San Juan 6 - Biblia

Jesús umɨngaru jeta wae reta Tumpa imbaepuere rupi

¹ Kua jaɨkue rupi Jesús jare jemimboe reta ndiwe yuraa uwäe reta ɨpa wasu Galilea jowaicho pe. Jokua ɨpa wasu jee wi Tiberias.

² Jare jeta wae reta yuraa jaɨkue, echa’ä uecha reta kërái Jesús umɨnguera imbaerasɨ wae reta imbaepuere rupiño. Jukuärái Jesús uyapo uechaka waerä chupe reta Tumpa wi ou wae ko jae.

³ Jare yuraa ma uwäe reta yawe, uyupi reta pëti ɨwɨtu re jare Jesús uwapɨ joko pe jemimboe reta ndiwe.

⁴ Jokua ara reta rupi koiño ma ou judío reta uyemɨmandúa waerä pascua ara reta re.

⁵ Jare Jesús uecha jeta wae reta yuweru ñonoï ikotɨ. Jayawe upɨrandu jemimboe Felipe pe: “¿Kiawi pa yawata tembiu yamɨngaru waerä kua jeta wae reta?” jei chupe.

⁶ Erëi añetete Jesús uikuaa ma iko mbae uyapota oï wae. Jaeño upɨrandu Felipe pe uikuaa waerä Felipe wɨrowiata ra oï jese.

⁷ Jayawe Felipe jei chupe: “Kua jepɨete oïta yandewe. Mokui chiëto ara mbarawɨkɨ jepɨ pewa awe ndarau uepitɨ chupe reta jou waerä michi yepe,” jei chupe.

⁸ Jare pëti Jesús jemimboe Andrés jee wae – jae ko Simón Pedro tɨwɨ – jei Jesús pe:

⁹ “Ime kua pe oï pëti kunumi ime onoi pandepo mbɨyape cebada pewa jare mokui pira chariki mii. Erëi jokua ndarau etei uepitɨ kua jeta wae reta pewarä,” jei chupe.

¹⁰ Jayawe Jesús jei jemimboe reta pe: “Pemɨmbeu chupe reta uwapɨ reta waerä,” jei. Jayawe opa uwapɨ reta, echa’ä ime iko jeta kapiichape jokoropi. Jare kuimbae retaño uyepapa pandepo miri rupi.

¹¹ Jayawe Jesús uipɨsɨ jokua mbɨyape jare umee yasurupái Tumpa pe jese. Joko wi jae umee jemimboe reta pe, jemimboe reta umee yuapɨ ye waerä uwapɨ ñonoï wae reta pe. Jae nunga wi pira chariki mii uyapo kërái mbɨyape uyapo rami. Jare opaete wae reta ukaru jare opa ipunga reta. Jukuärái Jesús umbɨjeta mbɨyape jare pira umɨngaru waerä jokua jeta wae reta.

¹² Jare opa ma ipunga reta yawe, jeta mbɨyape uñepɨsäakue jembɨre. Jayawe Jesús jei jemimboe reta pe: “Pembatɨ mbɨyape uñepɨsäakue jembɨre wae awɨye waerä uyemombo,” jei chupe reta.

¹³ Jare jokua pandepo mbɨyape wae wi jembɨrekue, jae reta umbatɨ jare umɨtɨnee doce kanasta.

¹⁴ Jukuärái Jesús uyapo mbae kiawe ipuere’ä uyapo wae uechaka waerä chupe reta Tumpa wi ou wae ko jae. Jare joko pe ñonoï wae reta kua uecha yawe, jei reta iyupe: “Kua kuimbae yepe jae Tumpa iñee umɨmbeu wae Moisés arakae jei Tumpa ombouta iko wae,” jei reta.

¹⁵ Jare Jesús uikuaa chuwi reta jae reta uipota wɨraa uyapo waerä imburuwicha wasurä jae uipota’ä rewe. Jáeramo oo chuwi reta ɨwɨtu wasu kotɨ jaeño pe etei.

Jesús uwata ɨ iáramo rupi

¹⁶ Jare pɨ̈tu awe ma yawe, Jesús jemimboe reta uweyɨ yuraa ɨpa wasu pe.

¹⁷ Jare joko pe uyupi reta chalana pe jare umbɨpɨ yuraa reta Capernaum kotɨ. Pɨ̈tumimbi ma iko, erëi Jesús ndeiño ou ye umɨïru reta.

¹⁸ Jare täta ɨwɨtu uyeyapo chupe reta jare ɨ umbɨpɨ uyembɨaparoaroa.

¹⁹ Jare pandepo kilometro rupi ma uwata reta yawe, aramoiño uecha reta Jesús uwata ou oï ɨ iáramo rupi jare oya katu ou oï chalana kotɨ. Jayawe jemimboe reta ukɨyete ye.

²⁰ Erëi Jesús jei chupe reta: “Che ko. Awɨye pekɨye,” jei chupe reta.

²¹ Jayawe uyerowia rewe jae reta umbuyupi Jesús chalana pe. Jare jupiwoiño yuraa uwäe reta jokua ɨwɨ kiape jae reta yuraa ñonoï wae pe.

Jokua ukaru wae reta ueka Jesús

²² Pɨarewe pe jeta wae reta imeño upɨta ɨpa wasu jowaicho pe. Jare jae reta jei iyupe: “¿Mbae pɨpe ra Jesús oo? ¿Kërái ra oo yandewi?” jei reta. Jukuärái jei reta, echa’ä ïruwe ara pe uecha reta pëtiño chalana joko pe oï, jare uikuaa reta Jesús jemimboe reta opa ma oë yuraa pɨpe. Erëi Jesús mbaetɨ oo jae reta ndiwe.

²³ Jayawe yuweru uwäe ïru chalana reta tëta wasu Tiberias wi joko pe. Joko wi mbɨrɨ'ä iko ïruwe ara pe ukaru reta wae – jae ko kiape jou reta mbɨyape yandeYa umbɨjeta chupe reta wae umee yawe yasurupái Tumpa pe.

²⁴ Jayawe opaete wae uikuaa reta yawe Jesús jare jemimboe reta mbaetɨ yepe joko pe ñonoï, jayawe uyupi reta jokua chalana reta pe jare opa yuraa reta Capernaum kotɨ ueka reta waerä Jesús.

Jesús ko jae mbɨyape tekowe opa mbae wae umee wae rami

²⁵ Jare yuraa ma ɨpa wasu jowaicho pe uwäe reta yawe, owäiti reta Jesús. Jare jei reta chupe: “Oporomboe wae, ¿kërái yawe pa ndeyu kua pe?” jei reta chupe.

²⁶ Jayawe Jesús jei chupe reta: “Che tae pewe añetete wae, che ayapo ma pewe mbaembae kiawe ipuere’ä uyapo wae pe reta pikuaa waerä tëi añetete kía ko che wae. Erëi jokua jeko pewa’ä ko pe reta chereka peï. Pe reta chereka peï jokua mbɨyape pemɨngapɨɨ wae ramoño,” jei.

²⁷ “Erëi awɨye peparawɨkɨ perembiurä ɨmata’ä iko pewe wae reño. Peparawɨkɨta ko perembiurä opata mbae wae re – jokua ko jae tekowe opa mbae wae che kuimbaerä ayeyapo wae chepuere amee pewe wae. Jare jukuärái chepuere ayapo, echa’ä cheRu Tumpa umee ma chewe mbaepuere jokua ayapo waerä,” jei chupe reta.

²⁸ Jayawe upɨrandu reta Jesús pe: “¿Këraita pa mbarawɨkɨ Tumpa uipota ore nduyapo waerä tekowe opa mbae wae nonoi waerä?” jei reta.

²⁹ Jayawe Jesús jei chupe reta: “Perowia Tumpa ombou wae re – jae ko che. Kua ko jae mbarawɨkɨ Tumpa uipota piyapo waerä wae,” jei chupe reta.

^30-31 Jare jei reta Jesús pe: “¿Mbae pa ndiyapota orewe nduecha waerä jare ndorowia waerä nderé? Nduipota ndiyapo waerä orewe mbae tuicha wae mbaetɨ kiawe ipuere uyapo wae,” jei reta. “Arakaete Moisés umee yanderamɨkue reta pe maná jou reta waerä ɨwɨtini wasu rupi yureko reta rambuewe. Jukuärái ko jei Tumpa iñeerɨru pe, echa’ä joko pe uyekuatía oï kuärái: ‘Jae umee chupe reta mbɨyape ara pewa jou reta waerä,’ jei. Erëi nde, ¿mbae pa ndiyapota orewe ndorowia waerä nderé?” jei reta chupe.

³² Jayawe Jesús jei chupe reta: “Che tae pewe añetete wae, Moisés jae’ä ko umee chupe reta mbɨyape ara pewa. CheRu ko umee chupe reta. Jare añawe cheRu uipota umee oï pewe mbɨyape añetete wae ara pewa.

³³ Jare mbɨyape Tumpa añawe umee wae jae ko kua ou ara wi wae. Jae ko umee tekowe opa mbae wae ɨwɨ pewa reta pe,” jei chupe reta umbɨjaanga rewe.

³⁴ “Orerɨkeɨ,” jei reta, “jekuaeño emee mii orewe jokua nunga mbɨyape,” jei reta.

³⁵ Jayawe Jesús jei chupe reta: “Che etei ko jae jokua mbɨyape tekowe opa mbae wae umee wae,” jei. “Ipotawe kía ou chekotɨ cheré wɨrowia rewe wae ndarau etei iyembaɨ jare ndarau etei iɨwe wi,” jei umbɨjaanga rewe.

³⁶ “Erëi pe reta ndarau piyekou jokua re, echa’ä yepe tëi pe reta cherecha peï, erëi perowia’ä cheré. Jukuärái che jae ma pewe.

³⁷ Erëitu opaete kía kía cheRu umee chewe wae reta yuweruta chekotɨ. Jare ipotawe kía chekotɨ ou wae ndaraúi amombo.

³⁸ Echa’ä jokua ko jae cheRu uipota wae. Jare jae chembou ara wi ayapo waerä jae jei wae. Ayu’ä ko ayapo waerä che jae waeño,” jei chupe reta.

³⁹ “Jare cheRu uipota wae ko jae kua: Jae uipota che ayandareko kawi waerä jae umee chewe wae reta re. Ndarau pëti awe ukañɨ chewi. Jare cheRu uipota ambɨjekowe ye reta waerä umanokue wae reta ipɨte wi ara taɨkuewa pe,” jei.

⁴⁰ “Jayawe opaete cheré wɨrowia wae reta onoita tekowe opa mbae wae. Jare jae reta che ambɨjekowe yeta aï kuri umanokue wae reta ipɨte wi ara taɨkuewa pe. Jokua ko jae cheRu uipota wae,” jei Jesús chupe reta.

⁴¹ Jayawe judío itenondewa reta umbɨpɨ uyemɨngetangeta wɨari Jesús kotɨ. Echa’ä chupe reta pewarä ikawi’ä Jesús jei yawe: “Che ko jae mbɨyape ara wi ayu wae.”

⁴² Jei reta iyupe: “¿Jae’ä yerá kua Jesús José taɨ? Echa’ä yaikuaa katu ko tu jare ichɨ wi. Jayawe, ¿kërái yerá añawe jae jei oï, ‘Che ayu ko ara wi’?” jei reta iyupe.

⁴³ Jayawe Jesús jei chupe reta: “Peya jokua piyemɨngeta peï wae,” jei.

⁴⁴ “CheRu ko chembou. Jare ipuere’ä kía ou chekotɨ cheRu umɨkɨrëɨ'ä yawe ou chekotɨ waerä. Jare jokua chekotɨ ou wae reta ambɨjekowe yeta aï kuri ara taɨkuewa pe,” jei chupe reta.

⁴⁵ “Pëti kuimbae Tumpa iñee arakae umɨmbeu wae uikuatía cheré wɨrowiata wae reta re kuärái: ‘Tumpa etei omboeta oï opaete jae reta.’ Jukuärái uyekuatía oï,” jei. “Jayawe opaete kía kía uyapɨsaka jare uyemboe cheRu re wae reta yuweruta chekotɨ,” jei chupe reta.

⁴⁶ “Kiawe uecha’ä etei cheRu. Jaeño che aecha, echa’ä chuwi ko ayu.

⁴⁷ Erëi yepe tëi kiawe uecha’ä etei cheRu, erëitu che tae pewe añetete wae, ipotawe kía wɨrowia cheré wae ime onoi tekowe opa mbae wae.

⁴⁸ Che ko jae mbɨyape tekowe opa mbae wae amee wae,” jei Jesús chupe reta.

⁴⁹ “Pe reta pikuaa kawi peï peramɨkue reta jou maná jokua ɨwɨtini wasu rupi yureko reta yawe. Erëitu umanoñoi reta.

⁵⁰ Erëi kua mbɨyape ara wi ou wae ikawiete ye ko. Echa’ä kía jou kua mbɨyape wae, ikota jaeño mái pewa,” jei.

⁵¹ “Jare che etei ko jae jokua mbɨyape ara wi ayu wae tekowe opa mbae wae amee wae. Jare ipotawe kía kua mbɨyape jou wae onoita tekowe opa mbae wae,” jei umbɨjaanga rewe. “Cherete etei ko jae jokua mbɨyape. Jare che ameeta aï cherete opaete ɨwɨ pewa reta re opaete onoi waerä tëi tekowe ipɨau wae,” jei Jesús chupe reta.

⁵² Jayawe judío reta umbɨpɨ täta rupi uyeaka jae yepái Jesús jei wae re. “¿Këraita pa kua kuimbae umee yandewe jete yau waerä?” jei reta iyupe.

⁵³ Jayawe Jesús jei chupe reta umbɨjaanga rewe: “Che tae pewe añetete wae, che kuimbaerä ayeyapo wae, pe reta peu’ä yawe cherete jare cheruwɨ, ndarau penoi tekowe añetete pewa,” jei chupe reta.

^54-56 “Erëi ipotawe kía cherete jare cheruwɨ jou wae, jekuaeño che ndiwe oï, jare che ndarau etei asɨrɨ chuwi. Jokua nunga ime onoi tekowe opa mbae wae, jare che ambɨjekowe yeta aï kuri ara taɨkuewa pe. Jukuärái ko, echa’ä cherete jare cheruwɨ jae ko mbae yau wae jare añetete pewa,” jei chupe reta umbɨjaanga rewe.

⁵⁷ “CheRu ikoño mái wae chembou, jare che aiko jae imbaepuere rupi. Jae ramiño wi jokua cherete jou wae ikota che chembaepuere rupi,” jei chupe reta umbɨjaanga rewe.

⁵⁸ “Jayawe jukuärái ko kua mbɨyape ara wi ou wae. Kua mbɨyape jae’ä ko jokua peramɨkue reta jou wae rami. Echa’ä yepe tëi jokua mbɨyape jae reta jou wae omborɨ reta michi pewa, erëi jaɨkue rupi opañoi umano reta. Jare jokua mbɨyape ipuere’ä umee chupe reta tekowe opa mbae wae. Erëi jukuärai’ä ko kua mbɨyape che amee wae. Echa’ä ipotawe kía kua mbɨyape jou wae onoita tekowe opa mbae wae,” jei Jesús chupe reta.

⁵⁹ Jukuärái oporomboe Jesús tupao pe tëta wasu Capernaum pe.

Jeta uyapɨsaka iko jese wae reta ueya Jesús

⁶⁰ Kua uyandu reta yawe, jeta Jesús ndiwe uwata wae reta jei iyupe: “Kua jae jei wae yawaiete ko. ¿Kía ra jayawe ipuereta wɨrowia jese?” jei reta.

⁶¹ Jesús uikuaa chuwi uyemɨngeta reta iko jese wae. Jayawe jei chupe reta: “¿Jayawe kua che jae pewe wae kachi pa oï pewe?” jei.

⁶² “Jukuärái yawe, ¿këraita ra peï kuri jayawe che kuimbaerä ayeyapo wae cherecha ayupi ye a aï ara pe tenonde aiko wae pe? Che aikuaa aï pe reta pipota’ä jokua nunga Upuruepɨ wae,” jei chupe reta.

⁶³ “Jare jokua ara che a ye yawe, ¿këraita pa penoi tekowe opa mbae wae pe retaiño? Ndarau pepuere, echa’ä jaeño Tumpa iEspíritu umee kua nunga tekowe. Jare kua chiñee mii reta ou ko Espíritu Santo wi jare ueru tekowe opa mbae wae.

⁶⁴ Erëitu amokue pe reta perowia’ä cheré,” jei. Jukuärái Jesús jei chupe reta, echa’ä jae uikuaa iyɨpɨ wiwe kía nunga reta wɨrowiata’ä iko jese wae jare kía nunga umeeta iko jowaicho reta pe wae.

⁶⁵ Joko wi jei chupe reta: “Amokue pe reta perowia’ä cheré, jare jokua jeko pewa che jae ma pewe ipuere’ä kía ou chekotɨ cheRu mbaetɨ yawe umɨkɨrëɨ,” jei Jesús chupe reta.

⁶⁶ Joko wiwe jeta Jesús ndiwe uwata wae reta opa uñatima yewɨ jare uipota’ä ye ma uwata reta jae ndiwe.

⁶⁷ Jayawe Jesús upɨrandu jokua doce jemimboe reta pe: “¿Jare pe reta pipota wi peo ye chewi?” jei chupe reta.

⁶⁸ Jare Simón Pedro jei chupe: “¿OreYa, ¿kía re pa ndoota nduyemboya?” jei. “Ndeeño ko nemɨmbeu kawi orewe tekowe opa mbae wae kërái nonoi waerä.

⁶⁹ Jare wi ore ndorowia ko nderé jare nduikuaa ndeeño ko jae Tumpa Taɨ jupiete wae,” jei Pedro Jesús pe.

⁷⁰ Jayawe Jesús jei chupe reta: “Che etei ko puparawo pe doce wae reta. Erëitu ime pëti pepɨte pe aña pe uyeyokui oï wae,” jei.

⁷¹ Jukuärái Jesús uyemɨngeta Simón Iscariote taɨ Judas jee wae re. Jae ko jokua doce wae reta wi pëti. Jare taɨkue rupi kua kuimbae umeeta wɨreko Jesús jowaicho reta pe.