San Lucas 24 - Biblia

Jesús ikowe ye ou umanokue wae reta ipɨte wi

¹ Jayawe domingo ara ndimboweasɨ kuña reta opa yuraa ye teöwerenda kotɨ. Jare wɨraa reta wi jokua mbaembae utimbo kawi wae uyapɨkatu reta wae.

² Jare yuraa uwäe reta yawe teöwerenda pe, uecha reta ita tuicha wae uyembɨsɨrɨ ma oï teöwerenda jöke wi.

³ Jayawe uike reta japɨpe, erëi uwäe’ä chupe reta yandeYa Jesús jetekue.

⁴ Jáeramo uikuaa’ä mbae jei reta waerä. Jare aramoiño uyekuaa mokui kuimbae jemimonde uwerasɨ wae reta uyemboɨ ñonoï jae reta iyɨpɨ pe.

⁵ Jáeramo kuña reta opa ukɨye jare iñäkatindɨ rewe umae reta ɨwɨ re. Jayawe jokua kuimbae reta jei kuña reta pe: “¿Maera pa peka peï tekowe onoi wae umanokue wae reta ipɨte pe?

⁶ Jae mbaetɨ ma kua pe oï. Ikowe ye ma ko,” jei chupe reta. “Pemandúa jae jei pewe wae re jae iko yawe pe reta ndiwe Galilea pe.

⁷ Echa’ä jae jei pewe: ‘Che kuimbaerä ayeyapo wae, imeta ko chemee reta jeko kachi wae reta ipo pe. Jare jae reta chekututa kurusu re cheyuka waerä. Erëi joko wi mbapɨ ara pe aikowe yeta ayu aï umanokue wae reta ipɨte wi.’ Jukuärái Jesús jei pewe,” jei chupe reta.

⁸ Jayawe kuña reta imandúa Jesús jei chupe reta wae re.

⁹ Jayawe yuraa ye reta teöwerenda wi imiäri waerä Jesús once jemimboe tenondewaete reta pe jare ïru wae reta pe opaete kua mbaembae uyeyapo wae re.

¹⁰ Jokua kuña reta ko jae María Magdalena, Juana, Jacobo ichɨ María jee wae, jare ïru kuña reta jae reta ndiwe yuraa wae. Erëi kuña reta imiäri yawe Jesús jemimboe tenondewaete reta pe,

¹¹ jae reta wɨrowia’ä. Echa’ä jae reta imaerä imiäri pochɨño wae echa chupe reta.

¹² Erëitu jesewe Pedro uyandu yawe, upüa oë oo, jare osi etei oo teöwerenda kotɨ. Jare joko pe oo uwäe yawe, umae japɨpe kotɨ. Jare uecha tarapo uyeyokua pɨpe wae retaño joko pe oï. Jayawe joko wi oo ye ipɨakañɨ rewe.

Jesús uyekuaaka mokui jemimboe reta pe

¹³ Jare jokua ara etei mokui Jesús jemimboe reta yuraa yureko Jerusalén wi tëta wasu raɨ Emaús jee wae kotɨ. Kua tëta wasu raɨ oï once kilometro rupi Jerusalén wi.

^14-15 Jayawe jae reta uyemɨngeta yuraa yureko rambuewe opaete mbaembae uasa wae rewa. Jare aramoiño Jesús etei oya oo jese reta jare umbɨpɨ uwata oo jae reta ndiwe.

¹⁶ Erëi jae reta uikuaa’ä jae ko Jesús wae, echa’ä Jesús umaeño’ä jese reta uikuaa waerä.

¹⁷ Jayawe Jesús upɨrandu chupe reta: “¿Mbae re pa piyemɨngeta peï pewata rambuewe? ¿Maera pa pepɨatɨtɨ peï?” jei chupe reta.

¹⁸ Jayawe pëti wae jae reta Cleofas jee wae jei Jesús pe: “¿Ndikuaa’ä yerá kua ara rupi mbaembae uasa Jerusalén pe wae? Opaete opou wae reta wi, ndeeño chawaa ndikuaa’ä kua mbaembae uasa wae,” jei chupe.

¹⁹ “¿Mbae pa uasa?” jei Jesús chupe reta. “Jokua Jesús Nazaret pewa pe mbae uyeyapo wae re,” jei reta. “Echa’ä Tumpa ombou jae iñee umɨmbeu waerä. Jare jae uyapo imbaepuere rewe jeta mbaembae ikawi wae, jare ikawi oporomboe wi. Tumpa umae kawi jese, jare jae nunga wi opaete wae reta umae kawi jese,” jei reta.

²⁰ “Erëi sacerdote itenondewa reta jare yanemburuwicha reta umee romano reta pe uyukaka reta waerä kurusu re,” jei reta.

²¹ “Erëi ore ndorowia tëi nduiko jae yanderepɨta iko opaete yande Israel iñemoñaa yaiko wae reta. Jare añawe jae ko mbapɨ ara ma uasa oï kua mbae uyeyapo wae,” jei reta.

^22-23 “Jare jokuaño’ä ko. Iyei ndimbowe amokue kuña reta orepɨte pe yureko wae yuraa teöwerenda pe. Jare jae reta yuweru ye yawe, jei reta orewe mbaetɨ ndaye Jesús jetekue joko pe oï,” jei reta. “Jare imiäri reta orewe wi jae reta ndaye uecha araɨwa reta joko pe ñonoï. Jare jokua araɨwa reta ndaye jei chupe reta Jesús ikowe ye ma ou umanokue wae reta ipɨte wi,” jei reta. “Jare jokua jae reta imiäri orewe wae orembɨpɨakañɨete.

²⁴ Jayawe amokue wae orepɨte wi yuraa wi teöwerenda pe. Jare jae reta uecha opaete kërái kuña reta imiäri orewe wae rami etei. Uecha’ä reta Jesús,” jei reta Jesús pe.

²⁵ Jayawe Jesús jei chupe reta: “Pearakuaa mbae echa ko pe reta. ¿Pepuere’ä mbate pa pikuaa? Echa’ä arakaete ma Tumpa iñee umɨmbeu wae reta uikuatía kua mbaembae uasata iko wae. ¿Këraita pa ndeiño perowia jese?” jei chupe reta.

²⁶ “¿Uyekuatia’ä yerá oï kërái Cristo yae chupe wae tenonde imeta ko uiporara rani? Jare uiporara ma yawe, yandeRu Tumpa etei umbutuichata oï ara pe,” jei chupe reta.

²⁷ Jayawe Jesús umbɨpɨ umɨesäka chupe reta kërái ko uyekuatía oï jesewa Tumpa iñeerɨru pe. Jae umbɨpɨ Moisés uikuatía wiwe, jare joko wi arakae Tumpa iñee umɨmbeu wae reta uikuatía wae rupi umɨesäka wɨraa wɨraa chupe reta.

²⁸ Jayawe yuraa seri ma uwäe reta yawe tëta wasu raɨ pe, Jesús uasaraanga oo iko chuwi reta.

²⁹ Jayawe jae reta jei chupe: “Epɨta mii ore ndiwe. Echa’ä kaaruete ma oï ndewe. Jare warasɨ uiketa ma oo oï,” jei reta. Jayawe Jesús uike tëta pe upɨta waerä jae reta ndiwe.

³⁰ Jayawe jae reta uwapɨ mesa pe ukaru waerä. Joko wi Jesús uipɨsɨ mbɨyape, jare umee yasurupái Tumpa pe jese, jare upɨsäa umee chupe reta.

³¹ Jayawe ramo jae reta iyarakuaa uyepea jare uikuaa reta jae yepe Jesús. Erëi jupiwoiño Jesús ukañɨ chuwi reta.

³² Jayawe jei reta iyupe: “Jáeramo yepe yayerowiaete yaiko jae tape rupi umɨesäka yandewe yawe Tumpa iñee,” jei reta.

³³ Jayawe jupiwoiño jae reta upüa mesa wi, jare yuraa ye Jerusalén pe kiape Jesús once jemimboe tenondewaete reta ñonoï wae pe. Jare uwäe reta yawe joko pe, uyembatɨ ñonoï Jesús jemimboe tenondewaete reta ïru wae reta ndiwe.

³⁴ Jayawe jae reta jei jokua mokui wae pe: “Añetete yepe yandeYa ikowe ye ma ou umanokue wae reta ipɨte wi, jare uyekuaa Simón pe,” jei reta.

³⁵ Jayawe jokua mokui wae reta umbɨpɨ umɨmbeu chupe reta mbae uasa chupe reta tape rupi wae, jare kërái Jesús uyekuaaka chupe reta mbɨyape upɨsäa yawe.

Jesús uyekuaa jemimboe reta pe

³⁶ Jare uyemɨngeta yureko rambuewe, aramoiño Jesús etei uyekuaa jae reta ipɨte pe uyemboɨ oï. Jare jei chupe reta: “Pepɨakatu, cherɨwɨ reta,” jei.

³⁷ Erëi jae reta ukɨyete. Wɨrowia reta tëi uecha ñonoï pëti umanokue wae iä.

³⁸ Jayawe Jesús jei chupe reta: “¿Maera pa pekɨye? ¿Maera pa yawái pewe perowia waerä che aikowe ye wae?” jei.

³⁹ “Pemae chepo re jare chepɨ re. Che ko. Pepuere pipɨsɨ pikuaa waerä. Echa’ä pëti umanokue wae iä mbaetɨ onoi soo jare maekäwe kërái pe reta cherecha che anoi wae rami,” jei chupe reta.

⁴⁰ Jare kua jei ma yawe, Jesús uechaka chupe reta ipo jare ipɨ.

⁴¹ Jayawe jae reta ipɨakañɨ. Erëi tuicha rupi uyerowia ramo, ndei ipuere wɨrowia kawi reta. Jayawe Jesús upɨrandu chupe reta: “¿Ime pa kua pe penoi mbae jau waerä?” jei chupe reta.

⁴² Jayawe jae reta ueru chupe pira peraso oyɨkue jare ei iɨraitɨ rewe wae.

⁴³ Jare Jesús uipɨsɨ jare jou jae reta jowake.

⁴⁴ Joko wi jei chupe reta: “Pemandúa kawi peï, che aiko yawe pe reta ndiwe, che amɨmbeu pewe kua mbaembae uyeyapota iko chewe wae,” jei. “Che jae pewe imeta ko uyeyapo chewe opaete Moisés arakae uikuatía cheré wae, jare jae nunga wi jokua ïru kuimbae reta Tumpa iñee arakae umɨmbeu wae uikuatía cheré wae, jare salmo reta pe wi,” jei chupe reta.

⁴⁵ Jayawe Jesús uipea chuwi reta iyarakuaa jae reta uikuaa kawi waerä Tumpa iñee uyekuatía oï wae.

⁴⁶ Jei chupe reta: “Uyekuatía oï kërái Cristo pere chupe wae imeta ko uiporara jare umano, jare joko wi ikowe ye ou mbapɨ ara pe,” jei chupe reta.

⁴⁷ “Jare uyekuatía oï wi kërái ñee uyemɨmbeuta oï opaete rupi ueya reta waerä ipɨayemɨngeta jupi mbae wae Tumpa rewa jare wɨrowia kawi reta waerä jese. Jare uyemɨmbeuta oï wi kërái ipuere uyembái waerä chuwi reta mbaembae uyawɨ Tumpa kotɨ wae,” jei. “Kua mbaembae uyemɨmbeuta oï cheree re, jare uyemɨmbeuta rani Jerusalén pe jare joko wi opaete ɨwɨ rupi,” jei Jesús chupe reta.

⁴⁸ “Pe reta pecha opaete kua mbaembae uyeyapo chewe wae. Jare añawe pemɨmbeuta opaete wae pe kua pecha wae.

⁴⁹ Erëi imeta mbae rani uyeyapo pewe,” jei chupe reta. “Mase, che ambouta aï pewe Espíritu Santo cheRu jei umeeta oï pewe wae. Jae outa ara wi pemɨmbaepuere waerä. Erëi pepɨtata ko kua tëta wasu Jerusalén pe jokua mbaepuere penoi rewa.” Jukuärái Jesús jei jemimboe reta pe.

Jesús oo ye ara pe

⁵⁰ Jayawe Jesús wɨraa jemimboe reta Betania kotɨ. Jare yuraa uwäe reta joko pe yawe, Jesús upi ipo ara kotɨ jare jei: “CheRu, jekuaeño iyapo mii ikawi wae kua reta pe,” jei.

⁵¹ Jare jukuärái uyapo iko rambuewe, Jesús uyereraa chuwi reta ara kotɨ.

⁵² Jayawe jemimboe reta umbutuicha Jesús jee. Jare joko wi opa ye yuraa reta Jerusalén pe tuicha uyerowia rewe.

⁵³ Jare jekuaeño yuraa reta tupao wasu pe umbutuicha reta waerä Tumpa jee. Jaeño ma.