokua ɨwɨ rupi mbaetɨ iko ɨ Israel iñemoñaa reta jou waerä. Jáeramo uyembatɨ uñeengata reta waerä Moisés jare Aarón pe.

³ Jare pochɨ rewe jei reta Moisés pe: “¡Kërái moná Tumpa oreyuka tëi wi jokua ïru ñanerëtara reta opa uyuka yawe!” jei reta.

⁴ “Ore ko jae Tumpa uiparawo wae reta, erëi nde orereru kua ɨwɨtini wasu pe, jare añawe ¡numanota noï orerɨmba reta ndiwe ɨwe pe!” jei reta.

⁵ “Ɨwɨ Egipto ikawiete ye ko kua ɨwɨ ikawi mbae wae wi. Ndarau orepuere numaetɨ kua ɨwɨ utiniete wae pe. Erëi ɨwɨ Egipto pe ime ndureko mbaewɨye reta, ɨwa ía reta, uva reta, jare granada reta ndou waerä. Erëi añawe kua pe mbaetɨ etei ɨ awe ndou waerä,” jei reta Moisés pe.

⁶ Jayawe Moisés jare Aarón usɨrɨ chuwi reta jare yuraa reta tupao uike wae jowai. Joko pe mokui rewe uñeñono reta ɨwɨ re uipɨu rewe. Aramoiño Tumpa imbaepuere jupiete wae uyekuaa chupe reta pëti tembipe uwerasɨ wae rami.

⁷ Jare Tumpa jei Moisés pe kuärái:

⁸ “Eraa nderɨkeɨ Aarón jare ndepopoka, jare piyembatɨ opaete Israel iñemoñaa reta ndiwe,” jei. “Joko wi, jae reta umae ñonoï rambuewe, ere jokua itape pe oë waerä ɨ, jare ɨ oë woita itape wi. Tuicha ɨ oëta jokua itape wi uepitɨ waerä Israel iñemoñaa reta jare jɨmba reta wi jou waerä,” jei Tumpa Moisés pe.

⁹ Jayawe Moisés uipɨsɨ wɨraa ipopoka Tumpa jowai wi kërái Tumpa jei chupe wae rami.

¹⁰ Joko wi Moisés jare Aarón umbatɨ opaete Israel iñemoñaa reta jokua itape jowai. Jare Moisés jei chupe reta pochɨ rewe: “¡Mase, pereko kachi wae reta, añawe ɨ nomoëta kua itape wasu wi!” jei chupe reta.

¹¹ Joko wi Moisés upi ipopoka jare mokui wese okua itape re ipopoka pɨpe. Jayawe ɨ oë woi itape wi, jare opaete Israel iñemoñaa reta jare jɨmba reta wi jou ɨ ipunga rewa.

¹² Erëi Tumpa pochɨ rewe jei Moisés jare Aarón pe: “Pe reta piyapo’ä che jae pewe wae chererowia katu’ä ramo, jare jukuärái pechaka’ä chembaepuere Israel iñemoñaa reta jowai. Jáeramo añawe peraata’ä Israel iñemoñaa reta jokua ɨwɨ ikawiete wae pe,” jei chupe reta.

( ) Aarón imano rewa

²² Jayawe opaete Israel iñemoñaa reta oë yuraa ɨwɨ Cades jee wae wi ɨwɨtu wasu Hor jee wae kotɨ.

²³ Joko pe, ɨwɨ Edom jee wae iyapɨ pe, Tumpa jei Moisés jare Aarón pe kuärái:

²⁴ “Aarón umanota oï,” jei. “Uiketa’ä oï jae jokua ɨwɨ ikawiete wae pe ameeta aï Israel iñemoñaa reta isambiaɨ reta pe wae. Echa’ä pe reta piyapo’ä che jae wae rupi ɨtoröro Meriba jee wae jowai piko rambuewe,” jei chupe reta.

²⁵ Tumpa jei wi Moisés pe: “Eraa Aarón jare taɨ Eleazar nde ndiwe ɨwɨtu wasu Hor jee wae iyapɨte re.

²⁶ Joko pe emboi Aarón wi jemimonde sacerdote tenondewa pewa jare emondeka Eleazar pe. Jare jawoi pewa Aarón umanota oï joko pe,” jei Tumpa Moisés pe.

²⁷ Jayawe Moisés uyapo kërái Tumpa jei chupe wae rupi. Opaete Israel iñemoñaa reta umae ñonoï rambuewe, Moisés, Aarón, jare Eleazar yuraa uyupi reta ɨwɨtu wasu Hor jee wae re.

²⁸ Joko pe Moisés omboi Aarón jemimonde sacerdote tenondewa pewa jare omondeka Eleazar pe. Jare joko pe ɨwɨtu wasu iyapɨte re Aarón umano. Joko wi Moisés jare Eleazar uweyɨ ye reta ɨwɨtu wasu wi.

²⁹ Jayawe Israel iñemoñaa reta uikuaa yawe Aarón umano ma wae, opaete tuicha ipɨatɨtɨ reta jare uapïro reta Aarón treinta ara rupi.