San Mateo 15 - Biblia

Yandapo ikɨa Tumpa kotɨ wae yandepɨa wi ko oë

¹ Pëti ara amokue kuimbae Moisés uikuatía wae re oporomboe wae reta jare fariseo reta yuweru Jerusalén wi Jesús oï wae pe.

² Jare jae reta upɨrandu chupe: “¿Maera pa nderemimboe reta uyapo’ä yanderamɨkue reta jeko rupi? Echa’ä ukaru reta uyepoe mbae rewe,” jei reta chupe.

³ Jayawe Jesús jei chupe reta: “Pe reta oete ko piyapo mbae, echa’ä piyawɨ Tumpa jei wae piko waerä pereko rupii.

⁴ Pe reta pikuaa kawi tëi ko Tumpa arakaete jei kuärái: ‘Pipɨu peru jare pesɨ wi,’ jei. Jare jei wi kuärái: ‘Kía jei ikawi mbae wae tu jare ichɨ kotɨ wae, tuyuka reta.’ Jukuärái Tumpa jei Moisés pe uikuatía waerä.

⁵ Erëi pe reta peporomboe tëi kía ipuere jei tu jare ichɨ ikuasɨ wae pe kuärái: ‘Che ime anoi tëi korepoti, erëi chepuereta’ä pomborɨ pɨpe, echa’ä añono tee ma amee waerä Tumpa pe.’

⁶ Jare kía jukuärái jei wae, pe reta pere joko wiwe ipuereta’ä ma omborɨ tu jare ichɨ jokua korepoti pɨpe. Jáeramo peporomboe wae rupi uipɨu’ä reta tu jare ichɨ wi. Jukuärái pe reta peya ma ko Tumpa jei wae piko waerä pereko rupii,” jei chupe reta.

⁷ “Pe reta añetete wae nunga piyeyokui Tumpa pe. Isaías uikuatía arakaete peré wae jupi ko. Echa’ä jei kuärái:

⁸ ‘Kua reta iyuru wiño ko uipɨu chewi,’ jei Tumpa. ‘Erëi ipɨa pe uipɨu’ä etei chewi reta.

⁹ Umbutuicharaangaiño reta cheree. Oporomboe reta kuimbae jei wae rupiño.’ Jukuärái Isaías uikuatía Tumpa jei peré wae,” jei Jesús chupe reta.

¹⁰ Jayawe Jesús ueni opaete joko pe ñonoï wae reta jare jei chupe reta: “Piyapɨsaka kua re pikuaa kawi waerä,” jei chupe reta.

¹¹ “Ipotawe mbae kía jou wae ndarau uyapo ikɨa Tumpa kotɨ. Erëi ikawi mbae wae jei wae, jokua ko uyapo ikɨa Tumpa kotɨ,” jei chupe reta.

¹² Jayawe Jesús jemimboe reta yuweru jei chupe: “¿Ndikuaa pa fariseo reta umbɨarasɨ jokua nde ndere wae?” jei reta.

¹³ Jayawe Jesús jei chupe reta: “Jae reta oporomboe wae temitɨ rami ko. Erëi jae’ä ko temitɨ cheRu ara pe oï wae oñotɨ wae. Jare pëti ara Tumpa omondorokata oï,” jei.

¹⁴ “Jáeramo awɨye piyembɨpɨa’ä jae reta jei wae re. Jae reta uyererowia tëi uruwata ñonoï ïru wae reta Tumpa kotɨ. Erëi añetete jae reta jesa mbae wae uipoko uruwata ïru jesa mbae wae rami ko. Jare jukuärái yawe, mokui rewe uasawita ɨwɨkua pe,” jei chupe reta.

¹⁵ Jayawe Pedro jei Jesús pe: “Ikuaaka mii orewe mbae uipota jei jokua nembɨjaanga rewe ndere wae,” jei chupe.

¹⁶ Jayawe Jesús jei chupe reta: “¿Pe retawe yerá ndei pikuaa kawi jokua rewa?” jei.

¹⁷ “¿Pikuaa kawi’ä yerá ipotawe mbae peu wae oo perɨe peño jare pemombo?

¹⁸ Erëi mbae ikawi mbae wae pere wae, jokua oë pepɨa wi. Jare jokua ko peapo ikɨa Tumpa kotɨ,” jei chupe reta.

¹⁹ “Echa’ä pepɨa wi ko oë opa mbae ikawi mbae wae, echa’ä pepɨa pe piyemɨngeta mbaembae kachi wae re jare joko wi pepuruyuka, piyapo awasa, pembɨkere, pemonda, papu ïru wae reta re, jare ikawi mbae wae pere perapicha kotɨ,” jei.

²⁰ “Kua mbaembae ko peapo ikɨa Tumpa kotɨ. Erëi pekaru yawe piyepoe mbae rewe, jokua ndarau peapo ikɨa Tumpa kotɨ,” jei Jesús jemimboe reta pe.

Pëti kuña ɨwɨ Canaán pewa wɨrowia Jesús re

²¹ Jayawe Jesús jare jemimboe reta ndiwe yuraa reta joko wi tëta wasu reta Tiro jare Sidón jee wae iyɨpɨ rupi.

²² Jare jokua ɨwɨ pe ime iko pëti kuña ɨwɨ Canaán pewa. Jae ko judía mbae wae. Jae ou Jesús oï wae pe, jare usapɨkai pɨi rewe jei chupe: “CheYa, David iñemoñaa pewa, cheparareko mii,” jei. “Chemembɨ kuña mii uiporaraete oï, echa’ä aña uyembɨiya ma jese,” jei chupe.

²³ Erëi Jesús jei’ä mbae awe chupe. Jayawe jemimboe reta yuweru jei chupe: “Emondo ye jokua kuña, echa’ä usapɨkai pɨi rewe ou oï yanderaɨkue. Yanembɨkuerita oï,” jei reta chupe.

²⁴ Jayawe Jesús jei kuña pe: “Tumpa chembou Israel iñemoñaa reta peño. Jae reta owecha ukañɨ wae reta rami ko,” jei chupe.

²⁵ Jayawe kuña ou uñeñono ɨwɨ re Jesús jowai uipɨu rewe, jare jei chupe: “CheYa, chemborɨ mii,” jei.

²⁶ Jayawe Jesús jei chupe umbɨjaanga rewe: “Jupi’ä ko ñapɨ̈ro waerä tembiu sambiaɨ reta wi ñamee waerä yɨmba raɨ reta pe,” jei chupe.

²⁷ “Jukuärái tëi, cheYa,” jei kuña. “Erëitu tembiu uepitɨta ko oremaerä wi, echa’ä yɨmba raɨ retawe jou tembiu usururukue iya imesa wi,” jei chupe.

²⁸ Jayawe Jesús jei chupe: “¡Tuicha ko nderowia cheré, cherindɨ! Jáeramo uyeyapota ko ndewe nde ndipota wae rami,” jei chupe. Jare jupiwoiño kuña imembɨ ukuera.

Jesús umɨnguera jeta wae reta

²⁹ Jayawe Jesús jemimboe reta ndiwe yuraa ye joko wi uwäe reta ɨpa wasu Galilea pe. Joko wi koiño ime oï ɨwɨtu wasu raɨ. Jayawe uyupi reta jese, jare Jesús uwapɨ joko pe.

³⁰ Jare jeta wae reta wi yuweru jae oï wae pe. Jare ueru reta wi oñono Jesús jowai iköcho wae reta, jare ipo jowaicho utini wae reta, jare jesa mbae wae reta, jare iñee mbae wae reta, jare jeta ïru imbaerasɨ wae reta. Jayawe Jesús opa umɨnguera reta.

³¹ Iñee mbae wae reta umbɨpɨ uyemɨngeta, jare ipo jowaicho tɨpa wae reta ukuera, jare iköcho wae reta uwata kawi, jare jesa mbae wae reta umae kawi. Jare kua uecha reta yawe, opaete joko pe ñonoï wae reta ipɨakañɨ upɨta jare umbutuicha reta Tumpa jee.

Jesús umɨngaru irundɨ miri wae reta Tumpa imbaepuere rupi

³² Jayawe Jesús ueni jemimboe reta ikotɨ jare jei chupe reta: “Aiparareko anoi kua yuweru wae reta. Echa’ä mbapɨ ara rupi ma ñonoï reta che ndiwe, jare mbaetɨ ma mbae onoi reta jou waerä. Aipota’ä amondo ye reta iyembaɨ rewe, echa’ä aramoi jesawɨrɨta reta tape rupi,” jei chupe reta.

³³ Jayawe Jesús jemimboe reta jei chupe: “¿Kiape pa yandepuere ñawäe chupe mbae kua jeta wae reta jou waerä? Echa’ä mbaetɨ kiawe iko kua rupi,” jei reta.

³⁴ Jayawe Jesús upɨrandu chupe reta: “¿Mbowɨ pa mbɨyape ime penoi?” jei. Jare jae reta jei chupe: “Jaeño ime nonoi chiu mbɨyape, jare mbowɨ pira chariki mii,” jei reta.

³⁵ Jayawe Jesús jei joko pe ñonoï wae reta pe uwapɨ waerä.

³⁶ Joko wi uipɨsɨ jokua chiu mbɨyape jare pira chariki mii reta, jare umee yasurupái Tumpa pe jese. Jare upɨsäa umee jemimboe reta pe, jemimboe reta umee yuapɨ ye waerä opaete uwapɨ ñonoï wae reta pe.

³⁷ Jayawe opaetei ukaru reta jare ipunga upɨta reta. Jayawe Jesús jemimboe reta umbatɨ jembɨrekue chiu canasta tuicha wae reta.

³⁸ Jare ukaru wae reta kuimbae retaño uyepapa irundɨ miri rupi. Uyepapa’ä kuña reta jare sambiaɨ reta.

³⁹ Jayawe Jesús omondo ye reta jëta jëta rupi. Jare omondo ye reta ma yawe, jae jare jemimboe reta ndiwe uyupi chalana pe, jare yuraa reta ɨwɨ Magdala jee wae kotɨ.