San Mateo 14 - Biblia

Juan upurumbɨsakambu wae imano rewa

¹ Jokua ara reta rupi jeräkua mburuwicha wasu Herodes pe Jesús mbaembae uyapo wae.

² Jayawe jae jei uyeyokui chupe wae reta pe: “Jokua Jesús, jae ko aipo Juan upurumbɨsakambuse wae aramoi ikowe ye ma ou umanokue wae reta ipɨte wi. Jáeramo ko uyapo oï kua mbaembae kiawe ipuere’ä uyapo wae,” jei chupe reta.

^3-4 Echa’ä Herodes etei ko uyukaka Juan. Kua uyeyapo kuärái: Tenonde yawe Herodes umenda tɨwɨ Felipe jembireko Herodías jee wae ndiwe. Jare Juan umbɨeta Herodes pe jare jei chupe: “Kua nemenda nderɨwɨ jembireko ndiwe wae, ikawi’ä etei ko Tumpa jowai,” jei chupe. Jayawe Herodes uipɨsɨka Juan uñapɨ̈tika jare oñonoka peresorɨru pe umbɨyerowia waerä jembireko Herodías.

⁵ Jare yepe tëi Herodes uipota uyukaka Juan, erëi uyapo’ä. Echa’ä opaete wae reta wɨrowia Tumpa ko ombou Juan umɨmbeu waerä ñee chuwi etei ou wae. Jare Herodes ukɨye chuwi reta ramo, uyukaka’ä Juan.

⁶ Jayawe uwäe Herodes iara. Jare jae uparea jeta wae reta pe yuweru ukaru waerä jae ndiwe. Jayawe Herodías imembɨ kuña uike upɨrae chupe reta, jare Herodes uyerowia umae jese.

⁷ Jáeramo jei chupe: “Che tae ndewe Tumpa jowake, ameeta ndewe ipotawe mbae ndeka chewe wae,” jei chupe.

⁸ Jayawe kuñatái jei Herodes pe: “Emee chewe Juan upurumbɨsakambu wae iñäka pëti karúa pe,” jei chupe. Jukuärái jei kuñatái, echa’ä ichɨ omboemboe ma jukuärái jei waerä.

⁹ Jayawe mburuwicha wasu tuicha rupi ipɨatɨtɨ tëi. Erëi Tumpa jowake jei chupe ramo, jare ïru wae reta uyandu ramo, omondo pëti sɨndaro uyapo waerä kuñatái jei wae.

¹⁰ Jayawe oo sɨndaro peresorɨru pe uyayuasɨa Juan kɨsepuku pe.

¹¹ Joko wi ueru iñäkakue pëti karúa pe jare umee kuñatái pe. Jare kuñatái wɨraa umee yuapɨ ye ichɨ pe.

¹² Jayawe Juan jemimboe reta kua uikuaa yawe, yuweru jare wɨraa oñotɨ reta waerä Juan jetekue. Joko wi yuraa umɨmbeu reta Jesús pe.

Jesús umɨngaru jeta wae reta Tumpa imbaepuere rupi

¹³ Jare Jesús uyandu yawe Juan imano rewa, oo uyupi pëti chalana pe jare oo kïi ngatu wae pe. Erëi jeta wae reta uikuaa kiape Jesús oo oï wae. Jayawe jae reta yuraa Jesús jaɨkue ɨwɨ rupi etei tëta wasu raɨ reta wi.

¹⁴ Jayawe Jesús oo uwäe ɨpa wasu jembeɨ pe jare uweyɨ chalana wi. Jare uecha jeta wae reta ime ma yepe joko pe ñonoï. Jare tuicha rupi uiparareko umae jese reta. Jáeramo umɨnguera imbaerasɨ wae reta joko pe.

¹⁵ Jayawe pɨ̈tuta ma oï yawe, Jesús jemimboe reta yuweru jei chupe: “Mbaetɨ tëta kua rupi, jare kaaru ma oï,” jei reta. “Emondo kua jeta wae reta kiape ime tëta wae rupi owa reta waerä jembiurä. Echa’ä mbaetɨ mbae jou reta waerä kua pe,” jei reta.

¹⁶ Jayawe Jesús jei chupe reta: “Awɨye too reta,” jei. “Pe reta etei ko pemeeta chupe mbae jou reta waerä,” jei chupe reta.

¹⁷ “Ndarau orepuere,” jei reta. “Jaeño kua pe ime nonoi pandepo mbɨyape jare mokui pira chariki mii,” jei reta chupe.

¹⁸ Jayawe Jesús jei chupe reta: “Peru chewe kua pe. Yaecha,” jei.

¹⁹ Jayawe ueru reta ma yawe chupe, Jesús jei joko pe ñonoï wae reta pe uwapɨ waerä kapiichape re. Jayawe uipɨsɨ jokua pandepo mbɨyape jare mokui pira. Jare umae ara kotɨ jare umee yasurupái Tumpa pe jese. Joko wi upɨsäa mbɨyape, jare umee jemimboe reta pe jae reta umee yuapɨ ye waerä opaete wae pe.

²⁰ Jayawe opaete wae reta ukaru ipunga rewa. Jare Jesús jemimboe reta umbatɨ jokua jembɨrekue doce canasta rupi.

²¹ Opaete ukaru wae reta kuimbae retaño uyepapa pandepo miri rupi. Uyepapa’ä kuña reta jare sambiaɨ reta joko pe ñonoï wae. Jukuärái Jesús umbɨjeta mbɨyape jare pira umɨngaru waerä jeta wae reta.

Jesús uwata ɨ iáramo rupi

²² Jayawe Jesús jei jemimboe reta pe uyupi waerä chalana pe jare yuraa waerä tenonde ɨpa wasu jowaicho kotɨ. Jare jae upɨtaño joko pe omondo ye waerä uyembatɨ wae reta.

²³ Jare opa ma omondo ye reta yawe, Jesús uyupi pëti ɨwɨtu wasu re oo uyerure waerä Tumpa pe. Jare pɨ̈tu ma yawe, Jesús imeño jaeño pe etei joko pe oï.

²⁴ Jayawe chalana Jesús jemimboe reta oo pɨpe wae oo ma uwäe ɨpa wasu mbɨte pe. Jare yawái chupe reta uruwata waerä, echa’ä täta ɨwɨtu ou ikotɨ jare tuicha ɨ uyembɨaparoaroa chupe reta.

²⁵ Jare köeta ma yawe, Jesús uwata oo ikotɨ reta ɨ iáramo rupi.

²⁶ Jare jemimboe reta uecha yawe, ukɨyete ye reta jare jei reta iyupe: “¡Umanokue wae iä ko aipo kua!” jei reta. Jáeramo jäse reta ukɨyete ramo.

²⁷ Erëi jupiwoiño Jesús omondo chupe reta iñee: “Piyembɨpɨakatu. Awɨye pekɨye. Che ko,” jei chupe reta.

²⁸ Jayawe Pedro jei chupe: “CheYa, nde etei ko yawe, ere chewe awata waerä a ndekotɨ ɨ iáramo rupi,” jei chupe.

²⁹ Jayawe Jesús jei chupe: “Eyu,” jei chupe. Jayawe Pedro uweyɨ chalana wi, jare umbɨpɨ uwata ɨ iáramo rupi oo waerä tëi Jesús kotɨ.

³⁰ Erëi uecha yawe ɨwɨtu täta oï chupe, Pedro ukɨye jare umbɨpɨ uike ɨ pe. Jayawe jei usapɨkai rewe: “¡CheYa, chepɨsɨ mii!”

³¹ Jayawe jupiwoiño Jesús uipɨsɨ Pedro ipo wi, jare jei chupe: “Michiete nderowia cheré. ¿Maera pa nderowia kawi’ä cheré?” jei chupe.

³² Jayawe yuweru uyupi reta chalana pe, jare jupiwoiño ɨwɨtu upɨta.

³³ Jare Jesús jemimboe chalana pe ñonoï wae reta umbutuicha Jesús. “Añetete yepe nde ko jae Tumpa Taɨ,” jei reta chupe.

Jesús umɨnguera Genesaret pewa imbaerasɨ wae reta

³⁴ Jayawe yuraa uwäe reta ɨpa wasu jowaicho pe ɨwɨ Genesaret jee wae pe.

³⁵ Jare joko pewa reta uecha yawe Jesús, uikuaa reta kía ko jae wae. Jáeramo wɨraaka reta ñee opaete jokua ɨwɨ rupi uikuaa reta waerä. Jayawe ketɨ ketɨ wi ueru reta imbaerasɨ wae reta Jesús oï wae pe.

³⁶ Jare umɨñera reta Jesús umaeño waerä imbaerasɨ wae reta re uñatai waerä Jesús jemimonde jembeɨ mii yepe. Jare opaete uñatai Jesús jemimonde wae, opa ukuera reta Jesús imbaepuere pe.