San Juan 21 - Biblia

Jesús uyekuaa ye amokue jemimboe reta pe

¹ Kua jaɨkue rupi Jesús uyekuaa ye jemimboe reta pe ɨpa wasu Tiberias jee wae jembeɨ pe. Kua uyeyapo kuärái:

² Joko pe ñonoï Simón Pedro, jare Tomás (jae ko Chowakiri pe umbɨjee reta wae), jare Natanael tëta wasu raɨ Caná pewa ɨwɨ Galilea pe oï wae. Jare joko pe ñonoï wi Zebedeo taɨ reta jare mokui ye Jesús jemimboe reta wi.

³ Jayawe Simón Pedro jei ïru wae reta pe: “Ata ayepɨraka,” jei. Jare ïru reta jei chupe: “Ore ndoota wi nde ndiwe,” jei reta. Jayawe opa yuraa uyupi reta chalana pe. Erëi jokua pɨ̈tu uipɨsɨ'ä reta mbae awe.

⁴ Jare köe ma oo oï yawe, uecha reta kía uyemboɨ oï ɨpa wasu jembeɨ pe. Jae ko Jesús, erëi jae reta uikuaa’ä.

⁵ Jare Jesús usapɨkai chupe reta: “Cherɨwɨ reta, ¿mbaetɨ etei pa penoi pira?” jei chupe reta. “Mbaetɨ nonoi pëti awe,” jei reta chupe.

⁶ Jayawe Jesús jei chupe reta: “Pemombo pepɨsa chalana iyakata kotɨ jare pipɨsɨta pira reta,” jei chupe reta. Jayawe jukuärái uyapo reta jare uipɨsɨ reta jetaete ye pira. Jáeramo pɨsa poɨete ramo, ipuere’ä upi reta pɨsa chalana pe.

⁷ Jayawe jokua jemimboe Jesús uauete wae jei Pedro pe: “¡Mase, jae yepe yandeYa!” jei chupe. Jare Simón Pedro uyandu yawe, jawoi pewa uyemonde, echa’ä omboi yepe amokue jemimonde uparawɨkɨ kawi waerä. Jare uyemonde ma yawe, upɨrɨrɨkɨ ɨ pe jare uɨtai oo Jesús kotɨ.

⁸ Jare ïru reta yuweru chalana pe umɨata ueru pɨsa tɨnee oï pira pɨpe rewe. Echa’ä mbɨrɨ'ä ñonoï ɨpa wasu jembeɨ wi. Oï pëti chiëto metro rupi.

⁹ Jare yuweru ma uwäe reta yawe ɨ jembeɨ pe, uecha reta tata tatäpɨ rewe joko pe. Uecha reta wi pira tatäpɨ iáramo jare mbɨyape wi.

¹⁰ Jare Jesús jei chupe reta: “Peru mbowɨ pira pipɨsɨ wae,” jei chupe reta.

¹¹ Jayawe Simón Pedro oo uyupi ye chalana pe jare umɨata pɨsa ɨpa wasu jembeɨ kotɨ. Jokua pɨsa tɨnee oï pira tuichakue pɨpe – 153 rupi. Erëi yepe tëi jetaete ye oï, jesewe omondoro’ä pɨsa.

¹² Joko wi Jesús jei chupe reta: “Peyu pekaru,” jei. Erëi pëti awe jemimboe reta upɨrandu’ä chupe kía ra ko jae wae, echa’ä uikuaa reta jae ko yandeYa wae.

¹³ Jayawe Jesús oo upi mbɨyape jare umee chupe reta pira oyɨkue ndiwe.

¹⁴ Kua re mbapɨ wese ma Jesús uyekuaa jemimboe reta pe ikowe ye ou wiwe umanokue wae reta ipɨte wi.

Jesús oyokui Pedro

¹⁵ Jare opa ma ukaru reta yawe, Jesús jei Simón Pedro pe: “Simón, Jonás taɨ, ¿cherauete pa kua reta wi?” jei chupe. “Nduau, cheYa,” jei chupe. “Nde ndikuaa kawi che nduau ko.” Jayawe Jesús jei chupe: “Emɨngaru cheowecha raɨ mii reta,” jei chupe.

¹⁶ Jare jei ye chupe: “Simón, Jonás taɨ, ¿cherau pa?” Jare Pedro jei ye chupe: “Nduau, cheYa. Nde ndikuaa kawi che nduau ko,” jei chupe. Jayawe Jesús jei chupe: “Iyandareko cheowecha mii reta re.”

¹⁷ Jare jei ye chupe mbapɨ wese ma: “Simón, Jonás taɨ, ¿cherau pa?” Añawe Pedro ipɨatɨtɨ, echa’ä mbapɨ wese ma Jesús upɨrandu chupe uau ra wae. Jayawe jei ye Jesús pe: “CheYa, nde ndikuaa opaete. Nde ndikuaa kawi che nduau ko,” jei chupe. Jare Jesús jei ye chupe: “Emɨngaru cheowecha mii reta,” jei chupe.

¹⁸ “Che tae ndewe añetete wae, ndetaurusu yawe, ndiyembɨkuaase jare ndewatase ndipota ndeo wae rupi. Erëi nendechi ma yawe, ndeupita ndepo, jare neapɨ̈tita reta jare ndereraata reta kiape ndipota’ä tëi ndeo wae pe ndeyuka reta waerä,” jei chupe.

¹⁹ Kua jei Jesús umɨmbeu waerä Pedro pe kërái umanota iko wae jare kërái Tumpa jee uyembutuichakata iko Pedro imano rupi. Jayawe Jesús jei wi chupe: “Eyu che ndiwe.”

²⁰ Jare Pedro uyerowa umae jare uecha ou oï jaɨkue jokua jemimboe Jesús uauete wae. Jae ko jokua kuimbae tenonde yawe ukaru yureko yawe, ukaru iko Jesús iyɨpɨ pe jare jei, “CheYa, ¿kía etei pa ko jae nemeeta oï wae?” jei chupe wae.

²¹ Jayawe Pedro upɨrandu jesewa Jesús pe: “CheYa, ¿mbae pa uyeyapota oï chupe?” jei.

²² Jare Jesús jei chupe: “Aramoi che aipota yawe, jae jekuaeñota oï che ayu ye rewa. Erëi jokua mbae’ä ko nemaerä. Emaeño jese. Erëi nde, eyu che ndiwe,” jei chupe.

²³ Taɨkue rupi kua Jesús jei wae jeräkua opaete Cristo re wɨrowia wae reta pe. Jáeramo jeta jae reta wɨrowia tëi jokua kuimbae ndarau umano. Erëi Jesús jei’ä ndarau umano. Jaeño jei: “Aramoi che aipota yawe, jae jekuaeñota oï che ayu ye rewa. Erëi jokua mbae’ä ko nemaerä,” jei.

²⁴ Che ko jae jokua kuimbae. Jare che chemiäri ma jare aikuatía ma kua mbaembae. Jare kua amɨmbeu wae ore nduikuaa añetete ko.

²⁵ Jare ime ye jeta mbaembae Jesús uyapo wae. Opaete jokua mbaembae rewa uyekuatía oï yawe pëti pëti rupi, ndarau uepitɨ opaete tupapire jendarä kua ɨwɨ pe. Jaeño ma.