Marcos 11 - Biblia

Jesús uike Jerusalén pe

¹ Koiño tëta wasu Jerusalén wi, ñaipe Olivorenda jee wae jowai, ime ñonoï mokui tëta wasu raɨ reta Betfagé jare Betania jee wae. Jayawe Jesús jare jemimboe reta ndiwe yuraa seri ma uwäe reta yawe joko pe, Jesús jei mokui jemimboe reta pe:

² “Pekua pea tëta wasu raɨ yanderenonde oï wae pe. Jare joko pe pewäe yawe, pewäeta peï kuri pëti mburika taurusu wae uñeñapɨ̈ti oï wae, ndei kiawe opo jese wae. Piyora peru kua pe,” jei chupe reta.

³ “Jare ime yawe kía upɨrandu pewe wae, pereta chupe: ‘YandeYa uipota uiporu, erëi ɨmambaeño ueruruka yeta ueya pewe,’ pere.” Jukuärái jei Jesús chupe reta.

⁴ Jayawe Jesús jemimboe reta yuraa uwäe tëta wasu raɨ pe, jare uwäe chupe reta mburika taurusu wae Jesús jei wae rami. Uñeñapɨ̈ti iko tapembeɨ pe pëti tëta jöke iyɨpɨ mii pe. Jayawe jae reta oyora.

⁵ Jare amokue joko pe ñonoï wae reta uecha jare upɨrandu chupe reta: “¿Maera pa piyora peï mburika?” jei chupe reta.

⁶ Jayawe Jesús jemimboe reta umɨmbeu chupe reta Jesús jei wae. Jayawe umaeño jese reta wɨraa waerä.

⁷ Joko wi Jesús jemimboe reta ueru mburika taurusu wae Jesús oï wae pe jare omboi reta iñepëwaka oñono waerä mburika ikupe re. Jayawe Jesús opo jese jare oo yuapɨ ye Jerusalén kotɨ.

⁸ Jare jeta wae reta yuweru jare iñepëwaka uipɨso reta tape rupi mburika jenonde. Jare ïru wae reta uyasɨa karandaɨ jokɨ jare uipɨso reta tape rupi.

⁹ Jare Jesús jenonde jare jaɨkue rupi yuraa yureko wae reta usapɨkai pɨi rewe jei reta: “¡Tuyembutuichaka Tumpa jee! ¡Tumpa tuyapo ikawiete wae kua ou oï Tumpa jee re wae pe!

¹⁰ Kua ko jae yanemburuwicha wasu David iñemoñaa pewa outa iko wae. ¡Tuiko yanemburuwicha wasurä jaeño mái pewa! ¡Tuyembutuichaka Tumpa jee ara pe!” Jukuärái jei reta usapɨkai pɨi rewe.

¹¹ Jayawe Jesús oo uwäe Jerusalén pe yawe, uike oo tupao wasu joka pe jare umae jokoropi opaete mbaembae re. Erëi kaaru ma chupe ramo, oë ye oo Betania pe jokua doce jemimboe reta ndiwe.

¹² Jayawe pɨarewe pe yuraa ye reta Betania wi Jerusalén kotɨ. Jare yuraa yureko reta rambuewe, Jesús iyembaɨ.

¹³ Jare mbɨrɨ wi uecha pëti ɨwa jokɨ kawi oï wae. Jayawe oo tëi ikotɨ umae jese ime ra ía wae. Erëi mbaetɨ ía; jaeño jokɨ, echa’ä ndei uwäe ara ía waerä.

¹⁴ Jayawe Jesús jei chupe: “Kua wiwe ndarau ye ma kía jou ndeía,” jei chupe. Jare uyandu kawi Jesús jemimboe reta jokua jei wae.

Jesús omoë mbaemɨmba owaka wae reta tupao wasu joka wi

¹⁵ Jayawe yuraa uwäe reta tëta wasu Jerusalén pe. Jare Jesús uike ye tupao wasu joka pe kiape judío mbae wae reta ipuere uyembatɨ umbutuicha reta waerä Tumpa jee. Erëi joko pe ime jeta wae reta owaka ñonoï mbaemɨmba uñemee waerä Tumpa pe wae. Jayawe Jesús umbɨpɨ omoë joko wi jokua mbaemɨmba owaka wae reta jare owa ñonoï wae reta wi. Jare jokua uipepɨka korepoti ɨwɨ ambɨe wi ueru wae reta imesa reta Jesús opa umbɨyapara wɨraa chuwi reta. Jae nunga uyapo wi pɨkasu owaka wae reta jenda.

¹⁶ Jare umaeño’ä kía re awe uasa waerä jewɨta rewe jokoropi.

¹⁷ Jayawe Jesús umbɨpɨ omboe joko pe ñonoï wae reta jare jei: “Tumpa jei iñeerɨru pe kuärái: ‘Cherëta ko jae yerurerenda pewa opaete ɨwɨ pewa reta pewarä.’ Jukuärái Tumpa jei. Erëi pe reta piyapo ma imonda wae reta iñemía rami,” jei Jesús chupe reta.

¹⁸ Jayawe sacerdote itenondewa reta jare Moisés uikuatía wae re oporomboe wae reta uikuaa yawe kua mbae Jesús uyapo wae rewa, ukɨye reta aramoi jae imbaepuereteta chuwi reta. Echa’ä jae reta uikuaa opaete wae ipɨakañɨ tuicha rupi Jesús oporomboe wae re. Jáeramo joko wiwe jokua mburuwicha reta umbɨpɨ ueka kërái rupi uyukaka reta waerä Jesús.

¹⁹ Jare pɨ̈tuɨpɨ yawe, Jesús jare jemimboe reta yuraa ye Jerusalén wi Betania pe.

Jesús oporomboe yerure rewa

²⁰ Jare pɨarewe pe ndimbowe yawe, yuraa reta yewɨ Jerusalén kotɨ. Jare yuraa yureko reta rambuewe, uecha reta ɨwa opa ma utini iyɨpɨ wiwe.

²¹ Jayawe Pedro imandúa Jesús jei ɨwa pe wae re, jare jei: “¡Oporomboe wae, mase! Pea ɨwa ndiyepɨpeyu jese wae opa ma utini,” jei chupe.

²² Jayawe Jesús jei chupe reta: “Perowia Tumpa re,” jei.

²³ “Che tae pewe añetete wae, ime yawe kía jei pea ɨwɨtu wasu pe oo uyemombo waerä mar pe, jare wɨrowia ipɨa rewe uyeyapota oï chupe wae, jayawe uyeyapota ko chupe. Tumpa uyapota ɨwɨtu wasu oo uyemombo waerä mar pe,” jei chupe reta.

²⁴ “Jáeramo che tae pewe, piyerure yawe Tumpa pe ipotawe mbae re, jare perowia Tumpa umee ma ko pewe yawe, jayawe penoita ko,” jei chupe reta.

²⁵ “Jae nunga wi che tae pewe, piyerure peï yawe Tumpa pe, aramoi pemanduata perapicha mbae kachi uyapo pewe wae re. Jukuärái yawe, awɨye pemandúa chupe jokua re, peRu ara pe oï wae awɨye waerä imandúa wi pewe mbaembae piyawɨ ikotɨ wae re,” jei.

²⁶ “Erëi jekuaeño pemandúa chupe yawe ikawi mbae wae uyapo pewe wae re, jukuärái wi peRu ara pe oï wae jekuaeño imanduata pewe wi mbaembae piyawɨ ikotɨ wae re,” jei Jesús jemimboe reta pe.

Jesús umɨkïi jowaicho reta

²⁷ Jayawe Jesús jare jemimboe reta ndiwe yuraa uwäe reta ye Jerusalén pe jare yuraa reta ye tupao wasu pe. Jare Jesús uwata iko rambuewe tupao wasu joka rupi, yuweru owäiti sacerdote itenondewa reta, Moisés uikuatía wae re oporomboe wae reta, jare judío itenondewa reta.

²⁸ Jae reta upɨrandu chupe: “¿Kía pa nembou kua mbaembae ndiyapo waerä? ¿Kía pa jei ndewe ndepuere nemoë waerä mbaemɨmba owaka wae reta tupao wasu joka wi?” jei reta chupe.

²⁹ Jayawe Jesús jei chupe reta: “Che tapɨrandu wi pewe mbae re,” jei chupe reta. “Pemɨmbeu yawe chewe, jayawe che wi amɨmbeuta pewe kía ko chembou kua mbaembae ayapo waerä,” jei.

³⁰ “Pere chewe, ¿kía pa ombou Juan upurumbɨsakambu waerä? ¿Tumpa ra ombou, ani kuimbae retaño ra ombou? Pemɨmbeu chewe,” jei chupe reta.

³¹ Jayawe jae reta yuraa ikotɨ̈a mii jare jei iyupe reta: “Yae yawe, ‘Tumpa ko ombou Juan,’ jayawe Jesús jeita yandewe, ‘Jukuärái yawe, ¿maera pa perowia’ä jae jei wae?’ jeita yandewe.

³² Erëi yae yawe, ‘Kuimbae retaño ko ombou,’ jayawe ¿mbae ra uyapota kua uyembatɨ wae reta?” jei iyupe reta. Jae reta ukɨye chuwi reta aramoi ipuere uyembopochɨ reta ikotɨ. Echa’ä opaete wae wɨrowia Tumpa ko ombou Juan umɨmbeu waerä ñee Tumpa wi etei ou wae. Jáeramo mburuwicha reta uipɨu jei reta waerä kuimbae retaño ombou.

³³ Jayawe jei reta Jesús pe: “Ore nduikuaa’ä kía ra ko ombou Juan wae,” jei reta. Jayawe Jesús jei chupe reta: “Jayawe che wi ndarau amɨmbeu pewe kía ko chembou kua mbaembae ayapo waerä,” jei chupe reta.