Marcos 5 - Biblia

Jesús omoë aña reta kuimbae wi

¹ Jayawe Jesús jare jemimboe reta ndiwe yuraa uwäe ɨpa wasu jowaicho pe. Jokua ko jae Gadara pewa reta iɨwɨ.

² Jayawe Jesús uweyɨ chalana wi rupiwe, osi ou owäiti pëti kuimbae aña uyembɨiya jese wae.

³ Jae yepe iko parawete patïu rupi. Jare ipuere’ä ma kiawe uñapɨ̈ti, yepe tëi uñapɨ̈ti reta cadena pe.

⁴ Jeta wese ma jae reta uñapɨ̈ti tëi ipo jare ipɨ rupi cadena pe. Erëi jae opa omondoo cadena reta. Jare kiawe ipuere’ä ma jese.

⁵ Jekuaeño pɨ̈tu rupi jare ara rupi iko patïu rupi jare ɨwɨtu wasu raɨ rupi. Jare jekuaeño jäse jare uyembɨpere parawete ita pe.

⁶ Jayawe kua kuimbae mbɨrɨ wi uecha Jesús. Jare osi ou owäiti jare uñeñono itawa re jae jowai.

^7-8 Jayawe Jesús jei aña pe: “Nde aña, eë kua kuimbae wi,” jei chupe. Jayawe kuimbae jei Jesús pe iñeeäta rewe: “Jesús, Tumpa imbaepuere tuichaete wae Taɨ, ¿mbae pa ndeyu ndeka kua pe? Ere chewe Tumpa jowake awɨye waerä ndiporaraka chewe,” jei chupe.

⁹ Jayawe Jesús upɨrandu chupe: “¿Mbae pa nderee?” jei chupe. Jare aña jei chupe: “Che cheree Jeta Wae. Echa’ä jeta wae ko ore,” jei chupe.

¹⁰ Jare aña reta jekuaeño umɨñera Jesús awɨye waerä omoë reta mbɨrɨ jokua ɨwɨ wi.

¹¹ Joko wi ime koiño ñaipe re kuchi iyandarekoa reta umɨngaru ñonoï kuchi reta.

¹² Jayawe aña reta jei Jesús pe ikuasɨ katu rewe: “Oremondo pea kuchi reta re. Emaeño oreré nduike waerä jese reta,” jei reta chupe.

¹³ Jayawe Jesús umaeño jese reta. Jayawe aña reta opa oë kuimbae wi jare opa yuraa uike kuchi reta re. Joko wi kuchi reta täta rupi opa osi uweyɨ yuraa ɨwɨ̈a rupi uike reta ɨpa wasu pe. Jare joko pe kuchi reta opa iputupa umano. Kuchi reta uyepapa mokui miri rupi.

¹⁴ Jayawe kuchi iyandarekoa reta opa osi yuraa umɨmbeu tëta wasu pewa reta pe jare jokoropi ñonoï wae reta pe kua uyeyapo wae rewa. Jayawe uyandu wae reta yuweru uecha waerä mbae ra ko uasa wae.

¹⁵ Jare yuweru uwäe reta yawe Jesús oï wae pe, uecha reta jokua kuimbae aña reta uyembɨiyase jese wae uwapɨ oï, jare uyemonde ye ma oï, jare iyarakuaa ye ma oï. Jáeramo opa ukɨye reta.

¹⁶ Jare jokua tenonde uecha wae reta umɨmbeu ïru wae reta pe kërái uyeyapo kuimbae aña uyembɨiyase jese wae pe jare kuchi reta pe.

¹⁷ Jare kua uyandu reta yawe, umɨñera reta Jesús oë ye oo waerä jae reta iɨwɨ wi.

¹⁸ Jare Jesús uyupi ye chalana pe iko yawe, jokua kuimbae aña reta uyembɨiyase jese wae umɨñera oo waerä tëi Jesús ndiwe.

¹⁹ Erëi Jesús umaeño’ä jese jare jei chupe: “Ekua ye nerëta pe, jare embeu nerëtara reta pe kërái mbae ikawi wae ndeYa uyapo ndewe wae rewa jare kërái ndeparareko wae rewa,” jei chupe.

²⁰ Jayawe kuimbae oo joko wiño umbɨpɨ umɨmbeu ɨwɨ Decápolis jee wae rupi mbae ikawi wae Jesús uyapo chupe wae rewa. Jare opaete uyandu wae reta ipɨakañɨ jese reta.

Jesús umbɨjekowe ye pëti kuñatái

²¹ Jayawe Jesús jemimboe reta ndiwe yuraa ye uwäe reta ɨpa wasu jowaicho kotɨ chalana pɨpe. Jare jeta wae reta yuweru ɨpa wasu jembeɨ rupi Jesús oï wae pe.

²² Jare ou wi pëti kuimbae Jairo jee wae. Jae ko pëti tupao itenondewa. Jare jae uecha yawe Jesús, uñeñono ipɨtía re ɨwɨ re jae jowai.

²³ Jare ikuasɨ katu rewe jei Jesús pe: “Cherayɨ mii umanota ma oï orewi,” jei chupe. “Ya mii iñono ndepo jese ukuera waerä, awɨye waerä umano orewi,” jei chupe.

²⁴ Jayawe Jesús oo woi jae ndiwe. Jare jeta yuraa reta wi Jesús jupie, jare oyopɨ ye reta uwata kawi waerä.

²⁵ Jare jae reta ipɨte pe oo wi pëti kuña doce año ma imbaerasɨ iko tuwɨ wasu pe wae.

²⁶ Kua kuña tuicha rupi uiporara jeta upurupɨano wae reta uipɨano tëi rewe, jare opaete ma ikorepoti umee tëi iyuwi chupe reta. Erëi jesewe ukuera’ä. Jeieteño imbaerasɨ parawete.

^27-28 Jayawe jokua kuña uyandu ikawi wae Jesús rewa. Jare jei iyupe: “Jemimonde mii yepe añatai yawe, akuerata ko,” jei. Jayawe ou Jesús jaɨkue kotɨ wi jeta wae reta ipɨte rupi, jare uñatai Jesús jemimonde.

²⁹ ¡Jare jupiwoiño juwɨ wasu upɨta chuwi, jare uyandu jete ukuera ma imbaerasɨ wi!

³⁰ Erëi Jesús uikuaa woi jae imbaepuere pe umɨnguera ma ko kía. Jáeramo uyemboɨ jare uyerowa umae. Jare upɨrandu: “¿Kía pa cheremimonde uñatai?” jei.

³¹ Jayawe jemimboe reta jei chupe: “Ndecha ko kua jeta wae reta ndeopɨ ye ñonoï. ¿Maera pa ndepɨrandu kía ra nderemimonde uñatai?” jei reta chupe.

³² Erëi Jesús jekuaeño umae iyɨpɨ rupi uecha waerä kía ra uñatai jemimonde wae.

³³ Jare kuña uikuaa ma mbae uyeyapo chupe wae. Jáeramo ou Jesús kotɨ, jare uipɨu rewe uñeñono ɨwɨ re jae jowai. Jare uyembeu chupe jae ko jemimonde uñatai wae. Jae parawete urɨrɨ iko ukɨye ramo.

³⁴ Jayawe Jesús jei chupe: “Cherayɨ, ndekuera ma ko cheré nderowia ramo. Ekua ndepɨakatu rewe. Ndekuera ma ko nembaerasɨ wi,” jei chupe.

³⁵ Jare Jesús uyemɨngeta iko rambuewe, yuweru uwäe amokue kuimbae reta Jairo jëta wi ou wae. Jare jei reta Jairo pe: “Nderayɨ mii umano ma. Awɨye ma embɨawái oporomboe wae,” jei reta chupe.

³⁶ Erëi Jesús kua uyandu yawe, jei Jairo pe: “Awɨye ndepɨatɨtɨ. Erowiaño cheré,” jei chupe.

³⁷ Jare Jesús umaeño’ä ïru reta re yuraa waerä jae ndiwe Jairo jëta pe – jaeño Pedro, jare Jacobo, jare Jacobo tɨwɨ Juan.

³⁸ Jayawe yuraa uwäe reta Jairo jëta pe. Jare Jesús uecha jeta wae reta mbɨatɨtɨ wasu pe ñonoï jare jäse uyao ñonoï reta.

³⁹ Jayawe Jesús uike o pe jare jei chupe reta: “¿Maera pa mbɨatɨtɨ wasu pe peï jare piyao peï? Kua kuñatái umano’ä oï. Okeño ko oï,” jei chupe reta.

⁴⁰ Erëi jae reta kua ñee uyandu yawe, oyoyai reta Jesús. Jayawe Jesús jei chupe reta oë waerä oka pe. Jare joko wi uruike wɨraa kuñatái joo pe kuñatái tu jare ichɨ, jare jokua mbapɨ jemimboe jae ndiwe yuraa wae reta.

⁴¹ Jayawe Jesús uipɨsɨ kuñatái ipo pe jare jei chupe: “Talita kumi,” jei. (Kua ñee uipota jei jae reta iñee pe, “Kuñatái, che tae ndewe, epüa.”)

⁴² ¡Jayawe jupiwoiño kuñatái upüa jare umbɨpɨ uwata! Kua kuñatái doce año ma onoi. Jayawe Jesús ndiwe ñonoï wae reta ipɨakañɨete.

⁴³ Erëi Jesús jei chupe reta awɨye waerä umɨmbeu reta kía pe awe. Jare joko wi jei tu jare ichɨ pe umɨngaru reta waerä kuñatái.