Números 14 - Biblia

Israel iñemoñaa reta oyowaicho Tumpa kotɨ

¹ Jokua uyandu reta yawe, opaete Israel iñemoñaa reta ipɨatɨtɨete, jare jäse uyao reta opaete jokua pɨ̈tu.

² Jare opaete Israel iñemoñaa reta iyengeta Moisés jare Aarón pe, jare jei chupe reta: “¡Ikawita tëi ko opa numano waerä ɨwɨ Egipto pe jare kua ɨwɨtini wasu rupi!” jei reta.

³ “¡Erëi añawe Tumpa yandereraata jokua ɨwɨ Canaán pe opa ñamano waerä ñeräro pe! ¡Jukuärái yanderowaicho reta upɨ̈rota yandewi yanembireko reta jare yandesambiaɨ reta ipione retarä! ¡Ikawi ko ñañatima ye woi waerä ɨwɨ Egipto kotɨ!” jei reta Moisés jare Aarón pe.

⁴ Jayawe jei iyupe reta: “Yaiparawo woi yandeyupe pëti wae Moisés ipepɨka pe, jare ñañatima yewɨ ɨwɨ Egipto kotɨ,” jei reta.

⁵ Jokua ñee uyandu yawe, Moisés jare Aarón tuicha rupi ipɨatɨtɨ reta. Jáeramo uñeñono reta jowa ɨwɨ re opaete Israel iñemoñaa reta uyembatɨ ñonoï wae jowai.

⁶ Jare jokua doce upurupiäro wae reta ipɨte wi, mokuiño kuimbae ipɨatɨtɨ wi. Jae reta ko Nun taɨ Josué jee wae jare Jefone taɨ Caleb jee wae. Jare ipɨatɨtɨ pɨpei omondoro reta iyuwi jemimonde.

⁷ Jayawe jae reta jei opaete Israel iñemoñaa reta pe kuärái: “Jokua ɨwɨ ore nduecha wae añetete ikawiete ye wae ko.

⁸ Jare Tumpa uyerowia umae oï yanderé yawe, yandereraata jokua ɨwɨ ikawiete wae pe, jare umeeta oï yandewe yandeɨwɨrä yaiko waerä joko pe,” jei chupe reta.

⁹ “Jáeramo awɨye piyowaicho Tumpa kotɨ,” jei. “Awɨye pekɨye jokua ɨwɨ pewa reta wi. Añetete yawaita’ä ko yandewe ñamɨamɨri reta waerä, echa’ä Tumpa oï yande ndiwe,” jei. “Jáeramo mbaetɨta kía jae reta uepɨ waerä yandewi. Jayawe awɨye pekɨye chuwi reta.” Jukuärái jei tëi Josué jare Caleb chupe reta.

¹⁰ Erëi opaete Israel iñemoñaa reta uipota tëi uyapi reta ita pe uyuka waerä Josué jare Caleb. Erëi aramoiño uyekuaa chupe reta Tumpa imbaepuere jupiete wae tembipe uwerasɨ wae rami tupao iáramo.

¹¹ Jayawe Tumpa jei Moisés pe: “Chembaepuere tuicha wae rupi ayapo ma mbaembae ipuere mbaei kía uyapo wae Israel iñemoñaa reta pewarä. Erëi jesewe jae reta wɨrowia’ä ñeño cheré jare chererɨ̈ro ñonoï reta.

¹² Jayawe ambouta chupe reta pëti mbaerasɨ jasɨ wae opa ambái reta waerä. Joko wi jae reta ipepɨka pe ayapota ndewi jeta niñemoñaa retarä piko waerä tëta wasu tuichaete wae jare imbaepuerete wae chuwi reta,” jei Tumpa Moisés pe.

Moisés uyerure Tumpa pe Israel iñemoñaa reta re

^13-14 Erëi Moisés jei Tumpa pe: “Nembaepuerete rupi nde nenoe Israel iñemoñaa reta ɨwɨ Egipto wi,” jei. “Erëi opa ndiyuka reta yawe kua ɨwɨtini wasu pe, jare ɨwɨ Egipto pewa reta jokua uikuaa yawe, umɨmbeuta reta ɨwɨ Canaán pewa reta pe,” jei. “Jokua ɨwɨ Canaán pewa reta uikuaa ñonoï reta nde neï ore ndiwe wae. Echa’ä jae reta uikuaa ma kërái nde orereruwata neï ara rupi amapɨ̈tu oo oï wae rupi, jare kërái pɨ̈tu rupi amapɨ̈tu uyeyapo tata jendɨ wae orereruwata waerä,” jei.

^15-16 “Jáeramo aramoete nde opa ndiyuka reta yawe, ¿mbae ra jeita Canaán pewa reta jare ïru ɨwɨ pewa reta wi? Jeita reta kuärái: ‘Tumpa ipuere’ä uyapo jae jei uyapota oï wae, echa’ä ipuere’ä wɨraa Israel iñemoñaa reta ɨwɨ Canaán pe. Jáeramo opa uyuka reta ɨwɨtini wasu pe.’ Jukuärái jeita reta,” jei chupe.

¹⁷ “Jayawe cheTumpa, echaka mii orewe nembaepuere tuicha wae,” jei. “Nde etei ndere orewe kuärái:

¹⁸ ‘Che ko jae peTumpa. Tuicha chepɨawasu jare chepɨakawi pewe. Tuicha ko puau jare cheakañɨta opaetei mbaembae kachi piyapo wae wi. Erëitu aiporarakata aï teko iya reta pe. Añetete aiporarakata aï opaete chererɨ̈ro wae reta pe, isambiaɨ reta pe, jare jumɨmino reta pe, jare jumɨmino yuapɨ ye reta pe wi.’ Jukuärái ndere orewe,” jei.

¹⁹ “Jáeramo, ndepɨakawiete rupi awɨye mii nemandúa kua mbae kachi jae reta uyapo wae re, kërái ndepɨawasu ndiko chupe reta tenonde ɨwɨ Egipto pe yureko wiwe jare añawe rewa,” jei Moisés Tumpa pe.

²⁰ Jayawe Tumpa jei Moisés pe: “Che cheakañɨ ma kua mbae kachi uyapo reta wae wi kërái nde ndiyerure chewe wae rupi,” jei chupe.

²¹ “Jaeño ko che tekowe iYa, jare chembaepuere jupiete wae tɨnee oï opaete ɨwɨ rupi.

^22-23 Jáeramo che etei tae ndewe, jokua chererɨ̈ro wae reta ndarau yuraa uwäe reta jokua ɨwɨ ikawiete wae pe. Añetete uechata’äwe reta jokua ɨwɨ che jae tamɨkue reta pe ameeta tëi aiko chupe reta wae. Kua reta uecha tëi ma chembaepuere jupiete wae uyekuaa chupe reta tembipe uwerasɨ wae rami. Uecha reta tëi wi mbaembae chembaepuere tuicha wae rupi ayapo wae jae reta imaerä ɨwɨ Egipto pe jare kua ɨwɨtini wasu rupi wi. Jesewe payandepo wese ma omboporowa ñeño reta chepɨawasu, jare jekuaeño uyapo’ä reta che jae wae rupi,” jei chupe.

²⁴ “Erëi Caleb uyeyokui kawi chewe. Che aecha jae ambɨe ye ko jokua ïru wae reta wi. Jae jekuaeño iko che jae wae rupi. Jayawe che araata Caleb jokua ɨwɨ ikawiete jae uecha wae pe iko waerä joko pe. Jukuärái ameeta Caleb jare iñemoñaa reta pe jokua ɨwɨ ikawiete wae jae reta iɨwɨrä,” jei chupe.

²⁵ “Añawe, awɨye pekua Amalec iñemoñaa reta jare cananeo reta jëta kotɨ. Kuriye ndimbowe piñatima yeta ko ɨwɨtini wasu rupi Mar Pɨ̈ta jee wae kotɨ,” jei Tumpa Moisés pe.

Tumpa uiporaraka Israel iñemoñaa reta pe

²⁶ Jayawe Tumpa jei Moisés jare Aarón pe kuärái:

²⁷ “¿Kërái yawe rewa ra amɨawätata chupe reta jeko kachi wae jare iyengeta reta chekotɨ wae?” jei. “Echa’ä ayandu opaete Israel iñemoñaa reta uyemɨngeta kawi’ä ñonoï chekotɨ.

²⁸ Jáeramo ere chupe reta che, peTumpa, jae kuärái: ‘Che etei tae pewe, uyeyapota oï pewe pe reta pere wae rupi etei.

²⁹ Pëti pëti pe reta pepɨte wi ime onoi veinte año ɨwate wae umanota jare jeöwekue upɨtata kua ɨwɨtini wasu pe, piyengeta chekotɨ jeko pewa ramo.

³⁰ Yepe tëi tenonde che jae ameeta aiko pewe jokua ɨwɨ Canaán peɨwɨrä, erëi añawe jaeño Jefone taɨ Caleb jare Nun taɨ Josué yuraata ñonoï yureko waerä jokua ɨwɨ ikawiete wae pe,’ ere chupe reta.

³¹ ‘Pe reta pere: ‘Orerowaicho reta upɨ̈rota orewi oresambiaɨ reta,’ pere. Erëi jukuäraita’ä ko, echa’ä che araata pesambiaɨ reta yureko kawi waerä jokua ɨwɨ perɨ̈ro wae pe.

³² Erëi pe reta pemanota peï jare pereöwekue upɨtata kua ɨwɨtini wasu rupi.

³³ Jare pesambiaɨ reta uwatata ñonoï kerupi rupi mbaemɨmba iyandarekoa reta rami, jare uwatata reta cuarenta año kua ɨwɨtini wasu rupi pe reta opa pemano rewa. Jukuärái pesambiaɨ reta uiporarata ko pe reta perowia’ä cheré ramo,’ ere chupe reta.

³⁴ ‘Jokua upurupiäro wae reta cuarenta ara rupi oo uipiäro reta waerä jokua ɨwɨ. Jáeramo pe reta pewatata ko ɨwɨtini wasu rupi cuarenta año rupi. Pëti año uyepapata pëti ara rami. Jukuärái piporarata pereko kachi jeko pewa, jare pikuaata peï yawaiete ko pewe piyowaicho yawe chekotɨ.’ Jukuärái ere chupe reta.”

³⁵ Jare Tumpa jei wi Moisés jare Aarón pe: “Che, peTumpa, jae ma jukuärái. Jayawe tayapo che jae wae rupi opaete jokua jeko kachi uyembatɨ chekotɨ wae reta pe. Pëti pëti umanota ko kua ɨwɨtini wasu pe,” jei Tumpa chupe reta.

^36-37 Joko wi Tumpa ombou chupe reta mbaerasɨ uyuka woi waerä jokua kuimbae reta Moisés omondo uipiäro waerä jokua ɨwɨ wae. Echa’ä jokua kuimbae reta uñatima ye yawe, uyemɨngeta kawi’ä reta jokua ɨwɨ rewa opaete Israel iñemoñaa reta pe, jare umbɨyengetaka reta Tumpa kotɨ.

³⁸ Jayawe jokua doce upurupiäro wae reta ipɨte wi, jaeño Nun taɨ Josué jare Jefone taɨ Caleb upɨta jekowe rewe.