San Mateo 17 - Biblia

Amokue Jesús jemimboe reta uecha Jesús imbaepuere jembipete wae

¹ Jayawe owa ara ma uasa yawe, Jesús wɨraa Pedro, Jacobo, jare Jacobo tɨwɨ Juan ïru reta ipɨte wi pëti ɨwɨtu wasu re.

² Jare joko pe Jesús jete uyembɨambɨe chupe reta. Jowa jembipe warasɨ jembipe rami. Jare jemimonde tïasɨ jare uwera.

³ Jare aramoiño uyekuaa chupe reta Moisés jare Elías uyemɨngeta ñonoï Jesús ndiwe.

⁴ Jayawe Pedro jei Jesús pe: “OreYa, jaekawi ko ore noï kua pe,” jei chupe. “Nde ndipota yawe, che ayapota kua pe mbapɨ warasɨ̈a ñanarokɨ pewa – pëti nemaerä, pëti Moisés pewarä, jare pëti Elías pewarä wi,” jei chupe.

⁵ Jare Pedro uyemɨngeta iko rambuewe, uyekuaa chupe reta amapɨ̈tu jembipe wae jare opa oñowa reta. Jare amapɨ̈tu wi uyendu ñee jei: “Kua ko jae cheRaɨ auete wae. Jae chembɨyerowiaete. Piyapɨsaka jese,” jei.

⁶ Jare Jesús jemimboe reta kua uyandu yawe, ukɨyete jare oa reta ɨwɨ re uipɨu rewe.

⁷ Jayawe Jesús ou oñono ipo jese reta jare jei: “Pepüa. Awɨye pekɨye,” jei chupe reta.

⁸ Jare umae reta ye yawe, uecha’ä ma kiawe joko pe oï – jaeño ma Jesús.

⁹ Joko wi uweyɨ ye yureko reta rambuewe ɨwɨtu wasu wi, Jesús jei chupe reta: “Awɨye pemiäri añawe kía pe awe kua pecha wae. Ndei rani. Peäro che kuimbaerä ayeyapo wae amano jare aikowe ye ayu umanokue wae reta ipɨte wi rewa. Jayawe ramo pemɨeräkuata peï kuri,” jei chupe reta.

¹⁰ Jayawe jemimboe reta upɨrandu ye chupe mbae re: “¿Maera pa Moisés uikuatía wae re oporomboe wae reta jei Elías rani ko outa ndei Upuruepɨ wae ou mbowe?” jei reta.

¹¹ Jayawe Jesús jei chupe reta: “Añetete ko jae reta jei wae. Elías rani ko ou uyapɨkatu waerä opaete mbaembae,” jei.

¹² “Erëi che tae pewe añetete wae, Elías ou ma ko, jare yandetenondewa reta uikuaa’ä. Jáeramo uyapo reta chupe mbae jae reta uipota wae rupi. Jae ramiño wi che kuimbaerä ayeyapo wae aiporarata aï wi jae reta ipo pe,” jei chupe reta.

¹³ Jayawe ramo Jesús jemimboe reta uikuaa Juan upurumbɨsakambuse wae re yepe uyemɨngeta iko Jesús wae.

Jesús umɨnguera pëti kunumi raɨ aña uyembɨiya jese wae

¹⁴ Jayawe Jesús jare jokua mbapɨ jemimboe reta ndiwe yuweru ye uwäe reta jeta ñonoï wae reta pe. Jare pëti kuimbae jae reta ipɨte wi ou uñeñono itawa re Jesús jowai. Jare jei chupe:

¹⁵ “Oporomboe wae, iparareko mii chewe cheraɨ parawete,” jei. “Jae imbaerasɨ, jare umanomano, jare tuicha rupi uiporara oï. Jeta wese ma oa tëi tata pe jare ɨ pe wi,” jei.

¹⁶ “Jáeramo ko aru tëi ma nderemimboe reta pe umɨnguera waerä, erëi jae reta ipuere’ä umɨnguera,” jei kuimbae Jesús pe.

¹⁷ Jayawe Jesús jei joko pe ñonoï wae reta pe: “Pe pepɨatäta piko wae reta, ¿marái mbate ra perowia kawi’ä cheré? Chembɨkueri ma peï perowia mbae cheré wae. ¿Kërái yawe rewa ra arupɨata pewe? Peru chewe kua pe jokua kunumi raɨ,” jei chupe reta.

¹⁸ Jayawe ueru reta chupe yawe, Jesús iñeeäta rewe jei aña pe oë waerä kunumi raɨ wi. ¡Jare jupiwoiño kunumi raɨ ukuera!

¹⁹ Jayawe kaaru katu mii yawe, Jesús jemimboe reta yuweru Jesús oï wae pe. Jare jae retaño jae ndiwe ñonoï yawe, upɨrandu reta chupe: “¿Maera pa ore orepuere’ä nomoë aña jokua kunumi raɨ wi?” jei reta.

²⁰ Jayawe Jesús jei chupe reta: “Pepuere’ä, echa’ä perowia kawi’ä Tumpa re ramo,” jei. “Che tae pewe añetete wae, pe reta perowia yawe Tumpa re michi raɨ mii yepe, jayawe pepuereta piyapo mbaembae tuicha wae. Pepuereta pere pea ɨwɨtu wasu pe oo waerä joko wi jare upɨta waerä ikotɨ̈a pe. Jare jukuärái uyapota ko ɨwɨtu wasu. Ndarau mbae yawái pewe,” jei chupe reta.

²¹ “Erëi jokua nunga aña, jaeño pepuere pemoë piyerure rewe Tumpa pe, jare piñono tee ara reta pekaru mbae rewe,” jei Jesús jemimboe reta pe.

Jesús umɨmbeu ye jemimboe reta pe umanota iko wae

²² Jare ɨwɨ Galilea pe ñonoï rambuewe, Jesús jei jemimboe reta pe: “Che kuimbaerä ayeyapo wae, imeta kía chemee oï cherowaicho reta pe wae.

²³ Jare jae reta cheyukata,” jei. “Erëi joko wi mbapɨ ara pe aikowe yeta ayu aï kuri umanokue wae reta ipɨte wi,” jei chupe reta. Jayawe jemimboe reta ipɨatɨtɨ tuicha rupi Jesús jei chupe reta wae re.

Jesús oporomboe tupao wasu pewarä umbɨepɨta wae rewa

²⁴ Jayawe Jesús jare jemimboe reta ndiwe yuraa uwäe reta tëta wasu Capernaum pe. Jare joko pe yureko reta rambuewe, yuweru amokue tupao wasu pewarä okowara wae reta jare upɨrandu reta Pedro pe: “¿Umbɨepɨ pa pemboea yande imeta ko yambɨepɨ wae tupao wasu re uyandareko wae reta pewarä?” jei reta.

²⁵ “Umbɨepɨ ko,” jei Pedro chupe reta. Jayawe Pedro oo uike tëta kiape Jesús oï wae pe. Jare ndei upɨrandu mbowe Jesús pe jokua rewa, Jesús rani jei chupe: “Simón,” jei chupe. “Mburuwicha reta kua ɨwɨ pewa, ¿kía reta pe pa okowara – taɨ reta pe ra ani ïru wae reta peño? ¿Mbae pa ndere?” jei chupe.

²⁶ “Ïru wae reta peño,” jei Pedro. Jayawe Jesús jei chupe: “Jayawe taɨ reta umbɨepɨ'ä ko. Jae ramiño wi che ambɨepɨta’ä ko tëi cheRu jëta pewarä,” jei chupe.

²⁷ “Erëitu awɨye waerä yambɨarasɨ jokua okowara wae reta, ekua epindapo ɨpa wasu pe. Jare jokua pira tenondete ndipɨsɨ wae, epɨpira iyuru chuwi. Jare joko pe newäeta pëti korepoti riare. Eraa embɨepɨ tupao wasu pewarä okowara wae reta pe. Jokua uepitɨta oï chemaerä jare nemaerä wi,” jei Pedro pe. Jayawe jukuärái Pedro uyapo.