Marcos 3 - Biblia

Jesús umɨnguera pëti kuimbae ipo jowaicho utini wae

¹ Jayawe Jesús uike ye tupao pe, jare joko pe oï wi pëti kuimbae ipo jowaicho utini wae.

² Jare fariseo reta umae ngatu Jesús re upurumɨnguerata ra mbutuu ara pe wae re. Echa’ä Jesús umɨnguera yawe kuimbae, jeita reta Jesús uparawɨkɨ ma mbutuu ara pe jare umbɨjekota tëi reta jokua re.

³ Jayawe Jesús jei kuimbae ipo jowaicho utini wae pe: “Epüa. Eyu iyemboɨ kua reta jowai,” jei chupe.

⁴ Jayawe Jesús upɨrandu fariseo reta pe: “¿Mbae ra ko jupi yayapo waerä mbutuu ara pe? ¿Ikawi wae, ani ikawi mbae wae? ¿Yapuruepɨ waerä, ani yapuruyuka waerä? ¿Mbae pa jei Tumpa kua rewa?” jei chupe reta. Erëi jae reta jei’ä mbae awe.

⁵ Jayawe pochɨ rewe Jesús umae iyɨpɨ rupi ñonoï wae reta re, jare tuicha ipɨatɨtɨ jae reta ipɨatäta ramo. Jayawe jei kuimbae pe: “Emɨsɨmi ndepo,” jei chupe. Jayawe kuimbae ipo umɨsɨmi jare ukuera woi.

⁶ Jayawe fariseo reta opa oë joko wi. Jare umbɨpɨ uyemboemboe reta mburuwicha Herodes jee wae imborɨa reta ndiwe kërái rupi ipuere uyukaka reta waerä Jesús.

Jeta yuweru uyapɨsaka waerä Jesús iñee re

⁷ Jayawe Jesús jare jemimboe reta ndiwe yuraa ɨpa wasu kotɨ. Jare yuraa wi jaɨkue jeta ɨwɨ Galilea pewa reta.

⁸ Jare uyandu reta yawe opaete Jesús uyapo wae rewa, yuweru wi jae oï wae pe jeta ɨwɨ Judea pewa reta jare ɨwɨ Idumea pewa reta. Jare yuweru wi jeta tëta wasu reta Jerusalén, Tiro, jare Sidón pewa reta, jare ɨ wasu Jordán jowaicho kotɨwa reta.

⁹ Jayawe Jesús jei jemimboe reta pe uyapɨkatu waerä chupe pëti chalana uyupi pɨpe waerä, awɨye jeta wae reta oyopɨ waerä.

¹⁰ Echa’ä jae umɨnguera ma jeta wae reta; jáeramo jeta ïru imbaerasɨ wae reta uñemɨañamɨaña yuweru reta ikotɨ uyawɨkɨ reta waerä.

¹¹ Jare aña uyembɨiya jese wae reta joko pe ñonoï wi. Jare jae reta uecha yawe Jesús, opa oa reta ɨwɨ re jae jowai, jare iñeeäta rewe jei reta chupe: “Nde ko jae Tumpa Taɨ,” jei reta.

¹² Jayawe Jesús jei chupe reta: “Awɨye pemɨmbeu kía pe awe kua che rewa,” jei chupe reta.

Jesús jemimboe tenondewaete reta jee

¹³ Joko wi Jesús oo pëti ɨwɨtu re, jare uenika amokue kuimbae jae uiparawo wae reta. Jayawe jae reta yuweru jae oï wae pe.

¹⁴ Jare jae reta ipɨte wi Jesús uiparawo doce kuimbae reta jae ndiwe uñemɨïru uwata waerä. Jare taɨkue rupi Jesús omondota iko reta umɨmbeu waerä opaete rupi Tumpa iñee.

¹⁵ Jare wi umeeta iko chupe reta mbaepuere umɨnguera waerä imbaerasɨ wae reta jare omoë waerä aña uyembɨiya jese wae reta wi.

¹⁶ Kuärái ko Jesús uiparawo wae reta jee: Simón (kua kuimbae Jesús umbɨjee Pedro);

¹⁷ jare Zebedeo taɨ reta Jacobo jare Juan jee wae reta (kua mokui reta pe Jesús jei Boanerges, jare kua tee uipota jei iñee pe, “Ara jɨapu wae rami.”).

¹⁸ Jae nunga wi Jesús uiparawo Andrés, Felipe, Bartolomé, Mateo, Tomás, Alfeo taɨ Jacobo jee wae, Tadeo, jare Simón (kua Simón jae ko ïru wae reta ueni wi Zelote pe).

¹⁹ Jare Jesús uiparawo wi Judas Iscariote (kua kuimbae taɨkue rupi umeeta wɨreko Jesús jowaicho reta pe). Jukuärái ko jee Jesús uiparawo wae reta.

Mburuwicha reta umbɨjeko tëi Jesús

²⁰ Jayawe Jesús oo ye uike tëta pe kiape jae upɨta iko wae pe. Jare jeta wae reta yuweru ye joko pe. Jáeramo Jesús jare jemimboe reta ikïi’ä ñonoï jeko pewa, ipuere’äwe ukaru reta.

²¹ Jare Jesús jëtara reta jokua uikuaa yawe, yuweru wɨraa waerä tëi Jesús jëta pe. Echa’ä amokue reta jei Jesús rewa: “Iyarakuaa’ä ma oï,” jei reta.

²² Jare joko pe ñonoï amokue Moisés uikuatía wae re oporomboe wae reta. Jae reta yuweru ma Jerusalén wi. Jare jei yureko reta iyupe Jesús rewa: “Añawasu uyembɨiya ma jese. Añawasu imbaepuere rupi ko kua kuimbae omoë oï aña uyembɨiya jese wae reta wi,” jei tëi reta.

²³ Jayawe Jesús ueni opaete wae reta ikotɨ, jare jei chupe reta umbɨjaanga rewe: “Satanás ndarau jaei uñemoë kuimbae wi,” jei.

²⁴ “Echa’ä yande yaikuaa kawi ñaï tëta wasu pewa reta oyowaicho yawe jae yepái, opata ko uyererukachi reta.

²⁵ Jare jukuäraita wi ko pëti ñetära reta oyowaicho yawe jae yepái,” jei.

²⁶ “Jayawe Satanás ndarau jaei uñemoë kuimbae wi. Echa’ä jukuärái yawe, Satanás jare aña reta opata tëi uyembɨyao tee tee oyowaicho waerä jae yepái, jare opata tëi uyererukachi reta. Jare joko pe iyapɨta tëi ko Satanás,” jei chupe reta.

²⁷ Jare Jesús umbɨjaanga rewe jei wi chupe reta: “Ime yawe kía uipota uike kuimbae ipɨräta wae jëta pe upɨ̈ro waerä chuwi imbaembae, jae uipokua ranita ko jokua kuimbae ipɨräta wae. Jayawe ramo jae ipuereta upɨ̈ro chuwi imbaembae,” jei. “Jare jukuärái wi che mbaetɨ yawe tenonde amɨamɨri aña reta itenondewa Añawasu, ndarau wi chepuere amoë aña reta. ¿Këraita ra chepuere jayawe amoë aña reta kía wi Añawasu imbaepuere pe?” jei chupe reta.

²⁸ “Che tae pewe añetete wae, kua ɨwɨ pe ime opa kërái rái rupi Tumpa kotɨ uyawɨ reta wae, jare jeta wae reta uyemɨngeta kachi Tumpa kotɨ,” jei. “Tumpa ipuereta jokua umbái chuwi reta.

²⁹ Erëi ime yawe kía uyemɨngeta kachi Espíritu Santo kotɨ wae, Tumpa ndarau umbái chuwi jokua. Uyembɨjekota jaeño mái pewa,” jei chupe reta.

³⁰ Jesús jei jukuärái jokua Moisés uikuatía wae re oporomboe wae reta pe, echa’ä tenonde yawe jae reta jei tëi chupe: “Aña uyembɨiya ma jese.”

Jesús ichɨ jare tɨwɨ reta ou ueka reta Jesús

³¹ Jayawe Jesús ichɨ jare tɨwɨ reta ndiwe yuweru uwäe jokua tëta kiape Jesús oï wae pe, jare oka wi omondo uenika reta.

³² Jayawe o pe Jesús iyɨpɨ rupi uwapɨ ñonoï wae reta jei chupe: “Ndesɨ jare nderɨwɨ reta nereni ñonoï oka pe,” jei reta.

³³ Jayawe Jesús jei chupe reta: “¿Kía reta ra ko jae chesɨ jare cherɨwɨ reta?” jei chupe reta.

³⁴ Jayawe umae iyɨpɨ rupi uwapɨ ñonoï wae reta re jare jei: “Mase, kua nunga reta ko jae chesɨ jare cherɨwɨ reta.

³⁵ Echa’ä Tumpa jei wae uyapo wae reta ko jae cherɨwɨ reta jare cherindɨ reta jare chesɨ,” jei chupe reta.